Shiva Kavacham

ଶିଵ କଵଚମ୍

ଅଥ ଶିଵକଚମ୍

ଅସ୍ଯ ଶ୍ରୀ ଶିଵକଵଚ ସ୍ତୋତ୍ର ମହାମନ୍ତ୍ରସ୍ଯ ।

ଋଷଭ-ଯୋଗୀଶ୍ଵର ଋଷିଃ ।

ଅନୁଷ୍ଟୁପ୍ ଛନ୍ଦଃ ।

ଶ୍ରୀ-ସାମ୍ବସଦାଶିଵୋ ଦେଵତା ।

ଓଁ ବୀଜମ୍ ।

ନମଃ ଶକ୍ତିଃ ।

ଶିଵାଯେତି କୀଲକମ୍ ।

ସାମ୍ବସଦାଶିଵପ୍ରୀତ୍ଯର୍ଥେ ଜପେ ଵିନିଯୋଗଃ ॥

କରନ୍ଯାସଃ

ଓଁ ସଦାଶିଵାଯ ଅଙ୍ଗୁଷ୍ଠାଭ୍ଯାଂ ନମଃ ।

ନଂ ଗଙ୍ଗାଧରାଯ ତର୍ଜନୀଭ୍ଯାଂ ନମଃ ।

ମଂ ମୃତ୍ଯୁଞ୍ଜଯାଯ ମଧ୍ଯମାଭ୍ଯାଂ ନମଃ ।

ଶିଂ ଶୂଲପାଣଯେ ଅନାମିକାଭ୍ଯାଂ ନମଃ ।

ଵାଂ ପିନାକପାଣଯେ କନିଷ୍ଠିକାଭ୍ଯାଂ ନମଃ ।

ଯଂ ଉମାପତଯେ କରତଲକରପୃଷ୍ଠାଭ୍ଯାଂ ନମଃ ।

ହୃଦଯାଦି ଅଙ୍ଗନ୍ଯାସଃ

ଓଁ ସଦାଶିଵାଯ ହୃଦଯାଯ ନମଃ ।

ନଂ ଗଙ୍ଗାଧରାଯ ଶିରସେ ସ୍ଵାହା ।

ମଂ ମୃତ୍ଯୁଞ୍ଜଯାଯ ଶିଖାଯୈ ଵଷଟ୍ ।

ଶିଂ ଶୂଲପାଣଯେ କଵଚାଯ ହୁମ୍ ।

ଵାଂ ପିନାକପାଣଯେ ନେତ୍ରତ୍ରଯାଯ ଵୌଷଟ୍ ।

ଯଂ ଉମାପତଯେ ଅସ୍ତ୍ରାଯ ଫଟ୍ ।

ଭୂର୍ଭୁଵସ୍ସୁଵରୋମିତି ଦିଗ୍ବନ୍ଧଃ ॥

ଧ୍ଯାନମ୍

ଵଜ୍ରଦଂଷ୍ଟ୍ରଂ ତ୍ରିନଯନଂ କାଲକଣ୍ଠ ମରିନ୍ଦମମ୍ ।

ସହସ୍ରକର-ମତ୍ଯୁଗ୍ରଂ ଵନ୍ଦେ ଶମ୍ଭୁଂ ଉମାପତିମ୍ ॥

ରୁଦ୍ରାକ୍ଷ-କଙ୍କଣ-ଲସତ୍କର-ଦଣ୍ଡଯୁଗ୍ମଃ ପାଲାନ୍ତରା-ଲସିତ-ଭସ୍ମଧୃତ-ତ୍ରିପୁଣ୍ଡ୍ରଃ ।

ପଞ୍ଚାକ୍ଷରଂ ପରିପଠନ୍ ଵରମନ୍ତ୍ରରାଜଂ ଧ୍ଯାଯନ୍ ସଦା ପଶୁପତିଂ ଶରଣଂ ଵ୍ରଜେଥାଃ ॥

ଅତଃ ପରଂ ସର୍ଵପୁରାଣ-ଗୁହ୍ଯଂ ନିଃଶେଷ-ପାପୌଘହରଂ ପଵିତ୍ରମ୍ ।

ଜଯପ୍ରଦଂ ସର୍ଵ-ଵିପତ୍ପ୍ରମୋଚନଂ ଵକ୍ଷ୍ଯାମି ଶୈଵଂ କଵଚଂ ହିତାଯ ତେ ॥

ପଞ୍ଚପୂଜା

ଲଂ ପୃଥିଵ୍ଯାତ୍ମନେ ଗନ୍ଧଂ ସମର୍ପଯାମି ।

ହଂ ଆକାଶାତ୍ମନେ ପୁଷ୍ପୈଃ ପୂଜଯାମି ।

ଯଂ ଵାଯ୍ଵାତ୍ମନେ ଧୂପଂ ଆଘ୍ରାପଯାମି ।

