Shiva Kavacham

ziva kavacam

atha zivakacam

asya zrI zivakavaca stotra mahAmantrasya |

RSabha-yogIzvara RSiH |

anuSTup chandaH |

zrI-sAmbasadAzivo devatA |

OM bIjam |

namaH zaktiH |

zivAyeti kIlakam |

sAmbasadAzivaprItyarthe jape viniyogaH ||

karanyAsaH

OM sadAzivAya aGguSThAbhyAM namaH |

naM gaGgAdharAya tarjanIbhyAM namaH |

maM mRtyuJjayAya madhyamAbhyAM namaH |

ziM zUlapANaye anAmikAbhyAM namaH |

vAM pinAkapANaye kaniSThikAbhyAM namaH |

yaM umApataye karatalakarapRSThAbhyAM namaH |

hRdayAdi aGganyAsaH

OM sadAzivAya hRdayAya namaH |

naM gaGgAdharAya zirase svAhA |

maM mRtyuJjayAya zikhAyai vaSaT |

ziM zUlapANaye kavacAya hum |

vAM pinAkapANaye netratrayAya vauSaT |

yaM umApataye astrAya phaT |

bhUrbhuvassuvaromiti digbandhaH ||

dhyAnam

vajradaMSTraM trinayanaM kAlakaNTha marindamam |

sahasrakara-matyugraM vande zambhuM umApatim ||

rudrAkSa-kaGkaNa-lasatkara-daNDayugmaH pAlAntarA-lasita-bhasmadhRta-tripuNDraH |

paJcAkSaraM paripaThan varamantrarAjaM dhyAyan sadA pazupatiM zaraNaM vrajethAH ||

