Aditya Kavacham

Aditya kavacam

zloka 1

asya zrI AdityakavacastotramahAmantrasya agastyo bhagavAnRSiH anuSTupchandaH Adityo devatA zrIM bIjaM NIM zaktiH sUM kIlakaM mama AdityaprasAdasiddhyarthe jape viniyogaH |

dhyAnaM

japAkusumasaGkAzaM dvibhujaM padmahastakam

sindUrAmbaramAlyaM ca raktagandhAnulepanam |

mANikyaratnakhacita-sarvAbharaNabhUSitam

saptAzvarathavAhaM tu meruM caiva pradakSiNam ||

devAsuravarairvandyaM ghRNibhiH parisevitam |

dhyAyetpaThetsuvarNAbhaM sUryasya kavacaM mudA ||

kavacaM

ghRNiH pAtu zirodeze sUryaH pAtu lalATakam |

Adityo locane pAtu zrutI pAtu divAkaraH ||

ghrANaM pAtu sadA bhAnuH mukhaM pAtu sadAraviH |

jihvAM pAtu jagannetraH kaNThaM pAtu vibhAvasuH ||

skandhau grahapatiH pAtu bhujau pAtu prabhAkaraH |

karAvabjakaraH pAtu hRdayaM pAtu nabhomaNiH ||

dvAdazAtmA kaTiM pAtu savitA pAtu sakthinI |

UrU pAtu surazreSTo jAnunI pAtu bhAskaraH ||

jaGghe me pAtu mArtANDo gulphau pAtu tviSAmpatiH |

pAdau dinamaNiH pAtu pAtu mitro'khilaM vapuH ||

AdityakavacaM puNyamabhedyaM vajrasannibham |

sarvarogabhayAdibhyo mucyate nAtra saMzayaH ||

saMvatsaramupAsitvA sAmrAjyapadavIM labhet |

azeSarogazAntyarthaM dhyAyedAdityamaNDalam |

Aditya maNDala stutiH –

anekaratnasaMyuktaM svarNamANikyabhUSaNam |

kalpavRkSasamAkIrNaM kadambakusumapriyam ||

sindUravarNAya sumaNDalAya

suvarNaratnAbharaNAya tubhyam |

padmAdinetre ca supaGkajAya

brahmendra-nArAyaNa-zaGkarAya ||

saMraktacUrNaM sasuvarNatoyaM

sakuGkumAbhaM sakuzaM sapuSpam |

pradattamAdAya ca hemapAtre

prazastanAdaM bhagavan prasIda ||

iti Adityakavacam |