Narayana Kavacham
Narayana Kavacham
Narayana Kavacham
nArAyaNa kavacham
shloka 1
nyAsaH
a~NganyAsaH
OM OM pAdayoH namaH |
OM naM jAnunoH namaH |
OM moM UrvoH namaH |
OM nAM udare namaH |
OM rAM hRRidi namaH |
OM yaM urasi namaH |
OM NAM mukhe namaH |
OM yaM shirasi namaH |
karanyAsaH
OM OM dakShiNatarjanyAM namaH |
OM naM dakShiNamadhyamAyAM namaH |
OM moM dakShiNAnAmikAyAM namaH |
OM bhaM dakShiNakaniShThikAyAM namaH |
OM gaM vAmakaniShThikAyAM namaH |
OM vaM vAmAnikAyAM namaH |
OM teM vAmamadhyamAyAM namaH |
OM vAM vAmatarjanyAM namaH |
OM suM dakShiNA~NguShThordhvaparvaNi namaH |
OM deM dakShiNA~NguShThAdhaH parvaNi namaH |
OM vAM vAmA~NguShThordhvaparvaNi namaH |
OM yaM vAmA~NguShThAdhaH parvaNi namaH |
viShNuShaDakSharanyAsaH
OM OM hRRidaye namaH |
OM viM mUrdhnai namaH |
OM ShaM bhrurvormadhye namaH |
OM NaM shikhAyAM namaH |
OM veM netrayoH namaH |
OM naM sarvasandhiShu namaH |
OM maH prAchyAM astrAya phaT |
OM maH AgneyyAM astrAya phaT |
OM maH dakShiNasyAM astrAya phaT |
OM maH naiRRitye astrAya phaT |
OM maH pratIchyAM astrAya phaT |
OM maH vAyavye astrAya phaT |
OM maH udIchyAM astrAya phaT |
OM maH aishAnyAM astrAya phaT |
OM maH UrdhvAyAM astrAya phaT |
OM maH adharAyAM astrAya phaT |
shrI hariH
atha shrInArAyaNakavacha
rAjovAcha
yayA guptaH sahasrAkShaH savAhAn ripusainikAn |
krIDanniva vinirjitya trilokyA bubhuje shriyam || 1 ||
bhagavaMstanmamAkhyAhi varma nArAyaNAtmakam |
yathA.a.atatAyinaH shatrUn yena gupto.ajayanmRRidhe || 2 ||
shrI shuka uvAcha
vRRitaH purohitastvAShTro mahendrAyAnupRRichChate |
nArAyaNAkhyaM varmAha tadihaikamanAH shRRiNu || 3 ||
shrIvishvarUpa uvAcha
dhautANghripANirAchamya sapavitra udaNmukhaH |
kRRitasvA~NgakaranyAso mantrAbhyAM vAgyataH shuchiH || 4 ||
nArAyaNamayaM varma sannahyedbhaya Agate |
daivabhUtAtmakarmabhyo nArAyaNamayaH pumAn || 5 ||
pAdayorjAnunorUrvorudare hRRidyathorasi |
mukhe shirasyAnupUrvyAdo~NkArAdIni vinyaset || 6 ||
OM namo nArAyaNAyeti viparyayamathApi vA |
karanyAsaM tataH kuryAddvAdashAkSharavidyayA || 7 ||
praNavAdiyakArAntamaNgulyaNguShThaparvasu |
nyaseddhRRidaya o~NkAraM vikAramanu mUrdhani || 8 ||
ShakAraM tu bhruvormadhye NakAraM shikhayA nyaset |
vekAraM netrayoryu~njyAnnakAraM sarvasandhiShu || 9 ||
makAramastramuddishya mantramUrtirbhavedbudhaH |
savisargaM phaDantaM tatsarvadikShu vinirdishet || 10 ||
OM viShNave namaH ||
ityAtmAnaM paraM dhyAyeddhyeyaM ShaTChaktibhiryutam |
vidyAtejastapomUrtimimaM mantramudAharet || 11 ||
OM harirvidadhyAnmama sarvarakShAM
nyastA~NghripadmaH patagendra pRRiShThe |
darAricharmAsigadeShuchApa-
-pAshAndadhAno.aShTaguNo.aShTabAhuH || 12 ||
jaleShu mAM rakShatu matsyamUrti-
-ryAdogaNebhyo varuNasya pAshAt |
sthaleShu mAyAvaTuvAmano.avyA-
-ttrivikramaH khe.avatu vishvarUpaH || 13 ||
durgeShvaTavyAjimukhAdiShu prabhuH
pAyAnnRRisiMho.asurayUthapAriH |
vimu~nchato yasya mahATTahAsaM
disho vinedurnyapataMshcha garbhAH || 14 ||
rakShatvasau mAdhvani yaj~nakalpaH
svadaMShTrayonnItadharo varAhaH |
rAmo.adrikUTeShvatha vipravAse
salakShmaNo.avyAdbharatAgrajo.asmAn || 15 ||
mAmugradharmAdakhilAtpramAdA-
-nnArAyaNaH pAtu narashcha hAsAt |
dattastvayogAdatha yoganAthaH
pAyAdguNeshaH kapilaH karmabandhAt || 16 ||
sanatkumAro.avatu kAmadevA-
-ddhayAnano mAM pathi devahelanAt |
