Maha Narayana Upanishad

mahAnArAyaNa upaniSad

zloka 1

taittirIya araNyaka - caturthaH praznaH

OM sa॒ha nA॑ vavatu | sa॒ha nau॑ bhunaktu |

sa॒ha vI॒rya॑-GkaravAvahai | te॒ja॒svinA॒ vadhI॑tamastu॒ mA vi॑dviSA॒vahai᳚ ||

OM zAnti॒-zzAnti॒-zzAntiH॑ ||

ambhasyapAre (4.1)

ambha॑sya pA॒re bhuva॑nasya॒ maddhye॒ nAka॑sya pR॒SThe ma॑ha॒to mahI॑yAn |

zu॒kreNa॒ jyotIgM॑Si samanu॒pravi॑STaH pra॒jApa॑tizcarati॒ garbhe॑ a॒ntaH |

yasmi॑nni॒dagM saJca॒ vicaiti॒ sarvaM॒-ya~smi॑-nde॒vA adhi॒ vizve॑ niSe॒duH |

tade॒va bhU॒ta-ntadu॒ bhavya॑mA i॒da-ntada॒kSare॑ para॒me vyo॑mann |

yenA॑ vR॒ta-GkhaJca॒ diva॑-mma॒hIJca॒ yenA॑di॒tya-stapa॑ti॒ teja॑sA॒ bhrAja॑sA ca |

yama॒nta-ssa॑mu॒dre ka॒vayo॒ vaya॑nti॒ yada॒kSare॑ para॒me pra॒jAH |

yataH॑ prasU॒tA ja॒gataH॑ prasUtI॒ toye॑na jI॒vAn vyaca॑sarja॒ (vyasa॑sarja॒) bhUmyA᳚m |

yadoSa॑dhIbhiH pu॒ruSA᳚-npa॒zUg​zca॒ vive॑za bhU॒tAni॑ carAca॒rANi॑ |

ataH॑ para॒-nnAnya॒-daNI॑yasahi॒ parA᳚-tparaM॒-ya~-nmaha॑to ma॒hAnta᳚m |

yade॑ka-ma॒vyakta॒-mana॑ntarUpaM॒-vi~zva॑-mpurA॒Na-ntama॑saH॒ para॑stAt || 1.5 (tai. ara. 6.1.1)

tade॒varta-ntadu॑ sa॒tyamA॑hu॒-stade॒va brahma॑ para॒ma-Gka॑vI॒nAm |

i॒STA॒pU॒rta-mba॑hu॒dhA jA॒ta-JjAya॑mAnaM-vi~॒zva-mbi॑bharti॒ bhuva॑nasya॒ nAbhiH॑ |

tade॒vAgni-stadvA॒yu-stathsUrya॒stadu॑ ca॒ndramAH᳚ |

tade॒va zu॒krama॒mRta॒-ntadbrahma॒ tadApa॒-ssa pra॒jApa॑tiH |

sarve॑ nime॒SA ja॒jJire॑ vi॒dyutaH॒ puru॑SA॒dadhi॑ |

ka॒lA mu॑hU॒rtAH kASThA᳚zcAho-rA॒trAzca॑ sarva॒zaH |

a॒rdha॒mA॒sA mAsA॑ R॒tavaH॑ saM​va~thsa॒razca॑ kalpantAm |

sa ApaH॑ pradu॒ghe u॒bhe i॒me a॒ntari॑kSa॒-matho॒ suvaH॑ |

naina॑-mU॒rdhva-nna ti॒rya-Jca॒ na maddhye॒ pari॑jagrabhat |

na tasye॑ze॒ kazca॒na tasya॑ nAma ma॒hadyazaH॑ || 1.10 (tai. ara. 6.1.2)

na sa॒dRMze॑ tiSThati॒ rUpa॑masya॒ na cakSu॑SA pazyati॒ kazca॒naina᳚m |

hR॒dA ma॑nI॒SA mana॑sA॒-'bhi klR॑pto॒ ya e॑naM-vi~॒du-ramR॑tA॒ste bha॑vanti |

a॒dbhya-ssambhU॑to hiraNyaga॒rbha itya॒STau |

e॒Sa hi de॒vaH pra॒dizo-'nu॒ sarvAH॒ pUrvo॑ hi jA॒ta-ssa u॒ garbhe॑ a॒ntaH |

sa vi॒jAya॑mAna-ssajani॒SyamA॑NaH pra॒tyaM-mukhA᳚ stiSThati vi॒zvato॑mukhaH |

vi॒zvata॑zca-kSuru॒ta vi॒zvato॑ mukho vi॒zvato॑ hasta u॒ta vi॒zvata॑spAt |

sa-mbA॒hubhyA॒-nnama॑ti॒ sa-mpata॑trai॒-rdyAvA॑ pRthi॒vI ja॒naya॑-nde॒va ekaH॑ |

ve॒nasta-tpazya॒n. vizvA॒ bhuva॑nAni vi॒dvAn. yatra॒ vizva॒-mbhava॒tyeka॑-nIlam |

yasmi॑nni॒dagM saJca॒ vicaika॒gM॒ sa otaH॒ prota॑zca vi॒bhuH pra॒jAsu॑ |

pratadvo॑ce a॒mRta॒nnu vi॒dvA-nga॑ndha॒rvo nAma॒ nihi॑ta॒-GguhA॑su || 1.15 (tai. ara. 6.1.3)

trINi॑ pa॒dA nihi॑tA॒ guhA॑su॒ yastadveda॑ savi॒tuH pi॒tA-'sa॑t |

sa no॒ bandhu॑-rjani॒tA sa vi॑dhA॒tA dhAmA॑ni॒ veda॒ bhuva॑nAni॒ vizvA᳚ |

yatra॑ de॒vA a॒mRta॑mAna-zA॒nAstR॒tIye॒ dhAmA᳚nya॒-bhyaira॑yanta |

pari॒ dyAvA॑pRthi॒vI ya॑nti sa॒dyaH pari॑ lo॒kA-npari॒ dizaH॒ pari॒ suvaH॑ |

R॒tasya॒ tantuM॑-vitataM-vi॒cRtya॒ tada॑pazya॒-ttada॑bhava-tpra॒jAsu॑ |

pa॒rItya॑ lo॒kA-npa॒rItya॑ bhU॒tAni॑ pa॒rItya॒ sarvAH᳚ pra॒dizo॒ diza॑zca |

pra॒jApa॑tiH prathama॒jA R॒tasyA॒tmanA॒-''tmAna॑-ma॒bhi-samba॑bhUva |

sada॑sa॒spati॒-madbhu॑ta-mpri॒yamindra॑sya॒ kAmya᳚m |

sani॑-mme॒dhA ma॑yAsiSam |

uddI᳚pyasva jAtavedo 'pa॒ghnannir-R॑ti॒-mmama॑ || 1.19 (tai. ara. 6.1.4)

pa॒zUg​zca॒ mahya॒mAva॑ha॒ jIva॑naJca॒ dizo॑ diza |

mAno॑ higMsI jjAtavedo॒ gAmazva॒-mpuru॑Sa॒-Jjaga॑t |

abi॑bhra॒dagna॒ Aga॑hi zri॒yA mA॒ pari॑pAtaya || 1.21 (tai. ara. 6.1.5)

gAyatrI mantrAH (4.2)

puru॑Sasya vidma sahasrA॒kSasya॑ mahAde॒vasya॑ dhImahi | tanno॑ rudraH praco॒dayA᳚t ||

tatpuru॑SAya vi॒dmahe॑ mahAde॒vAya॑ dhImahi | tanno॑ rudraH praco॒dayA᳚t ||

tatpuru॑SAya vi॒dmahe॑ vakratu॒NDAya॑ dhImahi | tanno॑ dantiH praco॒dayA᳚t ||

tatpuru॑SAya vi॒dmahe॑ cakratu॒NDAya॑ dhImahi | tanno॑ nandiH praco॒dayA᳚t ||

tatpuru॑SAya vi॒dmahe॑ mahAse॒nAya॑ dhImahi | tannaH॑ SaNmukhaH praco॒dayA᳚t ||

tatpuru॑SAya vi॒dmahe॑ suvarNapa॒kSAya॑ dhImahi | tanno॑ garuDaH praco॒dayA᳚t ||

ve॒dA॒tma॒nAya॑ vi॒dmahe॑ hiraNyaga॒rbhAya॑ dhImahi | tanno᳚ brahma praco॒dayA᳚t ||

nA॒rA॒ya॒NAya॑ vi॒dmahe॑ vAsude॒vAya॑ dhImahi | tanno॑ viSNuH praco॒dayA᳚t ||

va॒jra॒na॒khAya॑ vi॒dmahe॑ tIkSNa-da॒gg॒STrAya॑ dhImahi | tanno॑ nArasigMhaH praco॒dayA᳚t ||

bhA॒ska॒rAya॑ vi॒dmahe॑ mahaddyutika॒rAya॑ dhImahi | tanno॑ AdityaH praco॒dayA᳚t ||

vai॒zvA॒na॒rAya॑ vi॒dmahe॑ lAlI॒lAya॑ dhImahi | tanno॑ agniH praco॒dayA᳚t ||

kA॒tyA॒ya॒nAya॑ vi॒dmahe॑ kanyaku॒mAri॑ dhImahi | tanno॑ durgiH praco॒dayA᳚t || 1.33 (tai. ara. 6.1.5-7)

dUrvA sUktaM (4.3)

sa॒ha॒sra॒para॑mA de॒vI॒ za॒tamU॑lA za॒tAGku॑rA |

sarvagM॑ haratu॑ me pA॒pa॒-ndU॒rvA duH॑svapna॒ nAza॑nI |

kANDA᳚-tkANDA-tpra॒roha॑ntI॒ paru॑SaH paruSaH॒ pari॑ |

e॒vA no॑ dUrve॒ prata॑nu sa॒hasre॑Na za॒tena॑ ca |

yA za॒tena॑ prata॒noSi॑ sa॒hasre॑Na vi॒roha॑si |

tasyA᳚ste devISTake vi॒dhema॑ ha॒viSA॑ va॒yam |

azva॑krA॒nte ra॑thakrA॒nte॒ vi॒SNukrA᳚nte va॒sundha॑rA |

zirasA॑ dhAra॑yiSyA॒mi॒ ra॒kSa॒sva mA᳚-mpade॒ pade || 1.37 (tai. ara. 6.1.8)

mRttikA sUktam (4.4)

bhUmi-rdhenu-rdharaNI lo॑kadhA॒riNI |

u॒dhRtA॑-'si va॑rAhe॒Na॒ kR॒SNe॒na za॑ta bA॒hunA |

mR॒ttike॑ hana॑ me pA॒paM॒-ya~॒nma॒yA du॑SkRta॒-GkRtam |

mR॒ttike᳚ brahma॑dattA॒-'si॒ kA॒zyape॑nAbhi॒mantri॑tA |

mR॒ttike॑ dehi॑ me pu॒STi॒-ntva॒yi sa॑rva-mpra॒tiSThi॑tam || 1.39

mR॒ttike᳚ pratiSThi॑te sa॒rva॒-nta॒nme ni॑rNuda॒ mRtti॑ke |

tayA॑ ha॒tena॑ pApe॒na॒ ga॒cchA॒mi pa॑ramA॒-Ggatim || 1.40 (tai. ara. 6.1.9)

zatrujaya mantrAH (4.5)

