శివ మహిమ్నా స్తోత్రమ్

శివ మహిమ్నా స్తోత్రమ్

శ్లోక 1

అథ శ్రీ శివమహిమ్నస్తోత్రమ్ ॥

మహిమ్నః పారం తే పరమవిదుషో యద్యసదృశీ

స్తుతిర్బ్రహ్మాదీనామపి తదవసన్నాస్త్వయి గిరః ।

అథాఽవాచ్యః సర్వః స్వమతిపరిణామావధి గృణన్

మమాప్యేష స్తోత్రే హర నిరపవాదః పరికరః

శ్లోక 2

అతీతః పన్థానం తవ చ మహిమా వాఙ్మనసయోః

అతద్వ్యావృత్త్యా యం చకితమభిధత్తే శ్రుతిరపి ।

స కస్య స్తోతవ్యః కతివిధగుణః కస్య విషయః

పదే త్వర్వాచీనే పతతి న మనః కస్య న వచః

॥ 1 ॥

శ్లోక 3

మధుస్ఫీతా వాచః పరమమమృతం నిర్మితవతః

తవ బ్రహ్మన్​ కిం వాగపి సురగురోర్విస్మయపదమ్ ।

మమ త్వేతాం వాణీం గుణకథనపుణ్యేన భవతః

పునామీత్యర్థేఽస్మిన్ పురమథన బుద్ధిర్వ్యవసితా

॥ 2 ॥

శ్లోక 4

తవైశ్వర్యం యత్తజ్జగదుదయరక్షాప్రలయకృత్

త్రయీవస్తు వ్యస్తం తిస్రుషు గుణభిన్నాసు తనుషు ।

అభవ్యానామస్మిన్ వరద రమణీయామరమణీం

విహన్తుం వ్యాక్రోశీం విదధత ఇహైకే జడధియః

॥ 3 ॥

శ్లోక 5

కిమీహః కిఙ్కాయః స ఖలు కిముపాయస్త్రిభువనం

కిమాధారో ధాతా సృజతి కిముపాదాన ఇతి చ ।

అతర్క్యైశ్వర్యే త్వయ్యనవసర దుఃస్థో హతధియః

కుతర్కోఽయం కాంశ్చిత్ ముఖరయతి మోహాయ జగతః

॥ 4 ॥

శ్లోక 6

అజన్మానో లోకాః కిమవయవవన్తోఽపి జగతాం

అధిష్ఠాతారం కిం భవవిధిరనాదృత్య భవతి ।

అనీశో వా కుర్యాద్ భువనజననే కః పరికరో

యతో మన్దాస్త్వాం ప్రత్యమరవర సంశేరత ఇమే

॥ 5 ॥

శ్లోక 7

త్రయీ సాఙ్ఖ్యం యోగః పశుపతిమతం వైష్ణవమితి

ప్రభిన్నే ప్రస్థానే పరమిదమదః పథ్యమితి చ ।

రుచీనాం వైచిత్ర్యాదృజుకుటిల నానాపథజుషాం

నృణామేకో గమ్యస్త్వమసి పయసామర్ణవ ఇవ

॥ 6 ॥

శ్లోక 8

మహోక్షః ఖట్వాఙ్గం పరశురజినం భస్మ ఫణినః

కపాలం చేతీయత్తవ వరద తన్త్రోపకరణమ్ ।

సురాస్తాం తామృద్ధిం దధతి తు భవద్భూప్రణిహితాం

న హి స్వాత్మారామం విషయమృగతృష్ణా భ్రమయతి

॥ 7 ॥

శ్లోక 9

ధ్రువం కశ్చిత్ సర్వం సకలమపరస్త్వధ్రువమిదం

పరో ధ్రౌవ్యాఽధ్రౌవ్యే జగతి గదతి వ్యస్తవిషయే ।

సమస్తేఽప్యేతస్మిన్ పురమథన తైర్విస్మిత ఇవ

స్తువన్​ జిహ్రేమి త్వాం న ఖలు నను ధృష్టా ముఖరతా

॥ 8 ॥

శ్లోక 10

తవైశ్వర్యం యత్నాద్ యదుపరి విరిఞ్చిర్హరిరధః

పరిచ్ఛేతుం యాతావనలమనలస్కన్ధవపుషః ।

తతో భక్తిశ్రద్ధా-భరగురు-గృణద్భ్యాం గిరిశ యత్

స్వయం తస్థే తాభ్యాం తవ కిమనువృత్తిర్న ఫలతి

