Narayaniyam Dashaka 100

nArAyaNIyaM dazaka 100 - bhagavataH kezAdipAdavarNanam

zloka 1

agre pazyAmi tejo nibiDatarakalAyAvalIlobhanIyaM

pIyUSAplAvito'haM tadanu tadudare divyakaizoraveSam |

tAruNyArambharamyaM paramasukharasAsvAdaromAJcitAGgai-

rAvItaM nAradAdyairvilasadupaniSatsundarImaNDalaizca ||1||

nIlAbhaM kuJcitAgraM ghanamamalataraM saMyataM cArubhaGgyA

ratnottaMsAbhirAmaM valayitamudayaccandrakaiH piJchajAlaiH |

mandArasraGnivItaM tava pRthukabarIbhAramAlokaye'haM

snigdhazvetordhvapuNDrAmapi ca sulalitAM phAlabAlenduvIthIm ||2

hRdyaM pUrNAnukampArNavamRdulaharIcaJcalabhrUvilAsai-

rAnIlasnigdhapakSmAvaliparilasitaM netrayugmaM vibho te |

sAndracchAyaM vizAlAruNakamaladalAkAramAmugdhatAraM

kAruNyAlokalIlAziziritabhuvanaM kSipyatAM mayyanAthe ||3||

uttuGgollAsinAsaM harimaNimukuraprollasadgaNDapAlI-

vyAlolatkarNapAzAJcitamakaramaNIkuNDaladvandvadIpram |

unmIladdantapaGktisphuradaruNataracchAyabimbAdharAntaH-

prItiprasyandimandasmitamadhurataraM vaktramudbhAsatAM me ||4||

bAhudvandvena ratnojjvalavalayabhRtA zoNapANipravAle-

nopAttAM veNunAlI prasRtanakhamayUkhAGgulIsaGgazArAm |

kRtvA vaktrAravinde sumadhuravikasadrAgamudbhAvyamAnaiH

zabdabrahmAmRtaistvaM ziziritabhuvanaiH siJca me karNavIthIm ||5||

utsarpatkaustubhazrItatibhiraruNitaM komalaM kaNThadezaM

vakSaH zrIvatsaramyaM taralatarasamuddIprahArapratAnam |

nAnAvarNaprasUnAvalikisalayinIM vanyamAlAM vilola-

llolambAM lambamAnAmurasi tava tathA bhAvaye ratnamAlAm ||6||

aGge paJcAGgarAgairatizayavikasatsaurabhAkRSTalokaM

lInAnekatrilokIvitatimapi kRzAM bibhrataM madhyavallIm |

zakrAzmanyastataptojjvalakanakanibhaM pItacelaM dadhAnaM

dhyAyAmo dIptarazmisphuTamaNirazanAkiGkiNImaNDitaM tvAm ||7||

UrU cArU tavorU ghanamasRNarucau cittacorau ramAyAH

vizvakSobhaM vizaGkya dhruvamanizamubhau pItacelAvRtAGgau |

AnamrANAM purastAnnyasanadhRtasamastArthapAlIsamudga-

cchAyaM jAnudvayaM ca kramapRthulamanojJe ca jaGghe niSeve ||8||

maJjIraM maJjunAdairiva padabhajanaM zreya ityAlapantaM

pAdAgraM bhrAntimajjatpraNatajanamanomandaroddhArakUrmam |

uttuGgAtAmrarAjannakharahimakarajyotsnayA cA'zritAnAM

santApadhvAntahantrIM tatimanukalaye maGgalAmaGgulInAm ||9||

yogIndrANAM tvadaGgeSvadhikasumadhuraM muktibhAjAM nivAso

bhaktAnAM kAmavarSadyutarukisalayaM nAtha te pAdamUlam |

nityaM cittasthitaM me pavanapurapate kRSNa kAruNyasindho

hRtvA nizzeSatApAn pradizatu paramAnandasandohalakSmIm ||10||

ajJAtvA te mahatvaM yadiha nigaditaM vizvanAtha kSamethAH

stotraM caitatsahasrottaramadhikataraM tvatprasAdAya bhUyAt |

dvedhA nArAyaNIyaM zrutiSu ca januSA stutyatAvarNanena

sphItaM lIlAvatArairidamiha kurutAmAyurArogyasaukhyam ||11||