yata॑ indra॒ bhayA॑mahe॒ tato॑ no॒ abha॑ya-GkRdhi |

magha॑van cha॒gdhi tava॒ tanna॑ U॒taye॒ vidviSo॒ vimRdho॑ jahi |

sva॒sti॒dA vi॒zaspati॑-rvRtra॒hA vimRdho॑ va॒zI |

vRSendraH॑ pu॒ra e॑tu na-ssvasti॒dA a॑bhayaGka॒raH |

sva॒sti na॒ indro॑ vR॒ddhazra॑vA-ssva॒sti naH॑ pU॒SA vi॒zvave॑dAH |

sva॒sti na॒stArkSyo॒ ari॑STanemi-ssva॒sti no॒ bRha॒spati॑-rdadhAtu |

ApA᳚nta-manyustR॒pala॑prabharmA॒ dhuni॒-zzimI॑vAM॒-charu॑mAgM RjI॒SI |

somo॒ vizvA᳚nyata॒sA vanA॑ni॒ nArvAgindra॑-mprati॒mAnA॑ni debhuH || 1.44

brahma॑ jajJA॒na-mpra॑tha॒ma-mpu॒rastA॒-dvisI॑ma॒ta-ssu॒ruco॑ ve॒na A॑vaH |

sa bu॒dhniyA॑ upa॒mA a॑sya vi॒SThA-ssa॒tazca॒ yoni॒-masa॑tazca॒ vivaH॑ |

syo॒nA pR॑thivi॒ bhavA॑ nRkSa॒rA ni॒veza॑nI | yacchA॑ na॒-zzarma॑ sa॒prathAH᳚ |

ga॒ndha॒dvA॒rA-ndu॑rAdha॒r​SA॒-nni॒tyapu॑STA-GkarI॒SiNI᳚m |

I॒zvarIgM॑ sarva॑bhUtA॒nA॒-ntAmi॒hopa॑hvaye॒ zriyam |

zrI᳚rme bha॒jatu | alakSmI᳚rme na॒zyatu |

viSNu॑mukhA॒ vai de॒vA-zchando॑-bhiri॒mAM​llo~॒kA-na॑napaja॒yya-ma॒bhya॑jayann |

ma॒hAgM indro॒ vajra॑bAhu-SSoDa॒zI zarma॑ yacchatu || 1.48 (tai. ara. 6.1.10)

sva॒sti no॑ ma॒ghavA॑ karotu॒ hantu॑ pA॒pmAnaM॒-yo~᳚-'smA-ndveSTi॑ |

so॒mAna॒gg॒ svara॑Na-GkRNu॒hi bra॑hmaNaspate |

ka॒kSIva॑ntaM॒-ya~ au॑zi॒jam |

zarI॑raM-ya~jJazama॒la-GkusI॑da॒-ntasmi᳚-nthsIdatu॒ yo᳚-'smA-ndveSTi॑ |

cara॑Na-mpa॒vitraM॒-vita॑ta-mpurA॒NaM-yena॑ pU॒ta-stara॑ti duSkR॒tAni॑ |

tena॑ pa॒vitre॑Na zu॒ddhena॑ pU॒tA ati॑ pA॒pmAna॒-marA॑ti-ntarema |

sa॒joSA॑ indra॒ saga॑No ma॒rudbhi॒-ssoma॑-mpiba vRtrahaJchUra vi॒dvAn |

ja॒hi zatrU॒gM॒ rapa॒ mRdho॑ nuda॒svAthAbha॑ya-GkRNuhi vi॒zvato॑ naH |

su॒mi॒trA na॒ Apa॒ oSa॑dhaya-ssantu durmi॒trAstasmai॑ bhUyAsu॒-ryA᳚-'smA-ndveSTi॒ yaJca॑ va॒ya-ndvi॒SmaH | 1.53 (tai. ara. 6.1.11)

Apo॒ hiSThA ma॑yo॒ bhuva॒stA na॑ U॒rje da॑dhAtana |

ma॒heraNA॑ya॒ cakSa॑se |

yo vaH॑ zi॒vata॑mo॒ rasa॒-stasya॑ bhAjayate॒ ha naH॑ |

u॒za॒tI-ri॑va mA॒taraH॑ |

tasmA॒ ara॑GgamAmavo॒ yasya॒ kSayA॑ya॒ jinva॑tha |

Apo॑ ja॒naya॑thA ca naH || 1.54 (tai. ara. 6.1.12)

aghamar​SaNa sUktam (4.6)

hira॑NyazRGgaM॒-va~ru॑Na॒-mprapa॑dye tI॒rtha-mme॑ dehi॒ yAci॑taH |

ya॒nmayA॑ bhu॒kta-ma॒sAdhU॑nA-mpA॒pebhya॑zca pra॒tigra॑haH |

yanme॒ mana॑sA vA॒cA॒ ka॒rma॒NA vA du॑SkRta॒-GkRtam |

tanna॒ indro॒ varu॑No॒ bRha॒spatiH॑ savi॒tA ca॑ punantu॒ punaH॑ punaH |

namo॒-'gnaye᳚-'phsu॒mate॒ nama॒ indrA॑ya॒ namo॒ varu॑NAya॒ namo vAruNyai॑ namo॒-'dbhyaH || 1.57

yada॒pA-GkrU॒raM-yada॑me॒ddhyaM-yada॑zA॒nta-ntadapa॑gacchatAt |

a॒tyA॒za॒nA-da॑tIpA॒nA॒-dya॒cca u॒grA-tpra॑ti॒grahA᳚t |

tanno॒ varu॑No rA॒jA॒ pA॒NinA᳚ hyava॒mar​za॑tu |

so॑-'hama॑pA॒po vi॒rajo॒ nirmu॒kto mu॑ktaki॒lbiSaH |

nAka॑sya pR॒SThamAru॑hya॒ gacche॒-dbrahma॑salo॒katAm |

yazcA॒॑phsu varu॑Na॒-ssa pu॒nAtva॑ghamar​Sa॒NaH |

i॒ma-mme॑ gaGge yamune sarasvati॒ zutu॑dri॒ stomagM॑ sacatA॒ paru॒SNiyA |

a॒si॒kni॒yA ma॑rudvRdhe vi॒tasta॒yA-''rjI॑kIye zRNu॒hyA su॒Soma॑yA |

R॒taJca॑ sa॒tyaJcA॒-bhI᳚ddhA॒ ttapa॒so-'ddhya॑jAyata |

tato॒ rAtri॑-rajAyata॒ tataH॑ samu॒dro a॑rNa॒vaH || 1.63 (tai. ara. 6.1.13)

sa॒mu॒drA-da॑rNa॒vA-dadhi॑ saM​va~thsa॒ro a॑jAyata |

a॒ho॒rA॒trANi॑ vi॒dadha॒-d(mi॒dadha॒d) vizva॑sya miSa॒to va॒zI |

U॒ryA॒ca॒ndra॒masau॑ dhA॒tA ya॑thA pU॒rva ma॑kalpayat |

diva॑Jca pRthi॒vI-JcA॒ntari॑kSa॒ matho॒ suvaH॑ |

ya-tpR॑thi॒vyAgM raja॑ssva॒ mAntari॑kSe vi॒roda॑sI |

i॒mAg​ stadA॒po va॑ruNaH pu॒nAtva॑ghamar​Sa॒NaH |

pu॒nantu॒ vasa॑vaH pu॒nAtu॒ varu॑NaH pu॒nAtva॑ghamar​Sa॒NaH |

e॒Sa bhU॒tasya॑ ma॒ddhye bhuva॑nasya go॒ptA |

e॒Sa pu॒NyakR॑tAM-lo~॒kA॒ne॒Sa mR॒tyor-hi॑ra॒Nmaya᳚m |

dyAvA॑pRthi॒vyor-hi॑ra॒Nmaya॒gM॒ sagg​zri॑ta॒gM॒ suvaH॑ | 1.66 (tai. ara. 6.1.14)

sa na॒-ssuva॒-ssagM zi॑zAdhi |

Ardra॒-Jjvala॑ti॒ jyoti॑-ra॒hama॑smi |

jyoti॒-rjvala॑ti॒ brahmA॒hama॑smi |

yo॑-'hama॑smi॒ brahmA॒hama॑smi |

a॒hama॑smi॒ brahmA॒hama॑smi |

a॒hame॒vAha-mmA-Jju॑homi॒ svAhA᳚ |

a॒kA॒rya॒-kA॒rya॑va kI॒rNI ste॒no bhrU॑Na॒hA gu॑ruta॒lpagaH |

varu॑No॒-'pAma॑ghamar​Sa॒Na-stasmA᳚-tpA॒pA-tpramu॑cyate |

ra॒jobhUmi॑stva॒mAgM roda॑yasva॒ prava॑danti॒ dhIrAH᳚ |

AkrA᳚n-thsamu॒draH pra॑tha॒me vidha॑rma-Jja॒naya॑-npra॒jA bhuva॑nasya॒ rAjA᳚ |

vRSA॑ pa॒vitre॒ adhi॒sAno॒ avye॑ bR॒ha-thsomo॑ vAvRdhe suvA॒na induH॑ || 1.70

(pura॑stA॒--dyazo॒ - guhA॑su॒ - mama॑ - cakratu॒NDAya॑ dhImahi - tIkSada॒gg॒SThrAya॑ dhImahi॒ - pari॑ - pra॒tiSThi॑taM - debhu--r yacchatu - dadhAtanA॒- dbhyo᳚ - 'rNa॒vaH - suvo॒ - rAjaika॑-Jca) (A1)

durgA sUktam (4.7)

jA॒tave॑dase sunavAma॒ soma॑-marAtIya॒to nida॑hAti॒ vedaH॑ |

sa naH॑ par​Sa॒dati॑ du॒rgANi॒ vizvA॑ nA॒veva॒ sindhu॑-nduri॒tA-'tya॒gniH |

tAma॒gniva॑rNA॒-ntapa॑sA jvala॒ntIM-vai~॑roca॒nI-Gka॑rmapha॒leSu॒ juSTA᳚m |

du॒rgA-nde॒vIgM zara॑Nama॒ha-mprapa॑dye su॒tara॑si tarase॒ namaH॑ |

agne॒ tva-mpA॑rayA॒ navyo॑ a॒smAn-thsva॒sti-bhi॒rati॑ du॒rgANi॒ vizvA᳚ |

pUzca॑ pR॒thvI ba॑hu॒lA na॑ u॒rvI bhavA॑ to॒kAya॒ tana॑yAya॒ zaM​yo~H |

vizvA॑ni no du॒rgahA॑ jAtaveda॒-ssindhu॒-nna nA॒vA du॑ri॒tA-'ti॑par​Si |

agne॑ atri॒va-nmana॑sA gRNA॒no᳚-'smAka॑-mboddhyavi॒tA ta॒nUnA᳚m |

pR॒ta॒nA॒jita॒gM॒ saha॑mAna-mu॒grama॒gnigM hu॑vema para॒mA-thsa॒dhasthA᳚t |

sa naH॑ par​Sa॒dati॑ du॒rgANi॒ vizvA॒ kSAma॑dde॒vo ati॑ duri॒tA-'tya॒gniH |

pra॒tnoSi॑-ka॒mIDyo॑ addhva॒reSu॑ sa॒nAcca॒ hotA॒ navya॑zca॒ sathsi॑ |

svAJcA᳚gne ta॒nuva॑-mpi॒praya॑svA॒smabhya॑Jca॒ saubha॑ga॒mAya॑jasva |

gobhi॒-rjuSTa॑ma॒yujo॒ niSi॑kta॒-ntave᳚ndra viSNo॒-ranu॒saJca॑rema |

nAka॑sya pR॒SThama॒bhi saM॒​vasA॑no॒ vaiSNa॑vIM-lo॒ka i॒ha mA॑dayantAm || 2.7 (du॒ri॒tA-'tya॒gnizca॒tvAri॑ ca) (tai. ara. 6.2.1)

vyAhRti homa mantrAH (4.8)

bhU-ranna॑-ma॒gnaye॑ pRthi॒vyai svAhA॒, bhuvo-'nnaM॑-vA~॒yave॒-'ntari॑kSAya॒ svAhA॒, suva॒ranna॑-mAdi॒tyAya॑ di॒ve svAhA॒, bhUrbhuva॒ssuva॒-ranna॑-Jca॒ndrama॑se di॒gbhya-ssvAhA॒, namo॑ de॒vebhyaH॑ sva॒dhA pi॒tRbhyo॒ bhUrbhuva॒ssuva॒-ranna॒mom || 3.1 (tai. ara. 6.3.1)

