Mooka Pancha Sathi 5

mUka pa~ncha shati 5 - mandasmita shatakam

shloka 1

badhnImo vayama~njaliM pratidinaM bandhachChide dehinAM

kandarpAgamatantramUlagurave kalyANakelIbhuve |

kAmAkShyA ghanasArapu~njarajase kAmadruhashchakShuShAM

mandArastabakaprabhAmadamuShe mandasmitajyotiShe ||1||

sadhrIche navamallikAsumanasAM nAsAgramuktAmaNe-

rAchAryAya mRRiNAlakANDamahasAM naisargikAya dviShe |

svardhunyA saha yudhvena himarucherardhAsanAdhyAsine

kAmAkShyAH smitama~njarIdhavalimAdvaitAya tasmai namaH ||2||

karpUradyutichAturImatitarAmalpIyasIM kurvatI

daurbhAgyodayameva saMvidadhatI dauShAkarINAM tviShAm |

kShullAneva manojnamallinikarAnphullAnapi vyanjatI

kAmAkShyA mRRidulasmitAMshulaharI kAmaprasUrastu me ||3||

yA pInastanamaNDalopari lasatkarpUralepAyate

yA nIlekShaNarAtrikAntitatiShu jyotsnAprarohAyate |

yA saundaryadhunItara~NgatatiShu vyAlolahaMsAyate

kAmAkShyAH shishirIkarotu hRRidayaM sA me smitaprAchurI ||4||

yeShAM gachChati pUrvapakShasaraNiM kaumudvataH shvetimA

yeShAM santatamArurukShati tulAkakShyAM sharachchandramAH |

yeShAmichChati kamburapyasulabhAmantevasatprakriyAM

kAmAkShyA mamatAM harantu mama te hAsatviShAma~NkurAH ||5||

AshAsImasu santataM vidadhatI naishAkarIM vyAkriyAM

kAshAnAmabhimAnabha~NgakalanAkaushalyamAbibhratI |

IshAnena vilokitA sakutukaM kAmAkShi te kalmaSha-

kleshApAyakarI chakAsti laharI mandasmitajyotiShAm ||6||

ArUDhasya samunnatastanataTIsAmrAjyasiMhAsanaM

kandarpasya vibhorjagattrayaprAkaTyamudrAnidheH |

yasyAshchAmarachAturIM kalayate rashmichChaTA cha~nchalA

sA mandasmitama~njarI bhavatu naH kAmAya kAmAkShi te ||7||

shambhoryA parirambhasambhramavidhau nairmalyasImAnidhiH

gairvANIva tara~NgiNI kRRitamRRidusyandAM kalindAtmajAm |

kalmAShIkurute kala~NkasuShamAM kaNThasthalIchumbinIM

kAmAkShyAH smitakandalI bhavatu naH kalyANasandohinI ||8||

jetuM hAralatAmiva stanataTIM sa~njagmuShI santataM

gantuM nirmalatAmiva dviguNitAM magnA kRRipAstrotasi |

labdhuM vismayanIyatAmiva haraM rAgAkulaM kurvatI

manjuste smitamanjarI bhavabhayaM mathnAtu kAmAkShi me ||9||

shvetApi prakaTaM nishAkararuchAM mAlinyamAtanvatI

shItApi smarapAvakaM pashupateH sandhukShayantI sadA |

svAbhAvyAdadharAshritApi namatAmuchchairdishantI gatiM

kAmAkShi sphuTamantarA sphuratu nastvanmandahAsaprabhA ||10||

vaktrashrIsarasIjale taralitabhrUvallikallolite

kAlimnA dadhatI kaTAkShajanuShA mAdhuvratIM vyApRRitim |

nirnidrAmalapuNDarIkakuhanApANDityamAbibhratI

kAmAkShyAH smitachAturI mama manaH kAtaryamunmUlayet ||11||

nityaM bAdhitabandhujIvamadharaM maitrIjuShaM pallavaiH

shuddhasya dvijamaNDalasya cha tiraskartAramapyAshritA |

yA vaimalyavatI sadaiva namatAM chetaH punItetarAM

kAmAkShyA hRRidayaM prasAdayatu me sA mandahAsaprabhA ||12||

druhyantI tamase muhuH kumudinIsAhAyyamAbibhratI

yAntI chandrakishorashekharavapuHsaudhANgaNe preNkhaNam |

