Mooka Pancha Sathi 2

mUka pa~ncha shati 2 - pAdAravinda shatakam

shloka 1

mahimnaH panthAnaM madanaparipanthipraNayini

prabhurnirNetuM te bhavati yatamAno.api katamaH |

tathApi shrIkA~nchIvihRRitirasike ko.api manaso

vipAkastvatpAdastutividhiShu jalpAkayati mAm ||1||

galagrAhI paurandarapuravanIpallavaruchAM

dhRRitapAthamyAnAmaruNamahasAmAdimaguruH |

samindhe bandhUkastabakasahayudhvA dishi dishi

prasarpankAmAkShyAshcharaNakiraNAnAmaruNimA ||2||

marAlInAM yAnAbhyasanakalanAmUlagurave

daridrANAM trANavyatikarasurodyAnatarave |

tamaskANDaprauDhiprakaTanatiraskArapaTave

jano.ayaM kAmAkShyAshcharaNanalinAya spRRihayate ||3||

vahantI saindUrIM saraNimavanamrAmarapuRI-

purandhrIsImante kavikamalabAlArkasuShamA |

trayIsImantinyAH stanataTanicholAruNapaTI

vibhAntI kAmAkShyAH padanalinakAntirvijayate ||4||

praNamrIbhUtasya praNayakalahatrastamanasaH

smarArAteshchUDAviyati gRRihamedhI himakaraH |

yayoH sAndhyAM kAntiM vahati suShamAbhishcharaNayoH

tayorme kAmAkShyA hRRidayamapatandraM viharatAm ||5||

yayoH pIThAyante vibudhamukuTInAM paTalikA

yayoH saudhAyante svayamudayabhAjo bhaNitayaH |

yayoH dAsAyante sarasijabhavAdyAshcharaNayoH

tayorme kAmAkShyA dinamanu varIvartu hRRidayam ||6||

nayantI sa~NkochaM sarasijaruchaM dikparisare

sRRijantI lauhityaM nakhakiraNachandrArdhakhachitA |

kavIndrANAM hRRitkairavavikasanodyogajananI

sphurantI kAmAkShyAH charaNaruchisandhyA vijayate ||7||

virAvairmA~njIraiH kimapi kathayantIva madhuraM

purastAdAnamre puravijayini smeravadane |

vayasyeva prauDhA shithilayati yA premakalaha-

prarohaM kAmAkShyAH charaNayugalI sA vijayate ||8||

suparvastrIlolAlakaparichitaM ShaTpadakulaiH

sphurallAkShArAgaM taruNataraNijyotiraruNaiH |

bhRRitaM kAntyambhobhiH visRRimaramarandaiH sarasijaiH

vidhatte kAmAkShyAH charaNayugalaM bandhupadavIm ||9||

rajaHsaMsarge.api sthitamarajasAmeva hRRidaye

paraM raktatvena sthitamapi viraktaikasharaNam |

alabhyaM mandAnAM dadhadapi sadA mandagatitAM

vidhatte kAmAkShyAH charaNayugamAshcharyalaharIm ||10||

jaTAlA ma~njIrasphuradaruNaratnAMshunikaraiH

niShidantI madhye nakharuchijharIgA~NgapayasAm |

jagattrANaM kartuM janani mama kAmAkShi niyataM

tapashcharyAM dhatte tava charaNapAthojayugalI ||11||

tulAkoTidvandvakkaNitabhaNitAbhItivachasoH

vinamraM kAmAkShI visRRimaramahaHpATalitayoH |

kShaNaM vinyAsena kShapitatamasorme lalitayoH

punIyAnmUrdhAnaM puraharapurandhrI charaNayoH ||12||

bhavAni druhyetAM bhavanibiDitebhyo mama muhu-

stamovyAmohebhyastava janani kAmAkShi charaNau |

yayorlAkShAbindusphuraNadharaNAddhvarjaTijaTA-

