Brahma Samhita

brahma saMhitA

shloka 1

IshvaraH paramaH kRRiShNaH sachchidAnandavigrahaH |

anAdirAdirgovindaH sarvakAraNakAraNam || 1 ||

sahasrapatrakamalaM gokulAkhyaM mahatpadam |

tatkarNikAraM taddhAma tadanantAshasambhavam || 2 ||

karNikAraM mahadyantraM ShaTkoNaM vajrakIlakam

ShaDa~Nga ShaTpadIsthAnaM prakRRityA puruSheNa cha |

premAnandamahAnandarasenAvasthitaM hi yat

jyotIrUpeNa manunA kAmabIjena sa~Ngatam || 3 ||

tatki~njalkaM tadaMshAnAM tatpatrANi shriyAmapi || 4 ||

chaturasraM tatparitaH shvetadvIpAkhyamadbhutam |

chaturasraM chaturmUrteshchaturdhAma chatuShkRRitam |

chaturbhiH puruShArthaishcha chaturbhirhetubhirvRRitam |

shUlairdashabhirAnaddhamUrdhvAdho digvidikShvapi |

aShTabhirnidhibhirjuShTamaShTabhiH siddhibhistathA |

manurUpaishcha dashabhirdikpAlaiH parito vRRitam |

shyAmairgauraishcha raktaishcha shuklaishcha pArShadarShabhaiH |

shobhitaM shaktibhistAbhiradbhutAbhiH samantataH || 5 ||

evaM jyotirmayo devaH sadAnandaM parAtparaH |

AtmArAmasya tasyAsti prakRRityA na samAgamaH || 6 ||

mAyayA.aramamANasya na viyogastayA saha |

AtmanA ramayA reme tyaktakAlaM sisRRikShayA || 7 ||

niyatiH sA ramAdevI tatpriyA tadvashaM tadA |

talli~NgaM bhagavAn shambhurjotirUpaH sanAtanaH |

yA yoniH sAparAshaktiH kAmo bIjaM mahaddhareH || 8 ||

li~NgayonyAtmikA jAtA imA mAheshvarI prajAH || 9 ||

shaktimAn puruShaH so.ayaM li~NgarUpI maheshvaraH |

tasminnAvirabhUlli~Nge mahAviShNurjagatpatiH || 10 ||

sahasrashIrShA puruShaH sahasrAkShaH sahasrapAt |

sahasrabAhurvishvAtmA sahasrAMshaH sahasrasUH || 11 ||

nArAyaNaH sa bhagavAnApastasmAtsanAtanAt |

AvirAsItkAraNArNo nidhiH sa~NkarShaNAtmakaH |

yoganidrAM gatastasmin sahasrAMshaH svayaM mahAn || 12 ||

tadromabila jAleShu bIjaM sa~NkarShaNasya cha |

haimAnyaNDAni jAtAni mahAbhUtAvRRitAni tu || 13 ||

pratyaNDamevamekAMshAdekAMshAdvishati svayam |

sahasramUrdhA vishvAtmA mahAviShNuH sanAtanaH || 14 ||

vAmANgAdasRRijadviShNuM dakShiNANgAtprajApatim |

jyotirli~NgamayaM shambhuM kUrchadeshAdavAsRRijat || 15 ||

aha~NkArAtmakaM vishvaM tasmAdetadvyajAyata || 16 ||

atha taistrividhairveshairlIlAmudvahataH kila |

yoganidrA bhagavatI tasya shrIriva sa~NgatA || 17 ||

sasRRikShAyAM tato nAbhestasya padmaM viniryayau |

tannAlaM hemanalinaM brahmaNo lokamadbhutam || 18 ||

tattvAni pUrvarUDhAni kAraNAni parasparam |

samavAyAprayogAchcha vibhinnAni pRRithak pRRithak |

chichChaktyA sajjamAno.atha bhagavAnAdipUruShaH |

yojayanmAyayA devo yoganidrAmakalpayat || 19 ||

yojayitvA tu tAnyeva pravivesha svayaM guhAm |

guhAM praviShTe tasmiMstu jIvAtmA pratibudhyate || 20 ||

sa nityo nityasambandhaH prakRRitishcha paraiva sA || 21 ||

evaM sarvAtmasambandhaM nAbhyAM padmaM harerabhUt |

tatra brahmAbhavadbhUyashchaturvedI chaturmukhaH || 22 ||

sa jAto bhagavachChaktyA tatkAlaM kila choditaH |

sisRRikShAyAM matiM chakre pUrvasaMskArasaMskRRitaH |

dadarsha kevalaM dhvAntaM nAnyatkimapi sarvataH || 23 ||

uvAcha puratastasmai tasya divyA sarasvatI |

kAmaH kRRiShNAya govinda he gopIjana ityapi |

vallabhAya priyA vahnermantraM te dAsyati priyam || 24 ||

tapastvaM tapa etena tava siddhirbhaviShyati || 25 ||

atha tepe sa suchiraM prINan govindamavyayam |