॥ 9 ॥

శ్లోక 11

అయత్నాదాసాద్య త్రిభువనమవైరవ్యతికరం

దశాస్యో యద్బాహూనభృత రణకణ్డూ-పరవశాన్ ।

శిరఃపద్మశ్రేణీ-రచితచరణామ్భోరుహ-బలేః

స్థిరాయాస్త్వద్భక్తేస్త్రిపురహర విస్ఫూర్జితమిదమ్

॥ 10 ॥

శ్లోక 12

అముష్య త్వత్సేవా-సమధిగతసారం భుజవనం

బలాత్ కైలాసేఽపి త్వదధివసతౌ విక్రమయతః ।

అలభ్యా పాతాలేఽప్యలసచలితాఙ్గుష్ఠశిరసి

ప్రతిష్ఠా త్వయ్యాసీద్ ధ్రువముపచితో ముహ్యతి ఖలః

॥ 11 ॥

శ్లోక 13

యదృద్ధిం సుత్రామ్ణో వరద పరమోచ్చైరపి సతీం

అధశ్చక్రే బాణః పరిజనవిధేయత్రిభువనః ।

న తచ్చిత్రం తస్మిన్ వరివసితరి త్వచ్చరణయోః

న కస్యాప్యున్నత్యై భవతి శిరసస్త్వయ్యవనతిః

॥ 12 ॥

శ్లోక 14

అకాణ్డ-బ్రహ్మాణ్డ-క్షయచకిత-దేవాసురకృపా

విధేయస్యాఽఽసీద్​ యస్త్రినయన విషం సంహృతవతః ।

స కల్మాషః కణ్ఠే తవ న కురుతే న శ్రియమహో

వికారోఽపి శ్లాఘ్యో భువన-భయ- భఙ్గ- వ్యసనినః

॥ 13 ॥

శ్లోక 15

అసిద్ధార్థా నైవ క్వచిదపి సదేవాసురనరే

నివర్తన్తే నిత్యం జగతి జయినో యస్య విశిఖాః ।

స పశ్యన్నీశ త్వామితరసురసాధారణమభూత్

స్మరః స్మర్తవ్యాత్మా న హి వశిషు పథ్యః పరిభవః

॥ 14 ॥

శ్లోక 16

మహీ పాదాఘాతాద్ వ్రజతి సహసా సంశయపదం

పదం విష్ణోర్భ్రామ్యద్ భుజ-పరిఘ-రుగ్ణ-గ్రహ- గణమ్ ।

ముహుర్ద్యౌర్దౌస్థ్యం యాత్యనిభృత-జటా-తాడిత-తటా

జగద్రక్షాయై త్వం నటసి నను వామైవ విభుతా

॥ 15 ॥

శ్లోక 17

వియద్వ్యాపీ తారా-గణ-గుణిత-ఫేనోద్గమ-రుచిః

ప్రవాహో వారాం యః పృషతలఘుదృష్టః శిరసి తే ।

జగద్ద్వీపాకారం జలధివలయం తేన కృతమితి

అనేనైవోన్నేయం ధృతమహిమ దివ్యం తవ వపుః

॥ 16 ॥

శ్లోక 18

రథః క్షోణీ యన్తా శతధృతిరగేన్ద్రో ధనురథో

రథాఙ్గే చన్ద్రార్కౌ రథ-చరణ-పాణిః శర ఇతి ।

దిధక్షోస్తే కోఽయం త్రిపురతృణమాడమ్బర-విధిః

విధేయైః క్రీడన్త్యో న ఖలు పరతన్త్రాః ప్రభుధియః

॥ 17 ॥

శ్లోక 19

హరిస్తే సాహస్రం కమల బలిమాధాయ పదయోః

యదేకోనే తస్మిన్​ నిజముదహరన్నేత్రకమలమ్ ।

గతో భక్త్యుద్రేకః పరిణతిమసౌ చక్రవపుషః

త్రయాణాం రక్షాయై త్రిపురహర జాగర్తి జగతామ్

॥ 18 ॥

శ్లోక 20

క్రతౌ సుప్తే జాగ్రత్​ త్వమసి ఫలయోగే క్రతుమతాం

క్వ కర్మ ప్రధ్వస్తం ఫలతి పురుషారాధనమృతే ।

అతస్త్వాం సమ్ప్రేక్ష్య క్రతుషు ఫలదాన-ప్రతిభువం

శ్రుతౌ శ్రద్ధాం బధ్వా దృఢపరికరః కర్మసు జనః