kuTIrA shoNANkaM vahati vapureNANkakalikA ||13||

pavitrIkuryurnuH padatalabhuvaH pATalaruchaH

parAgAste pApaprashamanadhurINAH parashive |

kaNaM labdhuM yeShAM nijashirasi kAmAkShi vivashA

valanto vyAtanvantyahamahamikAM mAdhavamukhAH ||14||

balAkAmAlAbhirnakharuchimayIbhiH parivRRite

vinamrasvarnArIvikachakachakAlAmbudakule |

sphurantaH kAmAkShi sphuTadalitabandhUkasuhRRida-

staTillekhAyante tava charaNapAthojakiraNAH ||15||

sarAgaH sadveShaH prasRRimarasaroje pratidinaM

nisargAdAkrAmanvibudhajanamUrdhAnamadhikam |

katha~NkAraM mAtaH kathaya padapadmastava satAM

natAnAM kAmAkShi prakaTayati kaivalyasaraNim ||16||

japAlakShmIshoNo janitaparamaj~nAnanalinI-

vikAsavyAsa~Ngo viphalitajagajjADyagarimA |

manaHpUrvAdriM me tilakayatu kAmAkShi tarasA

tamaskANDadrohI tava charaNapAthojaramaNaH ||17||

namaskurmaH pre~NkhanmaNikaTakanIlotpalamahaH-

payodhau ri~NkhadbhirnakhakiraNaphenairdhavalite |

sphuTaM kurvANAya prabalachaladaurvAnalashikhA-

vitarkaM kAmAkShyAH satatamaruNimne charaNayoH ||18||

shive pAshAyetAmalaghuni tamaHkUpakuhare

dinAdhIshAyetAM mama hRRidayapAthojavipine |

nabhomAsAyetAM sarasakavitArItisariti

tvadIyau kAmAkShi prasRRitakiraNau devi charaNau ||19||

niShaktaM shrutyante nayanamiva sadvRRittaruchiraiH

samairjuShTaM shuddhairadharamiva ramyairdvijagaNaiH |

shive vakShojanmadvitayamiva muktAshritamume

tvadIyaM kAmAkShi praNatasharaNaM naumi charaNam ||20||

namasyAsaMsajjannamuchiparipanthipraNayinI-

nisargapre~NkholatkuralakulakAlAhishabale |

nakhachChAyAdugdhodadhipayasi te vaidrumaruchAM

prachAraM kAmAkShi prachurayati pAdAbjasuShamA ||21||

kadA dUrIkartuM kaTuduritakAkolajanitaM

mahAntaM santApaM madanaparipanthipriyatame |

kShaNAtte kAmAkShi tribhuvanaparItApaharaNe

paTIyAMsaM lapsye padakamalasevAmRRitarasam ||22||

yayoH sAndhyaM rochiH satatamaruNimne spRRihayate

yayoshchAndrI kAntiH paripatati dRRiShTvA nakharuchim |

yayoH pAkodrekaM pipaThiShati bhaktyA kisalayaM

mradimnaH kAmAkShyA manasi charaNau tau tanumahe ||23||

jagannedaM nedaM paramiti parityajya yatibhiH

kushAgrIyasvAntaiH kushaladhiShaNaiH shAstrasaraNau |

gaveShyaM kAmAkShi dhruvamakRRitakAnAM girisute

girAmaidamparyaM tava charaNapadmaM vijayate ||24||

kRRitasnAnaM shAstrAmRRitasarasi kAmAkShi nitarAM

dadhAnaM vaishadyaM kalitarasamAnandasudhayA |

ala~NkAraM bhUmermunijanamanashchinmayamahA-

payodherantassthaM tava charaNaratnaM mRRigayate ||25||

manogehe mohodbhavatimirapUrNe mama muhuH

daridrANIkurvandinakarasahasrANi kiraNaiH |

vidhattAM kAmAkShi prasRRimaratamova~nchanachaNaH

