Chaurashtakam (Sri Chauragraganya Purushashtakam)

caurāṣṭakam (śrī caurāgragaṇya puruṣāṣṭakam)

Śloka 1

vraje prasiddhaṃ navanītacauraṃ

gopāṅganānāṃ ca dukūlacauram |

anekajanmārjitapāpacauraṃ

caurāgragaṇyaṃ puruṣaṃ namāmi || 1||

śrīrādhikāyā hṛdayasya cauraṃ

navāmbudaśyāmalakānticauram |

padāśritānāṃ ca samastacauraṃ

caurāgragaṇyaṃ puruṣaṃ namāmi || 2||

akiñcanīkṛtya padāśritaṃ yaḥ

karoti bhikṣuṃ pathi gehahīnam |

kenāpyaho bhīṣaṇacaura īdṛg-

dṛṣṭaḥśruto vā na jagattraye'pi || 3||

yadīya nāmāpi haratyaśeṣaṃ

giriprasārān api pāparāśīn |

āścaryarūpo nanu caura īdṛg

dṛṣṭaḥ śruto vā na mayā kadāpi || 4||

dhanaṃ ca mānaṃ ca tathendriyāṇi

prāṇāṃśca hṛtvā mama sarvameva |

palāyase kutra dhṛto'dya caura

tvaṃ bhaktidāmnāsi mayā niruddhaḥ || 5||

chinatsi ghoraṃ yamapāśabandhaṃ

bhinatsi bhīmaṃ bhavapāśabandham |

chinatsi sarvasya samastabandhaṃ

naivātmano bhaktakṛtaṃ tu bandham || 6||

manmānase tāmasarāśighore

kārāgṛhe duḥkhamaye nibaddhaḥ |

labhasva he caura! hare! cirāya

svacauryadoṣocitameva daṇḍam || 7||

kārāgṛhe vasa sadā hṛdaye madīye

madbhaktipāśadṛḍhabandhananiścalaḥ san |

tvāṃ kṛṣṇa he! pralayakoṭiśatāntare'pi

sarvasvacaura! hṛdayān na hi mocayāmi || 8||

iti śrībilvamaṅgalaṭhākūraviracitaṃ caurāṣṭakaṃ sampūrṇam |

cauragragaṇya puruṣāṣṭakam |