bhU-ra॒gnaye॑ pRthi॒vyai svAhA॒, bhuvo॑ vA॒yave॒-'ntari॑kSAya॒ svAhA॒ ,

suva॑rAdi॒tyAya॑ di॒ve svAhA॒, bhU-rbhuva॒ssuva॑-zca॒ndrama॑se di॒gbhya-ssvAhA॒,

namo॑ de॒vebhyaH॑ sva॒dhA pi॒tRbhyo॒ bhUrbhuva॒ssuva॒-ragna॒ om || 4.1

bhU-ra॒gnaye॑ ca pRthi॒vyai ca॑ maha॒te ca॒ svAhA॒,

bhuvo॑ vA॒yave॑ cA॒ntari॑kSAya ca maha॒te ca॒ svAhA॒,

suva॑rAdi॒tyAya॑ ca di॒ve ca॑ maha॒te ca॒ svAhA॒,

bhU-rbhuva॒ssuva॑-zca॒ndrama॑se ca॒ nakSa॑trebhyazca di॒gbhyazca॑ maha॒te ca॒ svAhA॒,

namo॑ de॒vebhyaH॑ sva॒dhA pi॒tRbhyo॒ bhUrbhuva॒ssuva॒-rmaha॒rom || 5.1 (tai. ara. 6.4.1)

jJAnaprAptyarthA homamantrAH (4.9)

pAhi no agna ena॑se svA॒hA |

pAhi no vizvaveda॑se svA॒hA |

yajJa-mpAhi vibhAva॑so svA॒hA |

sarva-mpAhi zatakra॑to svA॒hA || 6.1 (tai. ara. 6.7.1)

pA॒hi no॑ agna॒ eka॑yA |

pA॒hyu॑ta dvi॒tIya॑yA |

pA॒hyUrja॑-ntR॒tIya॑yA |

pA॒hi gI॒rbhi-zca॑ta॒sRbhi॑-rvaso॒ svAhA᳚ || 7.1 (tai. ara. 6.6.1)

vedAvismaraNAya japamantrAH (4.10)

ya-zchanda॑sA-mRSa॒bho vi॒zvarU॑pa॒-zchando᳚bhya॒-zchandAg॑syA vi॒veza॑ |

sacAgM zikyaH puro vAco॑pani॒Sa-dindro᳚ jye॒STha i॑ndri॒yAya॒ RSi॑bhyo॒ namo॑ de॒vebhyaH॑ sva॒dhA pi॒tRbhyo॒ bhUrbhuva॒ssuva॒-zchanda॒ om || 8.1 (tai. ara. 6.8.1)

namo॒ brahma॑Ne dhA॒raNa॑-mme a॒stva-ni॑rAkaraNaM-dhA॒rayi॑tA bhUyAsa॒-GkarNa॑yo-zzru॒ta-mmAcyo᳚Dhva॒-mmamA॒muSya॒ om || 9.1 (tai. ara. 6.9.1)

tapaH prazaMsA (4.11)

R॒ta-ntapaH॑ sa॒tya-ntapaH॑ zru॒ta-ntapaH॑ zA॒nta-ntapo॒ dama॒ stapa॒-zzama॒stapo॒ dAna॒-ntapo॒ yajJa॒-ntapo॒ bhUrbhuva॒ssuva॒-rbrahmai॒-tadupA᳚syai॒-tattapaH॑ || 10.1 (tai. ara. 6.10.1)

vihitAcaraNa prazaMsA niSiddhAcaraNa nindA ca (4.12)

yathA॑ vR॒kSasya॑ sa॒puMSpi॑tasya dU॒rA-dga॒ndho vA᳚tye॒va-mpuNya॑sya ka॒rmaNo॑ dU॒rA-dga॒ndho vA॑ti॒ yathA॑-'sidhA॒rA-Gka॒rte-'va॑hitA-mava॒krAme॒ yadyuve॒ yuve॒ havA॑ vi॒hvayi॑SyAmi ka॒rta-mpa॑tiSyA॒mItye॒va-ma॒mRtA॑-dA॒tmAna॑-Jju॒guphse᳚t || 11.1 (tai. ara. 6.11.1)

dahara vidyA (4.13)

a॒No-raNI॑yA-nmaha॒to mahI॑yA-nA॒tmA guhA॑yA॒-nnihi॑to-'sya ja॒ntoH |

tama॑kratu-mpazyati vItazo॒ko dhA॒tuH pra॒sAdA᳚-nmahi॒mAna॑mIzam |

sa॒pta prA॒NAH pra॒bhava॑nti॒ tasmA᳚-thsa॒ptArciSaH॑ sa॒midhaH॑ sa॒pta ji॒hvAH |

sa॒pta i॒me lo॒kA yeSu॒ cara॑nti prA॒NA gu॒hAza॑yA॒-nnihi॑tA-ssa॒pta sa॑pta |

ataH॑ samu॒drA gi॒raya॑zca॒ sarve॒-'smA-thsyanda॑nte॒ sindha॑va॒-ssarva॑rUpAH |

ata॑zca॒ vizvA॒ oSa॑dhayo॒ rasA᳚cca॒ yenai॑Sa bhU॒ta-sti॑SThatyantarA॒tmA |

bra॒hmA de॒vAnA᳚-mpada॒vIH ka॑vI॒nA-mRSi॒-rviprA॑NA-mmahi॒So mR॒gANA᳚m |

zye॒no gRdhrA॑NA॒g॒ svadhi॑ti॒-rvanA॑nA॒gM॒ somaH॑ pa॒vitra॒ matye॑ti॒ rebhann॑ |

a॒jA mekAM॒-lo~hi॑ta-zukla-kR॒SNA-mba॒hvI-mpra॒jA-Jja॒naya॑ntI॒gM॒ sarU॑pAm |

a॒jo hyeko॑ ju॒SamA॑No-'nu॒zete॒ jahA᳚tyenA-mbhu॒kta-bho॑gA॒majo᳚-'nyaH || 12.5 (tai. ara. 6.12.1)

ha॒gM॒sa-zzu॑ci॒Sa-dvasu॑-rantarikSa॒-saddhotA॑ vedi॒Sa-dati॑thi-rduroNa॒sat |

nR॒Sa-dva॑ra॒sa-dR॑ta॒sa-dvyo॑ma॒sa-da॒bjA go॒jA R॑ta॒jA a॑dri॒jA R॒ta-mbR॒hat |

ghR॒ta-mmi॑mikSire ghR॒tama॑sya॒ yoni॑-rghR॒te zri॒to ghR॒tamu॑vasya॒ dhAma॑ |

a॒nu॒Sva॒dhamAva॑ha mA॒daya॑sva॒ svAhA॑ kRtaM-vR~Sabha vakSi ha॒vyam |

sa॒mu॒drA dU॒rmi-rmadhu॑mA॒gM॒ udA॑ra-dupA॒gM॒zunA॒ sama॑mRta॒tva mA॑naT |

ghR॒tasya॒ nAma॒ guhyaM॒-ya~dasti॑ ji॒hvA de॒vAnA॑-ma॒mRta॑sya॒ nAbhiH॑ |

va॒ya-nnAma॒ prabra॑vAmA ghR॒tenA॒smin. ya॒jJe dhA॑rayAmA॒ namo॑bhiH |

upa॑ bra॒hmA zR॑Navaccha॒syamA॑na॒-JcatuH॑ zRGgo 'vamI-dgau॒ra e॒tat |

ca॒tvAri॒ zRGgA॒ trayo॑ asya॒ pAdA॒ dve zI॒ra॒.Se sa॒pta hastA॑so a॒sya |

tridhA॑ ba॒ddho vR॑Sa॒bho ro॑ravIti ma॒ho de॒vo martyA॒gM॒ Avi॑veza || 12.10 (tai. ara. 6.12.2)

tridhA॑ hi॒ta-mpa॒Nibhi॑-rgu॒hyamA॑na॒-Ggavi॑-de॒vAso॑ ghR॒tamanva॑vindann |

indra॒ eka॒gM॒ sUrya॒ eka॑-JjajAna ve॒nA dekagg॑ sva॒dhayA॒ niSTa॑takSuH |

yo de॒vAnA᳚-mpratha॒ma-mpu॒rastA॒-dvizvA॒dhiyo॑ ru॒dro ma॒har​SiH॑ |

hi॒ra॒Nya॒ga॒rbha-mpa॑zyata॒ jAya॑mAna॒gM॒ sano॑ de॒va-zzu॒bhayA॒ smRtyA॒ saM​yu~॑naktu |

yasmA॒tpara॒-nnApa॑ra॒ masti॒ kiJci॒dyasmA॒-nnANI॑yo॒ na jyAyo᳚-'sti॒ kazci॑t |

vR॒kSa i॑va stabdho di॒vi ti॑STha॒-tyeka॒stene॒da-mpU॒rNa-mpuru॑SeNa॒ sarva᳚m || 12.13

(sanyAsa sUktam)

na karma॑NA na pra॒jayA॒ dhane॑na॒ tyAge॑naike amRta॒tva-mA॑na॒zuH |

pare॑Na॒ nAka॒-nnihi॑ta॒-GguhA॑yAM-vi~॒bhrAja॑de॒ta-dyata॑yo vi॒zanti॑ ||

ve॒dA॒nta॒ vi॒jJAna॒-suni॑zcitA॒rthA-ssanyA॑sa yo॒gAdyata॑ya-zzuddha॒ sattvAH᳚ |

te bra॑hmalo॒ke tu॒ parA᳚ntakAle॒ parA॑mRtA॒-tpari॑mucyanti॒ sarve᳚ |

da॒hraM॒-vi॒pA॒pa-mpa॒rame᳚zma bhUtaM॒-ya-tpu॑NDarI॒ka-mpu॒rama॑ddhya sa॒gg॒stham |

ta॒trA॒pi॒ da॒hra-Gga॒ganaM॑-vi~zoka॒-stasmi॑n. yada॒ntasta-dupA॑sita॒vyam ||

yo vedAdau sva॑raH pro॒kto॒ ve॒dAnte॑ ca pra॒tiSThi॑taH |

tasya॑ pra॒kRti॑-lIna॒sya॒ yaH॒ paraH॑ sa॒ ma॒hezva॑raH || 12.17 (tai. ara. 6.12.3)

(ajo᳚-'nya॒ - Avi॑veza॒ - sarve॑ ca॒tvAri॑ ca)

nArAyaNa sUktaM (4.14)

sa॒ha॒sra॒zIr​Sa॑-nde॒vaM॒-vi॒zvAkSaM॑-vi॒zva za॑-mbhuvam |

vizva॑-nnA॒rAya॑Na-nde॒va॒ma॒kSara॑-mpara॒ma-mpa॒dam |

vi॒zvataH॒ para॑mAnni॒tyaM॒-vi~॒zva-nnA॑rAya॒NagM ha॑rim |

vizva॑me॒veda-mpuru॑Sa॒-sta-dvizva॒mupa॑jIvati |

patiM॒-vi~zva॑syA॒tmezva॑ra॒gM॒ zAzva॑tagM zi॒vama॑cyutam |

nA॒rAya॒Na-mma॑hAjJe॒yaM॒-vi~॒zvAtmA॑na-mpa॒rAya॑Nam |

nA॒rAya॒Na pa॑ro jyo॒ti॒rA॒tmA nA॑raya॒NaH pa॑raH |

nA॒rAya॒Na pa॑ra-mbra॒hma॒ ta॒ttva-nnA॑rAya॒NaH pa॑raH |

nA॒rAya॒Na pa॑ro dhyA॒tA॒ dhyA॒na-nnA॑rAya॒NaH pa॑raH |

yacca॑ ki॒Jcij-ja॑ga-thsa॒rva॒-ndR॒zyate᳚ zrUya॒te-'pi॑ vA | 13.4 (tai. ara. 6.13.1)

anta॑-rba॒hizca॑ ta-thsa॒rvaM॒-vyA~॒pya nA॑rAya॒Na-ssthi॑taH |

ana॑nta॒ mavya॑ya-Gka॒vigM sa॑mu॒dre-'ntaM॑-vi॒zva za॑bhuM​vam |

pa॒dma॒ko॒za-pra॑tIkA॒za॒gM॒ hR॒daya॑-JcApya॒dhomu॑kham |

adho॑ ni॒STyA vi॑tastyA॒nte॒ nA॒bhyAmu॑pari॒ tiSTha॑ti |

jvA॒la॒mA॒lA ku॑la-mbhA॒tI॒ vi॒zvasyA॑yata॒na-mma॑hat |

santa॑tagM zi॒lAbhi॑stu॒ lamba॑tyA koza॒sanni॑bham |

tasyAnte॑ suSi॒ragM sU॒kSma-ntasmi᳚n-thsa॒rva-mprati॑SThitam |

tasya॒ maddhye॑ ma॒hAna॑gni-rvi॒zvArci॑-rvi॒zvato॑ mukhaH |

so-'gra॑bhu॒g vibha॑ja-nti॒STha॒-nnAhA॑ra-maja॒raH ka॒viH |

ti॒rya॒gU॒rdhva ma॑dha-zzA॒yI॒ ra॒zmaya॑stasya॒ santa॑tA |

sa॒ntA॒paya॑ti sva-nde॒hamApA॑datala॒ masta॑kaH |

tasya॒ maddhye॒ vahni॑zikhA a॒NIyo᳚rdhvA vya॒vasthi॑taH |

nI॒lato॑ yada॑ maddhya॒sthA॒-dvi॒dyulle॑kheva॒ bhAsva॑rA |

nI॒vAra॒ zUka॑vatta॒nvI॒ pI॒tA bhA᳚svatya॒NUpa॑mA |

tasyA᳚-zzikhA॒yA ma॑ddhye pa॒ramA᳚tmA vya॒vasthi॑taH |

sa brahma॒ sa ziva॒-ssa hari॒-ssendra॒-sso-'kSa॑raH para॒ma-ssva॒rAT || 13.12 (tai. ara. 6.13.2)

