Sarasvati Kavacham

sarasvatI kavacam

zloka 1

(brahmavaivarta mahApurANAntargataM)

bhRguruvAca |

brahmanbrahmavidAMzreSTha brahmajJAnavizArada |

sarvajJa sarvajanaka sarvapUjakapUjita || 60

sarasvatyAzca kavacaM brUhi vizvajayaM prabho |

ayAtayAmamantrANAM samUho yatra saMyutaH || 61 ||

brahmovAca |

zRNu vatsa pravakSyAmi kavacaM sarvakAmadam |

zrutisAraM zrutisukhaM zrutyuktaM zrutipUjitam || 62 ||

uktaM kRSNena goloke mahyaM vRndAvane vane |

rAsezvareNa vibhunA rAse vai rAsamaNDale || 63 ||

atIva gopanIyaJca kalpavRkSasamaM param |

azrutAdbhutamantrANAM samUhaizca samanvitam || 64 ||

yaddhRtvA paThanAdbrahmanbuddhimAMzca bRhaspatiH |

yaddhRtvA bhagavAJchukraH sarvadaityeSu pUjitaH || 65 ||

paThanAddhAraNAdvAgmI kavIndro vAlmikI muniH |

svAyambhuvo manuzcaiva yaddhRtvA sarvapUjitAH || 66 ||

kaNAdo gautamaH kaNvaH pANiniH zAkaTAyanaH |

granthaM cakAra yaddhRtvA dakSaH kAtyAyanaH svayam || 67 ||

dhRtvA vedavibhAgaJca purANAnyakhilAni ca |

cakAra lIlAmAtreNa kRSNadvaipAyanaH svayam || 68 ||

zAtAtapazca saMvarto vasiSThazca parAzaraH |

yaddhRtvA paThanAdgranthaM yAjJavalkyazcakAra saH || 69 ||

RSyazRGgo bharadvAjazcAstIko devalastathA |

jaigISavyo'tha jAbAliryaddhRtvA sarvapUjitaH || 70 ||

kavacasyAsya viprendra RSireSa prajApatiH |

svayaM bRhaspatizchando devo rAsezvaraH prabhuH || 71 ||

sarvatattvaparijJAne sarvArthe'pi ca sAdhane |

kavitAsu ca sarvAsu viniyogaH prakIrtitaH || 72 ||

( kavacaM )

OM hrIM sarasvatyai svAhA ziro me pAtu sarvataH |

zrIM vAgdevatAyai svAhA bhAlaM me sarvadA'vatu || 73 ||

OM hrIM sarasvatyai svAheti zrotre pAtu nirantaram |

OM zrIM hrIM bhagavatyai sarasvatyai svAhA netrayugmaM sadA'vatu || 74 ||

aiM hrIM vAgvAdinyai svAhA nAsAM me sarvadA'vatu |

hrIM vidyAdhiSThAtRdevyai svAhA coMSTha sadA'vatu || 75 ||

OM zrIM hrIM brAhmyai svAheti dantapaGktiM sadA'vatu |

aimityekAkSaro mantro mama kaNThaM sadA'vatu || 76 ||

OM zrIM hrIM pAtu me grIvAM skandhaM me zrIM sadA'vatu |

OM hrIM vidyAdhiSThAtRdevyai svAhA vakSaH sadA'vatu || 77 ||

OM hrIM vidyAsvarUpAyai svAhA me pAtu nAbhikAm |

OM hrIM klIM vANyai svAheti mama pRSThaM sadA'vatu || 78 ||

OM sarvavarNAtmikAyai pAdayugmaM sadA'vatu |

OM rAgAdhiSThAtRdevyai sarvAGgaM me sadA'vatu || 79 ||

OM sarvakaNThavAsinyai svAhA pracyAM sadA'vatu |

OM hrIM jihvAgravAsinyai svAhA'gnidizi rakSatu || 80 ||

OM aiM hrIM zrIM sarasvatyai budhajananyai svAhA |

satataM mantrarAjo'yaM dakSiNe mAM sadA'vatu || 81 ||

OM hrIM zrIM tryakSaro mantro nairRtyAM me sadA'vatu |

kavijihvAgravAsinyai svAhA mAM vAruNe'vatu || 82 ||

OM sadambikAyai svAhA vAyavye mAM sadA'vatu |

OM gadyapadyavAsinyai svAhA mAmuttare'vatu || 83 ||

OM sarvazAstravAsinyai svAhaizAnyAM sadA'vatu |

OM hrIM sarvapUjitAyai svAhA cordhvaM sadA'vatu || 84 ||

aiM hrIM pustakavAsinyai svAhA'dho mAM sadAvatu |

OM granthabIjarUpAyai svAhA mAM sarvato'vatu || 85 ||

iti te kathitaM vipra sarvamantraughavigraham |

idaM vizvajayaM nAma kavacaM brahmArUpakam || 86 ||

purA zrutaM dharmavaktrAtparvate gandhamAdane |

tava snehAnmayA''khyAtaM pravaktavyaM na kasyacit || 87 ||

gurumabhyarcya vidhivadvastrAlaGkAracandanaiH |

praNamya daNDavadbhUmau kavacaM dhArayetsudhIH || 88 ||

paJcalakSajapenaiva siddhaM tu kavacaM bhavet |

yadi syAtsiddhakavaco bRhaspati samo bhavet || 89 ||

mahAvAgmI kavIndrazca trailokyavijayI bhavet |

zaknoti sarvaM jetuM sa kavacasya prabhAvataH || 90 ||

idaM te kANvazAkhoktaM kathitaM kavacaM mune |

stotraM pUjAvidhAnaM ca dhyAnaM vai vandanaM tathA || 91 ||

iti zrI brahmavaivarte mahApurANe prakRtikhaNDe nAradanArAyaNasaMvAde sarasvatIkavacaM nAma caturtho'dhyAyaH |