Mooka Pancha Sathi 2

mUka paJca zati 2 - pAdAravinda zatakam

mahimnaH panthAnaM madanaparipanthipraNayini

prabhurnirNetuM te bhavati yatamAno'pi katamaH |

tathApi zrIkAJcIvihRtirasike ko'pi manaso

vipAkastvatpAdastutividhiSu jalpAkayati mAm ||1||

galagrAhI paurandarapuravanIpallavarucAM

dhRtapAthamyAnAmaruNamahasAmAdimaguruH |

samindhe bandhUkastabakasahayudhvA dizi dizi

prasarpankAmAkSyAzcaraNakiraNAnAmaruNimA ||2||

marAlInAM yAnAbhyasanakalanAmUlagurave

daridrANAM trANavyatikarasurodyAnatarave |

tamaskANDaprauDhiprakaTanatiraskArapaTave

jano'yaM kAmAkSyAzcaraNanalinAya spRhayate ||3||

vahantI saindUrIM saraNimavanamrAmarapur2I-

purandhrIsImante kavikamalabAlArkasuSamA |

trayIsImantinyAH stanataTanicolAruNapaTI

vibhAntI kAmAkSyAH padanalinakAntirvijayate ||4||

praNamrIbhUtasya praNayakalahatrastamanasaH

smarArAtezcUDAviyati gRhamedhI himakaraH |

yayoH sAndhyAM kAntiM vahati suSamAbhizcaraNayoH

tayorme kAmAkSyA hRdayamapatandraM viharatAm ||5||

yayoH pIThAyante vibudhamukuTInAM paTalikA

yayoH saudhAyante svayamudayabhAjo bhaNitayaH |

yayoH dAsAyante sarasijabhavAdyAzcaraNayoH

tayorme kAmAkSyA dinamanu varIvartu hRdayam ||6||

nayantI saGkocaM sarasijarucaM dikparisare

sRjantI lauhityaM nakhakiraNacandrArdhakhacitA |

kavIndrANAM hRtkairavavikasanodyogajananI

sphurantI kAmAkSyAH caraNarucisandhyA vijayate ||7||

virAvairmAJjIraiH kimapi kathayantIva madhuraM

purastAdAnamre puravijayini smeravadane |

vayasyeva prauDhA zithilayati yA premakalaha-

prarohaM kAmAkSyAH caraNayugalI sA vijayate ||8||

suparvastrIlolAlakaparicitaM SaTpadakulaiH

sphurallAkSArAgaM taruNataraNijyotiraruNaiH |

bhRtaM kAntyambhobhiH visRmaramarandaiH sarasijaiH

vidhatte kAmAkSyAH caraNayugalaM bandhupadavIm ||9||

rajaHsaMsarge'pi sthitamarajasAmeva hRdaye

paraM raktatvena sthitamapi viraktaikazaraNam |

alabhyaM mandAnAM dadhadapi sadA mandagatitAM

vidhatte kAmAkSyAH caraNayugamAzcaryalaharIm ||10||

jaTAlA maJjIrasphuradaruNaratnAMzunikaraiH

niSidantI madhye nakharucijharIgAGgapayasAm |

jagattrANaM kartuM janani mama kAmAkSi niyataM

tapazcaryAM dhatte tava caraNapAthojayugalI ||11||

tulAkoTidvandvakkaNitabhaNitAbhItivacasoH

vinamraM kAmAkSI visRmaramahaHpATalitayoH |

kSaNaM vinyAsena kSapitatamasorme lalitayoH

punIyAnmUrdhAnaM puraharapurandhrI caraNayoH ||12||

bhavAni druhyetAM bhavanibiDitebhyo mama muhu-

stamovyAmohebhyastava janani kAmAkSi caraNau |

yayorlAkSAbindusphuraNadharaNAddhvarjaTijaTA-

kuTIrA zoNAGkaM vahati vapureNAGkakalikA ||13||

pavitrIkuryurnuH padatalabhuvaH pATalarucaH

parAgAste pApaprazamanadhurINAH parazive |

kaNaM labdhuM yeSAM nijazirasi kAmAkSi vivazA

valanto vyAtanvantyahamahamikAM mAdhavamukhAH ||14||

balAkAmAlAbhirnakharucimayIbhiH parivRte

vinamrasvarnArIvikacakacakAlAmbudakule |

