શિવ મહિમ્ના સ્તોત્રમ્

શિવ મહિમ્ના સ્તોત્રમ્

શ્લોક 1

અથ શ્રી શિવમહિમ્નસ્તોત્રમ્ ॥

મહિમ્નઃ પારં તે પરમવિદુષો યદ્યસદૃશી

સ્તુતિર્બ્રહ્માદીનામપિ તદવસન્નાસ્ત્વયિ ગિરઃ ।

અથાઽવાચ્યઃ સર્વઃ સ્વમતિપરિણામાવધિ ગૃણન્

મમાપ્યેષ સ્તોત્રે હર નિરપવાદઃ પરિકરઃ

શ્લોક 2

અતીતઃ પન્થાનં તવ ચ મહિમા વાઙ્મનસયોઃ

અતદ્વ્યાવૃત્ત્યા યં ચકિતમભિધત્તે શ્રુતિરપિ ।

સ કસ્ય સ્તોતવ્યઃ કતિવિધગુણઃ કસ્ય વિષયઃ

પદે ત્વર્વાચીને પતતિ ન મનઃ કસ્ય ન વચઃ

॥ 1 ॥

શ્લોક 3

મધુસ્ફીતા વાચઃ પરમમમૃતં નિર્મિતવતઃ

તવ બ્રહ્મન્​ કિં વાગપિ સુરગુરોર્વિસ્મયપદમ્ ।

મમ ત્વેતાં વાણીં ગુણકથનપુણ્યેન ભવતઃ

પુનામીત્યર્થેઽસ્મિન્ પુરમથન બુદ્ધિર્વ્યવસિતા

॥ 2 ॥

શ્લોક 4

તવૈશ્વર્યં યત્તજ્જગદુદયરક્ષાપ્રલયકૃત્

ત્રયીવસ્તુ વ્યસ્તં તિસ્રુષુ ગુણભિન્નાસુ તનુષુ ।

અભવ્યાનામસ્મિન્ વરદ રમણીયામરમણીં

વિહન્તું વ્યાક્રોશીં વિદધત ઇહૈકે જડધિયઃ

॥ 3 ॥

શ્લોક 5

કિમીહઃ કિઙ્કાયઃ સ ખલુ કિમુપાયસ્ત્રિભુવનં

કિમાધારો ધાતા સૃજતિ કિમુપાદાન ઇતિ ચ ।

અતર્ક્યૈશ્વર્યે ત્વય્યનવસર દુઃસ્થો હતધિયઃ

કુતર્કોઽયં કાંશ્ચિત્ મુખરયતિ મોહાય જગતઃ

॥ 4 ॥

શ્લોક 6

અજન્માનો લોકાઃ કિમવયવવન્તોઽપિ જગતાં

અધિષ્ઠાતારં કિં ભવવિધિરનાદૃત્ય ભવતિ ।

અનીશો વા કુર્યાદ્ ભુવનજનને કઃ પરિકરો

યતો મન્દાસ્ત્વાં પ્રત્યમરવર સંશેરત ઇમે

॥ 5 ॥

શ્લોક 7

ત્રયી સાઙ્ખ્યં યોગઃ પશુપતિમતં વૈષ્ણવમિતિ

પ્રભિન્ને પ્રસ્થાને પરમિદમદઃ પથ્યમિતિ ચ ।

રુચીનાં વૈચિત્ર્યાદૃજુકુટિલ નાનાપથજુષાં

નૃણામેકો ગમ્યસ્ત્વમસિ પયસામર્ણવ ઇવ

॥ 6 ॥

શ્લોક 8

મહોક્ષઃ ખટ્વાઙ્ગં પરશુરજિનં ભસ્મ ફણિનઃ

કપાલં ચેતીયત્તવ વરદ તન્ત્રોપકરણમ્ ।

સુરાસ્તાં તામૃદ્ધિં દધતિ તુ ભવદ્ભૂપ્રણિહિતાં

ન હિ સ્વાત્મારામં વિષયમૃગતૃષ્ણા ભ્રમયતિ

