Narayaniyam Dashaka 100
Narayaniyam Dashaka 100
Narayaniyam Dashaka 100
nArAyaNIyaM dashaka 100 - bhagavataH keshAdipAdavarNanam
shloka 1
agre pashyAmi tejo nibiDatarakalAyAvalIlobhanIyaM
pIyUShAplAvito.ahaM tadanu tadudare divyakaishoraveSham |
tAruNyArambharamyaM paramasukharasAsvAdaromAnchitANgai-
rAvItaM nAradAdyairvilasadupaniShatsundarImaNDalaishcha ||1||
nIlAbhaM kunchitAgraM ghanamamalataraM saMyataM chArubhaNgyA
ratnottaMsAbhirAmaM valayitamudayachchandrakaiH pi~nChajAlaiH |
mandArasra~NnivItaM tava pRRithukabarIbhAramAlokaye.ahaM
snigdhashvetordhvapuNDrAmapi cha sulalitAM phAlabAlenduvIthIm ||2
hRRidyaM pUrNAnukampArNavamRRidulaharIcha~nchalabhrUvilAsai-
rAnIlasnigdhapakShmAvaliparilasitaM netrayugmaM vibho te |
sAndrachChAyaM vishAlAruNakamaladalAkAramAmugdhatAraM
kAruNyAlokalIlAshishiritabhuvanaM kShipyatAM mayyanAthe ||3||
uttu~NgollAsinAsaM harimaNimukuraprollasadgaNDapAlI-
vyAlolatkarNapAshA~nchitamakaramaNIkuNDaladvandvadIpram |
unmIladdantapa~NktisphuradaruNatarachChAyabimbAdharAntaH-
prItiprasyandimandasmitamadhurataraM vaktramudbhAsatAM me ||4||
bAhudvandvena ratnojjvalavalayabhRRitA shoNapANipravAle-
nopAttAM veNunAlI prasRRitanakhamayUkhANgulIsaNgashArAm |
kRRitvA vaktrAravinde sumadhuravikasadrAgamudbhAvyamAnaiH
shabdabrahmAmRRitaistvaM shishiritabhuvanaiH si~ncha me karNavIthIm ||5||
utsarpatkaustubhashrItatibhiraruNitaM komalaM kaNThadeshaM
vakShaH shrIvatsaramyaM taralatarasamuddIprahArapratAnam |
nAnAvarNaprasUnAvalikisalayinIM vanyamAlAM vilola-
llolambAM lambamAnAmurasi tava tathA bhAvaye ratnamAlAm ||6||
aNge panchA~NgarAgairatishayavikasatsaurabhAkRRiShTalokaM
lInAnekatrilokIvitatimapi kRRishAM bibhrataM madhyavallIm |
shakrAshmanyastataptojjvalakanakanibhaM pItachelaM dadhAnaM
dhyAyAmo dIptarashmisphuTamaNirashanAki~NkiNImaNDitaM tvAm ||7||
UrU chArU tavorU ghanamasRRiNaruchau chittachorau ramAyAH
vishvakShobhaM vishaNkya dhruvamanishamubhau pItachelAvRRitANgau |
AnamrANAM purastAnnyasanadhRRitasamastArthapAlIsamudga-
chChAyaM jAnudvayaM cha kramapRRithulamanojne cha jaNghe niSheve ||8||
manjIraM manjunAdairiva padabhajanaM shreya ityAlapantaM
pAdAgraM bhrAntimajjatpraNatajanamanomandaroddhArakUrmam |
uttu~NgAtAmrarAjannakharahimakarajyotsnayA chA.ashritAnAM
santApadhvAntahantrIM tatimanukalaye maNgalAmaNgulInAm ||9||
yogIndrANAM tvada~NgeShvadhikasumadhuraM muktibhAjAM nivAso
bhaktAnAM kAmavarShadyutarukisalayaM nAtha te pAdamUlam |
nityaM chittasthitaM me pavanapurapate kRRiShNa kAruNyasindho
hRRitvA nishsheShatApAn pradishatu paramAnandasandohalakShmIm ||10||
aj~nAtvA te mahatvaM yadiha nigaditaM vishvanAtha kShamethAH
stotraM chaitatsahasrottaramadhikataraM tvatprasAdAya bhUyAt |
dvedhA nArAyaNIyaM shrutiShu cha januShA stutyatAvarNanena
sphItaM lIlAvatArairidamiha kurutAmAyurArogyasaukhyam ||11||