devarShivaryaH puruShArchanAntarA-
-tkUrmo harirmAM nirayAdasheShAt || 17 ||
dhanvantarirbhagavAnpAtvapathyA-
-ddvandvAdbhayAdRRiShabho nirjitAtmA |
yaj~nashcha lokAdavatAjjanAntA-
-dbalo gaNAtkrodhavashAdahIndraH || 18 ||
dvaipAyano bhagavAnaprabodhA-
-dbuddhastu pAShaNDagaNAtpramAdAt |
kalkiH kaleH kAlamalAtprapAtu
dharmAvanAyorukRRitAvatAraH || 19 ||
mAM keshavo gadayA prAtaravyA-
-dgovinda Asa~NgavamAttaveNuH |
nArAyaNaH prAhNa udAttashakti-
-rmadhyandine viShNurarIndrapANiH || 20 ||
devo.aparAhNe madhuhogradhanvA
sAyaM tridhAmAvatu mAdhavo mAm |
doShe hRRiShIkesha utArdharAtre
nishItha eko.avatu padmanAbhaH || 21 ||
shrIvatsadhAmA.apararAtra IshaH
pratyuSha Isho.asidharo janArdanaH |
dAmodaro.avyAdanusandhyaM prabhAte
vishveshvaro bhagavAnkAlamUrtiH || 22 ||
chakraM yugAntAnalatigmanemi
bhramatsamantAdbhagavatprayuktam |
dandagdhi dandagdhyarisainyamAshu
kakShaM yathA vAtasakho hutAshaH || 23 ||
gade.ashanisparshanavisphuli~Nge
niShpiNDhi niShpiNDhyajitapriyAsi |
kUShmANDavainAyakayakSharakSho
bhUtagrahAMshchUrNaya chUrNayArIn || 24 ||
tvaM yAtudhAnapramathapretamAtRRi-
-pishAchavipragrahaghoradRRiShTIn |
darendra vidrAvaya kRRiShNapUrito
bhImasvano.arerhRRidayAni kampayan || 25 ||
tvaM tigmadhArAsivarArisainya-
-mIshaprayukto mama Chindhi Chindhi |
chakShUMShi charman shatachandra ChAdaya
dviShAmaghonAM hara pApachakShuShAm || 26 ||
yanno bhayaM grahebhyo.abhUtketubhyo nRRibhya eva cha |
sarIsRRipebhyo daMShTribhyo bhUtebhyo.aghebhya eva cha || 27 ||
sarvANyetAni bhagavannAmarUpAstrakIrtanAt |
prayAntu sa~NkShayaM sadyo ye naH shreyaHpratIpakAH || 28 ||
garuDo bhagavAn stotrastomashChandomayaH prabhuH |
rakShatvasheShakRRichChrebhyo viShvaksenaH svanAmabhiH || 29 ||
sarvApadbhyo harernAmarUpayAnAyudhAni naH |
buddhIndriyamanaHprANAnpAntu pArShadabhUShaNAH || 30 ||
yathA hi bhagavAneva vastutaH sadasachcha yat |
satyenAnena naH sarve yAntu nAshamupadravAH || 31 ||
yathaikAtmyAnubhAvAnAM vikalparahitaH svayam |
bhUShaNAyudhali~NgAkhyA dhatte shaktIH svamAyayA || 32 ||
tenaiva satyamAnena sarvaj~no bhagavAn hariH |
pAtu sarvaiH svarUpairnaH sadA sarvatra sarvagaH || 33 ||
vidikShu dikShUrdhvamadhaH samantA-
-dantarbahirbhagavAnnArasiMhaH |
prahApaya.NllokabhayaM svanena
svatejasA grastasamastatejAH || 34 ||
maghavannidamAkhyAtaM varma nArAyaNAtmakam |
vijeShyasya~njasA yena daMshito.asurayUthapAn || 35 ||
etaddhArayamANastu yaM yaM pashyati chakShuShA |
padA vA saMspRRishetsadyaH sAdhvasAtsa vimuchyate || 36 ||
na kutashchidbhayaM tasya vidyAM dhArayato bhavet |
rAjadasyugrahAdibhyo vyAdhyAdibhyashcha karhichit || 37 ||
imAM vidyAM purA kashchitkaushiko dhArayan dvijaH |
yogadhAraNayA svA~NgaM jahau sa marudhanvani || 38 ||
tasyopari vimAnena gandharvapatirekadA |
yayau chitrarathaH strIbhirvRRito yatra dvijakShayaH || 39 ||
gaganAnnyapatatsadyaH savimAno hyavAkChirAH |
sa vAlakhilyavachanAdasthInyAdAya vismitaH |
prApya prAchyAM sarasvatyAM snAtvA dhAma svamanvagAt || 40 ||
shrI shuka uvAcha
ya idaM shRRiNuyAtkAle yo dhArayati chAdRRitaH |
taM namasyanti bhUtAni muchyate sarvato bhayAt || 41 ||
etAM vidyAmadhigato vishvarUpAchChatakratuH |
trailokyalakShmIM bubhuje vinirjitya mRRidhe.asurAn || 42 ||
iti shrImadbhAgavate mahApurANe ShaShThaskandhe nArAyaNavarmopadesho nAmAShTamo.adhyAyaH |