॥ 7 ॥

શ્લોક 9

ધ્રુવં કશ્ચિત્ સર્વં સકલમપરસ્ત્વધ્રુવમિદં

પરો ધ્રૌવ્યાઽધ્રૌવ્યે જગતિ ગદતિ વ્યસ્તવિષયે ।

સમસ્તેઽપ્યેતસ્મિન્ પુરમથન તૈર્વિસ્મિત ઇવ

સ્તુવન્​ જિહ્રેમિ ત્વાં ન ખલુ નનુ ધૃષ્ટા મુખરતા

॥ 8 ॥

શ્લોક 10

તવૈશ્વર્યં યત્નાદ્ યદુપરિ વિરિઞ્ચિર્હરિરધઃ

પરિચ્છેતું યાતાવનલમનલસ્કન્ધવપુષઃ ।

તતો ભક્તિશ્રદ્ધા-ભરગુરુ-ગૃણદ્ભ્યાં ગિરિશ યત્

સ્વયં તસ્થે તાભ્યાં તવ કિમનુવૃત્તિર્ન ફલતિ

॥ 9 ॥

શ્લોક 11

અયત્નાદાસાદ્ય ત્રિભુવનમવૈરવ્યતિકરં

દશાસ્યો યદ્બાહૂનભૃત રણકણ્ડૂ-પરવશાન્ ।

શિરઃપદ્મશ્રેણી-રચિતચરણામ્ભોરુહ-બલેઃ

સ્થિરાયાસ્ત્વદ્ભક્તેસ્ત્રિપુરહર વિસ્ફૂર્જિતમિદમ્

॥ 10 ॥

શ્લોક 12

અમુષ્ય ત્વત્સેવા-સમધિગતસારં ભુજવનં

બલાત્ કૈલાસેઽપિ ત્વદધિવસતૌ વિક્રમયતઃ ।

અલભ્યા પાતાલેઽપ્યલસચલિતાઙ્ગુષ્ઠશિરસિ

પ્રતિષ્ઠા ત્વય્યાસીદ્ ધ્રુવમુપચિતો મુહ્યતિ ખલઃ

॥ 11 ॥

શ્લોક 13

યદૃદ્ધિં સુત્રામ્ણો વરદ પરમોચ્ચૈરપિ સતીં

અધશ્ચક્રે બાણઃ પરિજનવિધેયત્રિભુવનઃ ।

ન તચ્ચિત્રં તસ્મિન્ વરિવસિતરિ ત્વચ્ચરણયોઃ

ન કસ્યાપ્યુન્નત્યૈ ભવતિ શિરસસ્ત્વય્યવનતિઃ

॥ 12 ॥

શ્લોક 14

અકાણ્ડ-બ્રહ્માણ્ડ-ક્ષયચકિત-દેવાસુરકૃપા

વિધેયસ્યાઽઽસીદ્​ યસ્ત્રિનયન વિષં સંહૃતવતઃ ।

સ કલ્માષઃ કણ્ઠે તવ ન કુરુતે ન શ્રિયમહો

વિકારોઽપિ શ્લાઘ્યો ભુવન-ભય- ભઙ્ગ- વ્યસનિનઃ

॥ 13 ॥

શ્લોક 15

અસિદ્ધાર્થા નૈવ ક્વચિદપિ સદેવાસુરનરે

નિવર્તન્તે નિત્યં જગતિ જયિનો યસ્ય વિશિખાઃ ।

સ પશ્યન્નીશ ત્વામિતરસુરસાધારણમભૂત્

સ્મરઃ સ્મર્તવ્યાત્મા ન હિ વશિષુ પથ્યઃ પરિભવઃ

॥ 14 ॥

શ્લોક 16

મહી પાદાઘાતાદ્ વ્રજતિ સહસા સંશયપદં

પદં વિષ્ણોર્ભ્રામ્યદ્ ભુજ-પરિઘ-રુગ્ણ-ગ્રહ- ગણમ્ ।

મુહુર્દ્યૌર્દૌસ્થ્યં યાત્યનિભૃત-જટા-તાડિત-તટા

જગદ્રક્ષાયૈ ત્વં નટસિ નનુ વામૈવ વિભુતા