(api॑ vA॒ - santa॑tA॒ SaT ca॑)

Aditya maNDale parabrahmopAsanaM (4.15)

A॒di॒tyo vA e॒Sa e॒ta-nma॒NDala॒-ntapa॑ti॒ tatra॒ tA Rca॒stadR॒cA ma॑NDala॒gM॒ sa R॒cAM-lo॒ko-'tha॒ya e॒Sa e॒tasmi॑-nma॒NDale॒-'r​ci-rdI॒pyate॒ tAni॒ sAmA॑ni॒ sa sA॒mnAM-lo॒ko-'tha॒ ya e॒Sa e॒tasmi॑-nma॒NDale॒-'rciSi॒ puru॑Sa॒stAni॒ yajUgM॑Si॒ sa yaju॑SA maNDala॒gM॒ sa yaju॑SAM-lo~॒ka-ssaiSA tra॒yyeva॑ vi॒dyA ta॑pati॒ ya e॒So᳚-'nta-rA॑di॒tye hi॑ra॒NmayaH॒ puru॑SaH || 14.1 (tai. ara. 6.14.1)

AdityapuruSasya sarvAtmakatva pradar​zanaM (4.16)

A॒di॒tyo vai teja॒ ojo॒ balaM॒-yaza॒-zcakSu॒-zzrotra॑mA॒tmA mano॑ ma॒nyu-rmanu॑-rmR॒tyu-ssa॒tyo mi॒tro vA॒yurA॑kA॒zaH prA॒No lo॑kapA॒laH kaH ki-Gka-nta-thsa॒tyamanna॑-ma॒mRtA॑ jI॒vo vizvaH॑ kata॒ma-ssva॑ya॒bhu-mbrahmai॒ tadamR॑ta e॒Sa puru॑Sa e॒Sa bhU॒tAnA॒-madhi॑pati॒-rbrahma॑Na॒-ssAyu॑jyagM salo॒katA॑-mApno-tye॒tAsA॑me॒va de॒vatA॑nA॒gM॒ sAyu॑jyagM sA॒r​STitAgM॑ samAna lo॒katA॑-mApnoti॒ ya e॒vaM-vede᳚tyupa॒niSat || 15.1 (tai. ara. 6.15.1)

zivopAsana mantrAH (4.17)

nidha॑napataye॒ namaH | nidha॑napatAntikAya॒ namaH |

UrdhvAya॒ namaH | UrdhvaliGgAya॒ namaH |

hiraNyAya॒ namaH | hiraNyaliGgAya॒ namaH |

suvarNAya॒ namaH | suvarNaliGgAya॒ namaH |

divyAya॒ namaH | divyaliGgAya॒ namaH | 16.1 (tai. ara. 6.16.1)

bhavAya॒ namaH | bhavaliGgAya॒ namaH |

zarvAya॒ namaH | zarvaliGgAya॒ namaH |

zivAya॒ namaH | zivaliGgAya॒ namaH |

jvalAya॒ namaH | jvalaliGgAya॒ namaH |

AtmAya॒ namaH | AtmaliGgAya॒ namaH |

paramAya॒ namaH | paramaliGgAya॒ namaH |

etathsomasya॑ sUrya॒sya॒ sarvaliGgagg॑ sthApa॒ya॒ti॒ pANimantra॑-mpavi॒tram || 16.1 (tai. ara. 6.16.2)

pazcimavaktra pratipAdaka mantraH (4.18)

tai. ara. 6.17.1

sa॒dyojA॒ta-mpra॑padyA॒mi॒ sa॒dyojA॒tAya॒ vai namo॒ namaH॑ |

bha॒ve bha॑ve॒ nAti॑bhave bhavasva॒ mAm | bha॒vodbha॑vAya॒ namaH॑ || 17.1

uttara vaktra pratipAdaka mantraH (4.19)

vA॒ma॒de॒vAya॒ namo᳚ jye॒SThAya॒ namaH॑ zre॒SThAya॒ namo॑ ru॒drAya॒ namaH॒ kAlA॑ya॒ namaH॒ kala॑vikaraNAya॒ namo॒ bala॑vikaraNAya॒ namo॒ balA॑ya॒ namo॒ bala॑pramathanAya॒ nama॒-ssarva॑bhUtadamanAya॒ namo॑ ma॒nonma॑nAya॒ namaH॑ || 18.1 (tai. ara. 6.18.1)

dakSiNa vaktra pratipAdaka mantraH (4.20)

a॒ghore᳚bhyo-'tha॒ ghore᳚bhyo॒ ghora॒ghora॑tarebhyaH |

sarve᳚bhya-ssarva॒ zarve᳚bhyo॒ nama॑ste astu ru॒drarU॑pebhyaH || 19.1 (tai. ara. 6.19.1)

prAgvaktra pratipAdaka mantraH (4.21)

tatpuru॑SAya vi॒dmahe॑ mahAde॒vAya॑ dhImahi | tanno॑ rudraH praco॒dayA᳚t || 20.1 (tai. ara. 6.20.1)

Urdhva vaktra pratipAdaka mantraH (4.22)

IzAna-ssarva॑vidyA॒nA॒- mIzvara-ssarva॑bhUtA॒nA॒-mbrahmAdhi॑pati॒-rbrahma॒No-'dhi॑pati॒-rbrahmA॑ zi॒vo me॑ astu sadAzi॒vom || 21.1 (tai. ara. 6.21.1)

namaskArArtha mantrAH (4.23)

namo hiraNyabAhave hiraNyavarNAya hiraNyarUpAya hiraNyapataye 'biGkApataya umApataye pazupataye॑ namo॒ namaH || 22.1 (tai. ara. 6.22.1)

R॒tagM sa॒tya-mpa॑ra-mbra॒hma॒ pu॒ruSa॑-GkRSNa॒piGga॑lam |

U॒rdhvare॑taM-vi॑rUpA॒kSaM॒-vi॒zvarU॑pAya॒ vai namo॒ namaH॑ || 23.1 (tai. ara. 6.23.1)

sarvo॒ vai ru॒drastasmai॑ ru॒drAya॒ namo॑ astu |

puru॑So॒ vai ru॒dra-ssanma॒ho namo॒ namaH॑ |

vizva॑-mbhU॒ta-mbhuva॑na-Jci॒tra-mba॑hu॒dhA jA॒ta-JjAya॑mAna-Jca॒ yat |

sarvo॒ hye॑Sa ru॒drastasmai॑ ru॒drAya॒ namo॑ astu || 24.1 (tai. ara. 6.24.1)

kadru॒drAya॒ prace॑tase mI॒DhuSTa॑mAya॒ tavya॑se |

vo॒cema॒ zanta॑magM hR॒de ||

sarvo॒hye॑Sa ru॒drastasmai॑ ru॒drAya॒ namo॑ astu || 25.1 (tai. ara. 6.25.1)

agnihotra havaNyAH upayuktasya vRkSa vizeSa-syAbhidhAnam (4.24-25)

yasya॒ vai ka॑Gkatyagni-hotra॒hava॑NI bhavati॒ pratye॒vA-syAhu॑taya-stiSTha॒ntyatho॒ prati॑SThityai || 26.1 (tai. ara. 6.26.1)

bhUdevatAka mantraH (4.26)

kR॒Nu॒Sva pAja॒ iti॒ paJca॑ |

adi॑ti-rde॒vA ga॑ndha॒rvA ma॑nu॒SyAH᳚ pi॒taro-'su॑rA॒-steSAgM॑ sarva bhU॒tAnA᳚-mmA॒tA me॒dinI॑ maha॒tA ma॒hI sA॑vi॒trI gA॑ya॒trI jaga॑tyu॒rvI pR॒thvI ba॑hu॒lA vizvA॑ bhU॒tA ka॑ta॒mA kAyA sA sa॒tye-tya॒mRteti॑ vasi॒SThaH || 28.1 (tai. ara. 6.28.1)

sarvA devatA ApaH (4.27)

Apo॒ vA i॒dagM sarvaM॒-vi~zvA॑ bhU॒tAnyApaH॑ prA॒NA vA ApaH॑ pa॒zava॒ Apo-'nna॒mApo -'mR॑ta॒mApaH॑ sa॒mrADApo॑ vi॒rADApaH॑ sva॒rADApaH॒

chandA॒g॒syApo॒ jyotI॒g॒SyApo॒ yajU॒g॒SyApaH॑ sa॒tyamApa॒-ssarvA॑ de॒vatA॒ Apo॒ bhUrbhuva॒ssuva॒rApa॒ om || 29.1 (tai. ara. 6.29.1)

sandhyAvandana mantrAH (4.28)

ApaH॑ punantu pRthi॒vI-mpR॑thi॒vI pU॒tA pu॑nAtu॒ mAm |

pu॒nantu॒ brahma॑Na॒spati॒-rbrahma॑ pU॒tA pu॑nAtu॒ mAm |

yaducchi॑STa॒-mabho᳚jyaM॒-ya~dvA॑ du॒zcari॑ta॒-mmama॑ |

sarva॑-mpunantu॒ mAmApo॑-'sa॒tAJca॑ prati॒graha॒gg॒ svAhA᳚ || 30.2 (tai. ara. 6.30.1)

agnizca mA manyuzca manyupatayazca manyu॑kRte॒bhyaH |

pApebhyo॑ rakSa॒ntAm | yadahnA pApa॑makA॒r॒Sam |

manasA vAcA॑ hastA॒bhyAm | padbhyA-mudare॑Na zi॒znA |

aha॒stada॑valu॒pantu | yatkiJca॑ duri॒ta-mmayi॑ |

idamaha-mAmamR॑ta yo॒nau | satye jyotiSi juho॑mi svA॒hA || 31.1 (tai. ara. 6.31.1)

sUryazca mA manyuzca manyupatayazca manyu॑kRte॒bhyaH |

pApebhyo॑ rakSa॒ntAm | yadrAtriyA pApa॑makA॒r॒Sam |

manasA vAcA॑ hastA॒bhyAm | padbhyA-mudare॑Na zi॒znA |

rAtri॒-stada॑valu॒pantu | yatkiJca॑ duri॒ta-mmayi॑ |

idamaha-mAmamR॑ta yo॒nau | sUrye jyotiSi juho॑mi svA॒hA || 32.1 (tai. ara. 6.32.1)

praNavasya RSyAdi vivaraNaM (4.29)

omityekAkSa॑ra-mbra॒hma | agnirdevatA brahma॑ ityA॒r​Sam |

gAyatra-Jchanda-mparamAtmaM॑ sarU॒pam | sAyujyaM-vi~॑niyo॒gam || 33.1 (tai. ara. 6.33.1)

gAyatryAvAhana mantrAH (4.30)