ରଂ ଅଗ୍ନ୍ଯାତ୍ମନେ ଦୀପଂ ଦର୍ଶଯାମି ।

ଵଂ ଅମୃତାତ୍ମନେ ଅମୃତଂ ମହା-ନୈଵେଦ୍ଯଂ ନିଵେଦଯାମି ।

ସଂ ସର୍ଵାତ୍ମନେ ସର୍ଵୋପଚାର-ପୂଜାଂ ସମର୍ପଯାମି ॥

ମନ୍ତ୍ରଃ

ଋଷଭ ଉଵାଚ ।

ନମସ୍କୃତ୍ଯ ମହାଦେଵଂ ଵିଶ୍ଵ-ଵ୍ଯାପିନ-ମୀଶ୍ଵରମ୍ ।

ଵକ୍ଷ୍ଯେ ଶିଵମଯଂ ଵର୍ମ ସର୍ଵରକ୍ଷାକରଂ ନୃଣାମ୍ ॥ 1 ॥

ଶୁଚୌ ଦେଶେ ସମାସୀନୋ ଯଥାଵତ୍କଲ୍ପିତାସନଃ ।

ଜିତେନ୍ଦ୍ରିଯୋ ଜିତପ୍ରାଣ-ଶ୍ଚିନ୍ତଯେଚ୍ଛିଵମଵ୍ଯଯମ୍ ॥ 2 ॥

ହୃତ୍ପୁଣ୍ଡରୀକାନ୍ତରସନ୍ନିଵିଷ୍ଟଂ

ସ୍ଵତେଜସା ଵ୍ଯାପ୍ତ-ନଭୋଽଵକାଶମ୍ ।

ଅତୀନ୍ଦ୍ରିଯଂ ସୂକ୍ଷ୍ମମନନ୍ତମାଦ୍ଯଂ

ଧ୍ଯାଯେତ୍ପରାନନ୍ଦମଯଂ ମହେଶମ୍ ॥ 3 ॥

ଧ୍ଯାନାଵଧୂତାଖିଲକର୍ମବନ୍ଧ-

-ଶ୍ଚିରଂ ଚିଦାନନ୍ଦନିମଗ୍ନଚେତାଃ ।

ଷଡକ୍ଷରନ୍ଯାସସମାହିତାତ୍ମା

ଶୈଵେନ କୁର୍ଯାତ୍କଵଚେନ ରକ୍ଷାମ୍ ॥ 4 ॥

ମାଂ ପାତୁ ଦେଵୋଽଖିଲଦେଵତାତ୍ମା

ସଂସାରକୂପେ ପତିତଂ ଗଭୀରେ ।

ତନ୍ନାମ ଦିଵ୍ଯଂ ଵରମନ୍ତ୍ରମୂଲଂ

ଧୁନୋତୁ ମେ ସର୍ଵମଘଂ ହୃଦିସ୍ଥମ୍ ॥ 5 ॥

ସର୍ଵତ୍ର ମାଂ ରକ୍ଷତୁ ଵିଶ୍ଵମୂର୍ତି-

-ର୍ଜ୍ଯୋତି-ର୍ମଯାନନ୍ଦଘନଶ୍ଚିଦାତ୍ମା ।

ଅଣୋରଣୀଯାନୁରୁଶକ୍ତିରେକଃ

ସ ଈଶ୍ଵରଃ ପାତୁ ଭଯାଦଶେଷାତ୍ ॥ 6 ॥

ଯୋ ଭୂସ୍ଵରୂପେଣ ବିଭର୍ତି ଵିଶ୍ଵଂ

ପାଯାତ୍ସ ଭୂମେର୍ଗିରିଶୋଽଷ୍ଟମୂର୍ତିଃ ।

ଯୋଽପାଂ ସ୍ଵରୂପେଣ ନୃଣାଂ କରୋତି

ସଞ୍ଜୀଵନଂ ସୋଽଵତୁ ମାଂ ଜଲେଭ୍ଯଃ ॥ 7 ॥

କଲ୍ପାଵସାନେ ଭୁଵନାନି ଦଗ୍ଧ୍ଵା

ସର୍ଵାଣି ଯୋ ନୃତ୍ଯତି ଭୂରିଲୀଲଃ ।

ସ କାଲରୁଦ୍ରୋଽଵତୁ ମାଂ ଦଵାଗ୍ନେ-

-ର୍ଵାତ୍ଯାଦିଭୀତେ-ରଖିଲାଚ୍ଚ ତାପାତ୍ ॥ 8 ॥

ପ୍ରଦୀପ୍ତ-ଵିଦ୍ଯୁତ୍କନକାଵଭାସୋ

ଵିଦ୍ଯାଵରାଭୀତି-କୁଠାରପାଣିଃ ।

