Ganesha Bhujanga Stotram

gaNeza bhujaGgam

zloka 1

raNatkSudraghaNTAninAdAbhirAmaM

calattANDavoddaNDavatpadmatAlam |

lasattundilAGgoparivyAlahAraM

gaNAdhIzamIzAnasUnuM tamIDe || 1 ||

dhvanidhvaMsavINAlayollAsivaktraM

sphuracchuNDadaNDollasadbIjapUram |

galaddarpasaugandhyalolAlimAlaM

gaNAdhIzamIzAnasUnuM tamIDe || 2 ||

prakAzajjapAraktaratnaprasUna-

pravAlaprabhAtAruNajyotirekam |

pralambodaraM vakratuNDaikadantaM

gaNAdhIzamIzAnasUnuM tamIDe || 3 ||

vicitrasphuradratnamAlAkirITaM

kirITollasaccandrarekhAvibhUSam |

vibhUSaikabhUSaM bhavadhvaMsahetuM

gaNAdhIzamIzAnasUnuM tamIDe || 4 ||

udaJcadbhujAvallarIdRzyamUlo-

ccaladbhrUlatAvibhramabhrAjadakSam |

marutsundarIcAmaraiH sevyamAnaM

gaNAdhIzamIzAnasUnuM tamIDe || 5 ||

sphuranniSThurAlolapiGgAkSitAraM

kRpAkomalodAralIlAvatAram |

kalAbindugaM gIyate yogivaryai-

rgaNAdhIzamIzAnasUnuM tamIDe || 6 ||

yamekAkSaraM nirmalaM nirvikalpaM

guNAtItamAnandamAkArazUnyam |

paraM pAramoGkAramAmnAyagarbhaM

vadanti pragalbhaM purANaM tamIDe || 7 ||

cidAnandasAndrAya zAntAya tubhyaM

namo vizvakartre ca hartre ca tubhyam |

namo'nantalIlAya kaivalyabhAse

namo vizvabIja prasIdezasUno || 8 ||

imaM sustavaM prAtarutthAya bhaktyA

paThedyastu martyo labhetsarvakAmAn |

gaNezaprasAdena siddhyanti vAco

gaNeze vibhau durlabhaM kiM prasanne || 9 ||