Hanuman Ashtakam

zrI hanumadaSTakam

zloka 1

zrIraghurAjapadAbjaniketana paGkajalocana maGgalarAze

caNDamahAbhujadaNDa surArivikhaNDanapaNDita pAhi dayAlo |

pAtakinaM ca samuddhara mAM mahatAM hi satAmapi mAnamudAraM

tvAM bhajato mama dehi dayAghana he hanuman svapadAmbujadAsyam || 1 ||

saMsRtitApamahAnaladagdhatanUruhamarmatanorativelaM

putradhanasvajanAtmagRhAdiSu saktamateratikilbiSamUrteH |

kenacidapyamalena purAkRtapuNyasupuJjalavena vibho vai

tvAM bhajato mama dehi dayAghana he hanuman svapadAmbujadAsyam || 2 ||

saMsRtikUpamanalpamaghoranidAghanidAnamajasramazeSaM

prApya suduHkhasahasrabhujaGgaviSaikasamAkulasarvatanorme |

ghoramahAkRpaNApadameva gatasya hare patitasya bhavAbdhau

tvAM bhajato mama dehi dayAghana he hanuman svapadAmbujadAsyam || 3 ||

saMsRtisindhuvizAlakarAlamahAbalakAlajhaSagrasanArtaM

vyagrasamagradhiyaM kRpaNaM ca mahAmadanakrasucakrahRtAsum |

kAlamahArasanorminipIDitamuddhara dInamananyagatiM mAM

tvAM bhajato mama dehi dayAghana he hanuman svapadAmbujadAsyam || 4 ||

saMsRtighoramahAgahane carato maNiraJjitapuNyasumUrteH

manmathabhIkaraghoramahogramRgapravarArditagAtrasusandheH |

matsaratApavizeSanipIDitabAhyamatezca kathaM cidameyaM

tvAM bhajato mama dehi dayAghana he hanuman svapadAmbujadAsyam || 5 ||

saMsRtivRkSamanekazatAghanidAnamanantavikarmasuzAkhaM

duHkhaphalaM karaNAdipalAzamanaGgasupuSpamacintyasumUlam |

taM hyadhiruhya hare patitaM zaraNAgatameva vimocaya mUDhaM

tvAM bhajato mama dehi dayAghana he hanuman svapadAmbujadAsyam || 6 ||

saMsRtipannagavaktrabhayaGkaradaMSTramahAviSadagdhazarIraM

prANavinirgamabhItisamAkulamandamanAthamatIva viSaNNam |

mohamahAkuhare patitaM dayayoddhara mAmajitendriyakAmaM

tvAM bhajato mama dehi dayAghana he hanuman svapadAmbujadAsyam || 7 ||

indriyanAmakacoragaNairhRtatattvavivekamahAdhanarAziM

saMsRtijAlanipAtitameva mahAbalibhizca vikhaNDitakAyam |

tvatpadapadmamanuttamamAzritamAzu kapIzvara pAhi kRpAlo

tvAM bhajato mama dehi dayAghana he hanuman svapadAmbujadAsyam || 8 ||

brahmamarudgaNarudramahendrakirITasukoTilasatpadapIThaM

dAzarathiM japati kSitimaNDala eSa nidhAya sadaiva hRdabje |

tasya hanUmata eva zivaGkaramaSTakametadaniSTaharaM vai

yaH satataM hi paThetsa naro labhate'cyutarAmapadAbjanivAsam || 9 ||

iti zrI madhusUdanAzrama ziSyA'cyutaviracitaM zrImaddanumadaSTakam |