Ganesha Bhujanga Stotram

gaNesha bhuja~Ngam

shloka 1

raNatkShudraghaNTAninAdAbhirAmaM

chalattANDavoddaNDavatpadmatAlam |

lasattundilA~NgoparivyAlahAraM

gaNAdhIshamIshAnasUnuM tamIDe || 1 ||

dhvanidhvaMsavINAlayollAsivaktraM

sphurachChuNDadaNDollasadbIjapUram |

galaddarpasaugandhyalolAlimAlaM

gaNAdhIshamIshAnasUnuM tamIDe || 2 ||

prakAshajjapAraktaratnaprasUna-

pravAlaprabhAtAruNajyotirekam |

pralambodaraM vakratuNDaikadantaM

gaNAdhIshamIshAnasUnuM tamIDe || 3 ||

vichitrasphuradratnamAlAkirITaM

kirITollasachchandrarekhAvibhUSham |

vibhUShaikabhUShaM bhavadhvaMsahetuM

gaNAdhIshamIshAnasUnuM tamIDe || 4 ||

uda~nchadbhujAvallarIdRRishyamUlo-

chchaladbhrUlatAvibhramabhrAjadakSham |

marutsundarIchAmaraiH sevyamAnaM

gaNAdhIshamIshAnasUnuM tamIDe || 5 ||

sphuranniShThurAlolapi~NgAkShitAraM

kRRipAkomalodAralIlAvatAram |

kalAbindugaM gIyate yogivaryai-

rgaNAdhIshamIshAnasUnuM tamIDe || 6 ||

yamekAkSharaM nirmalaM nirvikalpaM

guNAtItamAnandamAkArashUnyam |

paraM pAramo~NkAramAmnAyagarbhaM

vadanti pragalbhaM purANaM tamIDe || 7 ||

chidAnandasAndrAya shAntAya tubhyaM

namo vishvakartre cha hartre cha tubhyam |

namo.anantalIlAya kaivalyabhAse

namo vishvabIja prasIdeshasUno || 8 ||

imaM sustavaM prAtarutthAya bhaktyA

paThedyastu martyo labhetsarvakAmAn |

gaNeshaprasAdena siddhyanti vAcho

gaNeshe vibhau durlabhaM kiM prasanne || 9 ||