Dakshina Murthy Stotram

dakSiNA mUrti stotram

zloka 1

zAntipAThaH

OM yo brahmANaM vidadhAti pUrvaM

yo vai vedAMzca prahiNoti tasmai |

taM ha devamAtmabuddhiprakAzaM

mumukSurvai zaraNamahaM prapadye ||

dhyAnam

OM maunavyAkhyA prakaTita parabrahmatattvaM yuvAnaM

varSiSThAnte vasadRSigaNairAvRtaM brahmaniSThaiH |

AcAryendraM karakalita cinmudramAnandamUrtiM

svAtmArAmaM muditavadanaM dakSiNAmUrtimIDe || 1 ||

vaTaviTapisamIpebhUmibhAge niSaNNaM

sakalamunijanAnAM jJAnadAtAramArAt |

tribhuvanagurumIzaM dakSiNAmUrtidevaM

jananamaraNaduHkhacchedadakSaM namAmi || 2 ||

citraM vaTatarormUle vRddhAH ziSyA gururyuvA |

gurostu maunaM vyAkhyAnaM ziSyAstucchinnasaMzayAH || 3 ||

nidhaye sarvavidyAnAM bhiSaje bhavarogiNAm |

gurave sarvalokAnAM dakSiNAmUrtaye namaH || 4 ||

OM namaH praNavArthAya zuddhajJAnaikamUrtaye |

nirmalAya prazAntAya dakSiNAmUrtaye namaH || 5 ||

cidghanAya mahezAya vaTamUlanivAsine |

saccidAnandarUpAya dakSiNAmUrtaye namaH || 6 ||

Izvaro gururAtmeti mUrtibhedavibhAgine |

vyomavadvyAptadehAya dakSiNAmUrtaye namaH || 7 ||

aGguSThatarjanI yogamudrA vyAjenayoginAm |

zRtyarthaM brahmajIvaikyaM darzayanyogatA zivaH || 8 ||

OM zAntiH zAntiH zAntiH ||

stotram

vizvaM darpaNa-dRzyamAna-nagarI tulyaM nijAntargataM

pazyannAtmani mAyayA bahirivodbhUtaM yathA nidrayA |

yassAkSAtkurute prabodhasamaye svAtmAname vAdvayaM

tasmai zrIgurumUrtaye nama idaM zrI dakSiNAmUrtaye || 1 ||

bIjasyAntari-vAGkuro jagaditaM prAGnirvikalpaM punaH

mAyAkalpita dezakAlakalanA vaicitryacitrIkRtam |

mAyAvIva vijRmbhayatyapi mahAyogIva yaH svecchayA

tasmai zrIgurumUrtaye nama idaM zrI dakSiNAmUrtaye || 2 ||

yasyaiva sphuraNaM sadAtmakamasatkalpArthakaM bhAsate

sAkSAttatvamasIti vedavacasA yo bodhayatyAzritAn |

yassAkSAtkaraNAdbhavenna punarAvRttirbhavAmbhonidhau

tasmai zrIgurumUrtaye nama idaM zrI dakSiNAmUrtaye || 3 ||

nAnAcchidra ghaTodara sthita mahAdIpa prabhAbhAsvaraM

jJAnaM yasya tu cakSurAdikaraNa dvArA bahiH spandate |

jAnAmIti tameva bhAntamanubhAtyetatsamastaM jagat

tasmai zrI gurumUrtaye nama idaM zrI dakSiNAmUrtaye || 4 ||

dehaM prANamapIndriyANyapi calAM buddhiM ca zUnyaM viduH

strI bAlAndha jaDopamAstvahamiti bhrAntAbhRzaM vAdinaH |

mAyAzakti vilAsakalpita mahAvyAmoha saMhAriNe

tasmai zrI gurumUrtaye nama idaM zrI dakSiNAmUrtaye || 5 ||

rAhugrasta divAkarendu sadRzo mAyA samAcchAdanAt

sanmAtraH karaNopa saMharaNato yo'bhUtsuSuptaH pumAn |

prAgasvApsamiti prabhodasamaye yaH pratyabhijJAyate

tasmai zrI gurumUrtaye nama idaM zrI dakSiNAmUrtaye || 6 ||

bAlyAdiSvapi jAgradAdiSu tathA sarvAsvavasthAsvapi

vyAvRttA svanu vartamAna mahamityantaH sphurantaM sadA |

svAtmAnaM prakaTIkaroti bhajatAM yo mudrayA bhadrayA

tasmai zrI gurumUrtaye nama idaM zrI dakSiNAmUrtaye || 7 ||

vizvaM pazyati kAryakAraNatayA svasvAmisambandhataH

ziSyacAryatayA tathaiva pitR putrAdyAtmanA bhedataH |

svapne jAgrati vA ya eSa puruSo mAyA paribhrAmitaH

tasmai zrI gurumUrtaye nama idaM zrI dakSiNAmUrtaye || 8 ||

bhUrambhAMsyanalo'nilombara maharnAtho himAMzuH pumAn

ityAbhAti carAcarAtmakamidaM yasyaiva mUrtyaSTakam |

nAnyatkiJcana vidyate vimRzatAM yasmAtparasmAdvibho

tasmai zrI gurumUrtaye nama idaM zrI dakSiNAmUrtaye || 9 ||

sarvAtmatvamiti sphuTIkRtamidaM yasmAdamuSmin stave

tenAsva zravaNAttadartha mananAddhyAnAcca saGkIrtanAt |

sarvAtmatva mahAvibhUtisahitaM syAdIzvaratvaM svataH

siddhyettatpunaraSTadhA pariNataM caizvarya-mavyAhatam || 10 ||

|| iti zrImacchaGkarAcAryaviracitaM dakSiNAmUrtistotraM sampUrNam ||