ଚତୁର୍ମୁଖସ୍ତତ୍ପୁରୁଷସ୍ତ୍ରିନେତ୍ରଃ

ପ୍ରାଚ୍ଯାଂ ସ୍ଥିତୋ ରକ୍ଷତୁ ମାମଜସ୍ରମ୍ ॥ 9 ॥

କୁଠାର ଖେଟାଙ୍କୁଶପାଶଶୂଲ

କପାଲପାଶାକ୍ଷ ଗୁଣାନ୍ଦଧାନଃ ।

ଚତୁର୍ମୁଖୋ ନୀଲ-ରୁଚିସ୍ତ୍ରିନେତ୍ରଃ

ପାଯାଦଘୋରୋ ଦିଶି ଦକ୍ଷିଣସ୍ଯାମ୍ ॥ 10 ॥

କୁନ୍ଦେନ୍ଦୁ-ଶଙ୍ଖ-ସ୍ଫଟିକାଵଭାସୋ

ଵେଦାକ୍ଷମାଲା-ଵରଦାଭଯାଙ୍କଃ ।

ତ୍ର୍ଯକ୍ଷଶ୍ଚତୁର୍ଵକ୍ତ୍ର ଉରୁପ୍ରଭାଵଃ

ସଦ୍ଯୋଽଧିଜାତୋଽଵତୁ ମାଂ ପ୍ରତୀଚ୍ଯାମ୍ ॥ 11 ॥

ଵରାକ୍ଷ-ମାଲାଭଯଟଙ୍କ-ହସ୍ତଃ

ସରୋଜ-କିଞ୍ଜଲ୍କସମାନଵର୍ଣଃ ।

ତ୍ରିଲୋଚନ-ଶ୍ଚାରୁଚତୁର୍ମୁଖୋ ମାଂ

ପାଯାଦୁଦୀଚ୍ଯାଂ ଦିଶି ଵାମଦେଵଃ ॥ 12 ॥

ଵେଦାଭଯେଷ୍ଟାଙ୍କୁଶଟଙ୍କପାଶ-

-କପାଲଢକ୍କାକ୍ଷର-ଶୂଲପାଣିଃ ।

ସିତଦ୍ଯୁତିଃ ପଞ୍ଚମୁଖୋଽଵତାନ୍ମା-

-ମୀଶାନ ଊର୍ଧ୍ଵଂ ପରମପ୍ରକାଶଃ ॥ 13 ॥

ମୂର୍ଧାନମଵ୍ଯାନ୍ମମ ଚନ୍ଦ୍ରମୌଲିଃ

ଫାଲଂ ମମାଵ୍ଯାଦଥ ଫାଲନେତ୍ରଃ ।

ନେତ୍ରେ ମମାଵ୍ଯାଦ୍ଭଗନେତ୍ରହାରୀ

ନାସାଂ ସଦା ରକ୍ଷତୁ ଵିଶ୍ଵନାଥଃ ॥ 14 ॥

ପାଯାଚ୍ଛ୍ରୁତୀ ମେ ଶ୍ରୁତିଗୀତକୀର୍ତିଃ

କପୋଲମଵ୍ଯାତ୍ସତତଂ କପାଲୀ ।

ଵକ୍ତ୍ରଂ ସଦା ରକ୍ଷତୁ ପଞ୍ଚଵକ୍ତ୍ରୋ

ଜିହ୍ଵାଂ ସଦା ରକ୍ଷତୁ ଵେଦଜିହ୍ଵଃ ॥ 15 ॥

କଣ୍ଠଂ ଗିରୀଶୋଽଵତୁ ନୀଲକଣ୍ଠଃ

ପାଣିଦ୍ଵଯଂ ପାତୁ ପିନାକପାଣିଃ ।

ଦୋର୍ମୂଲମଵ୍ଯାନ୍ମମ ଧର୍ମବାହୁଃ

ଵକ୍ଷଃସ୍ଥଲଂ ଦକ୍ଷମଖାନ୍ତକୋଽଵ୍ଯାତ୍ ॥ 16 ॥

ମମୋଦରଂ ପାତୁ ଗିରୀନ୍ଦ୍ରଧନ୍ଵା

ମଧ୍ଯଂ ମମାଵ୍ଯାନ୍ମଦନାନ୍ତକାରୀ ।

ହେରମ୍ବତାତୋ ମମ ପାତୁ ନାଭିଂ

ପାଯାତ୍କଟିଂ ଧୂର୍ଜଟିରୀଶ୍ଵରୋ ମେ ॥ 17 ॥

[ସ୍ମରାରି-ରଵ୍ଯାନ୍ମମ ଗୁହ୍ଯଦେଶମ୍

ପୃଷ୍ଟଂ ସଦା ରକ୍ଷତୁ ପାର୍ଵତୀଶଃ ।]