kShaNArdhaM sAnnidhyaM charaNamaNidIpo janani te ||26||

kavInAM chetovannakhararuchisamparki vibudha-

sravantIsrotovatpaTumukharitaM haMsakaravaiH |

dinArambhashrIvanniyatamaruNachChAyasubhagaM

madantaH kAmAkShyAH sphuratu padapa~Nkeruhayugam ||27||

sadA kiM samparkAtprakRRitikaThinairnAkimukuTaiH

taTairnIhArAdreradhikamaNunA yogimanasA |

vibhinte sammohaM shishirayati bhaktAnapi dRRishAm

adRRishyaM kAmAkShi prakaTayati te pAdayugalam ||28||

pavitrAbhyAmamba prakRRitimRRidulAbhyAM tava shive

padAbhyAM kAmAkShi prasabhamabhibhUtaiH sachakitaiH |

pravAlairambhojairapi cha vanavAsavratadashAH

sadaivArabhyante paricharitanAnAdvijagaNaiH ||29||

chirAddRRishyA haMsaiH kathamapi sadA haMsasulabhaM

nirasyantI jADyaM niyatajaDamadhyaikasharaNam |

adoShavyAsa~NgA satatamapi doShAptimalinaM

payojaM kAmAkShyAH parihasati pAdAbjayugalI ||30||

surANAmAnandaprabalanatayA maNDanatayA

nakhendujyotsnAbhirvisRRimaratamaHkhaNDanatayA |

payojashrIdveShavrataratatayA tvachcharaNayoH

vilAsaH kAmAkShi prakaTayati naishAkaradashAm ||31||

sitimnA kAntInAM nakharajanuShAM pAdanalina-

chChavInAM shoNimnA tava janani kAmAkShi namane |

labhante mandAragrathitanavabandhUkakusuma-

srajAM sAmIchInyaM surapurapurandhrIkachabharAH ||32||

sphuranmadhye shuddhe nakhakiraNadugdhAbdhipayasAM

vahannabjaM chakraM daramapi cha lekhAtmakatayA |

shrito mAtsyaM rUpaM shriyamapi dadhAno nirupamAM

tridhAmA kAmAkShyAH padanalinanAmA vijayate ||33||

nakhashrIsannaddhastabakanichitaH svaishcha kiraNaiH

pisha~NgaiH kAmAkShi prakaTitalasatpallavaruchiH |

satAM gamyaH sha~Nke sakalaphaladAtA surataruH

tvadIyaH pAdo.ayaM tuhinagirirAjanyatanaye ||34||

vaShaTkurvanmA~njIrakalakalaiH karmalaharI-

havIMShi prauddaNDaM jvalati paramaj~nAnadahane |

mahIyAnkAmAkShi sphuTamahasi johoti sudhiyAM

manovedyAM mAtastava charaNayajvA girisute ||35||

mahAmantraM ki~nchinmaNikaTakanAdairmRRidu japan

kShipandikShu svachChaM nakharuchimayaM bhAsmanarajaH |

natAnAM kAmAkShi prakRRitipaTurachchATya mamatA-

pishAchIM pAdo.ayaM prakaTayati te mAntrikadashAm ||36||

udIte bodhendau tamasi nitarAM jagmuShi dashAM

daridrAM kAmAkShi prakaTamanurAgaM vidadhatI |

sitenAchChAdyANgaM nakharuchipaTenANghriyugalI-

purandhrI te mAtaH svayamabhisaratyeva hRRidayam ||37||

dinArambhaH sampannalinavipinAnAmabhinavo

vikAso vAsantaH sukavipikalokasya niyataH |

pradoShaH kAmAkShi prakaTaparamaj~nAnashashina-

shchakAsti tvatpAdasmaraNamahimA shailatanaye ||38||

dhRRitachChAyaM nityaM sarasiruhamaitrIparichitaM

nidhAnaM dIptInAM nikhilajagatAM bodhajanakam |

