Hanuman Ashtakam

shrI hanumadaShTakam

shloka 1

shrIraghurAjapadAbjaniketana paNkajalochana maNgalarAshe

chaNDamahAbhujadaNDa surArivikhaNDanapaNDita pAhi dayAlo |

pAtakinaM cha samuddhara mAM mahatAM hi satAmapi mAnamudAraM

tvAM bhajato mama dehi dayAghana he hanuman svapadAmbujadAsyam || 1 ||

saMsRRititApamahAnaladagdhatanUruhamarmatanorativelaM

putradhanasvajanAtmagRRihAdiShu saktamateratikilbiShamUrteH |

kenachidapyamalena purAkRRitapuNyasupu~njalavena vibho vai

tvAM bhajato mama dehi dayAghana he hanuman svapadAmbujadAsyam || 2 ||

saMsRRitikUpamanalpamaghoranidAghanidAnamajasramasheShaM

prApya suduHkhasahasrabhuja~NgaviShaikasamAkulasarvatanorme |

ghoramahAkRRipaNApadameva gatasya hare patitasya bhavAbdhau

tvAM bhajato mama dehi dayAghana he hanuman svapadAmbujadAsyam || 3 ||

saMsRRitisindhuvishAlakarAlamahAbalakAlajhaShagrasanArtaM

vyagrasamagradhiyaM kRRipaNaM cha mahAmadanakrasuchakrahRRitAsum |

kAlamahArasanorminipIDitamuddhara dInamananyagatiM mAM

tvAM bhajato mama dehi dayAghana he hanuman svapadAmbujadAsyam || 4 ||

saMsRRitighoramahAgahane charato maNira~njitapuNyasumUrteH

manmathabhIkaraghoramahogramRRigapravarArditagAtrasusandheH |

matsaratApavisheShanipIDitabAhyamateshcha kathaM chidameyaM

tvAM bhajato mama dehi dayAghana he hanuman svapadAmbujadAsyam || 5 ||

saMsRRitivRRikShamanekashatAghanidAnamanantavikarmasushAkhaM

duHkhaphalaM karaNAdipalAshamana~NgasupuShpamachintyasumUlam |

taM hyadhiruhya hare patitaM sharaNAgatameva vimochaya mUDhaM

tvAM bhajato mama dehi dayAghana he hanuman svapadAmbujadAsyam || 6 ||

saMsRRitipannagavaktrabhaya~NkaradaMShTramahAviShadagdhasharIraM

prANavinirgamabhItisamAkulamandamanAthamatIva viShaNNam |

mohamahAkuhare patitaM dayayoddhara mAmajitendriyakAmaM

tvAM bhajato mama dehi dayAghana he hanuman svapadAmbujadAsyam || 7 ||

indriyanAmakachoragaNairhRRitatattvavivekamahAdhanarAshiM

saMsRRitijAlanipAtitameva mahAbalibhishcha vikhaNDitakAyam |

tvatpadapadmamanuttamamAshritamAshu kapIshvara pAhi kRRipAlo

tvAM bhajato mama dehi dayAghana he hanuman svapadAmbujadAsyam || 8 ||

brahmamarudgaNarudramahendrakirITasukoTilasatpadapIThaM

dAsharathiM japati kShitimaNDala eSha nidhAya sadaiva hRRidabje |

tasya hanUmata eva shiva~NkaramaShTakametadaniShTaharaM vai

yaH satataM hi paThetsa naro labhate.achyutarAmapadAbjanivAsam || 9 ||

iti shrI madhusUdanAshrama shiShyA.achyutavirachitaM shrImaddanumadaShTakam |