Mooka Pancha Sathi 5

mUka paJca zati 5 - mandasmita zatakam

zloka 1

badhnImo vayamaJjaliM pratidinaM bandhacchide dehinAM

kandarpAgamatantramUlagurave kalyANakelIbhuve |

kAmAkSyA ghanasArapuJjarajase kAmadruhazcakSuSAM

mandArastabakaprabhAmadamuSe mandasmitajyotiSe ||1||

sadhrIce navamallikAsumanasAM nAsAgramuktAmaNe-

rAcAryAya mRNAlakANDamahasAM naisargikAya dviSe |

svardhunyA saha yudhvena himarucerardhAsanAdhyAsine

kAmAkSyAH smitamaJjarIdhavalimAdvaitAya tasmai namaH ||2||

karpUradyuticAturImatitarAmalpIyasIM kurvatI

daurbhAgyodayameva saMvidadhatI dauSAkarINAM tviSAm |

kSullAneva manojJamallinikarAnphullAnapi vyaJjatI

kAmAkSyA mRdulasmitAMzulaharI kAmaprasUrastu me ||3||

yA pInastanamaNDalopari lasatkarpUralepAyate

yA nIlekSaNarAtrikAntitatiSu jyotsnAprarohAyate |

yA saundaryadhunItaraGgatatiSu vyAlolahaMsAyate

kAmAkSyAH zizirIkarotu hRdayaM sA me smitaprAcurI ||4||

yeSAM gacchati pUrvapakSasaraNiM kaumudvataH zvetimA

yeSAM santatamArurukSati tulAkakSyAM zaraccandramAH |

yeSAmicchati kamburapyasulabhAmantevasatprakriyAM

kAmAkSyA mamatAM harantu mama te hAsatviSAmaGkurAH ||5||

AzAsImasu santataM vidadhatI naizAkarIM vyAkriyAM

kAzAnAmabhimAnabhaGgakalanAkauzalyamAbibhratI |

IzAnena vilokitA sakutukaM kAmAkSi te kalmaSa-

klezApAyakarI cakAsti laharI mandasmitajyotiSAm ||6||

ArUDhasya samunnatastanataTIsAmrAjyasiMhAsanaM

kandarpasya vibhorjagattrayaprAkaTyamudrAnidheH |

yasyAzcAmaracAturIM kalayate razmicchaTA caJcalA

sA mandasmitamaJjarI bhavatu naH kAmAya kAmAkSi te ||7||

zambhoryA parirambhasambhramavidhau nairmalyasImAnidhiH

gairvANIva taraGgiNI kRtamRdusyandAM kalindAtmajAm |

kalmASIkurute kalaGkasuSamAM kaNThasthalIcumbinIM

kAmAkSyAH smitakandalI bhavatu naH kalyANasandohinI ||8||

jetuM hAralatAmiva stanataTIM saJjagmuSI santataM

gantuM nirmalatAmiva dviguNitAM magnA kRpAstrotasi |

labdhuM vismayanIyatAmiva haraM rAgAkulaM kurvatI

maJjuste smitamaJjarI bhavabhayaM mathnAtu kAmAkSi me ||9||

zvetApi prakaTaM nizAkararucAM mAlinyamAtanvatI

zItApi smarapAvakaM pazupateH sandhukSayantI sadA |

svAbhAvyAdadharAzritApi namatAmuccairdizantI gatiM

kAmAkSi sphuTamantarA sphuratu nastvanmandahAsaprabhA ||10||

vaktrazrIsarasIjale taralitabhrUvallikallolite

kAlimnA dadhatI kaTAkSajanuSA mAdhuvratIM vyApRtim |

nirnidrAmalapuNDarIkakuhanApANDityamAbibhratI

kAmAkSyAH smitacAturI mama manaH kAtaryamunmUlayet ||11||

nityaM bAdhitabandhujIvamadharaM maitrIjuSaM pallavaiH

zuddhasya dvijamaNDalasya ca tiraskartAramapyAzritA |

yA vaimalyavatI sadaiva namatAM cetaH punItetarAM

kAmAkSyA hRdayaM prasAdayatu me sA mandahAsaprabhA ||12||

druhyantI tamase muhuH kumudinIsAhAyyamAbibhratI

yAntI candrakizorazekharavapuHsaudhAGgaNe preGkhaNam |

