Sri Krishna Sahasra Nama Stotram

zrI kRSNa sahasra nAma stotram

zloka 1

OM asya zrIkRSNasahasranAmastotramantrasya parAzara RSiH, anuSTup chandaH, zrIkRSNaH paramAtmA devatA, zrIkRSNeti bIjam, zrIvallabheti zaktiH, zArGgIti kIlakaM, zrIkRSNaprItyarthe jape viniyogaH ||

nyAsaH

parAzarAya RSaye namaH iti zirasi,

anuSTup chandase namaH iti mukhe,

gopAlakRSNadevatAyai namaH iti hRdaye,

zrIkRSNAya bIjAya namaH iti guhye,

zrIvallabhAya zaktyai namaH iti pAdayoH,

zArGgadharAya kIlakAya namaH iti sarvAGge ||

karanyAsaH

zrIkRSNa ityArabhya zUravaMzaikadhIrityantAni aGguSThAbhyAM namaH |

zaurirityArabhya svabhAsodbhAsitavraja ityantAni tarjanIbhyAM namaH |

kRtAtmavidyAvinyAsa ityArabhya prasthAnazakaTArUDha iti madhyamAbhyAM namaH,

bRndAvanakRtAlaya ityArabhya madhurAjanavIkSita ityanAmikAbhyAM namaH,

rajakapratighAtaka ityArabhya dvArakApurakalpana iti kaniSThikAbhyAM namaH

dvArakAnilaya ityArabhya parAzara iti karatalakarapRSThAbhyAM namaH,

evaM hRdayAdinyAsaH ||

dhyAnam

keSAJcitpremapuMsAM vigalitamanasAM bAlalIlAvilAsaM

keSAM gopAlalIlAGkitarasikatanurveNuvAdyena devam |

keSAM vAmAsamAje janitamanasijo daityadarpApahaivaM

jJAtvA bhinnAbhilASaM sa jayati jagatAmIzvarastAdRzo'bhUt || 1 ||

kSIrAbdhau kRtasaMstavassuragaNairbrahmAdibhiH paNDitaiH

prodbhUto vasudevasadmani mudA cikrIDa yo gokule |

kaMsadhvaMsakRte jagAma madhurAM sArAmasadvArakAM

gopAlo'khilagopikAjanasakhaH pAyAdapAyAt sa naH || 2 ||

phullendIvarakAntiminduvadanaM barhAvataMsapriyaM

zrIvatsAGkamudArakaustubhadharaM pItAmbaraM sundaram |

gopInAM nayanotpalArcitatanuM gogopasaGghAvRtaM

govindaM kalaveNuvAdanarataM divyAGgabhUSaM bhaje || 3 ||

om |

kRSNaH zrIvallabhaH zArGgI viSvaksenaH svasiddhidaH |

kSIrodadhAmA vyUhezaH zeSazAyI jaganmayaH || 1 ||

bhaktigamyastrayImUrtirbhArArtavasudhAstutaH |

devadevo dayAsindhurdevadevazikhAmaNiH || 2 ||

sukhabhAvassukhAdhAro mukundo muditAzayaH |

avikriyaH kriyAmUrtiradhyAtmasvasvarUpavAn || 3 ||

ziSTAbhilakSyo bhUtAtmA dharmatrANArthaceSTitaH |

antaryAmI kalArUpaH kAlAvayavasAkSikaH || 4 ||

vasudhAyAsaharaNo nAradapreraNonmukhaH |

prabhUSNurnAradodgIto lokarakSAparAyaNaH || 5 ||

rauhiNeyakRtAnando yogajJAnaniyojakaH |

mahAguhAntarnikSiptaH purANavapurAtmavAn || 6 ||

zUravaMzaikadhIzzauriH kaMsazaGkAviSAdakRt |

vasudevollasacchaktirdevakyaSTamagarbhagaH || 7 ||

vasudevasutaH zrImAndevakInandano hariH |

AzcaryabAlaH zrIvatsalakSmavakSAzcaturbhujaH || 8 ||