AyA॑tu॒ vara॑dA de॒vI॒ a॒kSara॑-mbrahma॒ sammi॑tam |

gA॒ya॒trI᳚-Jchanda॑sA-mmA॒teda-mbra॑hma ju॒Sasva॑ me |

yadahnA᳚-tkuru॑te pA॒pa॒-ntadahnA᳚-tprati॒mucya॑te |

ya-drAtriyA᳚-tkuru॑te pA॒pa॒-nta-drAtriyA᳚-tprati॒mucya॑te |

sarva॑ va॒rNe ma॑hAde॒vi॒ sa॒ndhyA vi॑dye sa॒rasva॑ti || 34.2 (tai. ara. 6.34.1)

ojo॑-'si॒ saho॑-'si॒ bala॑masi॒ bhrAjo॑-'si de॒vAnA॒-ndhAma॒nAmA॑॑-'si॒ vizva॑masi vi॒zvAyu॒-ssarva॑masi sa॒rvAyu-rabhibhUroM-gAyatrI-mAvA॑hayA॒mi॒ sAvitrI-mAvA॑hayA॒mi॒ sarasvatI-mAvA॑hayA॒mi॒ chandar​SI-nAvA॑hayA॒mi॒ zriya-mAvA॑hayA॒mi॒ gAyatriyA gAyatrI chando vizvAmitra RSi-ssavitA devatA-'gnirmukha-mbrahmA ziro viSNur​hRdayagM rudra-zzikhA pRthivIyoniH prANApAna-vyAnodAna-samAnA saprANA zvetavarNA sAGkhyAyana-sagotrA gAyatrI caturvigMzatyakSarA tripadA॑ SaTku॒kSiH॒ paJca zIr​Sopanayane vi॑niyo॒gaH॒-

o-mbhUH | o-mbhuvaH | ogM suvaH | o-mmahaH | o-JjanaH | o-ntapaH | ogM sa॒tyam | o-nta-thsa॑vi॒turvare᳚Nya॒-mbhargo॑ de॒vasya॑ dhImahi | dhiyo॒ yo naH॑ praco॒dayA᳚t | omApo॒ jyotI॒ raso॒-'mRta॒-mbrahma॒ bhUrbhuva॒ssuva॒rom || 35.2 (tai. ara. 6.35.1)

gAyatrI upasthAna mantrAH (4.31)

u॒ttame॑ zikha॑re jA॒te॒ bhU॒myA-mpa॑rvata॒ mUrdha॑ni |

brA॒hmaNe᳚bhyo-'bhya॑nujJA॒tA॒ ga॒ccha de॑vi ya॒thAsu॑kham |

stuto mayA varadA ve॑damA॒tA॒ pracodayantI pavane᳚ dvijA॒tA |

AyuH pRthivyAM-draviNa-mbra॑hmava॒rca॒sa॒-mmahya-ndatvA prajAtu-mbra॑hmalo॒kam || 36.2 (tai. ara. 6.36.1)

AdityadevatA mantraH (4.32)

ghRNi॒-ssUrya॑ Adi॒tyo na prabhA॑-vA॒tyakSa॑ram |

madhu॑kSaranti॒ ta-dra॑sam |

sa॒tyaM-vai~ ta-drasa॒-mApo॒ jyotI॒raso॒-'mRta॒-mbrahma॒ bhUrbhuva॒ssuva॒rom || 37.1 (tai. ara. 6.37.1)

trisuparNamantrAH (4.33)

brahma॑ metu॒ mAm | madhu॑ metu॒ mAm | brahma॑-me॒va madhu॑ metu॒ mAm |

yAste॑ soma pra॒jAva॒thso-'bhi॒so a॒ham | dusSva॑pna॒ha-ndu॑ruSvaha |

yAste॑ soma prA॒NAg​stA-Jju॑homi | trisu॑parNa॒ mayA॑cita-mbrAhma॒NAya॑ dadyAt |

bra॒hma॒ha॒tyAM-vA~ e॒te ghna॑nti | ye brA᳚hma॒NA-strisu॑parNa॒-mpaTha॑nti |

te soma॒-mprApnu॑vanti | A॒sa॒ha॒srA-tpa॒kti-mpuna॑nti | om || 38.1 (tai. ara. 6.38.1)

brahma॑ me॒dhayA᳚ | madhu॑ me॒dhayA᳚ |

brahma॑me॒va madhu॑ me॒dhayA᳚ | a॒dyA no॑ deva savitaH pra॒jAva॑thsAvI॒-ssaubha॑gam |

parA॑ du॒sSvapni॑yagM suva | vizvA॑ni deva savita-rduri॒tAni॒ parA॑suva |

ya-dbha॒dra-ntanma॒ Asu॑va | madhu॒vAtA॑ RtAya॒te madhu॑kSaranti॒ sindha॑vaH |

mAddhvI᳚rna-ssa॒ntvoSa॑dhIH | madhu॒nakta॑ mu॒toSasi॒ madhu॑ma॒-tpArthi॑va॒gM॒ rajaH॑ |

madhu॒dyaura॑stu naH pi॒tA | madhu॑mAnno॒ vana॒spati॒-rmadhu॑mAgM astu॒ sUryaH॑ |

mAddhvI॒ rgAvo॑ bhavantu naH | ya i॒ma-ntrisu॑parNa॒-mayA॑cita-mbrAhma॒NAya॑ dadyAt |

bhrU॒Na॒ha॒tyAM-vA~ e॒te ghna॑nti | ye brA᳚hma॒NA-strisu॑parNa॒-mpaTha॑nti |

te soma॒-mprApnu॑vanti | A॒sa॒ha॒srA-tpa॒kti-mpuna॑nti | om || 39.7 (tai. ara. 6.39.1)

brahma॑ me॒dhavA᳚ | madhu॑ me॒dhavA᳚ | brahma॑me॒va madhu॑ me॒dhavA᳚ |

bra॒hmA de॒vAnA᳚-mpada॒vIH ka॑vI॒nA-mRSi॒-rviprA॑NA-mmahi॒So mR॒gANA᳚m |

zye॒no gRddhrA॑NA॒g॒ svadhi॑ti॒-rvanA॑nA॒gM॒ somaH॑ pa॒vitra॒-matye॑ti॒ rebhann॑ |

ha॒gM॒sa-zzu॑ci॒Sa-dvasu॑rantarikSa॒ saddhotA॑- vedi॒Sa-dati॑thi-rduroNa॒sat |

nR॒Sadva॑ra॒-sadR॑ta॒-sa-dvyo॑ma॒-sada॒bjA- go॒jA R॑ta॒jA a॑dri॒jA R॒ta-mbR॒hat |

R॒cetvA॑ ru॒cetvA॒ sami-thsra॑vanti sa॒rito॒ na dhenAH᳚ |

a॒ntar-hR॒dA mana॑sA pU॒yamA॑nAH |

ghR॒tasya॒ dhArA॑ a॒bhicA॑kazImi |

hi॒ra॒Nyayo॑ veta॒so maddhya॑ AsAm |

tasmi᳚n-thsupa॒rNo ma॑dhu॒kR-tku॑lA॒yI bhaja॑nnAste॒ madhu॑ de॒vatA᳚bhyaH |

tasyA॑ sate॒ hara॑ya-ssa॒ptatIre᳚ sva॒dhA-nduhA॑nA a॒mRta॑sya॒ dhArA᳚m |

ya i॒da-ntrisu॑parNa॒-mayA॑cita-mbrAhma॒NAya॑ dadyAt |

vI॒ra॒ha॒tyAM-vA~ e॒te ghna॑nti | ye brA᳚hma॒NA-strisu॑parNa॒-mpaTha॑nti |

te soma॒-mprApnu॑vanti | A॒sa॒ha॒srA-tpa॒Gkti-mpuna॑nti | om || 40.6 (tai. ara. 6.40.1)

medhA sUktaM (4.34)

me॒dhAde॒vI ju॒SamA॑NA na॒ AgA᳚-dvi॒zvAcI॑ bha॒drA su॑mana॒sya mA॑nA |

tvayA॒ juSTA॑ nu॒damA॑nA du॒ruktA᳚-nbR॒hadva॑dema vi॒dathe॑ su॒vIrAH᳚ |

tvayA॒ juSTa॑ R॒Si-rbha॑vati devi॒ tvayA॒ brahmA॑-''ga॒tazrI॑ ru॒ta tvayA᳚ |

tvayA॒ juSTa॑zci॒traM-vi~॑ndate vasu॒ sA no॑ juSasva॒ dravi॑No namedhe || 41.1 (tai. ara. 6.41.1)

me॒dhA-mma॒ indro॑ dadAtu me॒dhA-nde॒vI sara॑svatI |

me॒dhA-mme॑ a॒zvinA॑-vu॒bhAvAdha॑ttA॒-mpuSka॑rasrajA ||

a॒phsa॒rAsu॑ ca॒ yA me॒dhA ga॑ndha॒rveSu॑ ca॒ yanmanaH॑ |

daivI᳚-mme॒dhA sara॑svatI॒ sA mA᳚-mme॒dhA su॒rabhi॑-rjuSatA॒g॒ svAhA᳚ || 42.1 (tai. ara. 6.42.1)

AmA᳚-mme॒dhA su॒rabhi॑-rvi॒zvarU॑pA॒ hira॑NyavarNA॒ jaga॑tI jaga॒myA |

Urja॑svatI॒ paya॑sA॒ pinva॑mAnA॒ sA mA᳚-mme॒dhA su॒pratI॑kA juSantAm || 43.1 (tai. ara. 6.43.1)

mayi॑ me॒dhA-mmayi॑ pra॒jA-mmayya॒gnistejo॑ dadhAtu॒ mayi॑ me॒dhA-mmayi॑ pra॒jA-mmayIndra॑ indri॒ya-nda॑dhAtu॒ mayi॑ me॒dhA-mmayi॑ pra॒jA-mmayi॒ sUryo॒ bhrAjo॑ dadhAtu || 44.1 (tai. ara. 6.44.1)

mRtyunivAraNa mantrAH (4.35)

apai॑tu mR॒tyu-ra॒mRta॑nna॒ Aga॑n. vaivasva॒to no॒ abha॑yaGkRNotu |

pa॒rNaM-va~na॒spate॑ rivA॒bhinaH॑ zIyatAgM ra॒yi-ssaca॑tAnna॒-zzacI॒patiH॑ || 45.1 (tai. ara. 6.45.1)

para॑-mmRtyo॒ anu॒ pare॑hi॒ panthAM॒-ya~ste॒sva ita॑ro deva॒yAnA᳚t |

cakSu॑Smate zRNva॒te te᳚ bravImi॒ mAnaH॑ pra॒jAgM rI॑riSo॒ mota vI॒rAn || 46.1 (tai. ara. 6.46.1)

vAta॑-mprA॒Na-mmana॑sA॒ nvAra॑bhAmahe pra॒jApa॑tiM॒-yo~ bhuva॑nasya go॒pAH |

sano॑ mR॒tyo strA॑yatA॒-mpAtvagMha॑so॒ jyog jI॒vA ja॒rAma॑zImahi || 47.1 (tai. ara. 6.47.1)

a॒mu॒tra॒ bhUyA॒dadha॒ yadya॒masya॒ bRha॑spate a॒bhiza॑ste॒ra mu॑JcaH |

pratyau॑hatA ma॒zvinA॑ mR॒tyu ma॑smA-dde॒vAnA॑magne bhi॒SajA॒ zacI॑bhiH || 48.1 (tai. ara. 6.48.1)

hari॒gM॒ hara॑nta॒- manu॑yanti de॒vA vizva॒syezA॑naM-vR~Sa॒bha-mma॑tI॒nAm |

brahma॒ sarU॑pa॒-manu॑me॒damA॑gA॒-daya॑na॒-mmA viva॑dhI॒-rvikra॑masva || 49.1 (tai. ara. 6.49.1)

zalkai॑ra॒gni-mi॑ndhA॒na u॒bhau lo॒kau sa॑nema॒ham |

u॒bhayo᳚ rlo॒kayA॑r-R॒dhdvA-'ti॑ mR॒tyu-nta॑rAmya॒ham || 50.1 (tai. ara. 6.50.1)

mA chi॑do mRtyo॒ mA va॑dhI॒r​mA me॒ balaM॒-vi~vR॑ho॒ mA pramo॑SIH |

pra॒jA-mmA me॑ rIriSa॒ Ayu॑rugra nR॒cakSa॑sa-ntvA ha॒viSA॑ vidhema || 51.1 (tai. ara. 6.51.1)