jJAnAmbhonidhivIcikAM sumanasAM kUlaGkaSAM kurvatI

kAmAkSyAH smitakaumudI haratu me saMsAratApodayam ||13||

kAzmIradravadhAtukardamarucA kalmASatAM bibhratI

haMsaudhairiva kurvatI paricitiM hArIkRtairmauktikaiH |

vakSojanmatuSArazailakaTake saJcAramAtanvatI

kAmAkSyA mRdulasmitadyutimayI bhAgIrathI bhAsate ||14||

kamborvaMzaparamparA iva kRpAsantAnavallIbhuvaH

samphullastabakA iva prasRmarA mUrtAH prasAdA iva |

vAkpIyUSakaNA iva tripathagAparyAyabhedA iva

bhrAjante tava mandahAsakiraNAH kAJcIpurInAyike ||15||

vakSoje ghanasArapatraracanAbhaGgIsapatnAyitA

kaNThe mauktikahArayaSTikiraNavyApAramudrAyitA |

oSThazrInikurumbapallavapuTe preGkhatprasUnAyitA

kAmAkSi sphuratAM madIyahRdaye tvanmandahAsaprabhA ||16||

yeSAM bindurivopari pracalito nAsAgramuktAmaNiH

yeSAM dIna ivAdhikaNThamayate hAraH karAlambanam |

yeSAM bandhurivoSThayoraruNimA dhatte svayaM raJjanaM

kAmAkSyAH prabhavantu te mama zivollAsAya hAsAGkurAH ||17||

yA jADyAmbunidhiM kSiNoti bhajatAM vairAyate kairavaiH

nityaM yAM niyamena yA ca yatate kartuM triNetrotsavam |

bimbaM cAndramasaM ca vaJcayati yA garveNa sA tAdRzI

kAmAkSi smitamaJjarI tava kathaM jyotsnetyasau kIrtyate ||18||

AruDhA rabhasAtpuraH purariporAzleSaNopakrame

yA te mAtarupaiti divyataTinIzaGkAkarI tatkSaNam |

oSThau vepayati bhruvau kuTilayatyAnamrayatyAnanaM

tAM vande mRduhAsapUrasuSamAmekAmranAthapriye ||19||

vaktrendostava candrikA smitatatirvalgu sphurantI satAM

syAccedyuktimidaM cakoramanasAM kAmAkSi kautUhalam |

etaccitramaharnizaM yadadhikAmeSA ruciM gAhate

bimboSThadyumaNiprabhAsvapi ca yadbibbokamAlambate ||20||

sAdRzyaM kalazAmbudhervahati yatkAmAkSi mandasmitaM

zobhAmoSTharucAmba vidrumabhavAmetAdbhidAM brUmahe |

ekasmAduditaM purA kila papau zarvaH purANaH pumAn

etanmadhyasamudbhavaM rasayate mAdhuryarUpaM rasam ||21||

uttuGgastanakumbhazailakaTake vistArikastUrikA-

patrazrIjuSi caJcalAH smitarucaH kAmAkSi te komalAH |

sandhyAdIdhitiraJjitA iva muhuH sAndrAdharajyotiSA

vyAlolAmalazAradAbhrazakalavyApAramAtanvate ||22||

kSIraM dUrata eva tiSThatu kathaM vaimalyamAtrAdidaM

mAtaste sahapAThavIthimayatAM mandasmitairmaJjulaiH |

kiM ceyaM tu bhidAsti dohanavazAdekaM tu saJjAyate

kAmAkSi svayamarthitaM praNamatAmanyattu doduhyate ||23||

karpUrairamRtairjagajjanani te kAmAkSi candrAtapaiH

muktAhAraguNairmRNAlavalayairmugdhasmitazrIriyam |

zrIkAJcIpuranAyike samatayA saMstUyate sajjanaiH

tattAdRGmama tApazAntividhaye kiM devi mandAyate ||24||

madhyegarbhitamaJjuvAkyalaharImAdhvIjharIzItalA

mandArastabakAyate janani te mandasmitAMzucchaTA |

yasyA vardhayituM muhurvikasanaM kAmAkSi kAmadruho

valgurvIkSaNavibhramavyatikaro vAsantamAsAyate ||25||

bimboSThadyutipuJjaraJjitarucistvanmandahAsacchaTA |