shvetadvIpapatiM kRRiShNaM golokasthaM parAtparam |

prakRRityA guNarUpiNyA rUpiNyA paryupAsitam |

sahasradalasampanne koTiki~njalkabRRiMhite |

bhUmishchintAmaNistatra karNikAre mahAsane |

samAsInaM chidAnandaM jyotirUpaM sanAtanam |

shabdabrahmamayaM veNuM vAdayantaM mukhAmbuje |

vilAsinIgaNavRRitaM svaiH svairaMshairabhiShTutam || 26 ||

atha veNuninAdasya trayImUrtimayI gatiH |

sphurantI praviveshAshu mukhAbjAni svayambhuvaH |

gAyatrIM gAyatastasmAdadhigatya sarojajaH |

saMskRRitashchAdiguruNA dvijatAmagamattataH || 27 ||

trayyA prabuddho.atha vidhirvij~nAtatattvasAgaraH |

tuShTAva vedasAreNa stotreNAnena keshavam || 28 ||

chintAmaNiprakarasadmasu kalpavRRikSha

lakShAvRRiteShu surabhIrabhipAlayantam |

lakShmIsahasrashatasambhramasevyamAnaM

govindamAdipuruShaM tamahaM bhajAmi || 29 ||

veNuM kvaNantamaravindadalAyatAkShaM

barhAvataMsamasitAmbudasundarA~Ngam |

kandarpakoTikamanIyavisheShashobhaM

govindamAdipuruShaM tamahaM bhajAmi || 30 ||

AlolachandrakalasadvanamAlyavaMshI-

-ratnA~NgadaM praNayakelikalAvilAsam |

shyAmaM tribha~NgalalitaM niyataprakAshaM

govindamAdipuruShaM tamahaM bhajAmi || 31 ||

a~NgAni yasya sakalendriyavRRittimanti

pashyanti pAnti kalayanti chiraM jaganti |

Anandachinmayasadujjvalavigrahasya

govindamAdipuruShaM tamahaM bhajAmi || 32 ||

advaitamachyutamanAdimanantarUpaM

AdyaM purANapuruShaM navayauvanaM cha |

vedeShu durlabhamadurlabhamAtmabhaktau

govindamAdipuruShaM tamahaM bhajAmi || 33 ||

panthAstu koTishatavatsarasampragamyo

vAyorathApi manaso munipu~NgavAnAm |

so.apyasti yatprapadasImnyavichintyatattve

govindamAdipuruShaM tamahaM bhajAmi || 34 ||

eko.apyasau rachayituM jagadaNDakoTiM

yachChaktirasti jagadaNDachayA yadantaH |

aNDAntarasthaparamANuchayAntarasthaM

govindamAdipuruShaM tamahaM bhajAmi || 35 ||

yadbhAvabhAvitadhiyo manujAstathaiva

samprApya rUpamahimAsanayAnabhUShAH |

sUktairyameva nigamaprathitaiH stuvanti

govindamAdipuruShaM tamahaM bhajAmi || 36 ||

AnandachinmayarasapratibhAvitAbhi-

-stAbhirya eva nijarUpatayA kalAbhiH |

goloka eva nivasatyakhilAtmabhUto

govindamAdipuruShaM tamahaM bhajAmi || 37 ||

premA~njanachChuritabhaktivilochanena

santaH sadaiva hRRidayeShu vilokayanti |

yaM shyAmasundaramachintyaguNasvarUpaM

govindamAdipuruShaM tamahaM bhajAmi || 38 ||

rAmAdimUrtiShu kalAniyamena tiShThan

nAnAvatAramakarodbhuvaneShu kintu |

kRRiShNaH svayaM samabhavatparamaH pumAn yo

govindamAdipuruShaM tamahaM bhajAmi || 39 ||

yasya prabhA prabhavato jagadaNDakoTi-

-koTiShvasheShavasudhAdi vibhUtibhinnam |

tadbrahma niShkalamanantamasheShabhUtaM

govindamAdipuruShaM tamahaM bhajAmi || 40 ||

mAyA hi yasya jagadaNDashatAni sUte

traiguNyatadviShayavedavitAyamAnA |

sattvAvalambiparasattvaM vishuddhasattvaM

govindamAdipuruShaM tamahaM bhajAmi || 41 ||

AnandachinmayarasAtmatayA manaHsu

yaH prANinAM pratiphalan smaratAmupetya |

lIlAyitena bhuvanAni jayatyajasraM

govindamAdipuruShaM tamahaM bhajAmi || 42 ||

golokanAmni nijadhAmni tale cha tasya

devi maheshaharidhAmasu teShu teShu |

te te prabhAvanichayA vihitAshcha yena

govindamAdipuruShaM tamahaM bhajAmi || 43 ||

sRRiShTisthitipralayasAdhanashaktirekA

ChAyeva yasya bhuvanAni bibharti durgA |