jnAnAmbhonidhivIchikAM sumanasAM kUlaNkaShAM kurvatI

kAmAkShyAH smitakaumudI haratu me saMsAratApodayam ||13||

kAshmIradravadhAtukardamaruchA kalmAShatAM bibhratI

haMsaudhairiva kurvatI parichitiM hArIkRRitairmauktikaiH |

vakShojanmatuShArashailakaTake sa~nchAramAtanvatI

kAmAkShyA mRRidulasmitadyutimayI bhAgIrathI bhAsate ||14||

kamborvaMshaparamparA iva kRRipAsantAnavallIbhuvaH

samphullastabakA iva prasRRimarA mUrtAH prasAdA iva |

vAkpIyUShakaNA iva tripathagAparyAyabhedA iva

bhrAjante tava mandahAsakiraNAH kA~nchIpurInAyike ||15||

vakShoje ghanasArapatrarachanAbha~NgIsapatnAyitA

kaNThe mauktikahArayaShTikiraNavyApAramudrAyitA |

oShThashrInikurumbapallavapuTe pre~NkhatprasUnAyitA

kAmAkShi sphuratAM madIyahRRidaye tvanmandahAsaprabhA ||16||

yeShAM bindurivopari prachalito nAsAgramuktAmaNiH

yeShAM dIna ivAdhikaNThamayate hAraH karAlambanam |

yeShAM bandhurivoShThayoraruNimA dhatte svayaM ra~njanaM

kAmAkShyAH prabhavantu te mama shivollAsAya hAsA~NkurAH ||17||

yA jADyAmbunidhiM kShiNoti bhajatAM vairAyate kairavaiH

nityaM yAM niyamena yA cha yatate kartuM triNetrotsavam |

bimbaM chAndramasaM cha va~nchayati yA garveNa sA tAdRRishI

kAmAkShi smitama~njarI tava kathaM jyotsnetyasau kIrtyate ||18||

AruDhA rabhasAtpuraH purariporAshleShaNopakrame

yA te mAtarupaiti divyataTinIsha~NkAkarI tatkShaNam |

oShThau vepayati bhruvau kuTilayatyAnamrayatyAnanaM

tAM vande mRRiduhAsapUrasuShamAmekAmranAthapriye ||19||

vaktrendostava chandrikA smitatatirvalgu sphurantI satAM

syAchchedyuktimidaM chakoramanasAM kAmAkShi kautUhalam |

etachchitramaharnishaM yadadhikAmeShA ruchiM gAhate

bimboShThadyumaNiprabhAsvapi cha yadbibbokamAlambate ||20||

sAdRRishyaM kalashAmbudhervahati yatkAmAkShi mandasmitaM

shobhAmoShTharuchAmba vidrumabhavAmetAdbhidAM brUmahe |

ekasmAduditaM purA kila papau sharvaH purANaH pumAn

etanmadhyasamudbhavaM rasayate mAdhuryarUpaM rasam ||21||

uttu~NgastanakumbhashailakaTake vistArikastUrikA-

patrashrIjuShi cha~nchalAH smitaruchaH kAmAkShi te komalAH |

sandhyAdIdhitira~njitA iva muhuH sAndrAdharajyotiShA

vyAlolAmalashAradAbhrashakalavyApAramAtanvate ||22||

kShIraM dUrata eva tiShThatu kathaM vaimalyamAtrAdidaM

mAtaste sahapAThavIthimayatAM mandasmitairma~njulaiH |

kiM cheyaM tu bhidAsti dohanavashAdekaM tu sa~njAyate

kAmAkShi svayamarthitaM praNamatAmanyattu doduhyate ||23||

karpUrairamRRitairjagajjanani te kAmAkShi chandrAtapaiH

muktAhAraguNairmRRiNAlavalayairmugdhasmitashrIriyam |

shrIkA~nchIpuranAyike samatayA saMstUyate sajjanaiH

tattAdRRi~Nmama tApashAntividhaye kiM devi mandAyate ||24||

madhyegarbhitama~njuvAkyalaharImAdhvIjharIshItalA

mandArastabakAyate janani te mandasmitAMshuchChaTA |

yasyA vardhayituM muhurvikasanaM kAmAkShi kAmadruho

valgurvIkShaNavibhramavyatikaro vAsantamAsAyate ||25||

bimboShThadyutipunjaranjitaruchistvanmandahAsachChaTA |