kalyANaM girisArvabhaumatanaye kallolayatvAzu me |

phullanmallipinaddhahallakamayI mAleva yA pezalA

zrIkAJcIzvari mAramarditururomadhye muhurlambate ||26||

bibhrANA zaradabhravibhramadazAM vidyotamAnApyaso

kAmAkSi smitamaJjarI kirati te kAruNyadhArArasam |

AzcaryaM zizirIkaroti jagatIzcAlokya cainAmaho

kAmaM khelati nIlakaNThahRdayaM kautUhalAndolitam ||27||

preGkhatprauDhakaTAkSakuJjakuhareSvatyacchagucchAyitaM

vaktrenducchavisindhuvIcinicaye phenapratAnAyitam |

nairantaryavijRmbhitastanataTe naicolapaTTAyitaM

kAluSyaM kabalIkarotu mama te kAmAkSi mandasmitam ||28||

pIyUSaM tava mantharasmitamiti vyarthaiva sApaprathA

kAmAkSi dhruvamIdRzaM yadi bhavedetatkathaM vA zive |

mandArasya kathAlavaM na sahate mathnAti mandAkinI-

minduM nindati kIrtite'pi kalazIpAthodhimIrSyAyate ||29||

vizveSAM nayanotsavaM vitanutAM vidyotatAM candramA

vikhyAto madanAntakena mukuTImadhye ca sammAnyatAm |

AH kiM jAtamanena hAsasuSamAmAlokya kAmAkSi te

kAlaGkImavalambate khalu dazAM kalmASahIno'pyasau ||30||

cetaH zItalayantu naH pazupaterAnandajIvAtavo

namrANAM nayanAdhvasImasu zaraccandrAtapopakramAH |

saMsArAkhyasaroruhAkarakhalIkAre tuSArotkarAH

kAmAkSi smarakIrtibIjanikarAstvanmandahAsAGkurAH ||31||

karmaughAkhyatamaHkacAkacikarAnkAmAkSi saJcintaye

tvanmandasmitarociSAM tribhuvanakSemaGkarAnaGkurAn |

ye vaktraM zizirazriyo vikasitaM candrAtapAmbhoruha-

dveSoddheSoNacAturImiva tiraskartuM pariSkurvate ||32||

kuryurnaH kulazailarAjatanaye kUlaGkaSaM maGgalaM

kundaspardhanacuJcavastava zive mandasmitaprakramAH |

ye kAmAkSi samastasAkSinayanaM santoSayantIzvaraM

karpUraprakarA iva prasRmarAH puMsAmasAdhAraNAH ||33||

kamreNa snapayasva karmakuhanAcoreNa mArAgama-

vyAkhyAzikSaNadIkSitena viduSAmakSINalakSmIpuSA |

kAmAkSi smitakandalena kaluSasphoTakriyAcuJcunA

kAruNyAmRtavIcikAviharaNaprAcuryadhuryeNa mAm ||34||

tvanmandasmitakandalasya niyataM kAmAkSi zaGkAmahe

bimbaH kazcana nUtanaH pracalito naizAkaraH zIkaraH |

kiJca kSIrapayonidhiH pratinidhiH svarvAhinIvIcikA-

bibvoko'pi viDamba eva kuhanA mallImatallIrucaH ||35||

duSkarmArkanisargakarkazamahassamparkatapataM mila-

tpaGkaM zaGkaravallabhe mama manaH kAJcIpurAlaGkriye |

amba tvanmRdulasmitAmRtarase maGktvA vidhUya vyathA-

mAnandodayasaudhazRGgapadavImAroDhumAkAGkSati ||36||

namrANAM nagarAjazekharasute nAkAlayAnAM puraH

kAmAkSi tvarayA vipatprazamena kAruNyadhArAH kiran |

AgacchantamanugrahaM prakaTayannAnandabIjAni te

nAsIre mRduhAsa eva tanute nAthe sudhAzItalaH ||37||

kAmAkSi prathamAnavibhramanidhiH kandarpadarpaprasUH

mugdhaste mRduhAsa eva girije muSNAtu me kilbiSam |

yaM draSTuM vihite karagraha ume zambhustrapAmIlitaM

svairaM kArayati sma tANDavavinodAnandinA taNDunA ||38||