sphurantaH kAmAkSi sphuTadalitabandhUkasuhRda-

staTillekhAyante tava caraNapAthojakiraNAH ||15||

sarAgaH sadveSaH prasRmarasaroje pratidinaM

nisargAdAkrAmanvibudhajanamUrdhAnamadhikam |

kathaGkAraM mAtaH kathaya padapadmastava satAM

natAnAM kAmAkSi prakaTayati kaivalyasaraNim ||16||

japAlakSmIzoNo janitaparamajJAnanalinI-

vikAsavyAsaGgo viphalitajagajjADyagarimA |

manaHpUrvAdriM me tilakayatu kAmAkSi tarasA

tamaskANDadrohI tava caraNapAthojaramaNaH ||17||

namaskurmaH preGkhanmaNikaTakanIlotpalamahaH-

payodhau riGkhadbhirnakhakiraNaphenairdhavalite |

sphuTaM kurvANAya prabalacaladaurvAnalazikhA-

vitarkaM kAmAkSyAH satatamaruNimne caraNayoH ||18||

zive pAzAyetAmalaghuni tamaHkUpakuhare

dinAdhIzAyetAM mama hRdayapAthojavipine |

nabhomAsAyetAM sarasakavitArItisariti

tvadIyau kAmAkSi prasRtakiraNau devi caraNau ||19||

niSaktaM zrutyante nayanamiva sadvRttaruciraiH

samairjuSTaM zuddhairadharamiva ramyairdvijagaNaiH |

zive vakSojanmadvitayamiva muktAzritamume

tvadIyaM kAmAkSi praNatazaraNaM naumi caraNam ||20||

namasyAsaMsajjannamuciparipanthipraNayinI-

nisargapreGkholatkuralakulakAlAhizabale |

nakhacchAyAdugdhodadhipayasi te vaidrumarucAM

pracAraM kAmAkSi pracurayati pAdAbjasuSamA ||21||

kadA dUrIkartuM kaTuduritakAkolajanitaM

mahAntaM santApaM madanaparipanthipriyatame |

kSaNAtte kAmAkSi tribhuvanaparItApaharaNe

paTIyAMsaM lapsye padakamalasevAmRtarasam ||22||

yayoH sAndhyaM rociH satatamaruNimne spRhayate

yayozcAndrI kAntiH paripatati dRSTvA nakharucim |

yayoH pAkodrekaM pipaThiSati bhaktyA kisalayaM

mradimnaH kAmAkSyA manasi caraNau tau tanumahe ||23||

jagannedaM nedaM paramiti parityajya yatibhiH

kuzAgrIyasvAntaiH kuzaladhiSaNaiH zAstrasaraNau |

gaveSyaM kAmAkSi dhruvamakRtakAnAM girisute

girAmaidamparyaM tava caraNapadmaM vijayate ||24||

kRtasnAnaM zAstrAmRtasarasi kAmAkSi nitarAM

dadhAnaM vaizadyaM kalitarasamAnandasudhayA |

alaGkAraM bhUmermunijanamanazcinmayamahA-

payodherantassthaM tava caraNaratnaM mRgayate ||25||

manogehe mohodbhavatimirapUrNe mama muhuH

daridrANIkurvandinakarasahasrANi kiraNaiH |

vidhattAM kAmAkSi prasRmaratamovaJcanacaNaH

kSaNArdhaM sAnnidhyaM caraNamaNidIpo janani te ||26||

kavInAM cetovannakhararucisamparki vibudha-

sravantIsrotovatpaTumukharitaM haMsakaravaiH |

dinArambhazrIvanniyatamaruNacchAyasubhagaM

madantaH kAmAkSyAH sphuratu padapaGkeruhayugam ||27||

sadA kiM samparkAtprakRtikaThinairnAkimukuTaiH

taTairnIhArAdreradhikamaNunA yogimanasA |

vibhinte sammohaM zizirayati bhaktAnapi dRzAm

adRzyaM kAmAkSi prakaTayati te pAdayugalam ||28||

pavitrAbhyAmamba prakRtimRdulAbhyAM tava zive

padAbhyAM kAmAkSi prasabhamabhibhUtaiH sacakitaiH |

pravAlairambhojairapi ca vanavAsavratadazAH

sadaivArabhyante paricaritanAnAdvijagaNaiH ||29||

cirAddRzyA haMsaiH kathamapi sadA haMsasulabhaM