mumukShUNAM mArgaprathanapaTu kAmAkShi padavIM

padaM te pAta~NgIM parikalayate parvatasute ||39||

shanaistIrtvA mohAmbudhimatha samAroDhumanasaH

kramAtkaivalyAkhyAM sukRRitisulabhAM saudhavalabhIm |

labhante niHshreNImiva jhaTiti kAmAkShi charaNaM

purashcharyAbhiste puramathanasImantini janAH ||40||

prachaNDArtikShobhapramathanakRRite prAtibhasari-

tpravAhaproddaNDIkaraNajaladAya praNamatAm |

pradIpAya prauDhe bhavatamasi kAmAkShi charaNa-

prasAdaunmukhyAya spRRihayati jano.ayaM janani te ||41||

marudbhiH saMsevyA satatamapi chA~nchalyarahitA

sadAruNyaM yAntI pariNatidaridrANasuShamA |

guNotkarShAnmA~njIrakakalakalaistarjanapaTuH

pravAlaM kAmAkShyAH parihasati pAdAbjayugalI ||42||

jagadrakShAdakShA jalajaruchishikShApaTutarA

samairnamyA ramyA satatamabhigamyA budhajanaiH |

dvayI lIlAlolA shrutiShu surapAlAdimukuTI-

taTIsImAdhAmA tava janani kAmAkShi padayoH ||43||

girAM dUrau chorau jaDimatimirANAM kRRitajaga-

tparitrANau shoNau munihRRidayalIlaikanipuNau |

nakhaiH smerau sArau nigamavachasAM khaNDitabhava-

grahonmAdau pAdau tava janani kAmAkShi kalaye ||44||

avishrAntaM pa~NkaM yadapi kalayanyAvakamayaM

nirasyankAmAkShi praNamanajuShAM pa~Nkamakhilam |

tulAkoTidvandaM dadhadapi cha gachChannatulatAM

girAM mArgaM pAdo girivarasute la~Nghayati te ||45||

pravAlaM savrIlaM vipinavivare vepayati yA

sphurallIlaM bAlAtapamadhikabAlaM vadati yA |

ruchiM sAndhyAM vandhyAM virachayati yA vardhayatu sA

shivaM me kAmAkShyAH padanalinapATalyalaharI ||46||

kira~njyotsnArItiM nakhamukharuchA haMsamanasAM

vitanvAnaH prItiM vikachataruNAmbhoruharuchiH |

prakAshaH shrIpAdastava janani kAmAkShi tanute

sharatkAlaprauDhiM shashishakalachUDapriyatame ||47||

nakhANkUrasmeradyutivimalagaNgAmbhasi sukhaM

kRRitasnAnaM j~nAnAmRRitamamalamAsvAdya niyatam |

udanchanmanjIrasphuraNamaNidIpe mama mano

manoj~ne kAmAkShyAshcharaNamaNiharmye viharatAm ||48||

bhavAmbhodhau naukAM jaDimavipine pAvakashikhA-

mamartyendrAdInAmadhimukuTamuttaMsakalikAm |

jagattApe jyotsnAmakRRitakavachaHpa~njarapuTe

shukastrIM kAmAkShyA manasi kalaye pAdayugalIm ||49||

paratmaprAkAshyapratiphalanachu~nchuH praNamatAM

manoj~nastvatpAdo maNimukuramudrAM kalayate |

yadIyAM kAmAkShi prakRRitimasRRiNAH shodhakadashAM

vidhAtuM cheShThante balaripuvadhUTIkachabharAH ||50||

avishrAntaM tiShThannakRRitakavachaHkandarapuTI-

kuTIrAntaH prauDhaM nakharuchisaTAlIM prakaTayan |

prachaNDaM khaNDatvaM nayatu mama kAmAkShi tarasA

tamovetaNDendraM tava charaNakaNThIravapatiH ||51||

purastAtkAmAkShi prachurarasamAkhaNDalapurI-

purandhrINAM lAsyaM tava lalitamAlokya shanakaiH |