ichChAnurUpamapi yasya cha cheShTate sA

govindamAdipuruShaM tamahaM bhajAmi || 44 ||

kShIraM yathA dadhi vikAravisheShayogAt

sa~njAyate na hi tataH pRRithagasti hetoH |

yaH shambhutAmapi tathA samupaiti kAryA-

-dgovindamAdipuruShaM tamahaM bhajAmi || 45 ||

dIpArchireva hi dashAntaramabhyupetya

dIpAyate vivRRitahetusamAnadharmA |

yastAdRRigeva hi cha viShNutayA vibhAti

govindamAdipuruShaM tamahaM bhajAmi || 46 ||

yaH kAraNArNavajale bhajati sma yoga-

-nidrAmanantajagadaNDasaromakUpaH |

AdhArashaktimavalambya parAM svamUrtiM

govindamAdipuruShaM tamahaM bhajAmi || 47 ||

yasyaikanishvasitakAlamathAvalambya

jIvanti lomabilajA jagadaNDanAthAH |

viShNurmahAn sa iha yasya kalAvisheSho

govindamAdipuruShaM tamahaM bhajAmi || 48 ||

bhAsvAn yathAshmashakaleShu nijeShu tejaH

svIyaM kiyatprakaTayatyapi tadvadatra |

brahmA ya eSha jagadaNDavidhAnakartA

govindamAdipuruShaM tamahaM bhajAmi || 49 ||

yatpAdapallavayugaM vinidhAya kumbha-

-dvandve praNAmasamaye sa gaNAdhirAjaH |

vighnAn vihantumalamasya jagattrayasya

govindamAdipuruShaM tamahaM bhajAmi || 50 ||

agnirmahI gaganamambu maruddishashcha

kAlastathAtmamanasIti jagattrayANi |

yasmAdbhavanti vibhavanti vishanti yaM cha

govindamAdipuruShaM tamahaM bhajAmi || 51 ||

yachchakShureSha savitA sakalagrahANAM

rAjA samastasuramUrtirasheShatejAH |

yasyAj~nayA bhramati sambhRRitakAlachakro

govindamAdipuruShaM tamahaM bhajAmi || 52 ||

dharmo.atha pApanichayaH shrutayastapAMsi

brahmAdikITapatagAvadhayashcha jIvAH |

yaddatamAtravibhavaprakaTaprabhAvA

govindamAdipuruShaM tamahaM bhajAmi || 53 ||

yastvindragopamathavendramaho svakarma-

-bandhAnurUpaphalabhAjanamAtanoti |

karmANi nirdahati kintu cha bhaktibhAjAM

govindamAdipuruShaM tamahaM bhajAmi || 54 ||

yaM krodhakAmasahajapraNayAdibhIti-

-vAtsalyamohagurugauravasevyabhAvaiH |

sa~nchintya tasya sadRRishIM tanumApurete

govindamAdipuruShaM tamahaM bhajAmi || 55 ||

shriyaH kAntAH kAntaH paramapuruShaH kalpataravo

drumA bhUmishchintAmaNigaNamayi toyamamRRitam |

kathA gAnaM nATyaM gamanamapi vaMshI priyasakhi

chidAnandaM jyotiH paramapi tadAsvAdyamapi cha |

sa yatra kShIrAbdhiH sravati surabhIbhyashcha sumahAn

nimeShArdhAkhyo vA vrajati na hi yatrApi samayaH |

bhaje shvetadvIpaM tamahamiha golokamiti yaM

vidantaste santaH kShitiviralachArAH katipaye || 56 ||

athovAcha mahAviShNurbhagavantaM prajApatim |

brahman mahattvavij~nAne prajAsarge cha chenmatiH |

pa~nchashlokImimAM vidyAM vatsa dattAM nibodha me || 57 ||

prabuddhe j~nAnabhaktibhyAmAtmanyAnandachinmayI |

udetyanuttamA bhaktirbhagavatpremalakShaNA || 58 ||

pramANaistat sadAchAraistadabhyAsairnirantaram |

bodhayanAtmanAtmAnaM bhaktimapyuttamAM labhet || 59 ||

yasyAH shreyaskaraM nAsti yayA nirvRRitimApnuyAt |

yA sAdhayati mAmeva bhaktiM tAmeva sAdhayet || 60 ||

dharmAnanyAn parityajya mAmekaM bhaja vishvasan |

yAdRRishI yAdRRishI shraddhA siddhirbhavati tAdRRishI |

kurvannirantaraM karma loko.ayamanuvartate |

tenaiva karmaNA dhyAyanmAM parAM bhaktimichChati || 61 ||

ahaM hi vishvasya charAcharasya

bIjaM pradhAnaM prakRRitiH pumAMshcha |

mayAhitaM teja idaM bibharShi

vidhe vidhehi tvamatho jaganti || 62 ||

iti shrI brahma saMhitA sampUrNam |