Apaduddharaka Hanuman Stotram

ApaduddhAraka hanumatstotram

zloka 1

OM asya zrI ApaduddhAraka hanumat stotra mahAmantra kavacasya, vibhISaNa RSiH, hanumAn devatA, sarvApaduddhAraka zrIhanumatprasAdena mama sarvApannivRttyarthe, sarvakAryAnukUlya siddhyarthe jape viniyogaH |

dhyAnam |

vAme kare vairibhidaM vahantaM

zailaM pare zRGkhalahAriTaGkam |

dadhAnamacchacchaviyajJasUtraM

bhaje jvalatkuNDalamAJjaneyam || 1 ||

saMvItakaupIna mudaJcitAGguliM

samujjvalanmauJjimathopavItinam |

sakuNDalaM lambizikhAsamAvRtaM

tamAJjaneyaM zaraNaM prapadye || 2 ||

ApannAkhilalokArtihAriNe zrIhanUmate |

akasmAdAgatotpAta nAzanAya namo namaH || 3 ||

sItAviyuktazrIrAmazokaduHkhabhayApaha |

tApatritayasaMhArin AJjaneya namo'stu te || 4 ||

AdhivyAdhi mahAmArI grahapIDApahAriNe |

prANApahartredaityAnAM rAmaprANAtmane namaH || 5 ||

saMsArasAgarAvarta kartavyabhrAntacetasAm |

zaraNAgatamartyAnAM zaraNyAya namo'stu te || 6 ||

vajradehAya kAlAgnirudrAyA'mitatejase |

brahmAstrastambhanAyAsmai namaH zrIrudramUrtaye || 7 ||

rAmeSTaM karuNApUrNaM hanUmantaM bhayApaham |

zatrunAzakaraM bhImaM sarvAbhISTapradAyakam || 8 ||

kArAgRhe prayANe vA saGgrAme zatrusaGkaTe |

jale sthale tathA''kAze vAhaneSu catuSpathe || 9 ||

gajasiMha mahAvyAghra cora bhISaNa kAnane |

ye smaranti hanUmantaM teSAM nAsti vipat kvacit || 10 ||

sarvavAnaramukhyAnAM prANabhUtAtmane namaH |

zaraNyAya vareNyAya vAyuputrAya te namaH || 11 ||

pradoSe vA prabhAte vA ye smarantyaJjanAsutam |

arthasiddhiM jayaM kIrtiM prApnuvanti na saMzayaH || 12 ||

japtvA stotramidaM mantraM prativAraM paThennaraH |

rAjasthAne sabhAsthAne prApte vAde labhejjayam || 13 ||

vibhISaNakRtaM stotraM yaH paThet prayato naraH |

sarvApadbhyo vimucyeta nA'tra kAryA vicAraNA || 14 ||

mantraH |

markaTeza mahotsAha sarvazokanivAraka |

zatrUn saMhara mAM rakSa zriyaM dApaya bho hare || 15

iti vibhISaNakRtaM sarvApaduddhAraka zrIhanumat stotram ||