nakhashrIbhiH smerA bahu vitanute nUpuraravai-

shchamatkRRityA sha~Nke charaNayugalI chATurachanAH ||52||

sarojaM nindantI nakhakiraNakarpUrashishirA

niShiktA mArArermukuTashashirekhAhimajalaiH |

sphurantI kAmAkShi sphuTaruchimaye pallavachaye

tavAdhatte maitrIM pathikasudRRishA pAdayugalI ||53||

natAnAM sampatteranavaratamAkarShaNajapaH

prarohatsaMsAraprasaragarimastambhanajapaH |

tvadIyaH kAmAkShi smaraharamanomohanajapaH

paTIyAnnaH pAyAtpadanalinama~njIraninadaH ||54||

vitanvIthA nAthe mama shirasi kAmAkShi kRRipayA

padAmbhojanyAsaM pashuparibRRiDhaprANadayite |

pibanto yanmudrAM prakaTamupakampAparisaraM

dRRishA nAnandyante nalinabhavanArAyaNamukhAH ||55||

praNAmodyadbRRindAramukuTamandArakalikA-

vilolallolambaprakaramayadhUmaprachurimA |

pradIptaH pAdAbjadyutivitatipATalyalaharI-

kRRishAnuH kAmAkShyA mama dahatu saMsAravipinam ||56||

valakShashrIrRRikShAdhipashishusadRRikShaistava nakhaiH

jighRRikShurdakShatvaM sarasiruhabhikShutvakaraNe |

kShaNAnme kAmAkShi kShapitabhavasa~NkShobhagarimA

vachovaichakShanyaM charaNayugalI pakShmalayatAt ||57||

samantAtkAmAkShi kShatatimirasantAnasubhagAn

anantAbhirbhAbhirdinamanu digantAnvirachayan |

ahantAyA hantA mama jaDimadantAvalahariH

vibhintAM santApaM tava charaNachintAmaNirasau ||58||

dadhAno bhAsvattAmamRRitanilayo lohitavapuH

vinamrANAM saumyo gururapi kavitvaM cha kalayan |

gatau mando ga~NgAdharamahiShi kAmAkShi bhajatAM

tamaHketurmAtastava charaNapadmo vijayate ||59||

nayantIM dAsatvaM nalinabhavamukhyAnasulabha-

pradAnAddInAnAmamaratarudaurbhAgyajananIm |

jagajjanmakShemakShayavidhiShu kAmAkShi padayo-

rdhurINAmIShTe karastava bhaNitumAhopuruShikAm ||60||

jano.ayaM santapto janani bhavachaNDAMshukiraNaiH

alabdhavaikaM shItaM kaNamapi paraj~nAnapayasaH |

tamomArge pAnthastava jhaTiti kAmAkShi shishirAM

padAmbhojachChAyAM paramashivajAye mRRigayate ||61||

jayatyamba shrImannakhakiraNachInAMshukamayaM

vitAnaM bibhrANe suramukuTasa~NghaTTamasRRiNe |

nijAruNyakShaumAstaraNavati kAmAkShi sulabhA

budhaiH saMvinnArI tava charaNamANikyabhavane ||62||

pratImaH kAmAkShi sphuritataruNAdityakiraNa-

shriyo mUladravyaM tava charaNamadrIndratanaye |

surendrAshAmApUrayati yadasau dhvAntamakhilaM

dhunIte digbhAgAnapi cha mahasA pATalayate ||63||

mahAbhAShyavyAkhyApaTushayanamAropayati vA

smaravyApArerShyApishunaniTilaM kArayati vA |

dvirephANAmadhyAsayati satataM vAdhivasatiM

praNamrAnkAmAkShyAH padanalinamAhAtmyagarimA ||64||

vivekAmbhassrotassnapanaparipATIshishirite

samIbhUte shAstrasmaraNahalasa~NkarShaNavashAt |