nirasyantI jADyaM niyatajaDamadhyaikazaraNam |

adoSavyAsaGgA satatamapi doSAptimalinaM

payojaM kAmAkSyAH parihasati pAdAbjayugalI ||30||

surANAmAnandaprabalanatayA maNDanatayA

nakhendujyotsnAbhirvisRmaratamaHkhaNDanatayA |

payojazrIdveSavrataratatayA tvaccaraNayoH

vilAsaH kAmAkSi prakaTayati naizAkaradazAm ||31||

sitimnA kAntInAM nakharajanuSAM pAdanalina-

cchavInAM zoNimnA tava janani kAmAkSi namane |

labhante mandAragrathitanavabandhUkakusuma-

srajAM sAmIcInyaM surapurapurandhrIkacabharAH ||32||

sphuranmadhye zuddhe nakhakiraNadugdhAbdhipayasAM

vahannabjaM cakraM daramapi ca lekhAtmakatayA |

zrito mAtsyaM rUpaM zriyamapi dadhAno nirupamAM

tridhAmA kAmAkSyAH padanalinanAmA vijayate ||33||

nakhazrIsannaddhastabakanicitaH svaizca kiraNaiH

pizaGgaiH kAmAkSi prakaTitalasatpallavaruciH |

satAM gamyaH zaGke sakalaphaladAtA surataruH

tvadIyaH pAdo'yaM tuhinagirirAjanyatanaye ||34||

vaSaTkurvanmAJjIrakalakalaiH karmalaharI-

havIMSi prauddaNDaM jvalati paramajJAnadahane |

mahIyAnkAmAkSi sphuTamahasi johoti sudhiyAM

manovedyAM mAtastava caraNayajvA girisute ||35||

mahAmantraM kiJcinmaNikaTakanAdairmRdu japan

kSipandikSu svacchaM nakharucimayaM bhAsmanarajaH |

natAnAM kAmAkSi prakRtipaTuraccATya mamatA-

pizAcIM pAdo'yaM prakaTayati te mAntrikadazAm ||36||

udIte bodhendau tamasi nitarAM jagmuSi dazAM

daridrAM kAmAkSi prakaTamanurAgaM vidadhatI |

sitenAcchAdyAGgaM nakharucipaTenAGghriyugalI-

purandhrI te mAtaH svayamabhisaratyeva hRdayam ||37||

dinArambhaH sampannalinavipinAnAmabhinavo

vikAso vAsantaH sukavipikalokasya niyataH |

pradoSaH kAmAkSi prakaTaparamajJAnazazina-

zcakAsti tvatpAdasmaraNamahimA zailatanaye ||38||

dhRtacchAyaM nityaM sarasiruhamaitrIparicitaM

nidhAnaM dIptInAM nikhilajagatAM bodhajanakam |

mumukSUNAM mArgaprathanapaTu kAmAkSi padavIM

padaM te pAtaGgIM parikalayate parvatasute ||39||

zanaistIrtvA mohAmbudhimatha samAroDhumanasaH

kramAtkaivalyAkhyAM sukRtisulabhAM saudhavalabhIm |

labhante niHzreNImiva jhaTiti kAmAkSi caraNaM

purazcaryAbhiste puramathanasImantini janAH ||40||

pracaNDArtikSobhapramathanakRte prAtibhasari-

tpravAhaproddaNDIkaraNajaladAya praNamatAm |

pradIpAya prauDhe bhavatamasi kAmAkSi caraNa-

prasAdaunmukhyAya spRhayati jano'yaM janani te ||41||

marudbhiH saMsevyA satatamapi cAJcalyarahitA

sadAruNyaM yAntI pariNatidaridrANasuSamA |

guNotkarSAnmAJjIrakakalakalaistarjanapaTuH

pravAlaM kAmAkSyAH parihasati pAdAbjayugalI ||42||

jagadrakSAdakSA jalajarucizikSApaTutarA

samairnamyA ramyA satatamabhigamyA budhajanaiH |

dvayI lIlAlolA zrutiSu surapAlAdimukuTI-

taTIsImAdhAmA tava janani kAmAkSi padayoH ||43||

girAM dUrau corau jaDimatimirANAM kRtajaga-

tparitrANau zoNau munihRdayalIlaikanipuNau |

nakhaiH smerau sArau nigamavacasAM khaNDitabhava-

grahonmAdau pAdau tava janani kAmAkSi kalaye ||44||

