Sri Radha Krishna Ashtakam

zrI rAdhA kRSNa aSTakam

zloka 1

yaH zrIgovardhanAdriM sakalasurapatIMstatragogopabRndaM

svIyaM saMrakSituM cetyamarasukhakaraM mohayan sandadhAra |

tanmAnaM khaNDayitvA vijitaripukulo nIladhArAdharAbhaH

kRSNo rAdhAsameto vilasatu hRdaye so'smadIye sadaiva || 1 ||

yaM dRSTvA kaMsabhUpaH svakRtakRtimaho saMsmaranmantrivaryAn

kiM vA pUrvaM mayedaM kRtamiti vacanaM duHkhitaH pratyuvAca |

AjJapto nAradena smitayutavadanaH pUrayansarvakAmAn

kRSNo rAdhAsameto vilasatu hRdaye so'smadIye sadaiva || 2 ||

yena prodyatpratApA nRpatikulabhavAH pANDavAH kauravAbdhiM

tIrtvA pAraM tadIyaM jagadakhilanRNAM dustaraJceti jagmuH |

tatpatnIcIravRddhipraviditamahimA bhUtale bhUpatIzaH

kRSNo rAdhAsameto vilasatu hRdaye so'smadIye sadaiva || 3 ||

yasmai coddhRtya pAtrAddadhiyutanavanItaM karairgopikAbhi-

rdattaM tadbhAvapUrtau vinihitahRdayassatyamevaM tirodhAt |

muktAguJjAvalIbhiH pracuratamaruciH kuNDalAkrAntagaNDaH

kRSNo rAdhAsameto vilasatu hRdaye so'smadIye sadaiva || 4 ||

yasmAdvizvAbhirAmAdiha jananavidhau sarvanandAdigopAH

saMsArArtervimuktAH sakalasukhakarAH sampadaH prApureva |

itthaM pUrNenduvaktraH kalakamaladRzaH svIyajanma stuvantaH

kRSNo rAdhAsameto vilasatu hRdaye so'smadIye sadaiva || 5 ||

yasya zrInandasUnoH vrajayuvatijanAzcAgatA bhartRputrAM-

styaktvA zrutvA samIpe vicakitanayanAH sapramodAH svagehe |

rantuM rAsAdilIlA manasijadalitA veNunAdaM ca ramyaM

kRSNo rAdhAsameto vilasatu hRdaye so'smadIye sadaiva || 6 ||

yasmin dRSTe samaste jagati yuvatayaH prANanAthavratAyA-

stA apyevaM hi nUnaM kimapi ca hRdaye kAmabhAvaM dadhatyaH |

tatsnehAbdhiM vapuzcedaviditadharaNau sUryabimbasvarUpAH

kRSNo rAdhAsameto vilasatu hRdaye so'smadIye sadaiva || 7 ||

yaH svIye gokule'sminviditanijakulodbhUtabAlaiH sameto

mAtaryevaM cakAra prasRtatamaguNAnbAlalIlAvilAsAn |

hatvA vatsapralambadvividabakakharAngopabRndaM jugopa

kRSNo rAdhAsameto vilasatu hRdaye so'smadIye sadaiva || 8 ||

kRSNArAdhASTakaM prAtarutthAya prapaThennaraH |

ya evaM sarvadA nUnaM sa prApnoti parAM gatim || 9 ||

iti zrIraghunAthacArya viracitaM zrIrAdhAkRSNASTakam |