satAM chetaHkShetre vapati tava kAmAkShi charaNo

mahAsaMvitsasyaprakaravarabIjaM girisute ||65||

dadhAno mandArastabakaparipATIM nakharuchA

vahandIptAM shoNA~NgulipaTalachAmpeyakalikAm |

ashokollAsaM naH prachurayatu kAmAkShi charaNo

vikAsI vAsantaH samaya iva te sharvadayite ||66||

nakhAMshuprAchuryaprasRRimaramarAlAlidhavalaH

sphuranma~njIrodyanmarakatamahashshaivalayutaH |

bhavatyAH kAmAkShi sphuTacharaNapATalyakapaTo

nadaH shoNAbhikhyo nagapatitanUje vijayate ||67||

dhunAnaM pa~NkaughaM paramasulabhaM kaNTakakulaiH

vikAsavyAsa~NgaM vidadhadaparAdhInamanisham |

nakhendujyotsnAbhirvishadaruchi kAmAkShi nitarAm

asAmAnyaM manye sarasijamidaM te padayugam ||68||

karIndrAya druhyatyalasagatilIlAsu vimalaiH

payojairmAtsaryaM prakaTayati kAmaM kalayate |

padAmbhojadvandvaM tava tadapi kAmAkShi hRRidayaM

munInAM shAntAnAM kathamanishamasmai spRRihayate ||69||

nirastA shoNimnA charaNakiraNAnAM tava shive

samindhAnA sandhyAruchirachalarAjanyatanaye |

asAmarthyAdenaM paribhavitumetatsamaruchAM

sarojAnAM jAne mukulayati shobhAM pratidinam ||70||

upAdikShaddAkShyaM tava charaNanAmA gururasau

marAlAnAM sha~Nke masRRiNagatilAlityasaraNau |

ataste nistandraM niyatamamunA sakhyapadavIM

prapannaM pAthojaM prati dadhati kAmAkShi kutukam ||71||

dadhAnaiH saMsargaM prakRRitimalinaiH ShaTpadakulaiH

dvijAdhIshashlAghAvidhiShu vidadhadbhirmukulatAm |

rajomishraiH padmairniyatamapi kAmAkShi padayoH

virodhaste yukto viShamasharavairipriyatame ||72||

kavitvashrImishrIkaraNanipuNau rakShaNachaNau

vipannAnAM shrImannalinamasRRiNau shoNakiraNau |

munIndrANAmantaHkaraNasharaNau mandasaraNau

manoj~nau kAmAkShyA duritaharaNau naumi charaNau ||73||

parasmAtsarvasmAdapi cha parayormuktikarayoH

nakhashrIbhirjyotsnAkalitatulayostAmratalayoH |

nilIye kAmAkShyA nigamanutayornAkinatayoH

nirastapronmIlannalinamadayoreva padayoH ||74||

svabhAvAdanyonyaM kisalayamapIdaM tava padaM

mradimnA shoNimnA bhagavati dadhAte sadRRishatAm |

vane pUrvasyechChA satatamavane kiM tu jagatAM

parasyetthaM bhedaH sphurati hRRidi kAmAkShi sudhiyAm ||75||

kathaM vAchAlo.api prakaTamaNima~njIraninadaiH

sadaivAnandArdrAnvirachayati vAchaMyamajanAn |

prakRRityA te shoNachChavirapi cha kAmAkShi charaNo

manIShAnairmalyaM kathamiva nRRiNAM mAMsalayate ||76||

chalattRRiShNAvIchIparichalanaparyAkulatayA

muhurbhrAntastAntaH paramashivavAmAkShi paravAn |

titIrShuH kAmAkShi prachuratarakarmAmbudhimamuM

kadAhaM lapsye te charaNamaNisetuM girisute ||77||

vishuShyantyAM praj~nAsariti duritagrIShmasamaya-

prabhAveNa kShINe sati mama manaHkekini shuchA |