kalyANaM girisArvabhaumatanaye kallolayatvAshu me |

phullanmallipinaddhahallakamayI mAleva yA peshalA

shrIkA~nchIshvari mAramarditururomadhye muhurlambate ||26||

bibhrANA sharadabhravibhramadashAM vidyotamAnApyaso

kAmAkShi smitama~njarI kirati te kAruNyadhArArasam |

AshcharyaM shishirIkaroti jagatIshchAlokya chainAmaho

kAmaM khelati nIlakaNThahRRidayaM kautUhalAndolitam ||27||

preNkhatprauDhakaTAkShakunjakuhareShvatyachChaguchChAyitaM

vaktrenduchChavisindhuvIchinichaye phenapratAnAyitam |

nairantaryavijRRimbhitastanataTe naicholapaTTAyitaM

kAluShyaM kabalIkarotu mama te kAmAkShi mandasmitam ||28||

pIyUShaM tava mantharasmitamiti vyarthaiva sApaprathA

kAmAkShi dhruvamIdRRishaM yadi bhavedetatkathaM vA shive |

mandArasya kathAlavaM na sahate mathnAti mandAkinI-

minduM nindati kIrtite.api kalashIpAthodhimIrShyAyate ||29||

vishveShAM nayanotsavaM vitanutAM vidyotatAM chandramA

vikhyAto madanAntakena mukuTImadhye cha sammAnyatAm |

AH kiM jAtamanena hAsasuShamAmAlokya kAmAkShi te

kAla~NkImavalambate khalu dashAM kalmAShahIno.apyasau ||30||

chetaH shItalayantu naH pashupaterAnandajIvAtavo

namrANAM nayanAdhvasImasu sharachchandrAtapopakramAH |

saMsArAkhyasaroruhAkarakhalIkAre tuShArotkarAH

kAmAkShi smarakIrtibIjanikarAstvanmandahAsA~NkurAH ||31||

karmaughAkhyatamaHkachAkachikarAnkAmAkShi sa~nchintaye

tvanmandasmitarochiShAM tribhuvanakShemaNkarAnaNkurAn |

ye vaktraM shishirashriyo vikasitaM chandrAtapAmbhoruha-

dveShoddheShoNachAturImiva tiraskartuM pariShkurvate ||32||

kuryurnaH kulashailarAjatanaye kUlaNkaShaM maNgalaM

kundaspardhanachu~nchavastava shive mandasmitaprakramAH |

ye kAmAkShi samastasAkShinayanaM santoShayantIshvaraM

karpUraprakarA iva prasRRimarAH puMsAmasAdhAraNAH ||33||

kamreNa snapayasva karmakuhanAchoreNa mArAgama-

vyAkhyAshikShaNadIkShitena viduShAmakShINalakShmIpuShA |

kAmAkShi smitakandalena kaluShasphoTakriyAchu~nchunA

kAruNyAmRRitavIchikAviharaNaprAchuryadhuryeNa mAm ||34||

tvanmandasmitakandalasya niyataM kAmAkShi sha~NkAmahe

bimbaH kashchana nUtanaH prachalito naishAkaraH shIkaraH |

ki~ncha kShIrapayonidhiH pratinidhiH svarvAhinIvIchikA-

bibvoko.api viDamba eva kuhanA mallImatallIruchaH ||35||

duShkarmArkanisargakarkashamahassamparkatapataM mila-

tpaNkaM shaNkaravallabhe mama manaH kAnchIpurAlaNkriye |

amba tvanmRRidulasmitAmRRitarase ma~NktvA vidhUya vyathA-

mAnandodayasaudhashRRiNgapadavImAroDhumAkANkShati ||36||

namrANAM nagarAjashekharasute nAkAlayAnAM puraH

kAmAkShi tvarayA vipatprashamena kAruNyadhArAH kiran |

AgachChantamanugrahaM prakaTayannAnandabIjAni te

nAsIre mRRiduhAsa eva tanute nAthe sudhAshItalaH ||37||

kAmAkShi prathamAnavibhramanidhiH kandarpadarpaprasUH

mugdhaste mRRiduhAsa eva girije muShNAtu me kilbiSham |

yaM draShTuM vihite karagraha ume shambhustrapAmIlitaM

svairaM kArayati sma tANDavavinodAnandinA taNDunA ||38||