svabhAvotkRSTasadbhAvaH kRSNASTamyantasambhavaH |

prAjApatyarkSasambhUto nizIthasamayoditaH || 9 ||

zaGkhacakragadApadmapANiH padmanibhekSaNaH |

kirITI kaustubhoraskaH sphuranmakarakuNDalaH || 10 ||

pItavAsA ghanazyAmaH kuJcitAJcitakuntalaH |

suvyaktavyaktAbharaNaH sUtikAgRhabhUSaNaH || 11 ||

kArAgArAndhakAraghnaH pitRprAgjanmasUcakaH |

vasudevastutaH stotraM tApatrayanivAraNaH || 12 ||

niravadyaH kriyAmUrtirnyAyavAkyaniyojakaH |

adRSTaceSTaH kUTastho dhRtalaukikavigrahaH || 13 ||

maharSimAnasollAso mahImaGgaladAyakaH |

santoSitasuravrAtaH sAdhucittaprasAdakaH || 14 ||

janakopAyanirdeSTA devakInayanotsavaH |

pitRpANipariSkAro mohitAgArarakSakaH || 15 ||

svazaktyuddhATitAzeSakapATaH pitRvAhakaH |

zeSoragaphaNAcchatrazzeSoktAkhyAsahasrakaH || 16 ||

yamunApUravidhvaMsI svabhAsodbhAsitavrajaH |

kRtAtmavidyAvinyAso yogamAyAgrasambhavaH || 17 ||

durgAniveditodbhAvo yazodAtalpazAyakaH |

nandagopotsavasphUrtirvrajAnandakarodayaH || 18 ||

sujAtajAtakarma zrIrgopIbhadroktinirvRtaH |

alIkanidropagamaH pUtanAstanapIDanaH || 19 ||

stanyAttapUtanAprANaH pUtanAkrozakArakaH |

vinyastarakSAgodhUliryazodAkaralAlitaH || 20 ||

nandAghrAtaziromadhyaH pUtanAsugatipradaH |

bAlaH paryaGkanidrAlurmukhArpitapadAGguliH || 21 ||

aJjanasnigdhanayanaH paryAyAGkuritasmitaH |

lIlAkSastaralAlokazzakaTAsurabhaJjanaH || 22 ||

dvijoditasvastyayano mantrapUtajalAplutaH |

yazodotsaGgaparyaGko yazodAmukhavIkSakaH || 23 ||

yazodAstanyamuditastRNAvartAdidussahaH |

tRNAvartAsuradhvaMsI mAtRvismayakArakaH || 24 ||

prazastanAmakaraNo jAnucaGkramaNotsukaH |

vyAlambicUlikAratno ghoSagopapraharSaNaH || 25 ||

svamukhapratibimbArthI grIvAvyAghranakhojjvalaH |

paGkAnuleparuciro mAMsalorukaTItaTaH || 26 ||

ghRSTajAnukaradvandvaH pratibimbAnukArakRt |

avyaktavarNavAgvRttiH smitalakSyaradodgamaH || 27 ||

dhAtrIkarasamAlambI praskhalaccitracaGkramaH |

anurUpavayasyADhyazcArukaumAracApalaH || 28 ||

vatsapucchasamAkRSTo vatsapucchavikarSaNaH |

vismAritAnyavyApAro gopagopImudAvahaH || 29 ||

akAlavatsanirmoktA vrajavyAkrozasusmitaH |

navanItamahAcoro dArakAhAradAyakaH || 30 ||

pITholUkhalasopAnaH kSIrabhANDavibhedanaH |

zikyabhANDasamAkarSI dhvAntAgArapravezakRt || 31 ||

bhUSAratnaprakAzADhyo gopyupAlambhabhartsitaH |

parAgadhUsarAkAro mRdbhakSaNakRtekSaNaH || 32 ||

bAloktamRtkathArambho mitrAntargUDhavigrahaH |

kRtasantrAsalolAkSo jananIpratyayAvahaH || 33||

mAtRdRzyAttavadano vaktralakSyacarAcaraH |

yazodAlAlitasvAtmA svayaM svAcchandyamohanaH || 34 ||