ଊରୁଦ୍ଵଯଂ ପାତୁ କୁବେରମିତ୍ରୋ

ଜାନୁଦ୍ଵଯଂ ମେ ଜଗଦୀଶ୍ଵରୋଽଵ୍ଯାତ୍ ।

ଜଙ୍ଘାଯୁଗଂ ପୁଙ୍ଗଵକେତୁରଵ୍ଯା-

-ତ୍ପାଦୌ ମମାଵ୍ଯାତ୍ସୁରଵନ୍ଦ୍ଯପାଦଃ ॥ 18 ॥

ମହେଶ୍ଵରଃ ପାତୁ ଦିନାଦିଯାମେ

ମାଂ ମଧ୍ଯଯାମେଽଵତୁ ଵାମଦେଵଃ ।

ତ୍ରିଲୋଚନଃ ପାତୁ ତୃତୀଯଯାମେ

ଵୃଷଧ୍ଵଜଃ ପାତୁ ଦିନାନ୍ତ୍ଯଯାମେ ॥ 19 ॥

ପାଯାନ୍ନିଶାଦୌ ଶଶିଶେଖରୋ ମାଂ

ଗଙ୍ଗାଧରୋ ରକ୍ଷତୁ ମାଂ ନିଶୀଥେ ।

ଗୌରୀପତିଃ ପାତୁ ନିଶାଵସାନେ

ମୃତ୍ଯୁଞ୍ଜଯୋ ରକ୍ଷତୁ ସର୍ଵକାଲମ୍ ॥ 20 ॥

ଅନ୍ତଃସ୍ଥିତଂ ରକ୍ଷତୁ ଶଙ୍କରୋ ମାଂ

ସ୍ଥାଣୁଃ ସଦା ପାତୁ ବହିଃସ୍ଥିତଂ ମାମ୍ ।

ତଦନ୍ତରେ ପାତୁ ପତିଃ ପଶୂନାଂ

ସଦାଶିଵୋ ରକ୍ଷତୁ ମାଂ ସମନ୍ତାତ୍ ॥ 21 ॥

ତିଷ୍ଠନ୍ତ-ମଵ୍ଯାଦ୍ଭୁଵନୈକନାଥଃ

ପାଯାଦ୍ଵ୍ରଜନ୍ତଂ ପ୍ରମଥାଧିନାଥଃ ।

ଵେଦାନ୍ତଵେଦ୍ଯୋଽଵତୁ ମାଂ ନିଷଣ୍ଣଂ

ମାମଵ୍ଯଯଃ ପାତୁ ଶିଵଃ ଶଯାନମ୍ ॥ 22 ॥

ମାର୍ଗେଷୁ ମାଂ ରକ୍ଷତୁ ନୀଲକଣ୍ଠଃ

ଶୈଲାଦି-ଦୁର୍ଗେଷୁ ପୁରତ୍ରଯାରିଃ ।

ଅରଣ୍ଯଵାସାଦି-ମହାପ୍ରଵାସେ

ପାଯାନ୍ମୃଗଵ୍ଯାଧ ଉଦାରଶକ୍ତିଃ ॥ 23 ॥

କଲ୍ପାନ୍ତ-କାଲୋଗ୍ର-ପଟୁପ୍ରକୋପଃ [କଟୋପ]

ସ୍ଫୁଟାଟ୍ଟ-ହାସୋଚ୍ଚଲିତାଣ୍ଡ-କୋଶଃ ।

ଘୋରାରି-ସେନାର୍ଣଵଦୁର୍ନିଵାର-

-ମହାଭଯାଦ୍ରକ୍ଷତୁ ଵୀରଭଦ୍ରଃ ॥ 24 ॥

ପତ୍ତ୍ଯଶ୍ଵମାତଙ୍ଗ-ରଥାଵରୂଧିନୀ- [ଘଟାଵରୂଥ]