ataH paraM sarvapurANa-guhyaM niHzeSa-pApaughaharaM pavitram |

jayapradaM sarva-vipatpramocanaM vakSyAmi zaivaM kavacaM hitAya te ||

paJcapUjA

laM pRthivyAtmane gandhaM samarpayAmi |

haM AkAzAtmane puSpaiH pUjayAmi |

yaM vAyvAtmane dhUpaM AghrApayAmi |

raM agnyAtmane dIpaM darzayAmi |

vaM amRtAtmane amRtaM mahA-naivedyaM nivedayAmi |

saM sarvAtmane sarvopacAra-pUjAM samarpayAmi ||

mantraH

RSabha uvAca |

namaskRtya mahAdevaM vizva-vyApina-mIzvaram |

vakSye zivamayaM varma sarvarakSAkaraM nRNAm || 1 ||

zucau deze samAsIno yathAvatkalpitAsanaH |

jitendriyo jitaprANa-zcintayecchivamavyayam || 2 ||

hRtpuNDarIkAntarasanniviSTaM

svatejasA vyApta-nabho'vakAzam |

atIndriyaM sUkSmamanantamAdyaM

dhyAyetparAnandamayaM mahezam || 3 ||

dhyAnAvadhUtAkhilakarmabandha-

-zciraM cidAnandanimagnacetAH |

SaDakSaranyAsasamAhitAtmA

zaivena kuryAtkavacena rakSAm || 4 ||

mAM pAtu devo'khiladevatAtmA

saMsArakUpe patitaM gabhIre |

tannAma divyaM varamantramUlaM

dhunotu me sarvamaghaM hRdistham || 5 ||

sarvatra mAM rakSatu vizvamUrti-

-rjyoti-rmayAnandaghanazcidAtmA |

aNoraNIyAnuruzaktirekaH

sa IzvaraH pAtu bhayAdazeSAt || 6 ||

yo bhUsvarUpeNa bibharti vizvaM

pAyAtsa bhUmergirizo'STamUrtiH |

yo'pAM svarUpeNa nRNAM karoti

saJjIvanaM so'vatu mAM jalebhyaH || 7 ||

kalpAvasAne bhuvanAni dagdhvA

sarvANi yo nRtyati bhUrilIlaH |

sa kAlarudro'vatu mAM davAgne-

-rvAtyAdibhIte-rakhilAcca tApAt || 8 ||

pradIpta-vidyutkanakAvabhAso

vidyAvarAbhIti-kuThArapANiH |

caturmukhastatpuruSastrinetraH

prAcyAM sthito rakSatu mAmajasram || 9 ||

kuThAra kheTAGkuzapAzazUla

kapAlapAzAkSa guNAndadhAnaH |

caturmukho nIla-rucistrinetraH

pAyAdaghoro dizi dakSiNasyAm || 10 ||

kundendu-zaGkha-sphaTikAvabhAso

vedAkSamAlA-varadAbhayAGkaH |

tryakSazcaturvaktra uruprabhAvaH

sadyo'dhijAto'vatu mAM pratIcyAm || 11 ||

varAkSa-mAlAbhayaTaGka-hastaH

saroja-kiJjalkasamAnavarNaH |

trilocana-zcArucaturmukho mAM

pAyAdudIcyAM dizi vAmadevaH || 12 ||

vedAbhayeSTAGkuzaTaGkapAza-

-kapAlaDhakkAkSara-zUlapANiH |

sitadyutiH paJcamukho'vatAnmA-

-mIzAna UrdhvaM paramaprakAzaH || 13 ||

mUrdhAnamavyAnmama candramauliH

phAlaM mamAvyAdatha phAlanetraH |

netre mamAvyAdbhaganetrahArI

nAsAM sadA rakSatu vizvanAthaH || 14 ||

pAyAcchrutI me zrutigItakIrtiH

kapolamavyAtsatataM kapAlI |

vaktraM sadA rakSatu paJcavaktro

jihvAM sadA rakSatu vedajihvaH || 15 ||

kaNThaM girIzo'vatu nIlakaNThaH

pANidvayaM pAtu pinAkapANiH |

dormUlamavyAnmama dharmabAhuH

vakSaHsthalaM dakSamakhAntako'vyAt || 16 ||

mamodaraM pAtu girIndradhanvA

madhyaM mamAvyAnmadanAntakArI |

herambatAto mama pAtu nAbhiM

pAyAtkaTiM dhUrjaTirIzvaro me || 17 ||

[smarAri-ravyAnmama guhyadezam

pRSTaM sadA rakSatu pArvatIzaH |]

UrudvayaM pAtu kuberamitro

jAnudvayaM me jagadIzvaro'vyAt |

jaGghAyugaM puGgavaketuravyA-

-tpAdau mamAvyAtsuravandyapAdaH || 18 ||

mahezvaraH pAtu dinAdiyAme

mAM madhyayAme'vatu vAmadevaH |

trilocanaH pAtu tRtIyayAme

vRSadhvajaH pAtu dinAntyayAme || 19 ||

pAyAnnizAdau zazizekharo mAM

gaGgAdharo rakSatu mAM nizIthe |

gaurIpatiH pAtu nizAvasAne

mRtyuJjayo rakSatu sarvakAlam || 20 ||

antaHsthitaM rakSatu zaGkaro mAM

sthANuH sadA pAtu bahiHsthitaM mAm |

tadantare pAtu patiH pazUnAM

sadAzivo rakSatu mAM samantAt || 21 ||

tiSThanta-mavyAdbhuvanaikanAthaH

pAyAdvrajantaM pramathAdhinAthaH |

vedAntavedyo'vatu mAM niSaNNaM

mAmavyayaH pAtu zivaH zayAnam || 22 ||

mArgeSu mAM rakSatu nIlakaNThaH

zailAdi-durgeSu puratrayAriH |

araNyavAsAdi-mahApravAse

pAyAnmRgavyAdha udArazaktiH || 23 ||

kalpAnta-kAlogra-paTuprakopaH [kaTopa]

sphuTATTa-hAsoccalitANDa-kozaH |

ghorAri-senArNavadurnivAra-

-mahAbhayAdrakSatu vIrabhadraH || 24 ||

pattyazvamAtaGga-rathAvarUdhinI- [ghaTAvarUtha]