॥ 15 ॥

શ્લોક 17

વિયદ્વ્યાપી તારા-ગણ-ગુણિત-ફેનોદ્ગમ-રુચિઃ

પ્રવાહો વારાં યઃ પૃષતલઘુદૃષ્ટઃ શિરસિ તે ।

જગદ્દ્વીપાકારં જલધિવલયં તેન કૃતમિતિ

અનેનૈવોન્નેયં ધૃતમહિમ દિવ્યં તવ વપુઃ

॥ 16 ॥

શ્લોક 18

રથઃ ક્ષોણી યન્તા શતધૃતિરગેન્દ્રો ધનુરથો

રથાઙ્ગે ચન્દ્રાર્કૌ રથ-ચરણ-પાણિઃ શર ઇતિ ।

દિધક્ષોસ્તે કોઽયં ત્રિપુરતૃણમાડમ્બર-વિધિઃ

વિધેયૈઃ ક્રીડન્ત્યો ન ખલુ પરતન્ત્રાઃ પ્રભુધિયઃ

॥ 17 ॥

શ્લોક 19

હરિસ્તે સાહસ્રં કમલ બલિમાધાય પદયોઃ

યદેકોને તસ્મિન્​ નિજમુદહરન્નેત્રકમલમ્ ।

ગતો ભક્ત્યુદ્રેકઃ પરિણતિમસૌ ચક્રવપુષઃ

ત્રયાણાં રક્ષાયૈ ત્રિપુરહર જાગર્તિ જગતામ્

॥ 18 ॥

શ્લોક 20

ક્રતૌ સુપ્તે જાગ્રત્​ ત્વમસિ ફલયોગે ક્રતુમતાં

ક્વ કર્મ પ્રધ્વસ્તં ફલતિ પુરુષારાધનમૃતે ।

અતસ્ત્વાં સમ્પ્રેક્ષ્ય ક્રતુષુ ફલદાન-પ્રતિભુવં

શ્રુતૌ શ્રદ્ધાં બધ્વા દૃઢપરિકરઃ કર્મસુ જનઃ

॥ 19 ॥

શ્લોક 21

ક્રિયાદક્ષો દક્ષઃ ક્રતુપતિરધીશસ્તનુભૃતાં

ઋષીણામાર્ત્વિજ્યં શરણદ સદસ્યાઃ સુર-ગણાઃ ।

ક્રતુભ્રંશસ્ત્વત્તઃ ક્રતુફલ-વિધાન-વ્યસનિનઃ

ધ્રુવં કર્તુઃ શ્રદ્ધા-વિધુરમભિચારાય હિ મખાઃ

॥ 20 ॥

શ્લોક 22

પ્રજાનાથં નાથ પ્રસભમભિકં સ્વાં દુહિતરં

ગતં રોહિદ્​ ભૂતાં રિરમયિષુમૃષ્યસ્ય વપુષા ।

ધનુષ્પાણેર્યાતં દિવમપિ સપત્રાકૃતમમું

ત્રસન્તં તેઽદ્યાપિ ત્યજતિ ન મૃગવ્યાધરભસઃ

॥ 21 ॥

શ્લોક 23

સ્વલાવણ્યાશંસા ધૃતધનુષમહ્નાય તૃણવત્

પુરઃ પ્લુષ્ટં દૃષ્ટ્વા પુરમથન પુષ્પાયુધમપિ ।

યદિ સ્ત્રૈણં દેવી યમનિરત-દેહાર્ધ-ઘટનાત્

અવૈતિ ત્વામદ્ધા બત વરદ મુગ્ધા યુવતયઃ

॥ 22 ॥

શ્લોક 24

શ્મશાનેષ્વાક્રીડા સ્મરહર પિશાચાઃ સહચરાઃ

ચિતા-ભસ્માલેપઃ સ્રગપિ નૃકરોટી-પરિકરઃ ।

અમઙ્ગલ્યં શીલં તવ ભવતુ નામૈવમખિલં

તથાપિ સ્મર્તૄણાં વરદ પરમં મઙ્ગલમસિ

॥ 23 ॥