-ସହସ୍ର-ଲକ୍ଷାଯୁତ-କୋଟିଭୀଷଣମ୍ ।

ଅକ୍ଷୌହିଣୀନାଂ ଶତମାତତାଯିନାଂ

ଛିନ୍ଦ୍ଯାନ୍ମୃଡୋ ଘୋରକୁଠାରଧାରଯା ॥ 25 ॥

ନିହନ୍ତୁ ଦସ୍ଯୂନ୍ପ୍ରଲଯାନଲାର୍ଚି-

-ର୍ଜ୍ଵଲତ୍ତ୍ରିଶୂଲଂ ତ୍ରିପୁରାନ୍ତକସ୍ଯ ।

ଶାର୍ଦୂଲ-ସିଂହର୍କ୍ଷଵୃକାଦି-ହିଂସ୍ରାନ୍

ସନ୍ତ୍ରାସଯତ୍ଵୀଶ-ଧନୁଃ ପିନାକଃ ॥ 26 ॥

ଦୁସ୍ସ୍ଵପ୍ନ ଦୁଶ୍ଶକୁନ ଦୁର୍ଗତି ଦୌର୍ମନସ୍ଯ

ଦୁର୍ଭିକ୍ଷ ଦୁର୍ଵ୍ଯସନ ଦୁସ୍ସହ ଦୁର୍ଯଶାଂସି ।

ଉତ୍ପାତ-ତାପ-ଵିଷଭୀତି-ମସଦ୍ଗ୍ରହାର୍ତିଂ

ଵ୍ଯାଧୀଂଶ୍ଚ ନାଶଯତୁ ମେ ଜଗତାମଧୀଶଃ ॥ 27 ॥

ଓଁ ନମୋ ଭଗଵତେ ସଦାଶିଵାଯ

ସକଲ-ତତ୍ତ୍ଵାତ୍ମକାଯ

ସର୍ଵ-ମନ୍ତ୍ର-ସ୍ଵରୂପାଯ

ସର୍ଵ-ଯନ୍ତ୍ରାଧିଷ୍ଠିତାଯ

ସର୍ଵ-ତନ୍ତ୍ର-ସ୍ଵରୂପାଯ

ସର୍ଵ-ତତ୍ତ୍ଵ-ଵିଦୂରାଯ

ବ୍ରହ୍ମ-ରୁଦ୍ରାଵତାରିଣେ-ନୀଲକଣ୍ଠାଯ

ପାର୍ଵତୀ-ମନୋହରପ୍ରିଯାଯ

ସୋମ-ସୂର୍ଯାଗ୍ନି-ଲୋଚନାଯ

ଭସ୍ମୋଦ୍ଧୂଲିତ-ଵିଗ୍ରହାଯ

ମହାମଣି-ମୁକୁଟ-ଧାରଣାଯ

ମାଣିକ୍ଯ-ଭୂଷଣାଯ

ସୃଷ୍ଟିସ୍ଥିତି-ପ୍ରଲଯକାଲ-ରୌଦ୍ରାଵତାରାଯ

ଦକ୍ଷାଧ୍ଵର-ଧ୍ଵଂସକାଯ

ମହାକାଲ-ଭେଦନାଯ

ମୂଲଧାରୈକ-ନିଲଯାଯ

ତତ୍ଵାତୀତାଯ

ଗଙ୍ଗାଧରାଯ

ସର୍ଵ-ଦେଵାଦି-ଦେଵାଯ

ଷଡାଶ୍ରଯାଯ

ଵେଦାନ୍ତ-ସାରାଯ

ତ୍ରିଵର୍ଗ-ସାଧନାଯ

ଅନନ୍ତକୋଟି-ବ୍ରହ୍ମାଣ୍ଡ-ନାଯକାଯ

ଅନନ୍ତ-ଵାସୁକି-ତକ୍ଷକ-କର୍କୋଟକ-ଶଙ୍ଖ-କୁଲିକ-ପଦ୍ମ-ମହାପଦ୍ମେତି-ଅଷ୍ଟ-ମହା-ନାଗ-କୁଲଭୂଷଣାଯ

ପ୍ରଣଵସ୍ଵରୂପାଯ

ଚିଦାକାଶାଯ

ଆକାଶ-ଦିକ୍-ସ୍ଵରୂପାଯ

ଗ୍ରହ-ନକ୍ଷତ୍ର-ମାଲିନେ

ସକଲାଯ

କଲଙ୍କ-ରହିତାଯ

ସକଲ-ଲୋକୈକ-କର୍ତ୍ରେ

ସକଲ-ଲୋକୈକ-ଭର୍ତ୍ରେ

ସକଲ-ଲୋକୈକ-ସଂହର୍ତ୍ରେ

ସକଲ-ଲୋକୈକ-ଗୁରଵେ

ସକଲ-ଲୋକୈକ-ସାକ୍ଷିଣେ

ସକଲ-ନିଗମଗୁହ୍ଯାଯ

ସକଲ-ଵେଦାନ୍ତ-ପାରଗାଯ

ସକଲ-ଲୋକୈକ-ଵରପ୍ରଦାଯ