savitrIsnehasaMzliSTaH savitrIstanalolupaH |

navanItArthanAprahvo navanItamahAzanaH || 35 ||

mRSAkopaprakampoSTho goSThAGgaNavilokanaH |

dadhimanthaghaTIbhettA kiGkiNIkvANasUcitaH || 36 ||

haiyaGgavInarasiko mRSAzruzcauryazaGkitaH |

jananIzramavijJAtA dAmabandhaniyantritaH || 37 ||

dAmAkalpazcalApAGgo gADholUkhalabandhanaH |

AkRSTolUkhalo'nantaH kuberasutazApavit || | 38 ||

nAradoktiparAmarzI yamalArjunabhaJjanaH |

dhanadAtmajasaGghuSTo nandamocitabandhanaH || 39 ||

bAlakodgItanirato bAhukSepoditapriyaH |

AtmajJo mitravazago gopIgItaguNodayaH || 40 ||

prasthAnazakaTArUDho bRndAvanakRtAlayaH |

govatsapAlanaikAgro nAnAkrIDAparicchadaH || 41 ||

kSepaNIkSepaNaprIto veNuvAdyavizAradaH |

vRSavatsAnukaraNo vRSadhvAnaviDambanaH || 42 ||

niyuddhalIlAsaMhRSTaH kUjAnukRtakokilaH |

upAttahaMsagamanassarvajanturutAnukRt || 43 ||

bhRGgAnukArI dadhyannacoro vatsapurassaraH |

balI bakAsuragrAhI bakatAlupradAhakaH || 44 ||

bhItagopArbhakAhUto bakacaJcuvidAraNaH |

bakAsurArirgopAlo bAlo bAlAdbhutAvahaH || 45 ||

balabhadrasamAzliSTaH kRtakrIDAnilAyanaH |

krIDAsetunidhAnajJaH plavaGgotplavano'dbhutaH || 46 ||

kandukakrIDano luptanandAdibhavavedanaH |

sumano'laGkRtazirAH svAdusnigdhAnnazikyabhRt || 47 ||

guJjAprAlambanacchannaH piJchairalakaveSakRt |

vanyAzanapriyaH zRGgaravAkAritavatsakaH || 48 ||

manojJapallavottaMsapuSpasvecchAttaSaTpadaH |

maJjuziJjitamaJjIracaraNaH karakaGkaNaH || 49 ||

anyonyazAsanaH krIDApaTuH paramakaitavaH |

pratidhvAnapramuditaH zAkhAcaturacaGkramaH || 50 ||

aghadAnavasaMhartA vrajavighnavinAzanaH |

vrajasaJjIvanaH zreyonidhirdAnavamuktidaH || 51 ||

kAlindIpulinAsInassahabhuktavrajArbhakaH |

kakSAjaTharavinyastaveNurvallavaceSTitaH || 52 ||

bhujasandhyantaranyastazRGgavetraH zucismitaH |

vAmapANisthadadhyannakabalaH kalabhASaNaH || 53 ||

aGgulyantaravinyastaphalaH paramapAvanaH |

adRzyatarNakAnveSI vallavArbhakabhItihA || 54 ||

adRSTavatsapavrAto brahmavijJAtavaibhavaH |

govatsavatsapAnveSI virAT-puruSavigrahaH || 55 ||

svasaGkalpAnurUpArtho vatsavatsaparUpadhRk |

yathAvatsakriyArUpo yathAsthAnanivezanaH || 56 ||

yathAvrajArbhakAkAro gogopIstanyapassukhI |

cirAdvalohito dAnto brahmavijJAtavaibhavaH || 57 ||

vicitrazaktirvyAlInasRSTagovatsavatsapaH |

brahmatrapAkaro dhAtRstutassarvArthasAdhakaH || 58 ||

brahma brahmamayo'vyaktastejorUpassukhAtmakaH |

niruktaM vyAkRtirvyakto nirAlambanabhAvanaH || 59 ||

prabhaviSNuratantrIko devapakSArtharUpadhRk |