kShuNNaM kenachideva dhIramanasA kutrApi nAnAjanaiH

karmagranthiniyantritairasugamaM kAmAkShi sAmAnyataH |

mugdhairdruShTumashakyameva manasA mUDhasaya me mauktikaM

mArgaM darshayatu pradIpa iva te mandasmitashrIriyam ||39||

jyotsnAkAntibhireva nirmalataraM naishAkaraM maNDalaM

haMsaireva sharadvilAsasamaye vyAkochamambhoruham |

svachChaireva vikasvarairuDuguNaiH kAmAkShi bimbaM divaH

puNyaireva mRRidusmitaistava mukhaM puShNAti shobhAbharam ||40||

mAnagranthividhuntudena rabhasAdAsvAdyamAne nava-

premADambarapUrNimAhimakare kAmAkShi te tatkShaNam |

Alokya smitachandrikAM punarimAmunmIlanaM jagmuShIM

chetaH shIlayate chakoracharitaM chandrArdhachUDAmaNeH ||41||

kAmAkShi smitamanjarIM tava bhaje yasyAstviShAmaNkurA-

nApInastanapAnalAlasatayA nishshaNkamaNkeshayaH |

UrdhvaM vIkShya vikarShati prasRRimarAnuddAmayA shuNDayA

sUnusute bisasha~NkayAshu kuhanAdantAvalagrAmaNIH ||42||

gADhAshleShavimardasambhramavashAduddAmamuktAguNa-

prAlambe kuchakumbhayorvigalite dakShadviSho vakShasi |

yA sakhyena pinahyati prachurayA bhAsA tadIyAM dashAM

sA me khelatu kAmakoTi hRRidaye sAndrasmitAMshuchChaTA ||43||

mandAre tava mantharasmitaruchAM mAtsaryamAlokyate

kAmAkShi smarashAsane cha niyato rAgodayo lakShyate |

chAndrIShu dyutimanjarIShu cha mahAndveShANkuro dRRishyate

shuddhAnAM kathamIdRRishI girisute.atishuddhA dashA kathyatAm ||44||

pIyUShaM khalu pIyate surajanairdugdhAmbudhirmathyate

mAheshaishcha jaTAkalApanigaDairmandAkinI nahyate |

shItAMshuH paribhUyate cha tamasA tasmAdanetAdRRishI

kAmAkShi smitamanjarI tava vachovaidagdhyamullaNghate ||45||

Asha~Nke tava mandahAsalaharImanyAdRRishIM chandrikA-

mekAmreshakuTumbini pratipadaM yasyAH prabhAsa~Ngame |

vakShojAmburuhe na te rachayataH kAnchiddashAM kauNmalI-

mAsyAmbhoruhamamba ki~ncha shanakairAlambate phullatAm ||46||

AstIrNAdharakAntipallavachaye pAtaM muhurjagmuShI

mAradrohiNi kandalatsmarasharajvAlAvalIrvya~njatI |

nindantI ghanasArahAravalayajyotsnAmRRiNAlAni te

kAmAkShi smitachAturI virahiNIrItiM jagAhetarAm ||47||

sUryAlokavidhau vikAsamadhikaM yAntI harantI tama-

ssandohaM namatAM nijasmaraNato doShAkaradveShiNI |

niryAntI vadanAravindakuharAnnirdhUtajADyA nRRiNAM

shrIkAmAkShi tava smitadyutimayI chitrIyate chandrikA ||48||

kuNThIkuryuramI kubodhaghaTanAmasmanmanomAthinIM

shrIkAmAkShi shivaNkarAstava shive shrImandahAsANkurAH |

ye tanvanti nirantaraM taruNimastamberamagrAmaNI-

kumbhadvandvaviDambini stanataTe muktAkuthADambaram ||49||

pre~NkhantaH sharadambudA iva shanaiH premAnilaiH preritA

majjanto mandanArikaNThasuShamAsindhau muhurmantharam |

shrIkAmAkShi tava smitAMshunikarAH shyAmAyamAnashriyo

nIlAmbhodharanaipuNIM tata ito nirnidrayantya~njasA ||50||

vyApAraM chaturAnanaikavihRRitau vyAkurvatI kurvatI

rudrAkShagrahaNaM maheshi satataM vAgUrmikallolitA |

utphullaM dhavalAravindamadharIkRRitya sphurantI sadA

