Narayaniyam Dashaka 2

nArAyaNIyaM dashaka 2 - bhagavataH svarUpamAdhuryaM tathA bhaktimahattvam

shloka 1

sUryaspardhikirITamUrdhvatilakaprodbhAsiphAlAntaraM

kAruNyAkulanetramArdrahasitollAsaM sunAsApuTam|

gaNDodyanmakarAbhakuNDalayugaM kaNThojvalatkaustubhaM

tvadrUpaM vanamAlyahArapaTalashrIvatsadIpraM bhaje||1||

keyUrANgadakaNkaNottamamahAratnANgulIyANkita-

shrImadbAhuchatuShkasaNgatagadAshaNkhAripa~NkeruhAm |

kAnchit kAnchanakAnchilAnchChitalasatpItAmbarAlambinI-

mAlambe vimalAmbujadyutipadAM mUrtiM tavArtichChidam ||2||

yatttrailokyamahIyaso.api mahitaM sammohanaM mohanAt

kAntaM kAntinidhAnato.api madhuraM mAdhuryadhuryAdapi |

saundaryottarato.api sundarataraM tvadrUpamAshcharyato.a-

pyAshcharyaM bhuvane na kasya kutukaM puShNAti viShNo vibho ||3||

tattAdRRi~NmadhurAtmakaM tava vapuH samprApya sampanmayI

sA devI paramotsukA chirataraM nAste svabhakteShvapi |

tenAsyA bata kaShTamachyuta vibho tvadrUpamAnoj~naka -

premasthairyamayAdachApalabalAchchApalyavArtodabhUt ||4||

lakShmIstAvakarAmaNIyakahRRitaiveyaM pareShvasthire-

tyasminnanyadapi pramANamadhunA vakShyAmi lakShmIpate |

ye tvaddhyAnaguNAnukIrtanarasAsaktA hi bhaktA janA-

steShveShA vasati sthiraiva dayitaprastAvadattAdarA ||5||

evambhUtamanoj~natAnavasudhAniShyandasandohanaM

tvadrUpaM parachidrasAyanamayaM chetoharaM shRRiNvatAm |

sadyaH prerayate matiM madayate romAnchayatyaNgakaM

vyAsi~nchatyapi shItavAShpavisarairAnandamUrChodbhavaiH ||6||

evambhUtatayA hi bhaktyabhihito yogassa yogadvayAt

karmaj~nAnamayAt bhRRishottamataro yogIshvarairgIyate |

saundaryaikarasAtmake tvayi khalu premaprakarShAtmikA

bhaktirnishramameva vishvapuruShairlabhyA ramAvallabha ||7||

niShkAmaM niyatasvadharmacharaNaM yat karmayogAbhidhaM

taddUretyaphalaM yadaupaniShadaj~nAnopalabhyaM punaH |

tattvavyaktatayA sudurgamataraM chittasya tasmAdvibho

tvatpremAtmakabhaktireva satataM svAdIyasI shreyasI ||8||

atyAyAsakarANi karmapaTalAnyAcharya niryanmalA

bodhe bhaktipathe.athavA.apyuchitatAmAyAnti kiM tAvatA |

kliShTvA tarkapathe paraM tava vapurbrahmAkhyamanye puna-

shchittArdratvamRRite vichintya bahubhissiddhyanti janmAntaraiH ||9||

tvadbhaktistu kathArasAmRRitajharInirmajjanena svayaM

siddhyantI vimalaprabodhapadavImakleshatastanvatI |

sadyassiddhikarI jayatyayi vibho saivAstu me tvatpada-

premaprauDhirasArdratA drutataraM vAtAlayAdhIshvara ||10||