tvadIyaH kAmAkShi sphuritacharaNAmbhodamahimA

nabhomAsATopaM nagapatisute kiM na kurute ||78||

vinamrANAM chetobhavanavalabhIsImni charaNa-

pradIpe prAkAshyaM dadhati tava nirdhUtatamasi |

asImA kAmAkShi svayamalaghuduShkarmalaharI

vighUrNantI shAntiM shalabhaparipATIva bhajate ||79||

virAjantI shuktirnakhakiraNamuktAmaNitateH

vipatpAthorAshau tarirapi narANAM praNamatAm |

tvadIyaH kAmAkShi dhruvamalaghuvahnirbhavavane

munInAM jnAnAgneraraNirayamaNghirvijayate ||80||

samastaiH saMsevyaH satatamapi kAmAkShi vibudhaiH

stuto gandharvastrIsulalitavipa~nchIkalaravaiH |

bhavatyA bhindAno bhavagirikulaM jRRimbhitatamo-

baladrohI mAtashcharaNapuruhUto vijayate ||81||

vasantaM bhaktAnAmapi manasi nityaM parilasad-

ghanachChAyApUrNaM shuchimapi nRRiNAM tApashamanam |

nakhendujyotsnAbhiH shishiramapi padmodayakaraM

namAmaH kAmAkShyAshcharaNamadhikAshcharyakaraNam ||82||

kavIndrANAM nAnAbhaNitiguNachitrIkRRitavachaH-

prapa~nchavyApAraprakaTanakalAkaushalanidhiH |

adhaHkurvannabjaM sanakabhRRigumukhyairmunijanaiH

namasyaH kAmAkShyAshcharaNaparameShThI vijayate ||83||

bhavatyAH kAmAkShi sphuritapadapa~NkeruhabhuvAM

parAgANAM pUraiH parihRRitakala~NkavyatikaraiH |

natAnAmAmRRiShTe hRRidayamukure nirmalaruchi

prasanne nishsheShaM pratiphalati vishvaM girisute ||84||

tava trastaM pAdAtkisalayamaraNyAntaramagAt

paraM rekhArUpaM kamalamamumevAshritamabhUt |

jitAnAM kAmAkShi dvitayamapi yuktaM paribhave

videshe vAso vA sharaNagamanaM vA nijaripoH ||85||

gRRihItvA yAthArthyaM nigamavachasAM deshikakRRipA-

kaTAkSharkajyotishshamitamamatAbandhatamasaH |

yatante kAmAkShi pratidivasamantardraDhayituM

tvadIyaM pAdAbjaM sukRRitaparipAkena sujanAH ||86||

jaDAnAmapyamba smaraNasamaye tavachcharaNayoH

bhramanmanthakShmAbhRRiddhumughumitasindhupratibhaTAH |

prasannAH kAmAkShi prasabhamadharaspandanakarA

bhavanti svachChandaM prakRRitiparipakkA bhaNitayaH ||87||

vahannapyashrAntaM madhuraninadaM haMsakamasau

tamevAdhaH kartuM kimiva yatate keligamane |

bhavasyaivAnandaM vidadhadapi kAmAkShi charaNo

bhavatyAstaddrohaM bhagavati kimevaM vitanute ||88||

yadatyantaM tAmyatyalasagativArtAsvapi shive

tadetatkAmAkShi prakRRitimRRidulaM te padayugam |

kirITaiH sa~NghaTTaM kathamiva suraughasya sahate

munIndrANAmAste manasi cha kathaM sUchinishite ||89||

manora~Nge matke vibudhajanasammodajananI

sarAgavyAsaNgaM sarasamRRidusanchArasubhagA |

manoj~nA kAmAkShi prakaTayatu lAsyaprakaraNaM

raNanma~njIrA te charaNayugalInartakavadhUH ||90||

pariShkurvanmAtaH pashupatikapardaM charaNarAT