kSuNNaM kenacideva dhIramanasA kutrApi nAnAjanaiH

karmagranthiniyantritairasugamaM kAmAkSi sAmAnyataH |

mugdhairdruSTumazakyameva manasA mUDhasaya me mauktikaM

mArgaM darzayatu pradIpa iva te mandasmitazrIriyam ||39||

jyotsnAkAntibhireva nirmalataraM naizAkaraM maNDalaM

haMsaireva zaradvilAsasamaye vyAkocamambhoruham |

svacchaireva vikasvarairuDuguNaiH kAmAkSi bimbaM divaH

puNyaireva mRdusmitaistava mukhaM puSNAti zobhAbharam ||40||

mAnagranthividhuntudena rabhasAdAsvAdyamAne nava-

premADambarapUrNimAhimakare kAmAkSi te tatkSaNam |

Alokya smitacandrikAM punarimAmunmIlanaM jagmuSIM

cetaH zIlayate cakoracaritaM candrArdhacUDAmaNeH ||41||

kAmAkSi smitamaJjarIM tava bhaje yasyAstviSAmaGkurA-

nApInastanapAnalAlasatayA nizzaGkamaGkezayaH |

UrdhvaM vIkSya vikarSati prasRmarAnuddAmayA zuNDayA

sUnusute bisazaGkayAzu kuhanAdantAvalagrAmaNIH ||42||

gADhAzleSavimardasambhramavazAduddAmamuktAguNa-

prAlambe kucakumbhayorvigalite dakSadviSo vakSasi |

yA sakhyena pinahyati pracurayA bhAsA tadIyAM dazAM

sA me khelatu kAmakoTi hRdaye sAndrasmitAMzucchaTA ||43||

mandAre tava mantharasmitarucAM mAtsaryamAlokyate

kAmAkSi smarazAsane ca niyato rAgodayo lakSyate |

cAndrISu dyutimaJjarISu ca mahAndveSAGkuro dRzyate

zuddhAnAM kathamIdRzI girisute'tizuddhA dazA kathyatAm ||44||

pIyUSaM khalu pIyate surajanairdugdhAmbudhirmathyate

mAhezaizca jaTAkalApanigaDairmandAkinI nahyate |

zItAMzuH paribhUyate ca tamasA tasmAdanetAdRzI

kAmAkSi smitamaJjarI tava vacovaidagdhyamullaGghate ||45||

AzaGke tava mandahAsalaharImanyAdRzIM candrikA-

mekAmrezakuTumbini pratipadaM yasyAH prabhAsaGgame |

vakSojAmburuhe na te racayataH kAJciddazAM kauGmalI-

mAsyAmbhoruhamamba kiJca zanakairAlambate phullatAm ||46||

AstIrNAdharakAntipallavacaye pAtaM muhurjagmuSI

mAradrohiNi kandalatsmarazarajvAlAvalIrvyaJjatI |

nindantI ghanasArahAravalayajyotsnAmRNAlAni te

kAmAkSi smitacAturI virahiNIrItiM jagAhetarAm ||47||

sUryAlokavidhau vikAsamadhikaM yAntI harantI tama-

ssandohaM namatAM nijasmaraNato doSAkaradveSiNI |

niryAntI vadanAravindakuharAnnirdhUtajADyA nRNAM

zrIkAmAkSi tava smitadyutimayI citrIyate candrikA ||48||

kuNThIkuryuramI kubodhaghaTanAmasmanmanomAthinIM

zrIkAmAkSi zivaGkarAstava zive zrImandahAsAGkurAH |

ye tanvanti nirantaraM taruNimastamberamagrAmaNI-

kumbhadvandvaviDambini stanataTe muktAkuthADambaram ||49||

preGkhantaH zaradambudA iva zanaiH premAnilaiH preritA

majjanto mandanArikaNThasuSamAsindhau muhurmantharam |

zrIkAmAkSi tava smitAMzunikarAH zyAmAyamAnazriyo

nIlAmbhodharanaipuNIM tata ito nirnidrayantyaJjasA ||50||

vyApAraM caturAnanaikavihRtau vyAkurvatI kurvatI

rudrAkSagrahaNaM mahezi satataM vAgUrmikallolitA |

utphullaM dhavalAravindamadharIkRtya sphurantI sadA