mA no॑ ma॒hAnta॑mu॒ta mA no॑ arbha॒ka-mmA na॒ ukSa॑ntamu॒ta mA na॑ ukSi॒tam |

mA no॑ vadhIH pi॒tara॒-mmota mA॒tara॑-mpri॒yA mA na॑sta॒nuvo॑ rudra rIriSaH || 52.1 (tai. ara. 6.52.1)

mA na॑sto॒ke tana॑ye॒ mA na॒ Ayu॑Si॒ mA no॒ goSu॒ mA no॒ azve॑Su rIriSaH |

vI॒rAnmA no॑ rudra bhAmi॒tova॑dhIr-ha॒viSma॑nto॒ nama॑sA vidhema te || 53.1 (tai. ara. 6.53.1)

prajApati-prArthanA mantraH (4.36)

prajA॑pate॒ na tvade॒tA-nya॒nyo vizvA॑ jA॒tAni॒ pari॒tA ba॑bhUva |

ya-tkA॑mAste juhu॒mastanno॑ astu va॒yagg​ syA॑ma॒ pata॑yo rayI॒NAm || 54.1 (tai. ara. 6.54.1)

indraprArthanA mantraH (4.37)

sva॒sti॒dA vi॒zaspati॑-rvRtra॒hA vimRdho॑ va॒zI |

vRSendraH॑ pu॒ra e॑tu nassvasti॒dA a॑bhaya-Gka॒raH || 55.1 (tai. ara. 6.55.1)

mRtyuJjaya mantrAH (4.38)

trya॑mbakaM-ya~jAmahe suga॒ndhi-mpu॑STi॒vardha॑nam |

u॒rvA॒ru॒kami॑va॒ bandha॑nA-nmR॒tyo-rmu॑kSIya॒ mA-'mRtA᳚t || 56.1 (tai. ara. 6.56.1)

ye te॑ sa॒hasra॑ma॒yuta॒-mpAzA॒ mRtyo॒ martyA॑ya॒ hanta॑ve |

tAn. ya॒jJasya॑ mA॒yayA॒ sarvA॒nava॑ yajAmahe | mR॒tyave॒ svAhA॑ mR॒tyave॒ svAhA᳚ || 58.1 (tai. ara. 6.57-58)

pApanivArakA mantrAH (4.39)

de॒vakR॑ta॒syaina॑so-'va॒yaja॑namasi॒ svAhA᳚ |

ma॒nu॒Sya॑kRta॒syaina॑so 'va॒yaja॑namasi॒ svAhA᳚ |

pi॒tRkR॑ta॒syaina॑so 'va॒yaja॑namasi॒ svAhA᳚ |

A॒tmakR॑ta॒syaina॑so 'va॒yaja॑namasi॒ svAhA᳚ |

a॒nyakR॑ta॒syaina॑so 'va॒yaja॑namasi॒ svAhA᳚ |

a॒smatkR॑ta॒syaina॑so 'va॒yaja॑namasi॒ svAhA᳚ |

yaddi॒vA ca॒ nakta॒-Jcaina॑zcakR॒ma tasyA॑ va॒yaja॑namasi॒ svAhA᳚ |

ya-thsva॒panta॑zca॒ jAgra॑ta॒-zcaina॑zca-kR॒ma tasyA॑ va॒yaja॑namasi॒ svAhA᳚ |

ya-thsu॒Supta॑zca॒ jAgra॑ta॒-zcaina॑zca-kR॒ma tasyA॑ va॒yaja॑namasi॒ svAhA᳚ |

ya-dvi॒dvAgMsa॒zcA vi॑dvAgMsa॒zcaina॑zca-kR॒ma tasyA॑ va॒yaja॑namasi॒ svAhA᳚ |

enasa enaso vayajanama॑si svA॒hA || 59.1 (tai. ara. 6.59.1)

vasu-prArthanA mantraH (4.40)

yadvo॑ devAzcakR॒ma ji॒hvayA॑ gu॒rumana॑so vA॒ prayu॑tI deva॒ heDa॑nam |

arA॑vA॒yo no॑ a॒bhidu॑cchunA॒yate॒ tasmi॒-ntadeno॑ vasavo॒ nidhe॑tana॒ svAhA᳚ || 60.1 (tai. ara. 6.60.1)

kAmo-'kAr​SIt - manyurakAr​SIt mantraH (4.41)

kAmo-'kAr​SI᳚-nnamo॒ namaH |

kAmo-'kAr​SI-tkAmaH karoti nAha-Gkaromi kAmaH kartA nAha-GkartA kAmaH॑ kAra॒yitA nAha॑-GkAra॒yitA eSa te kAma kAmA॑ya svA॒hA || 61.1 (tai. ara. 6.61.1)

manyurakAr​SI᳚-nnamo॒ namaH |

manyurakAr​SI-nmanyuH karoti nAha-Gkaromi manyuH kartA nAha-GkartA manyuH॑ kAra॒yitA nAha॑-GkAra॒yitA eSa te manyo manya॑ve svA॒hA || 62.1 (tai. ara. 6.62.1)

virajA homa mantrAH (4.42)

tilAJjuhomi sarasAgM sapiSTA-ngandhAra mama citte rama॑ntu svA॒hA |

gAvo hiraNya-ndhanamannapAnagM sarveSAg​ zri॑yai svA॒hA |

zriyaJca lakSmiJca puSTiJca kIrti॑-JcA nR॒NyatAm | brahmaNya-mba॑hupu॒tratAm |

zraddhAmedhe prajA-ssandadA॑tu svA॒hA || 63.3 (tai. ara. 6.63.1)

tilAH kRSNA-sti॑lA-zzve॒tA॒-stilA-ssaumyA va॑zAnu॒gAH |

tilAH punantu॑ me pA॒paM॒-ya~tkiJci-ddurita-mma॑yi svA॒hA |

cora॒syAnna-nna॑vazrA॒ddha॒-mbra॒hma॒hA gu॑ruta॒lpagaH |

gosteyagM sa॑rApA॒na॒-mbhrUNahatyA tilA zAntigM zamaya॑ntu svA॒hA |

zrIzca lakSmIzca puSTIzca kIrti॑-JcA nR॒NyatAm |

brahmaNya-mba॑hupu॒tratAm |

zraddhAmedhe prajJAtu jAtaveda-ssandadA॑tu svA॒hA || 64.3 (tai. ara. 6.64.1)

prANApAna-vyAnodAna-samAnA me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

vAM-mana-zcakSuH-zrotra-jihvA-ghrANa-reto-buddhyAkUti-ssaGkalpA me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

tvak-carma-mAgMsa-rudhira-medo-majjA-snAyavo-'sthIni me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

ziraH pANi pAda pAr​zva pRSTho-rUdara-jaGgha-zizrnopastha pAyavo me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

uttiSTha puruSa harita-piGgala lohitAkSi dehi dehi dadApayitA me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ || 65.5 (tai. ara. 6.65.1)

pRthivyApa stejo vAyu-rAkAzA me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

zabda-spar​za-rUparasa-gandhA me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

mano-vAk-kAya-karmANi me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

avyaktabhAvai-ra॑haGkA॒ra॒-rjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

AtmA me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

antarAtmA me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

paramAtmA me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ |

kSu॒dhe svAhA᳚ | kSutpi॑pAsAya॒ svAhA᳚ | vivi॑Tyai॒ svAhA᳚ |

Rgvi॑dhAnAya॒ svAhA᳚ | ka॒So᳚tkAya॒ svAhA᳚ |

kSu॒tpi॒pA॒sAma॑la-Jjye॒SThA॒ma॒la॒kSmI-rnA॑zayA॒myaham |

abhU॑ti॒-masa॑mRddhi॒Jca॒ sarvAM (sarvA) nirNuda me pApmA॑nagg​ svA॒hA |

annamaya-prANamaya-manomaya-vijJAnamaya-mAnandamaya-mAtmA me॑ zuddhya॒ntA॒-Jjyoti॑ ra॒haM-vi~॒rajA॑ vipA॒pmA bhU॑yAsa॒gg॒ svAhA᳚ || 66.10 (tai. ara. 6.66.1)

vaizvadeva mantrAH (4.43)

a॒gnaye॒ svAhA᳚ | vizve᳚bhyo de॒vebhya॒-ssvAhA᳚ |

dhru॒vAya॑ bhU॒mAya॒ svAhA᳚ | dhru॒va॒kSita॑ye॒ svAhA᳚ |

a॒cyu॒ta॒kSita॑ye॒ svAhA᳚ | a॒gnaye᳚ sviSTa॒kRte॒ svAhA᳚ |

dharmA॑ya॒ svAhA᳚ | adha॑rmAya॒ svAhA᳚ |

a॒dbhya-ssvAhA᳚ | o॒Sa॒dhi॒va॒na॒spa॒tibhya॒-ssvAhA᳚ | 67.1 (tai. ara. 6.67.1)

ra॒kSo॒de॒va॒ja॒nebhya॒-ssvAhA᳚ |

gRhyA᳚bhya॒-ssvAhA᳚ | a॒va॒sAne᳚bhya॒-ssvAhA᳚ |

a॒va॒sAna॑patibhya॒-ssvAhA᳚ | sa॒rva॒bhU॒tebhya॒-ssvAhA᳚ |

AmA॑ya॒ svAhA᳚ | a॒ntari॑kSAya॒ svAhA᳚ |

yadeja॑ti॒ jaga॑ti॒ yacca॒ ceSTa॑ti॒ nAmno॑ bhA॒go-'ya-nnAmne॒ svAhA᳚ |

pR॒thi॒vyai svAhA᳚ | a॒ntari॑kSAya॒ svAhA᳚ | 67.2 (tai. ara. 6.67.2)

di॒ve svAhA᳚ | sUryA॑ya॒ svAhA᳚ |

ca॒ndrama॑se॒ svAhA᳚ | nakSa॑trebhya॒-ssvAhA᳚ |

indrA॑ya॒ svAhA᳚ | bRha॒spata॑ye॒ svAhA᳚ |

pra॒jApa॑taye॒ svAhA᳚ | brahma॑Ne॒ svAhA᳚ |

sva॒dhA pi॒tRbhya॒-ssvAhA᳚ | namo॑ ru॒drAya॑ pazu॒pata॑ye॒ svAhA᳚ | 67.3 (tai. ara. 6.67.3)

de॒vebhya॒-ssvAhA᳚ | pi॒tRbhyaH॑ sva॒dhA-'stu॑ |

bhU॒tebhyo॒ namaH॑ | ma॒nu॒Sye᳚bhyo॒ hantA᳚ |

pra॒jApa॑taye॒ svAhA᳚ | pa॒ra॒me॒SThine॒ svAhA᳚ |

yathA kU॑pa-zza॒tadhA॑ra-ssa॒hasra॑dhAro॒ akSi॑taH |

e॒vA me॑ astu dhA॒nyagM sa॒hasra॑dhAra॒-makSi॑tam |

dhana॑dhAnyai॒ svAhA᳚ || ye bhU॒tAH pra॒cara॑nti॒ divA॒nakta॒-mbali॑-mi॒cchanto॑ vi॒tuda॑sya॒ preSyAH᳚ |

tebhyo॑ ba॒li-mpu॑STi॒kAmo॑ harAmi॒ mayi॒ puSTi॒-mpuSTi॑pati-rdadhAtu॒ svAhA᳚ || 67.4 (tai. ara. 6.67.4)

(o॒Sa॒dhi॒va॒na॒spa॒tibhya॒-ssvAhA॒ - 'ntari॑kSAya॒ svAhA॒ - namo॑ ru॒drAya॑ pazu॒pata॑ye॒ svAhA॑ - vi॒tuda॑sya॒ preSyA॒ eka॑-Jca)

o᳚-nta-dbra॒hma | o᳚-nta-dvA॒yuH |

o᳚-ntadA॒tmA | o᳚-nta-thsa॒tyam |

o᳚-nta-thsarva᳚m | o᳚-nta-tpuro॒-rnamaH |

antazcarati॑ bhUte॒Su॒ guhAyAM-vi~॑zva mU॒rtiSu |

tvaM-yajJastvaM-vaSaTkArastva-midrastvagM rudrastvaM​vi~SNustva-mbrahmatva॑-mprajA॒patiH |

tva-nta॑dApa॒ Apo॒ jyotI॒ raso॒-'mRta॒-mbrahma॒ bhUrbhuva॒ssuva॒rom || 68.2 (tai. ara. 6.68.1)

