Shiva Aparadha Kshamapana Stotram

zivAparAdha kSamApaNa stotram

zloka 1

Adau karmaprasaGgAtkalayati kaluSaM mAtRkukSau sthitaM mAM

viNmUtrAmedhyamadhye kvathayati nitarAM jATharo jAtavedAH |

yadyadvai tatra duHkhaM vyathayati nitarAM zakyate kena vaktuM

kSantavyo me'parAdhaH ziva ziva ziva bho zrImahAdeva zambho || 1||

bAlye duHkhAtireko malalulitavapuH stanyapAne pipAsA

no zaktazcendriyebhyo bhavaguNajanitAH jantavo mAM tudanti |

nAnArogAdiduHkhAdrudanaparavazaH zaGkaraM na smarAmi

kSantavyo me'parAdhaH ziva ziva ziva bho zrImahAdeva zambho || 2||

prauDho'haM yauvanastho viSayaviSadharaiH paJcabhirmarmasandhau

daSTo naSTo vivekaH sutadhanayuvatisvAdusaukhye niSaNNaH |

zaivIcintAvihInaM mama hRdayamaho mAnagarvAdhirUDhaM

kSantavyo me'parAdhaH ziva ziva ziva bho zrImahAdeva zambho || 3||

vArdhakye cendriyANAM vigatagatimatizcAdhidaivAditApaiH

pApai rogairviyogaistvanavasitavapuH prauDhahInaM ca dInam |

mithyAmohAbhilASairbhramati mama mano dhUrjaTerdhyAnazUnyaM

kSantavyo me'parAdhaH ziva ziva ziva bho zrImahAdeva zambho || 4||

snAtvA pratyUSakAle snapanavidhividhau nAhRtaM gAGgatoyaM

pUjArthaM vA kadAcidbahutaragahanAtkhaNDabilvIdalAni |

nAnItA padmamAlA sarasi vikasitA gandhadhUpaiH tvadarthaM

kSantavyo me'parAdhaH ziva ziva ziva bho zrImahAdeva zambho || 5||

dugdhairmadhvAjyayuktairdadhisitasahitaiH snApitaM naiva liGgaM

no liptaM candanAdyaiH kanakaviracitaiH pUjitaM na prasUnaiH |

dhUpaiH karpUradIpairvividharasayutairnaiva bhakSyopahAraiH

kSantavyo me'parAdhaH ziva ziva ziva bho zrImahAdeva zambho || 6||

no zakyaM smArtakarma pratipadagahanapratyavAyAkulAkhyaM

zraute vArtA kathaM me dvijakulavihite brahmamArgAnusAre | var brahmamArge susAre

jJAto dharmo vicAraiH zravaNamananayoH kiM nididhyAsitavyaM

kSantavyo me'parAdhaH ziva ziva ziva bho zrImahAdeva zambho || 7||

dhyAtvA citte zivAkhyaM pracurataradhanaM naiva dattaM dvijebhyo

havyaM te lakSasaGkhyairhutavahavadane nArpitaM bIjamantraiH |

no taptaM gAGgAtIre vratajapaniyamaiH rudrajApyairna vedaiH

kSantavyo me'parAdhaH ziva ziva ziva bho zrImahAdeva zambho || 8||

nagno niHsaGgazuddhastriguNavirahito dhvastamohAndhakAro

nAsAgre nyastadRSTirviditabhavaguNo naiva dRSTaH kadAcit |

unmanyA'vasthayA tvAM vigatakalimalaM zaGkaraM na smarAmi

kSantavyo me'parAdhaH ziva ziva ziva bho zrImahAdeva zambho || 9||

sthitvA sthAne saroje praNavamayamarutkumbhake (kuNDale) sUkSmamArge

zAnte svAnte pralIne prakaTitavibhave jyotirUpe'parAkhye |

liGgajJe brahmavAkye sakalatanugataM zaGkaraM na smarAmi

kSantavyo me'parAdhaH ziva ziva ziva bho zrImahAdeva zambho || 10||

hRdyaM vedAntavedyaM hRdayasarasije dIptamudyatprakAzaM

satyaM zAntasvarUpaM sakalamunimanaHpadmaSaNDaikavedyam |

jAgratsvapne suSuptau triguNavirahitaM zaGkaraM na smarAmi

kSantavyo me'parAdhaH ziva ziva ziva bho zrImahAdeva zambho || 11||

candrodbhAsitazekhare smarahare gaGgAdhare zaGkare

sarpairbhUSitakaNThakarNavivare netrotthavaizvAnare | yugale

dantitvakkRtasundarAmbaradhare trailokyasAre hare

mokSArthaM kuru cittavRttimacalAmanyaistu kiM karmabhiH || 12||

kiM vA'nena dhanena vAjikaribhiH prAptena rAjyena kiM

kiM vA putrakalatramitrapazubhirdehena gehena kim |

jJAtvaitatkSaNabhaGguraM sapadi re tyAjyaM mano dUrataH

svAtmArthaM guruvAkyato bhaja mana zrIpArvatIvallabham || 13||

paurohityaM rajanicaritaM grAmaNItvaM niyogo

mAThApatyaM hyanRtavacanaM sAkSivAdaH parAnnam |

brahmadveSaH khalajanaratiH prANinAM nirdayatvaM

mA bhUdevaM mama pazupate janmajanmAntareSu || 14||

Ayurnazyati pazyatAM pratidinaM yAti kSayaM yauvanaM

pratyAyAnti gatAH punarna divasAH kAlo jagadbhakSakaH |

lakSmIstoyataraGgabhaGgacapalA vidyuccalaM jIvitaM

tasmAttvAM zaraNAgataM zaraNada tvaM rakSa rakSAdhunA || 15|| tasmAnmAM

vande devamumApatiM suraguruM vande jagatkAraNaM

vande pannagabhUSaNaM mRgadharaM vande pazUnAM patim |

vande sUryazazAGkavahninayanaM vande mukundapriyaM

vande bhaktajanAzrayaM ca varadaM vande zivaM zaGkaram ||16||

gAtraM bhasmasitaM sitaM ca hasitaM haste kapAlaM sitaM var smitaM ca

khaTvAGgaM ca sitaM sitazca vRSabhaH karNe site kuNDale |

gaGgA phenasitA jaTA pazupatezcandraH sito mUrdhani

so'yaM sarvasito dadAtu vibhavaM pApakSayaM sarvadA || 17||

karacaraNakRtaM vAkkAyajaM karmajaM vA

zravaNanayanajaM vA mAnasaM vA'parAdham |

vihitamavihitaM vA sarvametatkSmasva

ziva ziva karuNAbdhe zrImahAdeva zambho || 18||

|| iti zrImad zaGkarAcAryakRta zivAparAdhakSamApaNastotraM sampUrNam ||