Narayana Kavacham

nArAyaNa kavacam

zloka 1

nyAsaH

aGganyAsaH

OM OM pAdayoH namaH |

OM naM jAnunoH namaH |

OM moM UrvoH namaH |

OM nAM udare namaH |

OM rAM hRdi namaH |

OM yaM urasi namaH |

OM NAM mukhe namaH |

OM yaM zirasi namaH |

karanyAsaH

OM OM dakSiNatarjanyAM namaH |

OM naM dakSiNamadhyamAyAM namaH |

OM moM dakSiNAnAmikAyAM namaH |

OM bhaM dakSiNakaniSThikAyAM namaH |

OM gaM vAmakaniSThikAyAM namaH |

OM vaM vAmAnikAyAM namaH |

OM teM vAmamadhyamAyAM namaH |

OM vAM vAmatarjanyAM namaH |

OM suM dakSiNAGguSThordhvaparvaNi namaH |

OM deM dakSiNAGguSThAdhaH parvaNi namaH |

OM vAM vAmAGguSThordhvaparvaNi namaH |

OM yaM vAmAGguSThAdhaH parvaNi namaH |

viSNuSaDakSaranyAsaH

OM OM hRdaye namaH |

OM viM mUrdhnai namaH |

OM SaM bhrurvormadhye namaH |

OM NaM zikhAyAM namaH |

OM veM netrayoH namaH |

OM naM sarvasandhiSu namaH |

OM maH prAcyAM astrAya phaT |

OM maH AgneyyAM astrAya phaT |

OM maH dakSiNasyAM astrAya phaT |

OM maH naiRtye astrAya phaT |

OM maH pratIcyAM astrAya phaT |

OM maH vAyavye astrAya phaT |

OM maH udIcyAM astrAya phaT |

OM maH aizAnyAM astrAya phaT |

OM maH UrdhvAyAM astrAya phaT |

OM maH adharAyAM astrAya phaT |

zrI hariH

atha zrInArAyaNakavaca

rAjovAca

yayA guptaH sahasrAkSaH savAhAn ripusainikAn |

krIDanniva vinirjitya trilokyA bubhuje zriyam || 1 ||

bhagavaMstanmamAkhyAhi varma nArAyaNAtmakam |

yathA''tatAyinaH zatrUn yena gupto'jayanmRdhe || 2 ||

zrI zuka uvAca

vRtaH purohitastvASTro mahendrAyAnupRcchate |

nArAyaNAkhyaM varmAha tadihaikamanAH zRNu || 3 ||

zrIvizvarUpa uvAca

dhautAGghripANirAcamya sapavitra udaGmukhaH |

kRtasvAGgakaranyAso mantrAbhyAM vAgyataH zuciH || 4 ||

nArAyaNamayaM varma sannahyedbhaya Agate |

daivabhUtAtmakarmabhyo nArAyaNamayaH pumAn || 5 ||

pAdayorjAnunorUrvorudare hRdyathorasi |

mukhe zirasyAnupUrvyAdoGkArAdIni vinyaset || 6 ||

OM namo nArAyaNAyeti viparyayamathApi vA |

karanyAsaM tataH kuryAddvAdazAkSaravidyayA || 7 ||

praNavAdiyakArAntamaGgulyaGguSThaparvasu |

nyaseddhRdaya oGkAraM vikAramanu mUrdhani || 8 ||

SakAraM tu bhruvormadhye NakAraM zikhayA nyaset |

vekAraM netrayoryuJjyAnnakAraM sarvasandhiSu || 9 ||

makAramastramuddizya mantramUrtirbhavedbudhaH |

savisargaM phaDantaM tatsarvadikSu vinirdizet || 10 ||

OM viSNave namaH ||

ityAtmAnaM paraM dhyAyeddhyeyaM SaTchaktibhiryutam |

vidyAtejastapomUrtimimaM mantramudAharet || 11 ||

OM harirvidadhyAnmama sarvarakSAM

nyastAGghripadmaH patagendra pRSThe |

darAricarmAsigadeSucApa-

-pAzAndadhAno'STaguNo'STabAhuH || 12 ||

jaleSu mAM rakSatu matsyamUrti-

-ryAdogaNebhyo varuNasya pAzAt |

sthaleSu mAyAvaTuvAmano'vyA-

-ttrivikramaH khe'vatu vizvarUpaH || 13 ||

durgeSvaTavyAjimukhAdiSu prabhuH

pAyAnnRsiMho'surayUthapAriH |

vimuJcato yasya mahATTahAsaM

dizo vinedurnyapataMzca garbhAH || 14 ||

rakSatvasau mAdhvani yajJakalpaH

svadaMSTrayonnItadharo varAhaH |

rAmo'drikUTeSvatha vipravAse

salakSmaNo'vyAdbharatAgrajo'smAn || 15 ||

mAmugradharmAdakhilAtpramAdA-

-nnArAyaNaH pAtu narazca hAsAt |

dattastvayogAdatha yoganAthaH

pAyAdguNezaH kapilaH karmabandhAt || 16 ||

sanatkumAro'vatu kAmadevA-

-ddhayAnano mAM pathi devahelanAt |