akAmassarvavedAdiraNIyasthUlarUpavAn || 60 ||

vyApI vyApyaH kRpAkartA vicitrAcArasammataH |

chandomayaH pradhAnAtmA mUrtAmUrtidvayAkRtiH || 61 ||

anekamUrtirakrodhaH paraH prakRtirakramaH |

sakalAvaraNopetassarvadevo mahezvaraH || 62 ||

mahAprabhAvanaH pUrvavatsavatsapadarzakaH |

kRSNayAdavagopAlo gopAlokanaharSitaH || 63 ||

smitekSAharSitabrahmA bhaktavatsalavAkpriyaH |

brahmAnandAzrudhautAGghrirlIlAvaicitryakovidaH || 64 ||

balabhadraikahRdayo nAmAkAritagokulaH |

gopAlabAlako bhavyo rajjuyajJopavItavAn || 65 ||

vRkSacchAyAhatAzAntirgopotsaGgopabarhaNaH |

gopasaMvAhitapado gopavyajanavIjitaH || 66|

gopagAnasukhonnidraH zrIdAmArjitasauhRdaH |

sunandasuhRdekAtmA subalaprANaraJjanaH || 67 ||

tAlIvanakRtakrIDo balapAtitadhenukaH |

gopIsaubhAgyasambhAvyo godhUlicchuritAlakaH || 68 ||

gopIvirahasantapto gopikAkRtamajjanaH |

pralambabAhurutphullapuNDarIkAvataMsakaH || 69 ||

vilAsalalitasmeragarbhalIlAvalokanaH |

sragbhUSaNAnulepADhyo jananyupahRtAnnabhuk || 70 ||

varazayyAzayo rAdhApremasallApanirvRtaH |

yamunAtaTasaJcArI viSArtavrajaharSadaH || 71 ||

kAliyakrodhajanakaH vRddhAhikulaveSTitaH |

kAliyAhiphaNAraGganaTaH kAliyamardanaH || 72 ||

nAgapatnIstutiprIto nAnAveSasamRddhikRt |

aviSvaktadRgAtmezaH svadRgAtmastutipriyaH || 73 ||

sarvezvarassarvaguNaH prasiddhassarvasAtvataH |

akuNThadhAmA candrArkadRSTirAkAzanirmalaH || 74 ||

anirdezyagatirnAgavanitApatibhaikSadaH |

svAGghrimudrAGkanAgendramUrdhA kAliyasaMstutaH || 75 ||

abhayo vizvatazcakSuH stutottamaguNaH prabhuH |

ahamAtmA marutprANaH paramAtmA dyuzIrSavAn || 76 ||

nAgopAyanahRSTAtmA hradotsAritakAliyaH |

balabhadrasukhAlApo gopAliGgananirvRtaH || 77 ||

dAvAgnibhItagopAlagoptA dAvAgninAzanaH |

nayanAcchAdanakrIDAlampaTo nRpaceSTitaH || 78 ||

kAkapakSadharassaumyo balavAhakakelimAn |

balaghAtitadurdharSapralambo balavatsalaH || 79 ||

muJjATavyagnizamanaH prAvRTkAlavinodavAn |

zilAnyastAnnabhRddaityasaMhartA zAdvalAsanaH || 80 ||

sadAptagopikodgItaH karNikArAvataMsakaH |

naTaveSadharaH padmamAlAGko gopikAvRtaH || 81 ||

gopImanoharApAGgo veNuvAdanatatparaH |

vinyastavadanAmbhojazcAruzabdakRtAnanaH || 82 ||

bimbAdharArpitodAraveNurvizvavimohanaH |

vrajasaMvarNitazrAvyaveNunAdaH zrutipriyaH || 83 ||

gogopagopIjanmepsurbrahmendrAdyabhivanditaH |

gItasnutisaritpUro nAdanartitabarhiNaH || 84 ||

rAgapallavitasthANurgItAnamitapAdapaH |

vismAritatRNagrAsamRgo mRgavilobhitaH || 85 ||