શ્લોક 25

મનઃ પ્રત્યક્ચિત્તે સવિધમવિધાયાત્ત-મરુતઃ

પ્રહૃષ્યદ્રોમાણઃ પ્રમદ-સલિલોત્સઙ્ગતિ-દૃશઃ ।

યદાલોક્યાહ્લાદં હ્રદ ઇવ નિમજ્યામૃતમયે

દધત્યન્તસ્તત્ત્વં કિમપિ યમિનસ્તત્ કિલ ભવાન્

॥ 24 ॥

શ્લોક 26

ત્વમર્કસ્ત્વં સોમસ્ત્વમસિ પવનસ્ત્વં હુતવહઃ

ત્વમાપસ્ત્વં વ્યોમ ત્વમુ ધરણિરાત્મા ત્વમિતિ ચ ।

પરિચ્છિન્નામેવં ત્વયિ પરિણતા બિભ્રતિ ગિરં

ન વિદ્મસ્તત્તત્ત્વં વયમિહ તુ યત્ ત્વં ન ભવસિ

॥ 25 ॥

શ્લોક 27

ત્રયીં તિસ્રો વૃત્તીસ્ત્રિભુવનમથો ત્રીનપિ સુરાન્

અકારાદ્યૈર્વર્ણૈસ્ત્રિભિરભિદધત્ તીર્ણવિકૃતિ ।

તુરીયં તે ધામ ધ્વનિભિરવરુન્ધાનમણુભિઃ

સમસ્તં વ્યસ્તં ત્વાં શરણદ ગૃણાત્યોમિતિ પદમ્

॥ 26 ॥

શ્લોક 28

ભવઃ શર્વો રુદ્રઃ પશુપતિરથોગ્રઃ સહમહાન્

તથા ભીમેશાનાવિતિ યદભિધાનાષ્ટકમિદમ્ ।

અમુષ્મિન્ પ્રત્યેકં પ્રવિચરતિ દેવ શ્રુતિરપિ

પ્રિયાયાસ્મૈધામ્ને પ્રણિહિત-નમસ્યોઽસ્મિ ભવતે

॥ 27 ॥

શ્લોક 29

નમો નેદિષ્ઠાય પ્રિયદવ દવિષ્ઠાય ચ નમઃ

નમઃ ક્ષોદિષ્ઠાય સ્મરહર મહિષ્ઠાય ચ નમઃ ।

નમો વર્ષિષ્ઠાય ત્રિનયન યવિષ્ઠાય ચ નમઃ

નમઃ સર્વસ્મૈ તે તદિદમતિસર્વાય ચ નમઃ

॥ 28 ॥

શ્લોક 30

બહુલ-રજસે વિશ્વોત્પત્તૌ ભવાય નમો નમઃ

પ્રબલ-તમસે તત્ સંહારે હરાય નમો નમઃ ।

જન-સુખકૃતે સત્ત્વોદ્રિક્તૌ મૃડાય નમો નમઃ

પ્રમહસિ પદે નિસ્ત્રૈગુણ્યે શિવાય નમો નમઃ

॥ 29 ॥

શ્લોક 31

કૃશ-પરિણતિ-ચેતઃ ક્લેશવશ્યં ક્વ ચેદં

ક્વ ચ તવ ગુણ-સીમોલ્લઙ્ઘિની શશ્વદૃદ્ધિઃ ।

ઇતિ ચકિતમમન્દીકૃત્ય માં ભક્તિરાધાદ્

વરદ ચરણયોસ્તે વાક્ય-પુષ્પોપહારમ્

॥ 30 ॥

શ્લોક 32

અસિત-ગિરિ-સમં સ્યાત્ કજ્જલં સિન્ધુ-પાત્રે

સુર-તરુવર-શાખા લેખની પત્રમુર્વી ।

લિખતિ યદિ ગૃહીત્વા શારદા સર્વકાલં

તદપિ તવ ગુણાનામીશ પારં ન યાતિ

॥ 31 ॥

શ્લોક 33

અસુર-સુર-મુનીન્દ્રૈરર્ચિતસ્યેન્દુ-મૌલેઃ