ସକଲ-ଲୋକୈକ-ଶଙ୍କରାଯ

ସକଲ-ଦୁରିତାର୍ତି-ଭଞ୍ଜନାଯ

ସକଲ-ଜଗଦଭଯଙ୍କରାଯ

ଶଶାଙ୍କ-ଶେଖରାଯ

ଶାଶ୍ଵତ-ନିଜାଵାସାଯ

ନିରାକାରାଯ

ନିରାଭାସାଯ

ନିରାମଯାଯ

ନିର୍ମଲାଯ

ନିର୍ଲୋଭାଯ

ନିର୍ମଦାଯ

ନିଶ୍ଚିନ୍ତାଯ

ନିରହଙ୍କାରାଯ

ନିରଙ୍କୁଶାଯ

ନିଷ୍କଲଙ୍କାଯ

ନିର୍ଗୁଣାଯ

ନିଷ୍କାମାଯ

ନିରୂପପ୍ଲଵାଯ

ନିରଵଧ୍ଯାଯ

ନିରନ୍ତରାଯ

ନିରୁପଦ୍ରଵାଯ

ନିରଵଦ୍ଯାଯ

ନିରନ୍ତରାଯ

ନିଷ୍କାରଣାଯ

ନିରାତଙ୍କାଯ

ନିଷ୍ପ୍ରପଞ୍ଚାଯ

ନିସ୍ସଙ୍ଗାଯ

ନିର୍ଦ୍ଵନ୍ଦ୍ଵାଯ

ନିରାଧାରାଯ

ନୀରାଗାଯ

ନିଶ୍କ୍ରୋଧାଯ

ନିର୍ଲୋଭାଯ

ନିଷ୍ପାପାଯ

ନିର୍ଵିକଲ୍ପାଯ

ନିର୍ଭେଦାଯ

ନିଷ୍କ୍ରିଯାଯ

ନିସ୍ତୁଲାଯ

ନିଶ୍ଶଂଶଯାଯ

ନିରଞ୍ଜନାଯ

ନିରୁପମ-ଵିଭଵାଯ

ନିତ୍ଯ-ଶୁଦ୍ଧ-ବୁଦ୍ଧ-ମୁକ୍ତ-ପରିପୂର୍ଣ-ସଚ୍ଚିଦାନନ୍ଦାଦ୍ଵଯାଯ

ପରମ-ଶାନ୍ତ-ସ୍ଵରୂପାଯ

ପରମ-ଶାନ୍ତ-ପ୍ରକାଶାଯ

ତେଜୋରୂପାଯ

ତେଜୋମଯାଯ

ତେଜୋଽଧିପତଯେ

ଜଯ ଜଯ ରୁଦ୍ର ମହାରୁଦ୍ର

ମହା-ରୌଦ୍ର

ଭଦ୍ରାଵତାର

ମହା-ଭୈରଵ

କାଲ-ଭୈରଵ

କଲ୍ପାନ୍ତ-ଭୈରଵ

କପାଲ-ମାଲାଧର

ଖଟ୍ଵାଙ୍ଗ-ଚର୍ମ-ଖଡ୍ଗ-ଧର

ପାଶାଙ୍କୁଶ-ଡମରୂଶୂଲ-ଚାପ-ବାଣ-ଗଦା-ଶକ୍ତି-ଭିନ୍ଦି-

ପାଲ-ତୋମର-ମୁସଲ-ଭୁଶୁଣ୍ଡୀ-ମୁଦ୍ଗର-ପାଶ-ପରିଘ-ଶତଘ୍ନୀ-ଚକ୍ରାଦ୍ଯାଯୁଧ-ଭୀଷଣାକାର

ସହସ୍ର-ମୁଖ

ଦଂଷ୍ଟ୍ରାକରାଲ-ଵଦନ

ଵିକଟାଟ୍ଟହାସ

ଵିସ୍ଫାତିତ-ବ୍ରହ୍ମାଣ୍ଡ-ମଣ୍ଡଲ-ନାଗେନ୍ଦ୍ରକୁଣ୍ଡଲ

ନାଗେନ୍ଦ୍ରହାର

ନାଗେନ୍ଦ୍ରଵଲଯ

ନାଗେନ୍ଦ୍ରଚର୍ମଧର

ନାଗେନ୍ଦ୍ରନିକେତନ

ମୃତ୍ଯୁଞ୍ଜଯ

ତ୍ର୍ଯମ୍ବକ

ତ୍ରିପୁରାନ୍ତକ

ଵିଶ୍ଵରୂପ

ଵିରୂପାକ୍ଷ

ଵିଶ୍ଵେଶ୍ଵର

ଵୃଷଭଵାହନ

ଵିଷଵିଭୂଷଣ

ଵିଶ୍ଵତୋମୁଖ

ସର୍ଵତୋମୁଖ

ମାଂ ରକ୍ଷ ରକ୍ଷ

ଜ୍ଵଲ ଜ୍ଵଲ

ପ୍ରଜ୍ଵଲ ପ୍ରଜ୍ଵଲ

ମହାମୃତ୍ଯୁଭଯଂ ଶମଯ ଶମଯ