shrIkAmAkShi sarasvatI vijayate tvanmandahAsaprabhA ||51||

karpUradyutitaskareNa mahasA kalmAShayatyAnanaM

shrIkA~nchIpuranAyike patiriva shrImandahAso.api te |

Ali~NgatyatipIvarAM stanataTIM bimbAdharaM chumbati

prauDhaM rAgabharaM vyanakti manaso dhairyaM dhunItetarAm ||52||

vaishadyena cha vishvatApaharaNakrIDApaTIyastayA

pANDityena pachelimena jagatAM netrotsavotpAdena |

kAmAkShi smitakandalaistava tulAmAroDhumudyoginI

jyotsnAsau jalarAshipoShaNatayA dUShyAM prapannA dashAm ||53||

lAvaNyAmbujinImRRiNAlavalayaiH shRRi~NgAragandhadvipa-

grAmaNyaH shrutichAmaraistaruNimasvArAjyatejo~NkuraiH |

AnandAmRRitasindhuvIchipRRiShatairAsyAbjahaMsaistava

shrIkAmAkShi mathAna mandahasitairmatkaM manaHkalmaSham ||54||

uttu~NgastanamaNDalIparichalanmANikyahArachChaTA-

chanchachChoNimapunjamadhyasaraNiM mAtaH pariShkurvatI |

yA vaidagdhyamupaiti sha~NkarajaTAkAntAravATIpata-

tsvarvApIpayasaH smitadyutirasau kAmAkShi te ma~njulA ||55||

sannAmaikajuShA janena sulabhaM saMsUchayantI shanai-

ruttu~Ngasya chirAdanugrahatarorutpatsyamAnaM phalam |

prAthamyena vikasvarA kusumavatprAgalbhyamabhyeyuShI

kAmAkShi smitachAturI tava mama kShema~NkarI kalpatAm ||56||

dhAnuShkAgrasarasya lolakuTilabhrUlekhayA bibhrato

lIlAlokashilImukhaM navavayassAmrAjyalakShmIpuShaH |

jetuM manmathamardinaM janani te kAmAkShi hAsaH svayaM

valgurvibhramabhUbhRRito vitanute senApatiprakriyAm ||57||

yannAkampata kAlakUTakabalIkAre chuchumbe na yad-

glAnyA chakShuShi rUShitAnalashikhe rudrasya tattAdRRisham |

cheto yatprasabhaM smarajvarashikhijvAlena lelihyate

tatkAmAkShi tava smitAMshukalikAhelAbhavaM prAbhavam ||58||

sambhinneva suparvalokataTinI vIchIchayairyAmunaiH

sammishreva shashA~NkadIptilaharI nIlairmahAnIradaiH |

kAmAkShi sphuritA tava smitaruchiH kAlA~njanaspardhinA

kAlimnA kacharochiShAM vyatikare kA~nchiddashAmashnute ||59||

jAnImo jagadIshvarapraNayini tvanmandahAsaprabhAM

shrIkAmAkShi sarojinImabhinavAmeShA yataH sarvadA |

Asyendoravalokena pashupaterabhyeti samphullatAM

tandrAlustadabhAva eva tanute tadvaiparItyakramam ||60||

yAntI lohitimAnamabhrataTinI dhAtuchChaTAkardamaiH

bhAntI bAlagabhastimAlikiraNairmeghAvalI shAradI |

bimboShThadyutipu~njachumbanakalAshoNAyamAnena te

kAmAkShi smitarochiShA samadashAmAroDhumAkA~NkShate ||61||

shrIkAmAkShi mukhendubhUShaNamidaM mandasmitaM tAvakaM

netrAnandakaraM tathA himakaro gachChedyathA tigmatAm |

shItaM devi tathA yathA himajalaM santApamudrAspadaM

shvetaM ki~ncha tathA yathA malinatAM dhatte cha muktAmaNiH ||62||

tvanmandasmitama~njarIM prasRRimarAM kAmAkShi chandrAtapaM

santaH santatamAmanantyamalatA tallakShaNaM lakShyate |

asmAkaM na dhunoti tApakamadhikaM dhUnoti nAbhyantaraM

dhvAntaM tatkhalu duHkhino vayamidaM kenoti no vidmahe ||63||

namrasya praNayaprarUDhakalahachChedAya pAdAbjayoH

mandaM chandrakishorashekharamaNeH kAmAkShi rAgeNa te |