ગ્રથિત-ગુણમહિમ્નો નિર્ગુણસ્યેશ્વરસ્ય ।

સકલ-ગણ-વરિષ્ઠઃ પુષ્પદન્તાભિધાનઃ

રુચિરમલઘુવૃત્તૈઃ સ્તોત્રમેતચ્ચકાર

॥ 32 ॥

શ્લોક 34

અહરહરનવદ્યં ધૂર્જટેઃ સ્તોત્રમેતત્

પઠતિ પરમભક્ત્યા શુદ્ધ-ચિત્તઃ પુમાન્ યઃ ।

સ ભવતિ શિવલોકે રુદ્રતુલ્યસ્તથાઽત્ર

પ્રચુરતર-ધનાયુઃ પુત્રવાન્ કીર્તિમાંશ્ચ

॥ 33 ॥

શ્લોક 35

મહેશાન્નાપરો દેવો મહિમ્નો નાપરા સ્તુતિઃ ।

અઘોરાન્નાપરો મન્ત્રો નાસ્તિ તત્ત્વં ગુરોઃ પરમ્

॥ 34 ॥

શ્લોક 36

દીક્ષા દાનં તપસ્તીર્થં જ્ઞાનં યાગાદિકાઃ ક્રિયાઃ ।

મહિમ્નસ્તવ પાઠસ્ય કલાં નાર્હન્તિ ષોડશીમ્

॥ 35 ॥

શ્લોક 37

કુસુમદશન-નામા સર્વ-ગન્ધર્વ-રાજઃ

શશિધરવર-મૌલેર્દેવદેવસ્ય દાસઃ ।

સ ખલુ નિજ-મહિમ્નો ભ્રષ્ટ એવાસ્ય રોષાત્

સ્તવનમિદમકાર્ષીદ્ દિવ્ય-દિવ્યં મહિમ્નઃ

॥ 36 ॥

શ્લોક 38

સુરગુરુમભિપૂજ્ય સ્વર્ગ-મોક્ષૈક-હેતું [સુરવરમુનિપૂજ્યં]

પઠતિ યદિ મનુષ્યઃ પ્રાઞ્જલિર્નાન્ય-ચેતાઃ ।

વ્રજતિ શિવ-સમીપં કિન્નરૈઃ સ્તૂયમાનઃ

સ્તવનમિદમમોઘં પુષ્પદન્તપ્રણીતમ્

॥ 37 ॥

શ્લોક 39

શ્રી પુષ્પદન્ત-મુખ-પઙ્કજ-નિર્ગતેન

સ્તોત્રેણ કિલ્બિષ-હરેણ હર-પ્રિયેણ ।

કણ્ઠસ્થિતેન પઠિતેન સમાહિતેન

સુપ્રીણિતો ભવતિ ભૂતપતિર્મહેશઃ

॥ 38 ॥

શ્લોક 40

આસમાપ્તમિદં સ્તોત્રં પુણ્યં ગન્ધર્વ-ભાષિતમ્ ।

અનૌપમ્યં મનોહારિ સર્વમીશ્વરવર્ણનમ્

॥ 43 ॥

શ્લોક 41

તવ તત્ત્વં ન જાનામિ કીદૃશોઽસિ મહેશ્વર ।

યાદૃશોઽસિ મહાદેવ તાદૃશાય નમો નમઃ

॥ 39 ॥

શ્લોક 42

એકકાલં દ્વિકાલં વા ત્રિકાલં યઃ પઠેન્નરઃ ।

સર્વપાપ-વિનિર્મુક્તઃ શિવ લોકે મહીયતે

॥ 41 ॥

શ્લોક 43

ઇત્યેષા વાઙ્મયી પૂજા શ્રીમચ્છઙ્કર-પાદયોઃ ।

અર્પિતા તેન દેવેશઃ પ્રીયતાં મે સદાશિવઃ

॥ 42 ॥

શ્લોક 44

॥ ઇતિ શ્રી પુષ્પદન્ત વિરચિતં શિવમહિમ્ન-સ્તોત્રં સમાપ્તમ્ ॥