॥ 19 ॥

శ్లోక 21

క్రియాదక్షో దక్షః క్రతుపతిరధీశస్తనుభృతాం

ఋషీణామార్త్విజ్యం శరణద సదస్యాః సుర-గణాః ।

క్రతుభ్రంశస్త్వత్తః క్రతుఫల-విధాన-వ్యసనినః

ధ్రువం కర్తుః శ్రద్ధా-విధురమభిచారాయ హి మఖాః

॥ 20 ॥

శ్లోక 22

ప్రజానాథం నాథ ప్రసభమభికం స్వాం దుహితరం

గతం రోహిద్​ భూతాం రిరమయిషుమృష్యస్య వపుషా ।

ధనుష్పాణేర్యాతం దివమపి సపత్రాకృతమముం

త్రసన్తం తేఽద్యాపి త్యజతి న మృగవ్యాధరభసః

॥ 21 ॥

శ్లోక 23

స్వలావణ్యాశంసా ధృతధనుషమహ్నాయ తృణవత్

పురః ప్లుష్టం దృష్ట్వా పురమథన పుష్పాయుధమపి ।

యది స్త్రైణం దేవీ యమనిరత-దేహార్ధ-ఘటనాత్

అవైతి త్వామద్ధా బత వరద ముగ్ధా యువతయః

॥ 22 ॥

శ్లోక 24

శ్మశానేష్వాక్రీడా స్మరహర పిశాచాః సహచరాః

చితా-భస్మాలేపః స్రగపి నృకరోటీ-పరికరః ।

అమఙ్గల్యం శీలం తవ భవతు నామైవమఖిలం

తథాపి స్మర్తౄణాం వరద పరమం మఙ్గలమసి

॥ 23 ॥

శ్లోక 25

మనః ప్రత్యక్చిత్తే సవిధమవిధాయాత్త-మరుతః

ప్రహృష్యద్రోమాణః ప్రమద-సలిలోత్సఙ్గతి-దృశః ।

యదాలోక్యాహ్లాదం హ్రద ఇవ నిమజ్యామృతమయే

దధత్యన్తస్తత్త్వం కిమపి యమినస్తత్ కిల భవాన్

॥ 24 ॥

శ్లోక 26

త్వమర్కస్త్వం సోమస్త్వమసి పవనస్త్వం హుతవహః

త్వమాపస్త్వం వ్యోమ త్వము ధరణిరాత్మా త్వమితి చ ।

పరిచ్ఛిన్నామేవం త్వయి పరిణతా బిభ్రతి గిరం

న విద్మస్తత్తత్త్వం వయమిహ తు యత్ త్వం న భవసి

॥ 25 ॥

శ్లోక 27

త్రయీం తిస్రో వృత్తీస్త్రిభువనమథో త్రీనపి సురాన్

అకారాద్యైర్వర్ణైస్త్రిభిరభిదధత్ తీర్ణవికృతి ।

తురీయం తే ధామ ధ్వనిభిరవరున్ధానమణుభిః

సమస్తం వ్యస్తం త్వాం శరణద గృణాత్యోమితి పదమ్

॥ 26 ॥

శ్లోక 28

భవః శర్వో రుద్రః పశుపతిరథోగ్రః సహమహాన్

తథా భీమేశానావితి యదభిధానాష్టకమిదమ్ ।

అముష్మిన్ ప్రత్యేకం ప్రవిచరతి దేవ శ్రుతిరపి

ప్రియాయాస్మైధామ్నే ప్రణిహిత-నమస్యోఽస్మి భవతే

॥ 27 ॥

శ్లోక 29

నమో నేదిష్ఠాయ ప్రియదవ దవిష్ఠాయ చ నమః

నమః క్షోదిష్ఠాయ స్మరహర మహిష్ఠాయ చ నమః ।

నమో వర్షిష్ఠాయ త్రినయన యవిష్ఠాయ చ నమః

నమః సర్వస్మై తే తదిదమతిసర్వాయ చ నమః

॥ 28 ॥

శ్లోక 30

బహుల-రజసే విశ్వోత్పత్తౌ భవాయ నమో నమః

ప్రబల-తమసే తత్ సంహారే హరాయ నమో నమః ।

జన-సుఖకృతే సత్త్వోద్రిక్తౌ మృడాయ నమో నమః

ప్రమహసి పదే నిస్త్రైగుణ్యే శివాయ నమో నమః

