Gopika Geetha (Bhagavatha Purana)

gopikA gItA (bhAgavata purANa)

shloka 1

gopya UchuH |

jayati te.adhikaM janmanA vrajaH

shrayata indirA shashvadatra hi |

dayita dRRishyatAM dikShu tAvakA-

stvayi dhRRitAsavastvAM vichinvate || 1||

sharadudAshaye sAdhujAtasa-

tsarasijodarashrImuShA dRRishA |

suratanAtha te.ashulkadAsikA

varada nighnato neha kiM vadhaH || 2||

viShajalApyayAdvyAlarAkShasA-

dvarShamArutAdvaidyutAnalAt |

vRRiShamayAtmajAdvishvatobhayA-

dRRiShabha te vayaM rakShitA muhuH || 3||

na khalu gopikAnandano bhavA-

nakhiladehinAmantarAtmadRRik |

vikhanasArthito vishvaguptaye

sakha udeyivAnsAtvatAM kule || 4||

virachitAbhayaM vRRiShNidhurya te

charaNamIyuShAM saMsRRiterbhayAt |

karasaroruhaM kAnta kAmadaM

shirasi dhehi naH shrIkaragraham || 5||

vrajajanArtihanvIra yoShitAM

nijajanasmayadhvaMsanasmita |

bhaja sakhe bhavatki~NkarIH sma no

jalaruhAnanaM chAru darshaya || 6||

praNatadehinAM pApakarshanaM

tRRiNacharAnugaM shrIniketanam |

phaNiphaNArpitaM te padAmbujaM

kRRiNu kucheShu naH kRRindhi hRRichChayam || 7||

madhurayA girA valguvAkyayA

budhamanoj~nayA puShkarekShaNa |

vidhikarIrimA vIra muhyatI-

radharasIdhunA.a.apyAyayasva naH || 8||

tava kathAmRRitaM taptajIvanaM

kavibhirIDitaM kalmaShApaham |

shravaNama~NgalaM shrImadAtataM

bhuvi gRRiNanti te bhUridA janAH || 9||

prahasitaM priya premavIkShaNaM

viharaNaM cha te dhyAnama~Ngalam |

rahasi saMvido yA hRRidispRRishaH

kuhaka no manaH kShobhayanti hi || 10||

chalasi yadvrajAchchArayanpashUn

nalinasundaraM nAtha te padam |

shilatRRiNA~NkuraiH sIdatIti naH

kalilatAM manaH kAnta gachChati || 11||

dinaparikShaye nIlakuntalai-

rvanaruhAnanaM bibhradAvRRitam |

ghanarajasvalaM darshayanmuhu-

rmanasi naH smaraM vIra yachChasi || 12||

praNatakAmadaM padmajArchitaM

dharaNimaNDanaM dhyeyamApadi |

charaNapa~NkajaM shantamaM cha te

ramaNa naH staneShvarpayAdhihan || 13||

suratavardhanaM shokanAshanaM

svaritaveNunA suShThu chumbitam |

itararAgavismAraNaM nRRiNAM

vitara vIra naste.adharAmRRitam || 14||

aTati yadbhavAnahni kAnanaM

truTiryugAyate tvAmapashyatAm |

kuTilakuntalaM shrImukhaM cha te

jaDa udIkShatAM pakShmakRRiddRRishAm || 15||

patisutAnvayabhrAtRRibAndhavA-

nativila~Nghya te.antyachyutAgatAH |

gatividastavodgItamohitAH

kitava yoShitaH kastyajennishi || 16||

rahasi saMvidaM hRRichChayodayaM

prahasitAnanaM premavIkShaNam |

bRRihaduraH shriyo vIkShya dhAma te

muhuratispRRihA muhyate manaH || 17||

vrajavanaukasAM vyaktira~Nga te

vRRijinahantryalaM vishvama~Ngalam |

tyaja manAk cha nastvatspRRihAtmanAM

svajanahRRidrujAM yanniShUdanam || 18||

yatte sujAtacharaNAmburuhaM staneSha

bhItAH shanaiH priya dadhImahi karkasheShu |

tenATavImaTasi tadvyathate na kiMsvit

kUrpAdibhirbhramati dhIrbhavadAyuShAM naH || 19||

iti shrImadbhAgavata mahApurANe pAramahaMsyAM saMhitAyAM

dashamaskandhe pUrvArdhe rAsakrIDAyAM gopIgItaM nAmaikatriMsho.adhyAyaH ||