-sahasra-lakSAyuta-koTibhISaNam |

akSauhiNInAM zatamAtatAyinAM

chindyAnmRDo ghorakuThAradhArayA || 25 ||

nihantu dasyUnpralayAnalArci-

-rjvalattrizUlaM tripurAntakasya |

zArdUla-siMharkSavRkAdi-hiMsrAn

santrAsayatvIza-dhanuH pinAkaH || 26 ||

dussvapna duzzakuna durgati daurmanasya

durbhikSa durvyasana dussaha duryazAMsi |

utpAta-tApa-viSabhIti-masadgrahArtiM

vyAdhIMzca nAzayatu me jagatAmadhIzaH || 27 ||

OM namo bhagavate sadAzivAya

sakala-tattvAtmakAya

sarva-mantra-svarUpAya

sarva-yantrAdhiSThitAya

sarva-tantra-svarUpAya

sarva-tattva-vidUrAya

brahma-rudrAvatAriNe-nIlakaNThAya

pArvatI-manoharapriyAya

soma-sUryAgni-locanAya

bhasmoddhUlita-vigrahAya

mahAmaNi-mukuTa-dhAraNAya

mANikya-bhUSaNAya

sRSTisthiti-pralayakAla-raudrAvatArAya

dakSAdhvara-dhvaMsakAya

mahAkAla-bhedanAya

mUladhAraika-nilayAya

tatvAtItAya

gaGgAdharAya

sarva-devAdi-devAya

SaDAzrayAya

vedAnta-sArAya

trivarga-sAdhanAya

anantakoTi-brahmANDa-nAyakAya

ananta-vAsuki-takSaka-karkoTaka-zaGkha-kulika-padma-mahApadmeti-aSTa-mahA-nAga-kulabhUSaNAya

praNavasvarUpAya

cidAkAzAya

AkAza-dik-svarUpAya

graha-nakSatra-mAline

sakalAya

kalaGka-rahitAya

sakala-lokaika-kartre

sakala-lokaika-bhartre

sakala-lokaika-saMhartre

sakala-lokaika-gurave

sakala-lokaika-sAkSiNe

sakala-nigamaguhyAya

sakala-vedAnta-pAragAya

sakala-lokaika-varapradAya

sakala-lokaika-zaGkarAya

sakala-duritArti-bhaJjanAya

sakala-jagadabhayaGkarAya

zazAGka-zekharAya

zAzvata-nijAvAsAya

nirAkArAya

nirAbhAsAya

nirAmayAya

nirmalAya

nirlobhAya

nirmadAya

nizcintAya

nirahaGkArAya

niraGkuzAya

niSkalaGkAya

nirguNAya

niSkAmAya

nirUpaplavAya

niravadhyAya

nirantarAya

nirupadravAya

niravadyAya

nirantarAya

niSkAraNAya

nirAtaGkAya

niSprapaJcAya

nissaGgAya

nirdvandvAya

nirAdhArAya

nIrAgAya

nizkrodhAya

nirlobhAya

niSpApAya

nirvikalpAya

nirbhedAya

niSkriyAya

nistulAya

nizzaMzayAya

niraJjanAya

nirupama-vibhavAya

nitya-zuddha-buddha-mukta-paripUrNa-saccidAnandAdvayAya

parama-zAnta-svarUpAya

parama-zAnta-prakAzAya

tejorUpAya

tejomayAya

tejo'dhipataye

jaya jaya rudra mahArudra

mahA-raudra

bhadrAvatAra

mahA-bhairava

kAla-bhairava

kalpAnta-bhairava

kapAla-mAlAdhara

khaTvAGga-carma-khaDga-dhara

pAzAGkuza-DamarUzUla-cApa-bANa-gadA-zakti-bhindi-

pAla-tomara-musala-bhuzuNDI-mudgara-pAza-parigha-zataghnI-cakrAdyAyudha-bhISaNAkAra

