Mukunda Mala Stotram

mukundamAlA stotram

shloka 1

ghuShyate yasya nagare ra~NgayAtrA dine dine |

tamahaM shirasA vande rAjAnaM kulashekharam ||

shrIvallabheti varadeti dayApareti

bhaktapriyeti bhavaluNThanakovideti |

nAtheti nAgashayaneti jagannivAse-

-tyAlApanaM pratipadaM kuru me mukunda || 1 ||

jayatu jayatu devo devakInandano.ayaM

jayatu jayatu kRRiShNo vRRiShNivaMshapradIpaH |

jayatu jayatu meghashyAmalaH komalA~Ngo

jayatu jayatu pRRithvIbhAranAsho mukundaH || 2 ||

mukunda mUrdhnA praNipatya yAche

bhavantamekAntamiyantamartham |

avismRRitistvachcharaNAravinde

bhave bhave me.astu bhavatprasAdAt || 3 ||

nAhaM vande tava charaNayordvandvamadvandvahetoH

kumbhIpAkaM gurumapi hare nArakaM nApanetum |

ramyArAmAmRRidutanulatA nandane nApi rantuM

bhAve bhAve hRRidayabhavane bhAvayeyaM bhavantam || 4 ||

nAsthA dharme na vasunichaye naiva kAmopabhoge

yadyadbhavyaM bhavatu bhagavan pUrvakarmAnurUpam |

etatprArthyaM mama bahumataM janmajanmAntare.api

tvatpAdAmbhoruhayugagatA nishchalA bhaktirastu || 5 ||

divi vA bhuvi vA mamAstu vAso

narake vA narakAntaka prakAmam |

avadhIrita shAradAravindau

charaNau te maraNe.api chintayAmi || 6 ||

kRRiShNa tvadIya padapaNkajapanjarAnta-

-madyaiva me vishatu mAnasarAjahaMsaH |

prANaprayANasamaye kaphavAtapittaiH

kaNThAvarodhanavidhau smaraNaM kutaste || 7 ||

chintayAmi harimeva santataM

mandamanda hasitAnanAmbujaM

nandagopatanayaM parAtparaM

nAradAdimunibRRindavanditam || 8 ||

karacharaNasaroje kAntimannetramIne

shramamuShi bhujavIchivyAkule.agAdhamArge |

harisarasi vigAhyApIya tejojalaughaM

bhavamaruparikhinnaH khedamadya tyajAmi || 9 ||

sarasijanayane sasha~Nkhachakre

murabhidi mA virama svachitta rantum |

sukhataramaparaM na jAtu jAne

haricharaNasmaraNAmRRitena tulyam || 10 ||

mA bhIrmandamano vichintya bahudhA yAmIshchiraM yAtanAH

nAmI naH prabhavanti pAparipavaH svAmI nanu shrIdharaH |

AlasyaM vyapanIya bhaktisulabhaM dhyAyasva nArAyaNaM

lokasya vyasanApanodanakaro dAsasya kiM na kShamaH || 11 ||

bhavajaladhigatAnAM dvandvavAtAhatAnAM

sutaduhitRRikalatratrANabhArArditAnAm |

viShamaviShayatoye majjatAmaplavAnAM

bhavatu sharaNameko viShNupoto narANAm || 12 ||

bhavajaladhimagAdhaM dustaraM nistareyaM

kathamahamiti cheto mA sma gAH kAtaratvam |

sarasijadRRishi deve tAvakI bhaktirekA

narakabhidi niShaNNA tArayiShyatyavashyam || 13 ||

tRRiShNAtoye madanapavanoddhUta mohormimAle

dArAvarte tanayasahajagrAhasa~NghAkule cha |

saMsArAkhye mahati jaladhau majjatAM nastridhAman

pAdAmbhoje varada bhavato bhaktinAvaM prayachCha || 14 ||