devarSivaryaH puruSArcanAntarA-

-tkUrmo harirmAM nirayAdazeSAt || 17 ||

dhanvantarirbhagavAnpAtvapathyA-

-ddvandvAdbhayAdRSabho nirjitAtmA |

yajJazca lokAdavatAjjanAntA-

-dbalo gaNAtkrodhavazAdahIndraH || 18 ||

dvaipAyano bhagavAnaprabodhA-

-dbuddhastu pASaNDagaNAtpramAdAt |

kalkiH kaleH kAlamalAtprapAtu

dharmAvanAyorukRtAvatAraH || 19 ||

mAM kezavo gadayA prAtaravyA-

-dgovinda AsaGgavamAttaveNuH |

nArAyaNaH prAhNa udAttazakti-

-rmadhyandine viSNurarIndrapANiH || 20 ||

devo'parAhNe madhuhogradhanvA

sAyaM tridhAmAvatu mAdhavo mAm |

doSe hRSIkeza utArdharAtre

nizItha eko'vatu padmanAbhaH || 21 ||

zrIvatsadhAmA'pararAtra IzaH

pratyuSa Izo'sidharo janArdanaH |

dAmodaro'vyAdanusandhyaM prabhAte

vizvezvaro bhagavAnkAlamUrtiH || 22 ||

cakraM yugAntAnalatigmanemi

bhramatsamantAdbhagavatprayuktam |

dandagdhi dandagdhyarisainyamAzu

kakSaM yathA vAtasakho hutAzaH || 23 ||

gade'zanisparzanavisphuliGge

niSpiNDhi niSpiNDhyajitapriyAsi |

kUSmANDavainAyakayakSarakSo

bhUtagrahAMzcUrNaya cUrNayArIn || 24 ||

tvaM yAtudhAnapramathapretamAtR-

-pizAcavipragrahaghoradRSTIn |

darendra vidrAvaya kRSNapUrito

bhImasvano'rerhRdayAni kampayan || 25 ||

tvaM tigmadhArAsivarArisainya-

-mIzaprayukto mama chindhi chindhi |

cakSUMSi carman zatacandra chAdaya

dviSAmaghonAM hara pApacakSuSAm || 26 ||

yanno bhayaM grahebhyo'bhUtketubhyo nRbhya eva ca |

sarIsRpebhyo daMSTribhyo bhUtebhyo'ghebhya eva ca || 27 ||

sarvANyetAni bhagavannAmarUpAstrakIrtanAt |

prayAntu saGkSayaM sadyo ye naH zreyaHpratIpakAH || 28 ||

garuDo bhagavAn stotrastomazchandomayaH prabhuH |

rakSatvazeSakRcchrebhyo viSvaksenaH svanAmabhiH || 29 ||

sarvApadbhyo harernAmarUpayAnAyudhAni naH |

buddhIndriyamanaHprANAnpAntu pArSadabhUSaNAH || 30 ||

yathA hi bhagavAneva vastutaH sadasacca yat |

satyenAnena naH sarve yAntu nAzamupadravAH || 31 ||

yathaikAtmyAnubhAvAnAM vikalparahitaH svayam |

bhUSaNAyudhaliGgAkhyA dhatte zaktIH svamAyayA || 32 ||

tenaiva satyamAnena sarvajJo bhagavAn hariH |

pAtu sarvaiH svarUpairnaH sadA sarvatra sarvagaH || 33 ||

vidikSu dikSUrdhvamadhaH samantA-

-dantarbahirbhagavAnnArasiMhaH |

prahApaya~llokabhayaM svanena

svatejasA grastasamastatejAH || 34 ||

maghavannidamAkhyAtaM varma nArAyaNAtmakam |

vijeSyasyaJjasA yena daMzito'surayUthapAn || 35 ||

etaddhArayamANastu yaM yaM pazyati cakSuSA |

padA vA saMspRzetsadyaH sAdhvasAtsa vimucyate || 36 ||

na kutazcidbhayaM tasya vidyAM dhArayato bhavet |

rAjadasyugrahAdibhyo vyAdhyAdibhyazca karhicit || 37 ||

imAM vidyAM purA kazcitkauziko dhArayan dvijaH |

yogadhAraNayA svAGgaM jahau sa marudhanvani || 38 ||

tasyopari vimAnena gandharvapatirekadA |

yayau citrarathaH strIbhirvRto yatra dvijakSayaH || 39 ||

gaganAnnyapatatsadyaH savimAno hyavAkchirAH |

sa vAlakhilyavacanAdasthInyAdAya vismitaH |

prApya prAcyAM sarasvatyAM snAtvA dhAma svamanvagAt || 40 ||

zrI zuka uvAca

ya idaM zRNuyAtkAle yo dhArayati cAdRtaH |

taM namasyanti bhUtAni mucyate sarvato bhayAt || 41 ||

etAM vidyAmadhigato vizvarUpAcchatakratuH |

trailokyalakSmIM bubhuje vinirjitya mRdhe'surAn || 42 ||

iti zrImadbhAgavate mahApurANe SaSThaskandhe nArAyaNavarmopadezo nAmASTamo'dhyAyaH |