bandhUkaprasavashriyaM jitavato baMhIyasIM tAdRRishIM

bimboShThasya ruchiM nirasya hasitajyotsnA vayasyAyate ||64||

muktAnAM parimochanaM vidadhatastatprItiniShpAdinI

bhUyo dUrata eva dhUtamarutastatpAlanaM tanvatI |

udbhUtasya jalAntarAdavirataM taddUratAM jagmuShI

kAmAkShi smitama~njarI tava kathaM kambostulAmashnute ||65||

shrIkAmAkShi tava smitadyutijharIvaidagdhyalIlAyitaM

pashyanto.api nirantaraM suvimalammanyA jaganmaNDale |

lokaM hAsayituM kimarthamanishaM prAkAshyamAtanvate

mandAkShaM virahayya ma~NgalataraM mandArachandrAdayaH ||66||

kShIrAbdherapi shailarAjatanaye tvanmandahAsasya cha

shrIkAmAkShi valakShimodayanidheH ki~nchidbhidAM brUmahe |

ekasmai puruShAya devi sa dadau lakShmIM kadAchitpurA

sarvebhyo.api dadAtyasau tu satataM lakShmIM cha vAgIshvarIm ||67||

shrIkA~nchIpuraratnadIpakalike tAnyeva menAtmaje

chAkorANi kulAni devi sutarAM dhanyAni manyAmahe |

kampAtIrakuTumbachaNkramakalAchunchUni cha~nchUpuTaiH

nityaM yAni tava smitendumahasAmAsvAdamAtanvate ||68||

shaityaprakramamAshrito.api namatAM jADyaprathAM dhUnayan

nairmalyaM paramaM gato.api girishaM rAgAkulaM chArayan |

lIlAlApapurassaro.api satataM vAchaMyamAnprINayan

kAmAkShi smitarochiShAM tava samullAsaH kathaM varNyate ||69||

shroNIcha~nchalamekhalAmukharitaM lIlAgataM mantharaM

bhrUvallIchalanaM kaTAkShavalanaM mandAkShavIkShAchaNam |

yadvaidagdhyamukhena manmatharipuM sammohayantya~njasA

shrIkAmAkShi tava smitAya satataM tasmai namsakurmahe ||70||

shrIkAmAkShi manoj~namandahasitajyotiShprarohe tava

sphItashvetimasArvabhaumasaraNiprAgalbhyamabhyeyuShi |

chandro.ayaM yuvarAjatAM kalayate cheTIdhuraM chandrikA

shuddhA sA cha sudhAjharI sahacharIsAdharmyamAlambate ||71||

jyotsnA kiM tanute phalaM tanumatAmauShNyaprashAntiM vinA

tvanmandasmitarochiShA tanumatAM kAmAkShi rochiShNunA |

santApo vinivAryate navavayaHprAchuryama~NkUryate

saundaryaM paripUryate jagati sA kIrtishcha sa~nchAryate ||72||

vaimalyaM kumudashriyAM himaruchaH kAntyaiva sandhukShyate

jyotsnArochirapi pradoShasamayaM prApyaiva sampadyate |

svachChatvaM navamauktikasya paramaM saMskArato dRRishyate

kAmAkShyAH smitadIdhitervishadimA naisargiko bhAsate ||73||

prAkAshyaM parameshvarapraNayini tvanmandahAsashriyaH

shrIkAmAkShi mama kShiNotu mamatAvaichakShaNImakShayAm |

yadbhItyeva nilIyate himakaro meghodare shuktikA-

garbhe mauktikamaNDalI cha sarasImadhye mRRiNAlI cha sA ||74||

herambe cha guhe harShabharitaM vAtsalyama~NkUrayat

mAradrohiNi pUruShe sahabhuvaM premANkuraM vyanjayat |

AnamreShu janeShu pUrNakaruNAvaidagdhyamuttAlayat

kAmAkShi smitamanjasA tava kathaNkAraM mayA kathyate ||75||

saNkruddhadvijarAjako.apyavirataM kurvandvijaiH saNgamaM

vANIpaddhatidUrago.api satataM tatsAhacharyaM vahan |

ashrAntaM pashudurlabho.api kalayanpatyau pashUnAM ratiM

shrIkAmAkShi tava smitAmRRitarasasyando mayi spandatAm ||76||