zrIkAmAkSi sarasvatI vijayate tvanmandahAsaprabhA ||51||

karpUradyutitaskareNa mahasA kalmASayatyAnanaM

zrIkAJcIpuranAyike patiriva zrImandahAso'pi te |

AliGgatyatipIvarAM stanataTIM bimbAdharaM cumbati

prauDhaM rAgabharaM vyanakti manaso dhairyaM dhunItetarAm ||52||

vaizadyena ca vizvatApaharaNakrIDApaTIyastayA

pANDityena pacelimena jagatAM netrotsavotpAdena |

kAmAkSi smitakandalaistava tulAmAroDhumudyoginI

jyotsnAsau jalarAzipoSaNatayA dUSyAM prapannA dazAm ||53||

lAvaNyAmbujinImRNAlavalayaiH zRGgAragandhadvipa-

grAmaNyaH zruticAmaraistaruNimasvArAjyatejoGkuraiH |

AnandAmRtasindhuvIcipRSatairAsyAbjahaMsaistava

zrIkAmAkSi mathAna mandahasitairmatkaM manaHkalmaSam ||54||

uttuGgastanamaNDalIparicalanmANikyahAracchaTA-

caJcacchoNimapuJjamadhyasaraNiM mAtaH pariSkurvatI |

yA vaidagdhyamupaiti zaGkarajaTAkAntAravATIpata-

tsvarvApIpayasaH smitadyutirasau kAmAkSi te maJjulA ||55||

sannAmaikajuSA janena sulabhaM saMsUcayantI zanai-

ruttuGgasya cirAdanugrahatarorutpatsyamAnaM phalam |

prAthamyena vikasvarA kusumavatprAgalbhyamabhyeyuSI

kAmAkSi smitacAturI tava mama kSemaGkarI kalpatAm ||56||

dhAnuSkAgrasarasya lolakuTilabhrUlekhayA bibhrato

lIlAlokazilImukhaM navavayassAmrAjyalakSmIpuSaH |

jetuM manmathamardinaM janani te kAmAkSi hAsaH svayaM

valgurvibhramabhUbhRto vitanute senApatiprakriyAm ||57||

yannAkampata kAlakUTakabalIkAre cucumbe na yad-

glAnyA cakSuSi rUSitAnalazikhe rudrasya tattAdRzam |

ceto yatprasabhaM smarajvarazikhijvAlena lelihyate

tatkAmAkSi tava smitAMzukalikAhelAbhavaM prAbhavam ||58||

sambhinneva suparvalokataTinI vIcIcayairyAmunaiH

sammizreva zazAGkadIptilaharI nIlairmahAnIradaiH |

kAmAkSi sphuritA tava smitaruciH kAlAJjanaspardhinA

kAlimnA kacarociSAM vyatikare kAJciddazAmaznute ||59||

jAnImo jagadIzvarapraNayini tvanmandahAsaprabhAM

zrIkAmAkSi sarojinImabhinavAmeSA yataH sarvadA |

Asyendoravalokena pazupaterabhyeti samphullatAM

tandrAlustadabhAva eva tanute tadvaiparItyakramam ||60||

yAntI lohitimAnamabhrataTinI dhAtucchaTAkardamaiH

bhAntI bAlagabhastimAlikiraNairmeghAvalI zAradI |

bimboSThadyutipuJjacumbanakalAzoNAyamAnena te

kAmAkSi smitarociSA samadazAmAroDhumAkAGkSate ||61||

zrIkAmAkSi mukhendubhUSaNamidaM mandasmitaM tAvakaM

netrAnandakaraM tathA himakaro gacchedyathA tigmatAm |

zItaM devi tathA yathA himajalaM santApamudrAspadaM

zvetaM kiJca tathA yathA malinatAM dhatte ca muktAmaNiH ||62||

tvanmandasmitamaJjarIM prasRmarAM kAmAkSi candrAtapaM

santaH santatamAmanantyamalatA tallakSaNaM lakSyate |

asmAkaM na dhunoti tApakamadhikaM dhUnoti nAbhyantaraM

dhvAntaM tatkhalu duHkhino vayamidaM kenoti no vidmahe ||63||

namrasya praNayaprarUDhakalahacchedAya pAdAbjayoH