॥ 29 ॥

శ్లోక 31

కృశ-పరిణతి-చేతః క్లేశవశ్యం క్వ చేదం

క్వ చ తవ గుణ-సీమోల్లఙ్ఘినీ శశ్వదృద్ధిః ।

ఇతి చకితమమన్దీకృత్య మాం భక్తిరాధాద్

వరద చరణయోస్తే వాక్య-పుష్పోపహారమ్

॥ 30 ॥

శ్లోక 32

అసిత-గిరి-సమం స్యాత్ కజ్జలం సిన్ధు-పాత్రే

సుర-తరువర-శాఖా లేఖనీ పత్రముర్వీ ।

లిఖతి యది గృహీత్వా శారదా సర్వకాలం

తదపి తవ గుణానామీశ పారం న యాతి

॥ 31 ॥

శ్లోక 33

అసుర-సుర-మునీన్ద్రైరర్చితస్యేన్దు-మౌలేః

గ్రథిత-గుణమహిమ్నో నిర్గుణస్యేశ్వరస్య ।

సకల-గణ-వరిష్ఠః పుష్పదన్తాభిధానః

రుచిరమలఘువృత్తైః స్తోత్రమేతచ్చకార

॥ 32 ॥

శ్లోక 34

అహరహరనవద్యం ధూర్జటేః స్తోత్రమేతత్

పఠతి పరమభక్త్యా శుద్ధ-చిత్తః పుమాన్ యః ।

స భవతి శివలోకే రుద్రతుల్యస్తథాఽత్ర

ప్రచురతర-ధనాయుః పుత్రవాన్ కీర్తిమాంశ్చ

॥ 33 ॥

శ్లోక 35

మహేశాన్నాపరో దేవో మహిమ్నో నాపరా స్తుతిః ।

అఘోరాన్నాపరో మన్త్రో నాస్తి తత్త్వం గురోః పరమ్

॥ 34 ॥

శ్లోక 36

దీక్షా దానం తపస్తీర్థం జ్ఞానం యాగాదికాః క్రియాః ।

మహిమ్నస్తవ పాఠస్య కలాం నార్హన్తి షోడశీమ్

॥ 35 ॥

శ్లోక 37

కుసుమదశన-నామా సర్వ-గన్ధర్వ-రాజః

శశిధరవర-మౌలేర్దేవదేవస్య దాసః ।

స ఖలు నిజ-మహిమ్నో భ్రష్ట ఏవాస్య రోషాత్

స్తవనమిదమకార్షీద్ దివ్య-దివ్యం మహిమ్నః

॥ 36 ॥

శ్లోక 38

సురగురుమభిపూజ్య స్వర్గ-మోక్షైక-హేతుం [సురవరమునిపూజ్యం]

పఠతి యది మనుష్యః ప్రాఞ్జలిర్నాన్య-చేతాః ।

వ్రజతి శివ-సమీపం కిన్నరైః స్తూయమానః

స్తవనమిదమమోఘం పుష్పదన్తప్రణీతమ్

॥ 37 ॥

శ్లోక 39

శ్రీ పుష్పదన్త-ముఖ-పఙ్కజ-నిర్గతేన

స్తోత్రేణ కిల్బిష-హరేణ హర-ప్రియేణ ।

కణ్ఠస్థితేన పఠితేన సమాహితేన

సుప్రీణితో భవతి భూతపతిర్మహేశః

॥ 38 ॥

శ్లోక 40

ఆసమాప్తమిదం స్తోత్రం పుణ్యం గన్ధర్వ-భాషితమ్ ।

అనౌపమ్యం మనోహారి సర్వమీశ్వరవర్ణనమ్

॥ 43 ॥

శ్లోక 41

తవ తత్త్వం న జానామి కీదృశోఽసి మహేశ్వర ।

యాదృశోఽసి మహాదేవ తాదృశాయ నమో నమః

॥ 39 ॥

శ్లోక 42

ఏకకాలం ద్వికాలం వా త్రికాలం యః పఠేన్నరః ।

సర్వపాప-వినిర్ముక్తః శివ లోకే మహీయతే

॥ 41 ॥

శ్లోక 43

ఇత్యేషా వాఙ్మయీ పూజా శ్రీమచ్ఛఙ్కర-పాదయోః ।

అర్పితా తేన దేవేశః ప్రీయతాం మే సదాశివః

॥ 42 ॥

శ్లోక 44

॥ ఇతి శ్రీ పుష్పదన్త విరచితం శివమహిమ్న-స్తోత్రం సమాప్తమ్ ॥