parAchAM hRRitpadmaM paramabhaNitInAM cha makuTam |

bhavAkhye pAthodhau pariharatu kAmAkShi mamatA-

parAdhInatvaM me parimuShitapAthojamahimA ||91||

prasUnaiH samparkAdamarataruNIkuntalabhavaiH

abhIShTAnAM dAnAdanishamapi kAmAkShi namatAm |

svasaNgAtkaNkeliprasavajanakatvena cha shive

tridhA dhatte vArtAM surabhiriti pAdo girisute ||92||

mahAmohastenavyatikarabhayAtpAlayati yo

vinikShiptaM svasminnijajanamanoratnamanisham |

sa rAgasyodrekAtsatatamapi kAmAkShi tarasA

kimevaM pAdo.asau kisalayaruchiM chorayati te ||93||

sadA svAdu~NkAraM viShayalaharIshAlikaNikAM

samAsvAdya shrAntaM hRRidayashukapotaM janani me |

kRRipAjAle phAlekShaNamahiShi kAmAkShi rabhasAt

gRRihItvA rundhIthArastava padayugIpa~njarapuTe ||94||

dhunAnaM kAmAkShi smaraNalavamAtreNa jaDima-

jvaraprauDhiM gUDhasthiti nigamanaiku~njakuhare |

alabhyaM sarveShAM katichana labhante sukRRitinaH

chirAdanviShyantastava charaNasiddhauShadhamidam ||95||

raNanma~njIrAbhyAM lalitagamanAbhyAM sukRRitinAM

manovAstavyAbhyAM mathitatimirAbhyAM nakharuchA |

nidheyAbhyAM patyA nijashirasi kAmAkShi satataM

namaste pAdAbhyAM nalinamRRidulAbhyAM girisute ||96||

surAge rAkendupratinidhimukhe parvatasute

chirAllabhye bhaktyA shamadhanajanAnAM pariShadA |

manobhRRi~Ngo matkaH padakamalayugme janani te

prakAmaM kAmAkShi tripuraharavAmAkShi ramatAm ||97||

shive saMvidrUpe shashishakalachUDapriyatame

shanairgatyAgatyA jitasuravarebhe girisute |

yatante santaste charaNanalinAlAnayugale

sadA baddhaM chittapramadakariyUthaM dRRiDhataram ||98||

yashaH sUte mAtarmadhurakavitAM pakShmalayate

shriyaM datte chitte kamapi paripAkaM prathayate |

satAM pAshagranthiM shithilayati kiM kiM na kurute

prapanne kAmAkShyAH praNatiparipATI charaNayoH ||99||

manIShAM mAhendrIM kakubhamiva te kAmapi dashAM

pradhatte kAmAkShyAshcharaNataruNAdityakiraNaH |

yadIye samparke dhRRitarasamarandA kavayatAM

parIpAkaM dhatte parimalavatI sUktinalinI ||100||

purA mArArAtiH puramajayadamba stavashataiH

prasannAyAM satyAM tvayi tuhinashailendratanaye |

ataste kAmAkShi sphuratu tarasA kAlasamaye

samAyAte mAtarmama manasi pAdAbjayugalam ||101||

padadvandvaM mandaM gatiShu nivasantaM hRRidi satAM

girAmante bhrAntaM kRRitakarahitAnAM paribRRiDhe |

janAnAmAnandaM janani janayantaM praNamatAM

tvadIyaM kAmAkShi pratidinamahaM naumi vimalam ||102||

idaM yaH kAmAkShyAshcharaNanalinastotrashatakaM

japennityaM bhaktyA nikhilajagadAhlAdajanakam |

sa vishveShAM vandyaH sakalakavilokaikatilakaH

chiraM bhuktvA bhogAnpariNamati chidrUpakalayA ||103||

|| iti pAdAravindashatakaM sampUrNam ||