mAdrAkShaM kShINapuNyAn kShaNamapi bhavato bhaktihInAnpadAbje

mAshrauShaM shrAvyabandhaM tava charitamapAsyAnyadAkhyAnajAtam |

mAsmArShaM mAdhava tvAmapi bhuvanapate chetasApahnuvAnA-

-nmAbhUvaM tvatsaparyAvyatikararahito janmajanmAntare.api || 15 ||

jihve kIrtaya keshavaM muraripuM cheto bhaja shrIdharaM

pANidvandva samarchayAchyutakathAH shrotradvaya tvaM shRRiNu |

kRRiShNaM lokaya lochanadvaya harergachChA~NghriyugmAlayaM

jighra ghrANa mukundapAdatulasIM mUrdhannamAdhokShajam || 16 ||

he lokAH shRRiNuta prasUtimaraNavyAdheshchikitsAmimAM

yogajnAH samudAharanti munayo yAM yAjnavalkyAdayaH |

antarjyotirameyamekamamRRitaM kRRiShNAkhyamApIyatAM

tatpItaM paramauShadhaM vitanute nirvANamAtyantikam || 17 |

he martyAH paramaM hitaM shRRiNuta vo vakShyAmi sa~NkShepataH

saMsArArNavamApadUrmibahulaM samyakpravishya sthitAH |

nAnAj~nAnamapAsya chetasi namo nArAyaNAyetyamuM

mantraM sapraNavaM praNAmasahitaM prAvartayadhvaM muhuH || 18 ||

pRRithvIreNuraNuH payAMsi kaNikAH phalguH sphuli~Ngo.alaghu-

-stejo niHshvasanaM maruttanutaraM randhraM susUkShmaM nabhaH |

kShudrA rudrapitAmahaprabhRRitayaH kITAH samastAH surAH

dRRiShTe yatra sa tAvako vijayate bhUmAvadhUtAvadhiH || 19 ||

baddhenA~njalinA natena shirasA gAtraiH saromodgamaiH

kaNThena svaragadgadena nayanenodgIrNabAShpAmbunA |

nityaM tvachcharaNAravindayugala dhyAnAmRRitAsvAdinA-

-masmAkaM sarasIruhAkSha satataM sampadyatAM jIvitam || 20 ||

he gopAlaka he kRRipAjalanidhe he sindhukanyApate

he kaMsAntaka he gajendrakaruNApArINa he mAdhava |

he rAmAnuja he jagattrayaguro he puNDarIkAkSha mAM

he gopIjananAtha pAlaya paraM jAnAmi na tvAM vinA || 21 ||

bhaktApAyabhuja~NgagAruDamaNistrailokyarakShAmaNiH

gopIlochanachAtakAmbudamaNiH saundaryamudrAmaNiH |

yaH kAntAmaNi rukmiNI ghanakuchadvandvaikabhUShAmaNiH

shreyo devashikhAmaNirdishatu no gopAlachUDAmaNiH || 22 ||

shatruchChedaikamantraM sakalamupaniShadvAkyasampUjyamantraM

saMsArottAramantraM samupachitatamaH sa~NghaniryANamantram |

sarvaishvaryaikamantraM vyasanabhujagasandaShTasantrANamantraM

jihve shrIkRRiShNamantraM japa japa satataM janmasAphalyamantram || 23 ||

vyAmoha prashamauShadhaM munimanovRRitti pravRRittyauShadhaM

daityendrArtikarauShadhaM tribhuvanI sa~njIvanaikauShadham |

bhaktAtyantahitauShadhaM bhavabhayapradhvaMsanaikauShadhaM

shreyaHprAptikarauShadhaM piba manaH shrIkRRiShNadivyauShadham || 24 ||

AmnAyAbhyasanAnyaraNyaruditaM vedavratAnyanvahaM

medashChedaphalAni pUrtavidhayaH sarve hutaM bhasmani |

tIrthAnAmavagAhanAni cha gajasnAnaM vinA yatpada-

-dvandvAmbhoruhasaMsmRRitirvijayate devaH sa nArAyaNaH || 25 ||