sahasra-mukha

daMSTrAkarAla-vadana

vikaTATTahAsa

visphAtita-brahmANDa-maNDala-nAgendrakuNDala

nAgendrahAra

nAgendravalaya

nAgendracarmadhara

nAgendraniketana

mRtyuJjaya

tryambaka

tripurAntaka

vizvarUpa

virUpAkSa

vizvezvara

vRSabhavAhana

viSavibhUSaNa

vizvatomukha

sarvatomukha

mAM rakSa rakSa

jvala jvala

prajvala prajvala

mahAmRtyubhayaM zamaya zamaya

apamRtyubhayaM nAzaya nAzaya

rogabhayaM utsAdaya utsAdaya

viSasarpabhayaM zamaya zamaya

corAn mAraya mAraya

mama zatrUn uccATaya uccATaya

trizUlena vidAraya vidAraya

kuThAreNa bhindhi bhindhi

khaDgena chinddi chinddi

khaTvAGgena vipodhaya vipodhaya

mama pApaM zodhaya zodhaya

musalena niSpeSaya niSpeSaya

bANaiH santADaya santADaya

yakSa rakSAMsi bhISaya bhISaya

azeSa bhUtAn vidrAvaya vidrAvaya

kUSmANDa-bhUta-betAla-mArIgaNa-brahmarAkSasa-gaNAn santrAsaya santrAsaya

mama abhayaM kuru kuru

naraka-mahAbhayAn mAM uddhara uddhara

vitrastaM mAM AzvAsaya AzvAsaya

amRta-kaTAkSa-vIkSaNena mAM Alokaya Alokaya

saJjIvaya saJjIvaya

kSuttRSNArtaM mAM ApyAyaya ApyAyaya

duHkhAturaM mAM Anandaya Anandaya

zivakavacena mAM AcchAdaya AcchAdaya

hara hara

hara hara

mRtyuJjaya

tryambaka

sadAziva

paramaziva

namaste namaste namaste namaH ||

pUrvavat - hRdayAdi nyAsaH |

paJcapUjA ||

bhUrbhuvassuvaromiti digvimokaH ||

phalazrutiH

RSabha uvAca |

ityetatkavacaM zaivaM varadaM vyAhRtaM mayA |

sarva-bAdhA-prazamanaM rahasyaM sarvadehinAm || 1 ||

yaH sadA dhArayenmartyaH zaivaM kavacamuttamam |

na tasya jAyate kvApi bhayaM zambhoranugrahAt || 2 ||

kSINAyu-rmRtyumApanno mahArogahato'pi vA |

sadyaH sukhamavApnoti dIrghamAyuzca vindati || 3 ||

sarvadAridryazamanaM saumAGgalya-vivardhanam |

yo dhatte kavacaM zaivaM sa devairapi pUjyate || 4 ||

mahApAtaka-saGghAtairmucyate copapAtakaiH |

dehAnte zivamApnoti ziva-varmAnubhAvataH || 5 ||

tvamapi zraddhayA vatsa zaivaM kavacamuttamam |

dhArayasva mayA dattaM sadyaH zreyo hyavApsyasi || 6 ||

sUta uvAca |

ityuktvA RSabho yogI tasmai pArthiva-sUnave |

dadau zaGkhaM mahArAvaM khaDgaM cAriniSUdanam || 7 ||

punazca bhasma sammantrya tadaGgaM sarvato'spRzat |

gajAnAM SaTsahasrasya dviguNaM ca balaM dadau || 8 ||

bhasmaprabhAvAtsamprApya balaizvaryadhRtismRtiH |

sa rAjaputraH zuzubhe zaradarka iva zriyA || 9 ||

tamAha prAJjaliM bhUyaH sa yogI rAjanandanam |

eSa khaDgo mayA dattastapomantrAnubhAvataH || 10 ||

zitadhAramimaM khaDgaM yasmai darzayasi sphuTam |

sa sadyo mriyate zatruH sAkSAnmRtyurapi svayam || 11 ||

asya zaGkhasya nihrAdaM ye zRNvanti tavAhitAH |

te mUrchitAH patiSyanti nyastazastrA vicetanAH || 12 ||

khaDgazaGkhAvimau divyau parasainyavinAzinau |

AtmasainyasvapakSANAM zauryatejovivardhanau || 13 ||

etayozca prabhAvena zaivena kavacena ca |

dviSaTsahasranAgAnAM balena mahatApi ca || 14 ||

bhasmadhAraNasAmarthyAcchatrusainyaM vijeSyasi |

prApya siMhAsanaM paitryaM goptAsi pRthivImimAm || 15 ||

iti bhadrAyuSaM samyaganuzAsya samAtRkam |

tAbhyAM sampUjitaH so'tha yogI svairagatiryayau || 16 ||

iti zrIskAndamahApurANe brahmottarakhaNDe zivakavaca prabhAva varNanaM nAma dvAdazo'dhyAyaH sampUrNaH ||