mandaM candrakizorazekharamaNeH kAmAkSi rAgeNa te |

bandhUkaprasavazriyaM jitavato baMhIyasIM tAdRzIM

bimboSThasya ruciM nirasya hasitajyotsnA vayasyAyate ||64||

muktAnAM parimocanaM vidadhatastatprItiniSpAdinI

bhUyo dUrata eva dhUtamarutastatpAlanaM tanvatI |

udbhUtasya jalAntarAdavirataM taddUratAM jagmuSI

kAmAkSi smitamaJjarI tava kathaM kambostulAmaznute ||65||

zrIkAmAkSi tava smitadyutijharIvaidagdhyalIlAyitaM

pazyanto'pi nirantaraM suvimalammanyA jaganmaNDale |

lokaM hAsayituM kimarthamanizaM prAkAzyamAtanvate

mandAkSaM virahayya maGgalataraM mandAracandrAdayaH ||66||

kSIrAbdherapi zailarAjatanaye tvanmandahAsasya ca

zrIkAmAkSi valakSimodayanidheH kiJcidbhidAM brUmahe |

ekasmai puruSAya devi sa dadau lakSmIM kadAcitpurA

sarvebhyo'pi dadAtyasau tu satataM lakSmIM ca vAgIzvarIm ||67||

zrIkAJcIpuraratnadIpakalike tAnyeva menAtmaje

cAkorANi kulAni devi sutarAM dhanyAni manyAmahe |

kampAtIrakuTumbacaGkramakalAcuJcUni caJcUpuTaiH

nityaM yAni tava smitendumahasAmAsvAdamAtanvate ||68||

zaityaprakramamAzrito'pi namatAM jADyaprathAM dhUnayan

nairmalyaM paramaM gato'pi girizaM rAgAkulaM cArayan |

lIlAlApapurassaro'pi satataM vAcaMyamAnprINayan

kAmAkSi smitarociSAM tava samullAsaH kathaM varNyate ||69||

zroNIcaJcalamekhalAmukharitaM lIlAgataM mantharaM

bhrUvallIcalanaM kaTAkSavalanaM mandAkSavIkSAcaNam |

yadvaidagdhyamukhena manmatharipuM sammohayantyaJjasA

zrIkAmAkSi tava smitAya satataM tasmai namsakurmahe ||70||

zrIkAmAkSi manojJamandahasitajyotiSprarohe tava

sphItazvetimasArvabhaumasaraNiprAgalbhyamabhyeyuSi |

candro'yaM yuvarAjatAM kalayate ceTIdhuraM candrikA

zuddhA sA ca sudhAjharI sahacarIsAdharmyamAlambate ||71||

jyotsnA kiM tanute phalaM tanumatAmauSNyaprazAntiM vinA

tvanmandasmitarociSA tanumatAM kAmAkSi rociSNunA |

santApo vinivAryate navavayaHprAcuryamaGkUryate

saundaryaM paripUryate jagati sA kIrtizca saJcAryate ||72||

vaimalyaM kumudazriyAM himarucaH kAntyaiva sandhukSyate

jyotsnArocirapi pradoSasamayaM prApyaiva sampadyate |

svacchatvaM navamauktikasya paramaM saMskArato dRzyate

kAmAkSyAH smitadIdhitervizadimA naisargiko bhAsate ||73||

prAkAzyaM paramezvarapraNayini tvanmandahAsazriyaH

zrIkAmAkSi mama kSiNotu mamatAvaicakSaNImakSayAm |

yadbhItyeva nilIyate himakaro meghodare zuktikA-

garbhe mauktikamaNDalI ca sarasImadhye mRNAlI ca sA ||74||

herambe ca guhe harSabharitaM vAtsalyamaGkUrayat

mAradrohiNi pUruSe sahabhuvaM premAGkuraM vyaJjayat |

AnamreSu janeSu pUrNakaruNAvaidagdhyamuttAlayat

kAmAkSi smitamaJjasA tava kathaGkAraM mayA kathyate ||75||

saGkruddhadvijarAjako'pyavirataM kurvandvijaiH saGgamaM

vANIpaddhatidUrago'pi satataM tatsAhacaryaM vahan |

azrAntaM pazudurlabho'pi kalayanpatyau pazUnAM ratiM