avizrAntaM paGkaM yadapi kalayanyAvakamayaM

nirasyankAmAkSi praNamanajuSAM paGkamakhilam |

tulAkoTidvandaM dadhadapi ca gacchannatulatAM

girAM mArgaM pAdo girivarasute laGghayati te ||45||

pravAlaM savrIlaM vipinavivare vepayati yA

sphurallIlaM bAlAtapamadhikabAlaM vadati yA |

ruciM sAndhyAM vandhyAM viracayati yA vardhayatu sA

zivaM me kAmAkSyAH padanalinapATalyalaharI ||46||

kiraJjyotsnArItiM nakhamukharucA haMsamanasAM

vitanvAnaH prItiM vikacataruNAmbhoruharuciH |

prakAzaH zrIpAdastava janani kAmAkSi tanute

zaratkAlaprauDhiM zazizakalacUDapriyatame ||47||

nakhAGkUrasmeradyutivimalagaGgAmbhasi sukhaM

kRtasnAnaM jJAnAmRtamamalamAsvAdya niyatam |

udaJcanmaJjIrasphuraNamaNidIpe mama mano

manojJe kAmAkSyAzcaraNamaNiharmye viharatAm ||48||

bhavAmbhodhau naukAM jaDimavipine pAvakazikhA-

mamartyendrAdInAmadhimukuTamuttaMsakalikAm |

jagattApe jyotsnAmakRtakavacaHpaJjarapuTe

zukastrIM kAmAkSyA manasi kalaye pAdayugalIm ||49||

paratmaprAkAzyapratiphalanacuJcuH praNamatAM

manojJastvatpAdo maNimukuramudrAM kalayate |

yadIyAM kAmAkSi prakRtimasRNAH zodhakadazAM

vidhAtuM ceSThante balaripuvadhUTIkacabharAH ||50||

avizrAntaM tiSThannakRtakavacaHkandarapuTI-

kuTIrAntaH prauDhaM nakharucisaTAlIM prakaTayan |

pracaNDaM khaNDatvaM nayatu mama kAmAkSi tarasA

tamovetaNDendraM tava caraNakaNThIravapatiH ||51||

purastAtkAmAkSi pracurarasamAkhaNDalapurI-

purandhrINAM lAsyaM tava lalitamAlokya zanakaiH |

nakhazrIbhiH smerA bahu vitanute nUpuraravai-

zcamatkRtyA zaGke caraNayugalI cATuracanAH ||52||

sarojaM nindantI nakhakiraNakarpUrazizirA

niSiktA mArArermukuTazazirekhAhimajalaiH |

sphurantI kAmAkSi sphuTarucimaye pallavacaye

tavAdhatte maitrIM pathikasudRzA pAdayugalI ||53||

natAnAM sampatteranavaratamAkarSaNajapaH

prarohatsaMsAraprasaragarimastambhanajapaH |

tvadIyaH kAmAkSi smaraharamanomohanajapaH

paTIyAnnaH pAyAtpadanalinamaJjIraninadaH ||54||

vitanvIthA nAthe mama zirasi kAmAkSi kRpayA

padAmbhojanyAsaM pazuparibRDhaprANadayite |

pibanto yanmudrAM prakaTamupakampAparisaraM

dRzA nAnandyante nalinabhavanArAyaNamukhAH ||55||

praNAmodyadbRndAramukuTamandArakalikA-

vilolallolambaprakaramayadhUmapracurimA |

pradIptaH pAdAbjadyutivitatipATalyalaharI-

kRzAnuH kAmAkSyA mama dahatu saMsAravipinam ||56||

valakSazrIrRkSAdhipazizusadRkSaistava nakhaiH

jighRkSurdakSatvaM sarasiruhabhikSutvakaraNe |

kSaNAnme kAmAkSi kSapitabhavasaGkSobhagarimA

vacovaicakSanyaM caraNayugalI pakSmalayatAt ||57||

samantAtkAmAkSi kSatatimirasantAnasubhagAn

anantAbhirbhAbhirdinamanu digantAnviracayan |

ahantAyA hantA mama jaDimadantAvalahariH

vibhintAM santApaM tava caraNacintAmaNirasau ||58||

dadhAno bhAsvattAmamRtanilayo lohitavapuH

vinamrANAM saumyo gururapi kavitvaM ca kalayan |

gatau mando gaGgAdharamahiSi kAmAkSi bhajatAM

tamaHketurmAtastava caraNapadmo vijayate ||59||