4.44 prANAhuti mantrAH

zra॒ddhAyA᳚-mprA॒Ne nivi॑STo॒-'mRta॑-Jjuhomi |

zra॒ddhAyA॑mapA॒ne nivi॑STo॒-'mRta॑-Jjuhomi |

zra॒ddhAyAM᳚-vyA~॒ne nivi॑STo॒-'mRta॑-Jjuhomi |

zra॒ddhAyA॑mudA॒ne nivi॑STo॒-'mRta॑-Jjuhomi |

zra॒ddhAyAgM॑ samA॒ne nivi॑STo॒-'mRta॑-Jjuhomi |

brahma॑Ni ma A॒tmA-'mR॑ta॒tvAya॑ ||

a॒mR॒to॒pa॒stara॑Namasi ||

zra॒ddhAyA᳚-mprA॒Ne nivi॑STo॒-'mRta॑-Jjuhomi |

zi॒vo mA॑ vi॒zApra॑dAhAya | prA॒NAya॒ svAhA᳚ |

zra॒ddhAyA॑mapA॒ne nivi॑STo॒-'mRta॑-Jjuhomi |

zi॒vo mA॑ vi॒zApra॑dAhAya | a॒pA॒nAya॒ svAhA᳚ |

zra॒ddhAyAM᳚-vyA~॒ne nivi॑STo॒-'mRta॑-Jjuhomi |

zi॒vo mA॑ vi॒zApra॑dAhAya | vyA॒nAya॒ svAhA᳚ |

zra॒ddhAyA॑-mudA॒ne nivi॑STo॒-'mRta॑-Jjuhomi |

zi॒vo mA॑ vi॒zApra॑dAhAya | u॒dA॒nAya॒ svAhA᳚ |

zra॒ddhAyAgM॑ samA॒ne nivi॑STo॒-'mRta॑-Jjuhomi |

zi॒vo mA॑ vi॒zApra॑dAhAya | sa॒mA॒nAya॒ svAhA᳚ |

brahma॑Ni ma A॒tmA-'mR॑ta॒tvAya॑ ||

a॒mR॒tA॒pi॒dhA॒nama॑si || 69.4 (tai. ara. 6.69.1)

bhuktAnnAbhimantraNa mantrAH (4.45)

zra॒ddhAyA᳚-mprA॒Ne nivi॑zyA॒-'mRtagM॑ hu॒tam | prA॒Na manne॑nApyAyasva |

zra॒ddhAyA॑mapA॒ne nivi॑zyA॒-'mRtagM॑ hu॒tam | a॒pA॒na manne॑nApyAyasva |

zra॒ddhAyAM᳚-vyA~॒ne nivi॑zyA॒-'mRtagM॑ hu॒tam | vyA॒na manne॑nApyAyasva |

zra॒ddhAyA॑-mudA॒ne nivi॑zyA॒-'mRtagM॑ hu॒tam | u॒dA॒na manne॑nApyAyasva |

zra॒ddhAyAgM॑ samA॒ne nivi॑zyA॒-'mRtagM॑ hu॒tam | sa॒mAna॒ manne॑nApyAyasva || 70.1 (tai. ara0.1)

bhojanAnte AtmAnusandhAna mantrAH (4.46)

aGguSThamAtraH puruSo-'GguSThaJca॑ samA॒zritaH | Iza-ssarvasya jagataH prabhuH prINAti॑ vizva॒bhuk || 71.1 (tai. ara. 6.71.1)

avayavasvasthatA prArthanA mantraH (4.47)

vAmma॑ A॒sann | na॒soH prA॒NaH | a॒kSyo-zcakSuH॑ |

karNa॑yo॒-zzrotra᳚m | bA॒hu॒vo-rbala᳚m | U॒ru॒vo rojaH॑ |

ari॑STA॒ vizvA॒nyaGgA॑ni ta॒nUH | ta॒nuvA॑ me sa॒ha nama॑ste astu॒ mA mA॑ higMsIH || 72.1 (tai. ara. 6.72.1)

indra saptar​Si saM​vA~da mantraH (4.48)

vayaH॑ supa॒rNA upa॑sedu॒rindra॑-mpri॒ya me॑dhA॒ RSa॑yo॒ nAdha॑mAnAH |

apa॑ddhvA॒nta mU᳚rNu॒hi pU॒rdhi cakSu॑-rmumu॒gdhya॑smA-nni॒dhaye॑ 'vaba॒ddhAn || 73.1 (tai. ara. 6.73.1)

hRdayAlambhana mantraH (4.49)

prANAnA-Ggranthirasi rudro mA॑ vizA॒ntakaH | tenAnnenA᳚-pyAya॒sva || 74.1 (tai. ara. 6.74.1)

devatA prANanirUpaNa mantraH (4.50)

namo rudrAya viSNave mRtyu॑rme pA॒hi || 75.1 (tai. ara. 6.75.1)

agni stuti mantraH (4.51)

tvama॑gne॒ dyubhi॒-stvamA॑zu-zu॒kSaNi॒-stvama॒dbhya-stvamazma॑na॒spari॑ |

tvaM-va~ne᳚bhya॒-stvamoSa॑dhIbhya॒-stva-nnR॒NA-nnR॑pate jAyase॒ zuciH॑ || 76.1 (tai. ara. 6.76.1)

abhISTa yAcanA mantraH (4.52)

zi॒vena॑ me॒ santi॑SThasva syo॒nena॑ me॒ santi॑SThasva subhU॒tena॑ me॒ santi॑SThasva brahmavarca॒sena॑ me॒ santi॑SThasva ya॒jJasyardhi॒ manu॒ santi॑STha॒ svopa॑ te yajJa॒ nama॒ upa॑ te॒ nama॒ upa॑ te॒ namaH॑ || 77.1 (tai. ara. 6.77.1)

para tattva nirUpaNaM (4.53)

sa॒tya-mpara॒-mparagM॑ sa॒tyagM sa॒tyena॒ na su॑va॒rgA-llo॒kAccya॑vante ka॒dAca॒na sa॒tAgM hi sa॒tya-ntasmA᳚-thsa॒tye ra॑mante॒,

tapa॒ iti॒ tapo॒ nAnaza॑nA॒-tparaM॒-ya~ddhi para॒-ntapa॒sta-ddudha॑r​Sa॒-nta-ddurA॑dhar​Sa॒-ntasmA॒-ttapa॑si ramante॒,

dama॒ iti॒ niya॑ta-mbrahmacA॒riNa॒-stasmA॒-ddame॑ ramante॒,

zama॒ ityara॑Nye mu॒naya॒-stasmA॒cchame॑ ramante,

dA॒namiti॒ sarvA॑Ni bhU॒tAni॑ pra॒zagMsa॑nti dA॒nAnnAti॑ du॒zcara॒-ntasmA᳚-ddA॒ne ra॑mante,

dha॒rma iti॒ dharme॑Na॒ sarva॑mi॒da-mpari॑gRhIta-ndha॒rmAnnAti॑-du॒Skara॒-ntasmA᳚--ddha॒rme ra॑mante,

pra॒jana॒ iti॒ bhUyAgM॑॑sa॒-stasmA॒-dbhUyi॑SThAH॒ prajA॑yante॒ tasmA॒-dbhUyi॑SThAH ॑ne ramante॒,

-'gnaya॒ ityA॑ha॒ tasmA॑-da॒gnaya॒ AdhA॑tavyA agniho॒tra-mityA॑ha॒ tasmA॑-dagniho॒tre ra॑mante,

ya॒jJa iti॑ ya॒jJo hi de॒vA stasmA᳚-dya॒jJe ra॑mante,

mAna॒sa-miti॑ vi॒dvAgMsa॒-stasmA᳚-dvi॒dvAgMsa॑ e॒va mA॑na॒se ra॑mante,

nyA॒sa iti॑ bra॒hmA bra॒hmA hi paraH॒ paro॑ hi bra॒hmA tAni॒ vA e॒tAnyava॑rANi॒ parAgM॑si nyA॒sa e॒vAtya॑recaya॒-dya e॒vaM-ve~de᳚tyupa॒niSat || 78.11 (tai. ara. 6.78.1)

4.54 jJAna sAdhana nirUpaNaM

prA॒jA॒pa॒tyo hAru॑Ni-ssupa॒rNeyaH॑ pra॒jApa॑ti-mpi॒tara॒-mupa॑sasAra॒ ki-mbha॑gava॒ntaH pa॑ra॒maM-va~॑da॒ntIti॒ tasmai॒ pro॑vAca,

sa॒tyena॑ vA॒yurAvA॑ti sa॒tye-nA॑di॒tyo ro॑cate di॒vi sa॒tyaM-vA॒caH pra॑ti॒SThA sa॒tye sa॒rva-mprati॑SThita॒-ntasmA᳚-thsa॒tya-mpa॑ra॒maM-vada॑nti॒,

tapa॑sA de॒vA de॒vatA॒-magra॑ Aya॒-ntapa॒sar​Sa॑ya॒-ssuva॒ranva॑-vinda॒-ntapa॑sA sa॒patnA॒-npraNu॑dA॒-mArA॑tI॒ stapa॑si sa॒rva-mprati॑SThita॒-ntasmA॒-ttapaH॑ para॒maM-va~da॑nti॒,

dame॑na dA॒ntAH ki॒lbiSa॑-mavadhU॒nvanti॒ dame॑na brahmacA॒riNa॒-ssuva॑ragaccha॒-ndamo॑ bhU॒tAnA᳚-ndurA॒dhar​Sa॒-ndame॑ sa॒rva-mprati॑SThita॒-ntasmA॒-ddamaH॑ para॒maM-va~da॑nti॒,

zame॑na zA॒ntA-zzi॒va-mA॒cara॑nti॒ zame॑na nA॒ka-mmu॒nayo॒-'nvavi॑nda॒n chamo॑ bhU॒tAnA᳚-ndurA॒dhar​Sa॒-Jchame॑ sa॒rva-mprati॑SThita॒-ntasmA॒cchamaH॑ para॒maM-va~da॑nti,

dA॒naM-ya॒jJAnAM॒-varU॑tha॒-ndakSi॑NA lo॒ke dA॒tAragM॑ sarva bhU॒tAnyu॑pajI॒vanti॑ dA॒nenArA॑tI॒-rapA॑nudanta dA॒nena॑ dviSa॒nto mi॒trA bha॑vanti dA॒ne sa॒rva-mprati॑SThita॒-ntasmA᳚-ddA॒na-mpa॑ra॒maM-va~da॑nti,

dha॒rmo vizva॑sya॒ jaga॑taH prati॒SThA lo॒ke dha॒rmiSTha॑-mpra॒jA u॑pasa॒rpanti॑ dha॒rmeNa॑ pA॒pa-ma॑pa॒nuda॑ti dha॒rme sa॒rva-mprati॑SThita॒-ntasmA᳚-ddha॒rma-mpa॑ra॒maM-va~da॑nti,

pra॒jana॑naM॒-vai~ pra॑ti॒SThA lo॒ke sA॒dhu pra॒jAyA᳚ sta॒ntun-ta॑nvA॒naH pi॑tR॒NA ma॑nR॒No bhava॑ti॒ tade॑va ta॒syA anR॑Na॒-ntasmA᳚-tpra॒jana॑na-mpara॒maM-va~da॑ntya॒,

gnayo॒ vai trayI॑ vi॒dyA de॑va॒yAnaH॒ panthA॑ gAr​hapa॒tya Rk-pR॑thi॒vI ra॑thanta॒ra-ma॑nvAhA-rya॒paca॑naM॒-yaju॑ra॒ntari॑kSaM-vAmade॒vya mA॑hava॒nIya॒-ssAma॑suva॒rgo lo॒ko bR॒hat-tasmA॑-da॒gnI-npa॑ra॒maM-va~da॑ntya,