vyAghrAdihiMsrasahajavairahartA sugAyanaH |

gADhodIritagobRndapremotkarNitatarNakaH || 86 ||

niSpandayAnabrahmAdivIkSito vizvavanditaH |

zAkhotkarNazakuntaughazchatrAyitabalAhakaH || 87 ||

prasannaH paramAnandazcitrAyitacarAcaraH |

gopikAmadano gopIkucakuGkumamudritaH || 88 ||

gopikanyAjalakrIDAhRSTo gopyaMzukApahRt |

skandhAropitagopastrIvAsAH kundanibhasmitaH || 89 ||

gopInetrotpalazazI gopikAyAcitAMzukaH |

gopInamaskriyAdeSTA gopyekakaravanditaH || 90 ||

gopyaJjalivizeSArthI gopakrIDAvilobhitaH |

zAntavAsasphuradgopIkRtAJjaliraghApahaH || 91 ||

gopIkelivilAsArthI gopIsampUrNakAmadaH |

gopastrIvastrado gopIcittacoraH kutUhalI || 92 ||

bRndAvanapriyo gopabandhuryajvAnnayAcitA |

yajJezo yajJabhAvajJo yajJapatnyabhivAJchitaH || 93 ||

munipatnIvitIrNAnnatRpto munivadhUpriyaH |

dvijapatnyabhibhAvajJo dvijapatnIvarapradaH || 94 ||

pratiruddhasatImokSaprado dvijavimohitA |

munijJAnaprado yajvastuto vAsavayAgavit || 95 ||

pitRproktakriyArUpazakrayAganivAraNaH |

zakrA'marSakarazzakravRSTiprazamanonmukhaH || 96 ||

govardhanadharo gopagobRndatrANatatparaH |

govardhanagiricchatracaNDadaNDabhujArgalaH || 97 ||

saptAhavidhRtAdrIndro meghavAhanagarvahA |

bhujAgroparivinyastakSmAdharakSmAbhRdacyutaH || 98 ||

svasthAnasthApitagirirgopIdadhyakSatArcitaH |

sumanassumanovRSTihRSTo vAsavavanditaH || 99 ||

kAmadhenupayaHpUrAbhiSiktassurabhistutaH |

dharAGghriroSadhIromA dharmagoptA manomayaH || 100 ||

jJAnayajJapriyazzAstranetrassarvArthasArathiH |

airAvatakarAnItaviyadgaGgApluto vibhuH || 101 ||

brahmAbhiSikto gogoptA sarvalokazubhaGkaraH |

sarvavedamayo magnanandAnveSipitRpriyaH || 102 ||

varuNodIritAtmekSAkautuko varuNArcitaH |

varuNAnItajanako gopajJAtAtmavaibhavaH || 103 ||

svarlokAlokasaMhRSTagopavargatrivargadaH |

brahmahRdgopito gopadraSTA brahmapadapradaH || 104 ||

zaraccandravihArotkaH zrIpatirvazako kSamaH |

bhayApaho bhartRruddhagopikAdhyAnagocaraH || 105 ||

gopikAnayanAsvAdyo gopInarmoktinirvRtaH |

gopikAmAnaharaNo gopikAzatayUthapaH || 106 ||

vaijayantIsragAkalpo gopikAmAnavardhanaH |

gopakAntAsunirdeSTA kAnto manmathamanmathaH || 107 ||

svAtmAsyadattatAmbUlaH phalitotkRSTayauvanaH |

vallavIstanasaktAkSo vallavIpremacAlitaH || 108 ||

gopIcelAJcalAsIno gopInetrAbjaSaTpadaH |

rAsakrIDAsamAsakto gopImaNDalamaNDanaH || 109 ||

gopIhemamaNizreNimadhyendramaNirujjvalaH |

vidyAdharenduzApaghnazzaGkhacUDaziroharaH || 110 ||

zaGkhacUDaziroratnasamprINitabalo'naghaH |

ariSTAriSTakRdduSTakezidaityaniSUdanaH || 111 ||