nayantIM dAsatvaM nalinabhavamukhyAnasulabha-

pradAnAddInAnAmamaratarudaurbhAgyajananIm |

jagajjanmakSemakSayavidhiSu kAmAkSi padayo-

rdhurINAmISTe karastava bhaNitumAhopuruSikAm ||60||

jano'yaM santapto janani bhavacaNDAMzukiraNaiH

alabdhavaikaM zItaM kaNamapi parajJAnapayasaH |

tamomArge pAnthastava jhaTiti kAmAkSi zizirAM

padAmbhojacchAyAM paramazivajAye mRgayate ||61||

jayatyamba zrImannakhakiraNacInAMzukamayaM

vitAnaM bibhrANe suramukuTasaGghaTTamasRNe |

nijAruNyakSaumAstaraNavati kAmAkSi sulabhA

budhaiH saMvinnArI tava caraNamANikyabhavane ||62||

pratImaH kAmAkSi sphuritataruNAdityakiraNa-

zriyo mUladravyaM tava caraNamadrIndratanaye |

surendrAzAmApUrayati yadasau dhvAntamakhilaM

dhunIte digbhAgAnapi ca mahasA pATalayate ||63||

mahAbhASyavyAkhyApaTuzayanamAropayati vA

smaravyApArerSyApizunaniTilaM kArayati vA |

dvirephANAmadhyAsayati satataM vAdhivasatiM

praNamrAnkAmAkSyAH padanalinamAhAtmyagarimA ||64||

vivekAmbhassrotassnapanaparipATIzizirite

samIbhUte zAstrasmaraNahalasaGkarSaNavazAt |

satAM cetaHkSetre vapati tava kAmAkSi caraNo

mahAsaMvitsasyaprakaravarabIjaM girisute ||65||

dadhAno mandArastabakaparipATIM nakharucA

vahandIptAM zoNAGgulipaTalacAmpeyakalikAm |

azokollAsaM naH pracurayatu kAmAkSi caraNo

vikAsI vAsantaH samaya iva te zarvadayite ||66||

nakhAMzuprAcuryaprasRmaramarAlAlidhavalaH

sphuranmaJjIrodyanmarakatamahazzaivalayutaH |

bhavatyAH kAmAkSi sphuTacaraNapATalyakapaTo

nadaH zoNAbhikhyo nagapatitanUje vijayate ||67||

dhunAnaM paGkaughaM paramasulabhaM kaNTakakulaiH

vikAsavyAsaGgaM vidadhadaparAdhInamanizam |

nakhendujyotsnAbhirvizadaruci kAmAkSi nitarAm

asAmAnyaM manye sarasijamidaM te padayugam ||68||

karIndrAya druhyatyalasagatilIlAsu vimalaiH

payojairmAtsaryaM prakaTayati kAmaM kalayate |

padAmbhojadvandvaM tava tadapi kAmAkSi hRdayaM

munInAM zAntAnAM kathamanizamasmai spRhayate ||69||

nirastA zoNimnA caraNakiraNAnAM tava zive

samindhAnA sandhyAruciracalarAjanyatanaye |

asAmarthyAdenaM paribhavitumetatsamarucAM

sarojAnAM jAne mukulayati zobhAM pratidinam ||70||

upAdikSaddAkSyaM tava caraNanAmA gururasau

marAlAnAM zaGke masRNagatilAlityasaraNau |

ataste nistandraM niyatamamunA sakhyapadavIM

prapannaM pAthojaM prati dadhati kAmAkSi kutukam ||71||

dadhAnaiH saMsargaM prakRtimalinaiH SaTpadakulaiH

dvijAdhIzazlAghAvidhiSu vidadhadbhirmukulatAm |

rajomizraiH padmairniyatamapi kAmAkSi padayoH

virodhaste yukto viSamazaravairipriyatame ||72||

kavitvazrImizrIkaraNanipuNau rakSaNacaNau

vipannAnAM zrImannalinamasRNau zoNakiraNau |

munIndrANAmantaHkaraNazaraNau mandasaraNau

manojJau kAmAkSyA duritaharaNau naumi caraNau ||73||

parasmAtsarvasmAdapi ca parayormuktikarayoH

nakhazrIbhirjyotsnAkalitatulayostAmratalayoH |

nilIye kAmAkSyA nigamanutayornAkinatayoH