ଅପମୃତ୍ଯୁଭଯଂ ନାଶଯ ନାଶଯ

ରୋଗଭଯଂ ଉତ୍ସାଦଯ ଉତ୍ସାଦଯ

ଵିଷସର୍ପଭଯଂ ଶମଯ ଶମଯ

ଚୋରାନ୍ ମାରଯ ମାରଯ

ମମ ଶତ୍ରୂନ୍ ଉଚ୍ଚାଟଯ ଉଚ୍ଚାଟଯ

ତ୍ରିଶୂଲେନ ଵିଦାରଯ ଵିଦାରଯ

କୁଠାରେଣ ଭିନ୍ଧି ଭିନ୍ଧି

ଖଡ୍ଗେନ ଛିନ୍ଦ୍ଦି ଛିନ୍ଦ୍ଦି

ଖଟ୍ଵାଙ୍ଗେନ ଵିପୋଧଯ ଵିପୋଧଯ

ମମ ପାପଂ ଶୋଧଯ ଶୋଧଯ

ମୁସଲେନ ନିଷ୍ପେଷଯ ନିଷ୍ପେଷଯ

ବାଣୈଃ ସନ୍ତାଡଯ ସନ୍ତାଡଯ

ଯକ୍ଷ ରକ୍ଷାଂସି ଭୀଷଯ ଭୀଷଯ

ଅଶେଷ ଭୂତାନ୍ ଵିଦ୍ରାଵଯ ଵିଦ୍ରାଵଯ

କୂଷ୍ମାଣ୍ଡ-ଭୂତ-ବେତାଲ-ମାରୀଗଣ-ବ୍ରହ୍ମରାକ୍ଷସ-ଗଣାନ୍ ସନ୍ତ୍ରାସଯ ସନ୍ତ୍ରାସଯ

ମମ ଅଭଯଂ କୁରୁ କୁରୁ

ନରକ-ମହାଭଯାନ୍ ମାଂ ଉଦ୍ଧର ଉଦ୍ଧର

ଵିତ୍ରସ୍ତଂ ମାଂ ଆଶ୍ଵାସଯ ଆଶ୍ଵାସଯ

ଅମୃତ-କଟାକ୍ଷ-ଵୀକ୍ଷଣେନ ମାଂ ଆଲୋକଯ ଆଲୋକଯ

ସଞ୍ଜୀଵଯ ସଞ୍ଜୀଵଯ

କ୍ଷୁତ୍ତୃଷ୍ଣାର୍ତଂ ମାଂ ଆପ୍ଯାଯଯ ଆପ୍ଯାଯଯ

ଦୁଃଖାତୁରଂ ମାଂ ଆନନ୍ଦଯ ଆନନ୍ଦଯ

ଶିଵକଵଚେନ ମାଂ ଆଚ୍ଛାଦଯ ଆଚ୍ଛାଦଯ

ହର ହର

ହର ହର

ମୃତ୍ଯୁଞ୍ଜଯ

ତ୍ର୍ଯମ୍ବକ

ସଦାଶିଵ

ପରମଶିଵ

ନମସ୍ତେ ନମସ୍ତେ ନମସ୍ତେ ନମଃ ॥

ପୂର୍ଵଵତ୍ - ହୃଦଯାଦି ନ୍ଯାସଃ ।

ପଞ୍ଚପୂଜା ॥

ଭୂର୍ଭୁଵସ୍ସୁଵରୋମିତି ଦିଗ୍ଵିମୋକଃ ॥

ଫଲଶ୍ରୁତିଃ

ଋଷଭ ଉଵାଚ ।

ଇତ୍ଯେତତ୍କଵଚଂ ଶୈଵଂ ଵରଦଂ ଵ୍ଯାହୃତଂ ମଯା ।

ସର୍ଵ-ବାଧା-ପ୍ରଶମନଂ ରହସ୍ଯଂ ସର୍ଵଦେହିନାମ୍ ॥ 1 ॥

ଯଃ ସଦା ଧାରଯେନ୍ମର୍ତ୍ଯଃ ଶୈଵଂ କଵଚମୁତ୍ତମମ୍ ।

ନ ତସ୍ଯ ଜାଯତେ କ୍ଵାପି ଭଯଂ ଶମ୍ଭୋରନୁଗ୍ରହାତ୍ ॥ 2 ॥

କ୍ଷୀଣାଯୁ-ର୍ମୃତ୍ଯୁମାପନ୍ନୋ ମହାରୋଗହତୋଽପି ଵା ।

ସଦ୍ଯଃ ସୁଖମଵାପ୍ନୋତି ଦୀର୍ଘମାଯୁଶ୍ଚ ଵିନ୍ଦତି ॥ 3 ॥

ସର୍ଵଦାରିଦ୍ର୍ଯଶମନଂ ସୌମାଙ୍ଗଲ୍ଯ-ଵିଵର୍ଧନମ୍ ।

ଯୋ ଧତ୍ତେ କଵଚଂ ଶୈଵଂ ସ ଦେଵୈରପି ପୂଜ୍ଯତେ ॥ 4 ॥