gniho॒tragM sA॑ya-mprA॒ta-rgR॒hANAM॒-niSkR॑ti॒-ssvi॑STagM suhu॒taM-ya॑jJakratU॒nA-mprAya॑NagM suva॒rgasya॑ lo॒kasya॒ jyoti॒-stasmA॑-dagniho॒tra-mpa॑ra॒maM-vada॑nti,

ya॒jJa iti॑ ya॒jJena॒ hi de॒vA diva॑-Gga॒tA ya॒jJenAsu॑rA॒-napA॑nudanta ya॒jJena॑ dviSa॒nto mi॒trA bha॑vanti ya॒jJe sa॒rva-mprati॑SThita॒-ntasmA᳚-dya॒jJa-mpa॑ra॒maM-va~da॑nti,

mAna॒saM-vai~ prA॑jApa॒tya-mpa॒vitra॑-mmAna॒sena॒ mana॑sA sA॒dhu pa॑zyati mAna॒sA RSa॑yaH pra॒jA a॑sRjanta mAna॒se sa॒rva-mprati॑SThita॒-ntasmA᳚-nmAna॒sa-mpa॑ra॒maM-va~da॑nti,

nyA॒sa i॒tyAhu॑-rmanI॒SiNo᳚ bra॒hmANa॑-mbra॒hmA vizvaH॑ kata॒ma-ssva॑ya॒bhuMH pra॒jApa॑ti-ssaM​vathsara॒ iti॑, saM​vathsa॒ro॑ 'sAvA॑di॒tyo ya e॒Sa A॑di॒tye puru॑Sa॒-ssa pa॑rame॒SThI brahmA॒tmA,

yAbhi॑rAdi॒tya-stapa॑ti ra॒zmibhi॒stAbhiH॑ pa॒rjanyo॑ var​Sati pa॒rjanye॑-nauSadhi-vanaspa॒tayaH॒ prajA॑yanta oSadhi-vanaspa॒tibhi॒-ranna॑-mbhava॒tyanne॑na prA॒NAH prA॒Nai-rbala॒-mbale॑na॒ tapa॒-stapa॑sA zra॒ddhA zra॒ddhayA॑ me॒dhA me॒dhayA॑ manI॒SA ma॑nI॒SayA॒ mano॒ mana॑sA॒ zAnti॒-zzAntyA॑ ci॒tta-Jci॒ttena॒ smRti॒gg॒ smRtyA॒ smAra॒gg॒ smAre॑Na vi॒jJAnaM॑-vi॒jJAne॑-nA॒tmAnaM॑-vedayati॒ tasmA॑da॒nna-ndada॒n-thsarvA᳚Nye॒tAni॑ dadA॒-tyannA᳚-tprA॒NA bha॑vanti,

bhU॒tAnA᳚-mprA॒Nai-rmano॒ mana॑sazca vi॒jJAnaM॑-vi~॒jJAnA॑-dAna॒ndo bra॑hma yo॒ni-ssa vA e॒Sa puru॑SaH paJca॒dhA pa॑JcA॒tmA yena॒ sarva॑mi॒da-mprota॑-mpRthi॒vI cA॒ntari॑kSa-Jca॒ dyauzca॒ diza॑zcAvAntaradi॒zAzca॒ sa vai sarva॑mi॒da-Jjaga॒thsa sa॒bhUtagM॑ sa bha॒vya-Jji॑jJAsa klR॒pta R॑ta॒jA rayi॑SThA,

zra॒ddhA sa॒tyo maha॑svA-nta॒paso॒ pari॑SThA॒d (vari॑SThA॒d) jJAtvA॑ tame॒va-mmana॑sA hR॒dA ca॒ bhUyo॑ na mR॒tyu-mupa॑yAhi vi॒dvA-ntasmA᳚-nnyA॒sa-me॒SA-ntapa॑sA-matirikta॒mAhu॑-rvasura॒Nvo॑ vi॒bhUra॑si prA॒Ne tvamasi॑ sandhA॒tA

brahma॑-ntvamasi॑ vizva॒dhRtte॑-jo॒dAs tvama॑sya॒gni-ra॑si varco॒dA-stvama॑si॒ sUrya॑sya dyumno॒dA stvama॑si ca॒ndrama॑sa upayA॒magR॑hIto-'si bra॒hmaNe᳚ tvA॒ mahasa॒,

omityA॒tmAnaM॑-yuJjItai॒tadvai ma॑hopa॒niSa॑da-nde॒vAnA॒-GguhyaM॒-ya e॒vaM-ve~da॑ bra॒hmaNo॑ mahi॒mAna॑-mApnoti॒ tasmA᳚-dbra॒hmaNo॑ mahi॒mAna॑-mityupa॒niSat || 79.20 (tai. ara. 6.79.1)

jJAnayajJaH (4.55)

tasyai॒vaM-vi~॒duSo॑ ya॒jJasyA॒tmA yaja॑mAnaH-zra॒dhdApatnI॒ zarI॑ra-mi॒ddhmamuro॒ vedi॒-rlomA॑ni

ba॒ra॒Hi-rve॒daH-zikhA॒ hRda॑yaM॒-yU~paH॒ kAma॒ Ajya॑-mma॒nyuH pa॒zu-stapo॒-'gni-rdamaH॑ zamayi॒tA dakSi॑NA॒-vAghotA᳚ prA॒Na u॑dga॒tA

cakSu॑radhva॒ryu-rmano॒ brahmA॒ zrotra॑ma॒gnI-dhyAva॒dhdriya॑te॒

sA dI॒kSA yadazrnA॑ti॒ tadhdavi॒-ryatpiba॑ti॒ tada॑sya somapA॒naM-ya~drama॑te॒

tadu॑pa॒sado॒ ya-thsa॒Jcara॑-tyupa॒viza॑-tyu॒ttiSTha॑te ca॒ sapra॑va॒rgyo॑

yanmukha॒-ntadA॑hava॒nIyo॒ yA vyAhR॑ti-rAhu॒ti-ryada॑sya vi॒jJAna॒-ntajju॒hoti॒ yathsA॒ya-mprA॒tara॑tti॒ tathsa॒midhaM॒-ya~tprA॒ta-rma॒ddhyandi॑nagM sA॒ya-Jca॒ tAni॒ sava॑nAni॒ ye

a॑horA॒tre te da॑r​zapUrNamA॒sau ye᳚-'rdhamA॒sAzca॒ mAsA᳚zca॒ te cA॑turmA॒syAni॒ ya R॒tava॒ste pa॑zuba॒ndhA ye saM॑​vathsa॒rAzca॑ parivathsa॒rAzca॒ te-'ha॑r​ga॒NA-ssa॑rva veda॒saM-vA

e॒ta-thsa॒traM-yanmara॑Na॒-ntada॑va॒bhRtha॑ e॒tadvai ja॑rAmarya-magniho॒tragM sa॒traM-ya e॒vaM-vi~॒dvA-nu॑da॒gaya॑ne pra॒mIya॑te

de॒vAnA॑me॒va ma॑hi॒mAna॑-Gga॒tvA-''di॒tyasya॒ sAyu॑jya-Ggaccha॒tyatha॒ yo da॑kSi॒Ne pra॒mIya॑te

pitR॒NA-me॒va ma॑hi॒mAna॑-Gga॒tvA ca॒ndrama॑sa॒-ssAyu॑jyagM salo॒katA॑-mApnotye॒tau vai sU᳚ryA candra॒masau᳚-rmahi॒mAnau᳚ brAhma॒No

vi॒dvA-na॒bhija॑yati॒ tasmA᳚-dbra॒hmaNo॑ mahi॒mAna॑mApnoti॒ tasmA᳚-dbra॒hmaNo॑ mahi॒mAna॑-mityupa॒niSat || 80.1 (tai. ara. 6.80.1)

sa॒ha nA॑ vavatu | sa॒ha nau॑ bhunaktu | sa॒ha vI॒rya॑-GkaravAvahai | te॒ja॒svinA॒ vadhI॑tamastu॒ mA vi॑dviSA॒vahai᳚ ||

|| OM zAnti॒-zzAnti॒-zzAntiH॑ ||

hariH॒ om |

iti mahAnArAyaNopaniSa-thsamAptA

(ambha॒syaika॑paJcA॒zaccha॒taM - jA॒tave॑dase॒ catu॑rdaza॒ - bhUrannaM॒ - bhUra॒gnaye॒ - bhUra॒gnaye॒ caika॑mekaM - pAhi - pA॒hi ca॒tvAri॑ catvAri॒ - ya-zchanda॑sA॒-ndve - namo॒ brahma॑Ne - R॒ta-ntapo॒ - yathA॑ vR॒kSasyaika॑ meka - ma॒NoraNI॑yA॒g॒ zcatu॑strigMzath - sahasra॒zI॑Sa॒gM॒ SaTvi॑gMzati - rAdi॒tyo vA e॒Sa - A॑di॒tyo vai teja॒ eka॑mekaM॒ - nidha॑napataye॒ trayo॑vigMzatiH - sa॒dyojA॒ta-ntrINi॑ - vAmade॒vAyaika॑ - ma॒ghore᳚bhya॒ - statpuru॑SAya॒ dve dve॒ - IzAno - namo hiraNyabAhava॒ eka॑meka - mR॒tagM sa॒tya-ndve - sarvo॒ vai ca॒tvAri॒ - kadru॒drAya॒ trINi॒ - yasya॒ vai kaGka॑tI - kRNu॒Sva pAjo - 'di॑ti॒ - rApo॒ vA i॒dagM sarva॒ meka॑meka॒ - mApaH॑ punantu ca॒tvA - ryagnizca - sUryazca nava॑ - na॒vomiti॑ ca॒tvA - ryAyA॑tu॒ pacau - jo॑-'si॒ dazo॒ - ttame॑ ca॒tvAri॒ - ghRNi॒strINi॒ - brahma॑metu॒ mAM-yAste᳚ brahmaha॒tyA-ndvAda॑za॒ - brahma॑ me॒dhayA॒-'dyA na॑ i॒ma-mbhrU॑Saha॒tyAM - brahma॑ me॒dhavA᳚ bra॒hmA de॒vAnA॑mi॒daM-vI॑raha॒tyAmekA॒nna vi॑gMzati॒ rekA॒nnavi॑gMzati--r me॒dhA de॒vI - me॒dhA-mma॒ indra॑zca॒tvAri॑ catvA॒ryA - mA᳚-mme॒dhA dve - mayi॑ me॒dhA meka॒- mapai॑tu॒ - paraM॒ - ~vAta॑-mprA॒Na - ma॑mutra॒bhUyA॒-d- ddhari॒gM॒ - zalkai॑ra॒gniM - mA chi॑do mRtyo॒ - mA no॑ ma॒hAntaM॒ - mAna॑sto॒ke - prajA॑pate - svasti॒dA - trya॑mbakaM॒ - ~ye te॑ sa॒hasra॒-ndve dve - mR॒tyave॒ svAhaikaM॑ - de॒vakR॑ta॒syaikA॑daza॒ - yadvo॑ devAH॒ - kAmo-'kAr​SI॒n - manyurakAr​SI॒-ddve dve॒ - tilAJjuhomi gAva-zzriya-mpra॑jAH paJca॒ - tilAH kRNSAzcora॑sya॒ zrIH prajJAtu jAtave॑da-ssa॒pta - prANa vA-ktvak chira uttiSTha puruSa॑ paJca॒ - pRthivI zabda mano vAg vyaktA-''tmA-'ntarAtmA paramAtmA me᳚ kSu॒dhe-'nnamaya॒ paJca॑dazA॒ - gnaye॒ svAhaika॑catvAri॒gM॒za - rdo᳚ ntadbra॒hma nava॑ - zra॒ddhAyA᳚-mprA॒Ne niviSTa॒ zcatu॑rvigMzatiH - zra॒ddhAyA॒-ndazA - GguSTha mAtraH puruSo dve - vAmma॑ A॒sanna॒STau - vayaH॑ supa॒r​SAH - prANAnA-Ggranthirasi dve dve - namo rudrAyaikaM॒ - tvama॑gne॒ dyubhir॒ dve - zi॒vena॑ me॒ santi॑SThasva - sa॒tyaM - prA॑jApa॒tya - stasyai॒va meka॑ meka॒ mazatiH)