nirastapronmIlannalinamadayoreva padayoH ||74||

svabhAvAdanyonyaM kisalayamapIdaM tava padaM

mradimnA zoNimnA bhagavati dadhAte sadRzatAm |

vane pUrvasyecchA satatamavane kiM tu jagatAM

parasyetthaM bhedaH sphurati hRdi kAmAkSi sudhiyAm ||75||

kathaM vAcAlo'pi prakaTamaNimaJjIraninadaiH

sadaivAnandArdrAnviracayati vAcaMyamajanAn |

prakRtyA te zoNacchavirapi ca kAmAkSi caraNo

manISAnairmalyaM kathamiva nRNAM mAMsalayate ||76||

calattRSNAvIcIparicalanaparyAkulatayA

muhurbhrAntastAntaH paramazivavAmAkSi paravAn |

titIrSuH kAmAkSi pracuratarakarmAmbudhimamuM

kadAhaM lapsye te caraNamaNisetuM girisute ||77||

vizuSyantyAM prajJAsariti duritagrISmasamaya-

prabhAveNa kSINe sati mama manaHkekini zucA |

tvadIyaH kAmAkSi sphuritacaraNAmbhodamahimA

nabhomAsATopaM nagapatisute kiM na kurute ||78||

vinamrANAM cetobhavanavalabhIsImni caraNa-

pradIpe prAkAzyaM dadhati tava nirdhUtatamasi |

asImA kAmAkSi svayamalaghuduSkarmalaharI

vighUrNantI zAntiM zalabhaparipATIva bhajate ||79||

virAjantI zuktirnakhakiraNamuktAmaNitateH

vipatpAthorAzau tarirapi narANAM praNamatAm |

tvadIyaH kAmAkSi dhruvamalaghuvahnirbhavavane

munInAM jJAnAgneraraNirayamaGghirvijayate ||80||

samastaiH saMsevyaH satatamapi kAmAkSi vibudhaiH

stuto gandharvastrIsulalitavipaJcIkalaravaiH |

bhavatyA bhindAno bhavagirikulaM jRmbhitatamo-

baladrohI mAtazcaraNapuruhUto vijayate ||81||

vasantaM bhaktAnAmapi manasi nityaM parilasad-

ghanacchAyApUrNaM zucimapi nRNAM tApazamanam |

nakhendujyotsnAbhiH ziziramapi padmodayakaraM

namAmaH kAmAkSyAzcaraNamadhikAzcaryakaraNam ||82||

kavIndrANAM nAnAbhaNitiguNacitrIkRtavacaH-

prapaJcavyApAraprakaTanakalAkauzalanidhiH |

adhaHkurvannabjaM sanakabhRgumukhyairmunijanaiH

namasyaH kAmAkSyAzcaraNaparameSThI vijayate ||83||

bhavatyAH kAmAkSi sphuritapadapaGkeruhabhuvAM

parAgANAM pUraiH parihRtakalaGkavyatikaraiH |

natAnAmAmRSTe hRdayamukure nirmalaruci

prasanne nizzeSaM pratiphalati vizvaM girisute ||84||

tava trastaM pAdAtkisalayamaraNyAntaramagAt

paraM rekhArUpaM kamalamamumevAzritamabhUt |

jitAnAM kAmAkSi dvitayamapi yuktaM paribhave

videze vAso vA zaraNagamanaM vA nijaripoH ||85||

gRhItvA yAthArthyaM nigamavacasAM dezikakRpA-

kaTAkSarkajyotizzamitamamatAbandhatamasaH |

yatante kAmAkSi pratidivasamantardraDhayituM

tvadIyaM pAdAbjaM sukRtaparipAkena sujanAH ||86||

jaDAnAmapyamba smaraNasamaye tavaccaraNayoH

bhramanmanthakSmAbhRddhumughumitasindhupratibhaTAH |

prasannAH kAmAkSi prasabhamadharaspandanakarA

bhavanti svacchandaM prakRtiparipakkA bhaNitayaH ||87||

vahannapyazrAntaM madhuraninadaM haMsakamasau

tamevAdhaH kartuM kimiva yatate keligamane |

bhavasyaivAnandaM vidadhadapi kAmAkSi caraNo

bhavatyAstaddrohaM bhagavati kimevaM vitanute ||88||

yadatyantaM tAmyatyalasagativArtAsvapi zive

tadetatkAmAkSi prakRtimRdulaM te padayugam |