zrIkAmAkSi tava smitAmRtarasasyando mayi spandatAm ||76||

zrIkAmAkSi mahezvare nirupamapremAGkuraprakramamaM

nityaM yaH prakaTIkaroti sahajAmunnidrayanmAdhurIm |

tattAdRktava mandahAsamahimA mAtaH kathaM mAnitAM

tanmUrdhnA suranimnagAM ca kalikAmindozca tAM nindati ||77||

ye mAdhuryavihAramaNTapabhuvo ye zaityamudrAkarA

ye vaizadyadazAvizeSasubhagAste mandahAsAGkurAH |

kAmAkSyAH sahajaM guNatrayamidaM paryAyataH kurvatAM

vANIgumphanaDambare ca hRdaye kIrtiprarohe ca me ||78||

kAmAkSyA mRdulasmitAMzunikarA dakSAntake vIkSaNe

mandAkSagrahilA himadyutimayUkhAkSepadIkSAGkurAH |

dAkSyaM pakSmalayantu mAkSikaguDadrAkSAbhavaM vAkSu me

sUkSmaM mokSapathaM nirIkSitumapi prakSAlayeyurmanaH ||79||

jAtyA zItazItalAni madhurANyetAni pUtAni te

gAGgAnIva payAMsi devi paTalAnyalpasmitajyotiSAm |

enaHpaGkaparamparAmalinitAmekAmranAthapriye

prajJAnAtsutarAM madIyadhiSaNAM prakSAlayantu kSaNAt ||80||

azrAntaM paratantritaH pazupatistvanmandahAsAGkuraiH

zrIkAmAkSi tadIyavarNasamatAsaGgena zaGkAmahe |

induM nAkadhunIM ca zekharayate mAlAM ca dhatte navaiH

vaikuNThairavakuNThanaM ca kurute dhUlIcayairbhAsmanaiH ||81||

zrIkAJcIpuradevate mRduvacassaurabhyamudrAspadaM

prauDhapremalatAnavInakusumaM mandasmitaM tAvakam |

mandaM kandalati priyasya vadanAloke samAbhASaNe

zlakSNe kuGmalati prarUDhapulake cAzloSaNe phullati ||82||

kiM traisrotasamambike pariNataM srotazcaturthaM navaM

pIyUSasya samastatApaharaNaM kiMvA dvitIyaM vapuH |

kiMsvittvannikaTaM gataM madhurimAbhyAsAya gavyaM payaH

zrIkAJcIpuranAyakapriyatame mandasmitaM tAvakam ||83||

bhUSA vaktrasaroruhasya sahajA vAcAM sakhI zAzvatI

nIvI vibhramasantateH pazupateH saudhI dRzAM pAraNA |

jIvAturmadanazriyaH zaziruceruccATanI devatA

zrIkAmAkSi girAmabhUmimayate hAsaprabhAmaJjarI ||84||

sUtiH zvetimakandalasya vasatiH zRGgArasArazriyaH

pUrtiH sUktijharIrasasya laharI kAruNyapAthonidheH |

vATI kAcana kausumI madhurimasvArAjyalakSmyAstava

zrIkAmAkSi mamAstu maGgalakarI hAsaprabhAcAturI ||85||

jantUnAM janiduHkhamRtyulaharIsantApanaM kRntataH

prauDhAnugrahapUrNazItalaruco nityodayaM bibhrataH |

zrIkAmAkSi visRtvarA iva karA hAsAGkurAste haThA-

dAlokena nihanyurandhatamasastomasya me santatim ||86||

uttuGgastanamaNDalasya vilasallAvaNyalIlAnaTI-

raGgasya sphuTamUrdhvasImani muhuH prAkAzyamabhyeyuSI |

zrIkAmAkSi tava smitadyutitatirbimboSThakAntyaGkuraiH

citrAM vidrumamudritAM vitanute mauktIM vitAnazriyam ||87||

svAbhAvyAttava vaktrameva lalitaM santoSasampAdanaM

zambhoH kiM punaraJcitasmitarucaH pANDityapAtrIkRtam |

ambhojaM svata eva sarvajagatAM cakSuHpriyambhAvukaM

kAmAkSi sphurite zaradvikasite kIdRgvidhaM bhrAjate ||88||

pumbhirnirmalamAnasaurvidadhate maitrIM dRDhaM nirmalAM

labdhvA karmalayaM ca nirmalatarAM kIrtiM labhantetarAm |