shrImannAma prochya nArAyaNAkhyaM

ke na prApurvA~nChitaM pApino.api |

hA naH pUrvaM vAkpravRRittA na tasmin

tena prAptaM garbhavAsAdiduHkham || 26 ||

majjanmanaH phalamidaM madhukaiTabhAre

matprArthanIya madanugraha eSha eva |

tvadbhRRityabhRRitya parichAraka bhRRityabhRRitya

bhRRityasya bhRRitya iti mAM smara lokanAtha || 27 ||

nAthe naH puruShottame trijagatAmekAdhipe chetasA

sevye svasya padasya dAtari sure nArAyaNe tiShThati |

yaM ka~nchitpuruShAdhamaM katipayagrAmeshamalpArthadaM

sevAyai mRRigayAmahe naramaho mUkA varAkA vayam || 28 ||

madana parihara sthitiM madIye

manasi mukundapadAravindadhAmni |

haranayanakRRishAnunA kRRisho.asi

smarasi na chakraparAkramaM murAreH || 29 ||

tattvaM bruvANAni paraM parasmA-

-nmadhu kSharantIva satAM phalAni |

prAvartaya prA~njalirasmi jihve

nAmAni nArAyaNa gocharANi || 30 ||

idaM sharIraM pariNAmapeshalaM

patatyavashyaM shlathasandhijarjaram |

kimauShadhaiH klishyasi mUDha durmate

nirAmayaM kRRiShNarasAyanaM piba || 31 ||

dArA vArAkaravarasutA te tanUjo viri~nchiH

stotA vedastava suragaNo bhRRityavargaH prasAdaH |

muktirmAyA jagadavikalaM tAvakI devakI te

mAtA mitraM balaripusutastvayyato.anyanna jAne || 32 ||

kRRiShNo rakShatu no jagattrayaguruH kRRiShNaM namasyAmyahaM

kRRiShNenAmarashatravo vinihatAH kRRiShNAya tasmai namaH |

kRRiShNAdeva samutthitaM jagadidaM kRRiShNasya dAso.asmyahaM

kRRiShNe tiShThati sarvametadakhilaM he kRRiShNa rakShasva mAm || 33 ||

tattvaM prasIda bhagavan kuru mayyanAthe

viShNo kRRipAM paramakAruNikaH kila tvam |

saMsArasAgaranimagnamanantadIna-

-muddhartumarhasi hare puruShottamo.asi || 34 ||

namAmi nArAyaNapAdapa~NkajaM

karomi nArAyaNapUjanaM sadA |

vadAmi nArAyaNanAma nirmalaM

smarAmi nArAyaNatattvamavyayam || 35 ||

shrInAtha nArAyaNa vAsudeva

shrIkRRiShNa bhaktapriya chakrapANe |

shrIpadmanAbhAchyuta kaiTabhAre

shrIrAma padmAkSha hare murAre || 36 ||

ananta vaikuNTha mukunda kRRiShNa

govinda dAmodara mAdhaveti |

vaktuM samartho.api na vakti kashchi-

-daho janAnAM vyasanAbhimukhyam || 37 ||

dhyAyanti ye viShNumanantamavyayaM

hRRitpadmamadhye satataM vyavasthitam |

samAhitAnAM satatAbhayapradaM

te yAnti siddhiM paramAM cha vaiShNavIm || 38 ||

kShIrasAgaratara~NgashIkarA-

-.a.asAratArakitachArumUrtaye |

bhogibhogashayanIyashAyine

mAdhavAya madhuvidviShe namaH || 39 ||

yasya priyau shrutidharau kavilokavIrau

mitre dvijanmavarapadmasharAvabhUtAm |

tenAmbujAkShacharaNAmbujaShaTpadena

rAj~nA kRRitA kRRitiriyaM kulashekhareNa || 40 ||

iti kulashekhara praNItaM mukundamAlA |