kirITaiH saGghaTTaM kathamiva suraughasya sahate

munIndrANAmAste manasi ca kathaM sUcinizite ||89||

manoraGge matke vibudhajanasammodajananI

sarAgavyAsaGgaM sarasamRdusaJcArasubhagA |

manojJA kAmAkSi prakaTayatu lAsyaprakaraNaM

raNanmaJjIrA te caraNayugalInartakavadhUH ||90||

pariSkurvanmAtaH pazupatikapardaM caraNarAT

parAcAM hRtpadmaM paramabhaNitInAM ca makuTam |

bhavAkhye pAthodhau pariharatu kAmAkSi mamatA-

parAdhInatvaM me parimuSitapAthojamahimA ||91||

prasUnaiH samparkAdamarataruNIkuntalabhavaiH

abhISTAnAM dAnAdanizamapi kAmAkSi namatAm |

svasaGgAtkaGkeliprasavajanakatvena ca zive

tridhA dhatte vArtAM surabhiriti pAdo girisute ||92||

mahAmohastenavyatikarabhayAtpAlayati yo

vinikSiptaM svasminnijajanamanoratnamanizam |

sa rAgasyodrekAtsatatamapi kAmAkSi tarasA

kimevaM pAdo'sau kisalayaruciM corayati te ||93||

sadA svAduGkAraM viSayalaharIzAlikaNikAM

samAsvAdya zrAntaM hRdayazukapotaM janani me |

kRpAjAle phAlekSaNamahiSi kAmAkSi rabhasAt

gRhItvA rundhIthArastava padayugIpaJjarapuTe ||94||

dhunAnaM kAmAkSi smaraNalavamAtreNa jaDima-

jvaraprauDhiM gUDhasthiti nigamanaikuJjakuhare |

alabhyaM sarveSAM katicana labhante sukRtinaH

cirAdanviSyantastava caraNasiddhauSadhamidam ||95||

raNanmaJjIrAbhyAM lalitagamanAbhyAM sukRtinAM

manovAstavyAbhyAM mathitatimirAbhyAM nakharucA |

nidheyAbhyAM patyA nijazirasi kAmAkSi satataM

namaste pAdAbhyAM nalinamRdulAbhyAM girisute ||96||

surAge rAkendupratinidhimukhe parvatasute

cirAllabhye bhaktyA zamadhanajanAnAM pariSadA |

manobhRGgo matkaH padakamalayugme janani te

prakAmaM kAmAkSi tripuraharavAmAkSi ramatAm ||97||

zive saMvidrUpe zazizakalacUDapriyatame

zanairgatyAgatyA jitasuravarebhe girisute |

yatante santaste caraNanalinAlAnayugale

sadA baddhaM cittapramadakariyUthaM dRDhataram ||98||

yazaH sUte mAtarmadhurakavitAM pakSmalayate

zriyaM datte citte kamapi paripAkaM prathayate |

satAM pAzagranthiM zithilayati kiM kiM na kurute

prapanne kAmAkSyAH praNatiparipATI caraNayoH ||99||

manISAM mAhendrIM kakubhamiva te kAmapi dazAM

pradhatte kAmAkSyAzcaraNataruNAdityakiraNaH |

yadIye samparke dhRtarasamarandA kavayatAM

parIpAkaM dhatte parimalavatI sUktinalinI ||100||

purA mArArAtiH puramajayadamba stavazataiH

prasannAyAM satyAM tvayi tuhinazailendratanaye |

ataste kAmAkSi sphuratu tarasA kAlasamaye

samAyAte mAtarmama manasi pAdAbjayugalam ||101||

padadvandvaM mandaM gatiSu nivasantaM hRdi satAM

girAmante bhrAntaM kRtakarahitAnAM paribRDhe |

janAnAmAnandaM janani janayantaM praNamatAM

tvadIyaM kAmAkSi pratidinamahaM naumi vimalam ||102||

idaM yaH kAmAkSyAzcaraNanalinastotrazatakaM

japennityaM bhaktyA nikhilajagadAhlAdajanakam |

sa vizveSAM vandyaH sakalakavilokaikatilakaH

ciraM bhuktvA bhogAnpariNamati cidrUpakalayA ||103||

|| iti pAdAravindazatakaM sampUrNam ||