sUktiM pakSmalayanti nirmalatamAM yattAvakAH sevakAH

tatkAmAkSi tava smitasya kalayA nairmalyasImAnidheH ||89||

AkarSannayanAni nAkisadasAM zaityena saMstambhaya-

nninduM kiJca vimohayanpazupatiM vizvArtimuccATayan |

hiMsatsaMsRtiDambaraM tava zive hAsAhvayo mAntrikaH

zrIkAmAkSi madIyamAnasatamovidveSaNe ceSTatAm ||90||

kSepIyaH kSapayantu kalmaSabhayAnyasmAkamalpasmita-

jyotirmaNDalacaGkramAstava zive kAmAkSi rociSNavaH |

pIDAkarmaThakarmagharmasamayavyApAratApAnala-

zrIpAtA navaharSavarSaNasudhAsrotasvinIzIkarAH ||91||

zrIkAmAkSi tava smitaindavamahaHpUre parimphUrjati

prauDhAM vAridhicAturIM kalayate bhaktAtmanAM prAtibham |

daurgatyaprasarAstamaHpaTalikAsAdharmyamAbibhrate

sarvaM kairavasAhacaryapadavIrItiM vidhatte param ||92||

mandArAdiSu manmathArimahiSi prAkAzyarItiM nijAM

kAdAcitkatayA vizaGkya bahuzo vaizadyamudrAguNaH |

sAtatyena tava smite vitanute svairAsanAvAsanAm ||93||

indhAne bhavavItihotranivahe karmaughacaNDAnila-

prauDhimnA bahulIkRte nipatitaM santApacintAkulam |

mAtarmAM pariSiJca kiJcidamalaiH pIyUSavarSairiva

zrIkAmAkSi tava smitadyutikaNaiH zaiziryalIlAkaraiH ||94||

bhASAyA rasanAgrakhelanajuSaH zRGgAramudrAsakhI-

lIlAjAtarateH sukhena niyamasnAnAya menAtmaje |

zrIkAmAkSi sudhAmayIva zizirA srotasvinI tAvakI

gADhAnandataraGgitA vijayate hAsaprabhAcAturI ||95||

santApaM viralIkarotu sakalaM kAmAkSi maccetanA

majjantI madhurasmitAmaradhunIkallolajAleSu te |

nairantaryamupetya manmathamarulloleSu yeSu sphuTaM

premenduH pratibimbito vitanute kautUhalaM dhUrjaTeH ||96||

cetaHkSIrapayodhimantharacaladrAgAkhyamanthAcala-

kSobhavyApRtisambhavAM janani te mandasmitazrIsudhAm |

svAdaMsvAdamudItakautukarasA netratrayI zAGkarI

zrIkAmAkSi nirantaraM pariNamatyAnandavIcImayI ||97||

Aloke tava paJcasAyakariporuddAmakautUhala-

preGkhanmArutaghaTTanapracalitAdAnandadugdhAmbudheH |

kAcidvIcirudaJcati pratinavA saMvitprarohAtmikA

tAM kAmAkSi kavIzvarAH smitamiti vyAkurvate sarvadA ||98||

sUktiH zIlayate kimadritanaye mandasmitAtte muhuH

mAdhuryAgamasampradAyamathavA sUkternu mandasmitam |

itthaM kAmapi gAhate mama manaH sandehamArgabhramiM

zrIkAmAkSi na pAramArthyasaraNisphUrtau nidhatte padam ||99||

krIDAlolakRpAsaroruhamukhIsaudhAGgaNebhyaH kavi-

zreNIvAkparipATikAmRtajharIsUtIgRhebhyaH zive |

nirvANAGkurasArvabhaumapadavIsiMhAsanebhyastava

zrIkAmAkSi manojJamandahasitajyotiSkaNebhyo namaH ||100||

AryAmeva vibhAvayanmanasi yaH pAdAravindaM puraH

pazyannArabhate stutiM sa niyataM labdhvA kaTAkSacchavim |

kAmAkSyA mRdulasmitAMzulaharIjyotsnAvayasyAnvitAm

ArohatyapavargasaudhavalabhImAnandavIcImayIm ||101||

|| iti mandasmitazatakaM sampUrNam ||

|| iti zrI mUkapaJcazatI sampUrNA ||

||auM tat sat ||