shrIkAmAkShi maheshvare nirupamapremA~NkuraprakramamaM

nityaM yaH prakaTIkaroti sahajAmunnidrayanmAdhurIm |

tattAdRRiktava mandahAsamahimA mAtaH kathaM mAnitAM

tanmUrdhnA suranimnagAM cha kalikAmindoshcha tAM nindati ||77||

ye mAdhuryavihAramaNTapabhuvo ye shaityamudrAkarA

ye vaishadyadashAvisheShasubhagAste mandahAsA~NkurAH |

kAmAkShyAH sahajaM guNatrayamidaM paryAyataH kurvatAM

vANIgumphanaDambare cha hRRidaye kIrtiprarohe cha me ||78||

kAmAkShyA mRRidulasmitAMshunikarA dakShAntake vIkShaNe

mandAkShagrahilA himadyutimayUkhAkShepadIkShA~NkurAH |

dAkShyaM pakShmalayantu mAkShikaguDadrAkShAbhavaM vAkShu me

sUkShmaM mokShapathaM nirIkShitumapi prakShAlayeyurmanaH ||79||

jAtyA shItashItalAni madhurANyetAni pUtAni te

gA~NgAnIva payAMsi devi paTalAnyalpasmitajyotiShAm |

enaHpa~NkaparamparAmalinitAmekAmranAthapriye

praj~nAnAtsutarAM madIyadhiShaNAM prakShAlayantu kShaNAt ||80||

ashrAntaM paratantritaH pashupatistvanmandahAsA~NkuraiH

shrIkAmAkShi tadIyavarNasamatAsaNgena shaNkAmahe |

induM nAkadhunIM cha shekharayate mAlAM cha dhatte navaiH

vaikuNThairavakuNThanaM cha kurute dhUlIchayairbhAsmanaiH ||81||

shrIkA~nchIpuradevate mRRiduvachassaurabhyamudrAspadaM

prauDhapremalatAnavInakusumaM mandasmitaM tAvakam |

mandaM kandalati priyasya vadanAloke samAbhAShaNe

shlakShNe ku~Nmalati prarUDhapulake chAshloShaNe phullati ||82||

kiM traisrotasamambike pariNataM srotashchaturthaM navaM

pIyUShasya samastatApaharaNaM kiMvA dvitIyaM vapuH |

kiMsvittvannikaTaM gataM madhurimAbhyAsAya gavyaM payaH

shrIkA~nchIpuranAyakapriyatame mandasmitaM tAvakam ||83||

bhUShA vaktrasaroruhasya sahajA vAchAM sakhI shAshvatI

nIvI vibhramasantateH pashupateH saudhI dRRishAM pAraNA |

jIvAturmadanashriyaH shashirucheruchchATanI devatA

shrIkAmAkShi girAmabhUmimayate hAsaprabhAma~njarI ||84||

sUtiH shvetimakandalasya vasatiH shRRi~NgArasArashriyaH

pUrtiH sUktijharIrasasya laharI kAruNyapAthonidheH |

vATI kAchana kausumI madhurimasvArAjyalakShmyAstava

shrIkAmAkShi mamAstu ma~NgalakarI hAsaprabhAchAturI ||85||

jantUnAM janiduHkhamRRityulaharIsantApanaM kRRintataH

prauDhAnugrahapUrNashItalarucho nityodayaM bibhrataH |

shrIkAmAkShi visRRitvarA iva karA hAsA~NkurAste haThA-

dAlokena nihanyurandhatamasastomasya me santatim ||86||

uttu~NgastanamaNDalasya vilasallAvaNyalIlAnaTI-

ra~Ngasya sphuTamUrdhvasImani muhuH prAkAshyamabhyeyuShI |

shrIkAmAkShi tava smitadyutitatirbimboShThakAntya~NkuraiH

chitrAM vidrumamudritAM vitanute mauktIM vitAnashriyam ||87||

svAbhAvyAttava vaktrameva lalitaM santoShasampAdanaM

shambhoH kiM punara~nchitasmitaruchaH pANDityapAtrIkRRitam |

ambhojaM svata eva sarvajagatAM chakShuHpriyambhAvukaM

kAmAkShi sphurite sharadvikasite kIdRRigvidhaM bhrAjate ||88||

pumbhirnirmalamAnasaurvidadhate maitrIM dRRiDhaM nirmalAM

labdhvA karmalayaM cha nirmalatarAM kIrtiM labhantetarAm |

