Shiva Upasana Mantra

zivopAsana mantrAH

zloka 1

o-nnidha॑napataye॒ namaH | nidhanapatAntikAya॒ namaH |

UrdhvAya॒ namaH | UrdhvaliGgAya॒ namaH |

hiraNyAya॒ namaH | hiraNyaliGgAya॒ namaH |

suvarNAya॒ namaH | suvarNaliGgAya॒ namaH |

divyAya॒ namaH | divyaliGgAya॒ namaH |

bhavAyaH॒ namaH | bhavaliGgAya॒ namaH |

zarvAya॒ namaH | zarvaliGgAya॒ namaH |

zivAya॒ namaH | zivaliGgAya॒ namaH |

jvalAya॒ namaH | jvalaliGgAya॒ namaH |

AtmAya॒ namaH | AtmaliGgAya॒ namaH |

paramAya॒ namaH | paramaliGgAya॒ namaH |

etatsomasya॑ sUrya॒sya sarvaliGgagg॑ sthApa॒ya॒ti॒ pANimantra-mpavi॒tram ||

sa॒dyo jA॒ta-mpra॑padyA॒mi॒ sa॒dyo jA॒tAya॒ vai namo॒ namaH॑ |

bha॒ve bha॑ve॒ nAti॑bhave bhavasva॒ mAm | bha॒vo-dbha॑vAya॒ namaH॑ ||

vA॒ma॒de॒vAya॒ namo᳚ jye॒SThAya॒ namaH॑ zre॒SThAya॒ namo॑ ru॒drAya॒ namaH॒

kAlA॑ya॒ namaH॒ kala॑vikaraNAya॒ namo॒ bala॑vikaraNAya॒ namo॒ balA॑ya॒ namo॒

bala॑pramathanAya॒ nama॒ ssarva॑bhUtadamanAya॒ namo॑ ma॒nonma॑nAya॒ namaH॑ |

a॒ghore᳚bhyo 'tha॒ghore᳚bhyo॒ ghora॒ghora॑tarebhyaH |

sarve᳚bhya-ssarva॒ zarve᳚bhyo॒ nama॑ste astu ru॒drarU॑pebhyaH ||

tatpuru॑SAya vi॒dmahe॑ mahAde॒vAya॑ dhImahi |

tanno॑ rudraH praco॒dayA᳚t ||

IzAna-ssarva॑vidyA॒nA॒-mIzvarasarva॑ bhUtA॒nAM॒

brahmAdhi॑pati॒-rbrahma॒No-'dhi॑pati॒-rbrahmA॑ zi॒vo me॑ astu sadAzi॒vom ||

namo hiraNyabAhave hiraNyavarNAya hiraNyarUpAya hiraNyapataye-'mbikApataya umApataye pazupataye॑ namo॒ namaH ||

R॒tagMR॒tagM sa॒tya-mpa॑ra-mbra॒hma॒ pu॒ruSa॑-GkRSNa॒piGga॑lam |

U॒rdhvare॑taM-vi॑rUpA॒kSaM॒-vi॒zvarU॑pAya॒ vai namo॒ namaH॑ ||

sarvo॒ hye॑Sa ru॒drastasmai॑ ru॒drAya॒ namo॑ astu॒ |

puru॑So॒ vai ru॒drassanma॒ho namo॒ namaH॑ |

vizva॑-mbhU॒ta-mbhuva॑na-Jci॒tra-mba॑hu॒dhA jA॒ta-JjAya॑mAna-Jca॒ yat |

sarvo॒ hye॑Sa ru॒drastasmai॑ ru॒drAya॒ namo॑ astu॒ |

ka-dru॒drAya॒ prace॑tase mI॒DhuSTa॑mAya॒ tavya॑se | vo॒cema॒ zanta॑magM hR॒de |

sarvo॒ hye॑Sa ru॒drastasmai॑ ru॒drAya॒ namo॑ astu॒ |

mA no॑ ma॒hAnta॑mu॒ta mA no॑ arbha॒ka-mmA na॒ ukSa॑ntamu॒ta mA na॑ ukSi॒tam |

mA no॑ vadhIH pi॒tara॒-mmota mA॒tara॑-mpri॒yA mA na॑sta॒nuvo॑ rudra rIriSaH |

mA na॑sto॒ke tana॑ye॒ mA na॒ Ayu॑Si॒ mA no॒ goSu॒ mA no॒ azve॑Su rIriSaH |

vI॒rAnmA no॑ rudra bhAmi॒to-'va॑dhIr​ha॒viSmaM॑to॒ nama॑sA vidhema te |

trya॑mbakaM-ya~jAmahe suga॒ndhi-mpu॑STi॒vardha॑nam |

u॒rvA॒ru॒kami॑va॒ bandha॑nAnmR॒tyormu॑kSIya॒ mA-'mRtA᳚t |

ye te॑ sa॒hasra॑ma॒yuta॒-mpAzA॒ mRtyo॒ martyA॑ya॒ hanta॑ve |

tAn ya॒jJasya॑ mA॒yayA॒ sarvA॒nava॑ yajAmahe |

mR॒tyave॒ svAhA॑ mR॒tyave॒ svAhA᳚ |

prANAnA-Ggranthirasi rudro mA॑ vizA॒ntakaH |

tenAnnenA᳚pyAya॒sva ||

namo rudrAya viSNave mRtyu॑rme pA॒hi ||

tvama॑gne dyubhi॒stva-mA॑zuzu॒kSaNi॒stva-ma॒dbhyastva-mazma॑na॒spari॑ | tvaM-va~ne᳚bhya॒-stvamoSa॑dhIbhya॒-stva-nnR॒NA-nnR॑pate jAyase॒ zuciH॒ ||

zi॒vena॑ me॒ santi॑SThasva-syo॒nena॑ me॒ santi॑SThasva subhU॒tena॑ me॒ santi॑SThasva ya॒jJasyadbhi॒rmanu॒ santi॑SThasvopa॑ te yajJa॒ nama॒ upa॑ te॒ nama॒ upa॑ te॒ namaH॑ ||

OM zAnti॒-zzAnti॒-zzAntiH॑ |