ମହାପାତକ-ସଙ୍ଘାତୈର୍ମୁଚ୍ଯତେ ଚୋପପାତକୈଃ ।

ଦେହାନ୍ତେ ଶିଵମାପ୍ନୋତି ଶିଵ-ଵର୍ମାନୁଭାଵତଃ ॥ 5 ॥

ତ୍ଵମପି ଶ୍ରଦ୍ଧଯା ଵତ୍ସ ଶୈଵଂ କଵଚମୁତ୍ତମମ୍ ।

ଧାରଯସ୍ଵ ମଯା ଦତ୍ତଂ ସଦ୍ଯଃ ଶ୍ରେଯୋ ହ୍ଯଵାପ୍ସ୍ଯସି ॥ 6 ॥

ସୂତ ଉଵାଚ ।

ଇତ୍ଯୁକ୍ତ୍ଵା ଋଷଭୋ ଯୋଗୀ ତସ୍ମୈ ପାର୍ଥିଵ-ସୂନଵେ ।

ଦଦୌ ଶଙ୍ଖଂ ମହାରାଵଂ ଖଡ୍ଗଂ ଚାରିନିଷୂଦନମ୍ ॥ 7 ॥

ପୁନଶ୍ଚ ଭସ୍ମ ସମ୍ମନ୍ତ୍ର୍ଯ ତଦଙ୍ଗଂ ସର୍ଵତୋଽସ୍ପୃଶତ୍ ।

ଗଜାନାଂ ଷଟ୍ସହସ୍ରସ୍ଯ ଦ୍ଵିଗୁଣଂ ଚ ବଲଂ ଦଦୌ ॥ 8 ॥

ଭସ୍ମପ୍ରଭାଵାତ୍ସମ୍ପ୍ରାପ୍ଯ ବଲୈଶ୍ଵର୍ଯଧୃତିସ୍ମୃତିଃ ।

ସ ରାଜପୁତ୍ରଃ ଶୁଶୁଭେ ଶରଦର୍କ ଇଵ ଶ୍ରିଯା ॥ 9 ॥

ତମାହ ପ୍ରାଞ୍ଜଲିଂ ଭୂଯଃ ସ ଯୋଗୀ ରାଜନନ୍ଦନମ୍ ।

ଏଷ ଖଡ୍ଗୋ ମଯା ଦତ୍ତସ୍ତପୋମନ୍ତ୍ରାନୁଭାଵତଃ ॥ 10 ॥

ଶିତଧାରମିମଂ ଖଡ୍ଗଂ ଯସ୍ମୈ ଦର୍ଶଯସି ସ୍ଫୁଟମ୍ ।

ସ ସଦ୍ଯୋ ମ୍ରିଯତେ ଶତ୍ରୁଃ ସାକ୍ଷାନ୍ମୃତ୍ଯୁରପି ସ୍ଵଯମ୍ ॥ 11 ॥

ଅସ୍ଯ ଶଙ୍ଖସ୍ଯ ନିହ୍ରାଦଂ ଯେ ଶୃଣ୍ଵନ୍ତି ତଵାହିତାଃ ।

ତେ ମୂର୍ଛିତାଃ ପତିଷ୍ଯନ୍ତି ନ୍ଯସ୍ତଶସ୍ତ୍ରା ଵିଚେତନାଃ ॥ 12 ॥

ଖଡ୍ଗଶଙ୍ଖାଵିମୌ ଦିଵ୍ଯୌ ପରସୈନ୍ଯଵିନାଶିନୌ ।

ଆତ୍ମସୈନ୍ଯସ୍ଵପକ୍ଷାଣାଂ ଶୌର୍ଯତେଜୋଵିଵର୍ଧନୌ ॥ 13 ॥

ଏତଯୋଶ୍ଚ ପ୍ରଭାଵେନ ଶୈଵେନ କଵଚେନ ଚ ।

ଦ୍ଵିଷଟ୍ସହସ୍ରନାଗାନାଂ ବଲେନ ମହତାପି ଚ ॥ 14 ॥

ଭସ୍ମଧାରଣସାମର୍ଥ୍ଯାଚ୍ଛତ୍ରୁସୈନ୍ଯଂ ଵିଜେଷ୍ଯସି ।

ପ୍ରାପ୍ଯ ସିଂହାସନଂ ପୈତ୍ର୍ଯଂ ଗୋପ୍ତାସି ପୃଥିଵୀମିମାମ୍ ॥ 15 ॥

ଇତି ଭଦ୍ରାଯୁଷଂ ସମ୍ଯଗନୁଶାସ୍ଯ ସମାତୃକମ୍ ।

ତାଭ୍ଯାଂ ସମ୍ପୂଜିତଃ ସୋଽଥ ଯୋଗୀ ସ୍ଵୈରଗତିର୍ଯଯୌ ॥ 16 ॥

ଇତି ଶ୍ରୀସ୍କାନ୍ଦମହାପୁରାଣେ ବ୍ରହ୍ମୋତ୍ତରଖଣ୍ଡେ ଶିଵକଵଚ ପ୍ରଭାଵ ଵର୍ଣନଂ ନାମ ଦ୍ଵାଦଶୋଽଧ୍ଯାଯଃ ସମ୍ପୂର୍ଣଃ ॥