sUktiM pakShmalayanti nirmalatamAM yattAvakAH sevakAH

tatkAmAkShi tava smitasya kalayA nairmalyasImAnidheH ||89||

AkarShannayanAni nAkisadasAM shaityena saMstambhaya-

nninduM ki~ncha vimohayanpashupatiM vishvArtimuchchATayan |

hiMsatsaMsRRitiDambaraM tava shive hAsAhvayo mAntrikaH

shrIkAmAkShi madIyamAnasatamovidveShaNe cheShTatAm ||90||

kShepIyaH kShapayantu kalmaShabhayAnyasmAkamalpasmita-

jyotirmaNDalacha~NkramAstava shive kAmAkShi rochiShNavaH |

pIDAkarmaThakarmagharmasamayavyApAratApAnala-

shrIpAtA navaharShavarShaNasudhAsrotasvinIshIkarAH ||91||

shrIkAmAkShi tava smitaindavamahaHpUre parimphUrjati

prauDhAM vAridhichAturIM kalayate bhaktAtmanAM prAtibham |

daurgatyaprasarAstamaHpaTalikAsAdharmyamAbibhrate

sarvaM kairavasAhacharyapadavIrItiM vidhatte param ||92||

mandArAdiShu manmathArimahiShi prAkAshyarItiM nijAM

kAdAchitkatayA visha~Nkya bahusho vaishadyamudrAguNaH |

sAtatyena tava smite vitanute svairAsanAvAsanAm ||93||

indhAne bhavavItihotranivahe karmaughachaNDAnila-

prauDhimnA bahulIkRRite nipatitaM santApachintAkulam |

mAtarmAM pariShincha kinchidamalaiH pIyUShavarShairiva

shrIkAmAkShi tava smitadyutikaNaiH shaishiryalIlAkaraiH ||94||

bhAShAyA rasanAgrakhelanajuShaH shRRi~NgAramudrAsakhI-

lIlAjAtarateH sukhena niyamasnAnAya menAtmaje |

shrIkAmAkShi sudhAmayIva shishirA srotasvinI tAvakI

gADhAnandatara~NgitA vijayate hAsaprabhAchAturI ||95||

santApaM viralIkarotu sakalaM kAmAkShi machchetanA

majjantI madhurasmitAmaradhunIkallolajAleShu te |

nairantaryamupetya manmathamarulloleShu yeShu sphuTaM

premenduH pratibimbito vitanute kautUhalaM dhUrjaTeH ||96||

chetaHkShIrapayodhimantharachaladrAgAkhyamanthAchala-

kShobhavyApRRitisambhavAM janani te mandasmitashrIsudhAm |

svAdaMsvAdamudItakautukarasA netratrayI shA~NkarI

shrIkAmAkShi nirantaraM pariNamatyAnandavIchImayI ||97||

Aloke tava pa~nchasAyakariporuddAmakautUhala-

pre~NkhanmArutaghaTTanaprachalitAdAnandadugdhAmbudheH |

kAchidvIchiruda~nchati pratinavA saMvitprarohAtmikA

tAM kAmAkShi kavIshvarAH smitamiti vyAkurvate sarvadA ||98||

sUktiH shIlayate kimadritanaye mandasmitAtte muhuH

mAdhuryAgamasampradAyamathavA sUkternu mandasmitam |

itthaM kAmapi gAhate mama manaH sandehamArgabhramiM

shrIkAmAkShi na pAramArthyasaraNisphUrtau nidhatte padam ||99||

krIDAlolakRRipAsaroruhamukhIsaudhA~NgaNebhyaH kavi-

shreNIvAkparipATikAmRRitajharIsUtIgRRihebhyaH shive |

nirvANA~NkurasArvabhaumapadavIsiMhAsanebhyastava

shrIkAmAkShi manoj~namandahasitajyotiShkaNebhyo namaH ||100||

AryAmeva vibhAvayanmanasi yaH pAdAravindaM puraH

pashyannArabhate stutiM sa niyataM labdhvA kaTAkShachChavim |

kAmAkShyA mRRidulasmitAMshulaharIjyotsnAvayasyAnvitAm

ArohatyapavargasaudhavalabhImAnandavIchImayIm ||101||

|| iti mandasmitashatakaM sampUrNam ||

|| iti shrI mUkapa~nchashatI sampUrNA ||

||auM tat sat ||