sarasassasmitamukhassusthiro virahAkulaH |

saGkarSaNArpitaprItirakrUradhyAnagocaraH || 112 ||

akrUrasaMstuto gUDho guNavRtyupalakSitaH |

pramANagamyastanmAtrA'vayavI buddhitatparaH || 113 ||

sarvapramANapramadhIssarvapratyayasAdhakaH |

puruSazca pradhAnAtmA viparyAsavilocanaH || 114 ||

madhurAjanasaMvIkSyo rajakapratighAtakaH |

vicitrAmbarasaMvIto mAlAkAravarapradaH || 115 ||

kubjAvakratvanirmoktA kubjAyauvanadAyakaH |

kubjAGgarAgasurabhiH kaMsakodaNDakhaNDanaH || 116 ||

dhIraH kuvalayApIDamardanaH kaMsabhItikRt |

dantidantAyudho raGgatrAsako mallayuddhavit || 117 ||

cANUrahantA kaMsArirdevakIharSadAyakaH |

vasudevapadAnamraH pitRbandhavimocanaH || 118 ||

urvIbhayApaho bhUpa ugrasenAdhipatyadaH |

AjJAsthitazacInAthassudharmAnayanakSamaH || 119 ||

Adyo dvijAtisatkartA ziSTAcArapradarzakaH |

sAndIpanikRtAbhyastavidyAbhyAsaikadhIssudhIH || 120 ||

gurvabhISTakriyAdakSaH pazcimodadhipUjitaH |

hatapaJcajanaprAptapAJcajanyo yamArcitaH || 121 ||

dharmarAjajayAnItaguruputra urukramaH |

guruputrapradazzAstA madhurAjasabhAsadaH || 122 ||

jAmadagnyasamabhyarcyo gomantagirisaJcaraH |

gomantadAvazamano garuDAnItabhUSaNaH || 123 ||

cakrAdyAyudhasaMzobhI jarAsandhamadApahaH |

sRgAlAvanipAlaghnassRgAlAtmajarAjyadaH || 124 ||

vidhvastakAlayavano mucukundavarapradaH |

AjJApitamahAmbhodhirdvArakApurakalpanaH || 125 ||

dvArakAnilayo rukmimAnahantA yadUdvahaH |

ruciro rukmiNIjAniH pradyumnajanakaH prabhuH || 126 ||

apAkRtatrilokArtiraniruddhapitAmahaH |

aniruddhapadAnveSI cakrI garuDavAhanaH || 127 ||

bANAsurapurIroddhA rakSAjvalanayantrajit |

dhUtapramathasaMrambho jitamAhezvarajvaraH || 128 ||

SaTcakrazaktinirjetA bhUtavetAlamohakRt |

zambhutrizUlajicchambhujRmbhaNazzambhusaMstutaH || 129 ||

indriyAtmenduhRdayassarvayogezvarezvaraH |

hiraNyagarbhahRdayo mohAvartanivartanaH || 130 ||

AtmajJAnanidhirmedhA kozastanmAtrarUpavAn |

indro'gnivadanaH kAlanAbhassarvAgamAdhvagaH || 131 ||

turIyasarvadhIsAkSI dvandvArAmAtmadUragaH |

ajJAtapAro vazyazrIravyAkRtavihAravAn || 132 ||

AtmapradIpo vijJAnamAtrAtmA zrIniketanaH |

bANabAhuvanacchettA mahendraprItivardhanaH || 133 ||

aniruddhanirodhajJo jalezAhRtagokulaH |

jalezavijayI vIrassatrAjidratnayAcakaH || 134 ||

prasenAnveSaNodyukto jAmbavaddhRtaratnadaH |

jitarkSarAjatanayAhartA jAmbavatIpriyaH || 135 ||

satyabhAmApriyaH kAmazzatadhanvaziroharaH |

kAlindIpatirakrUrabandhurakrUraratnadaH || 136 ||

kaikeyIramaNo bhadrAbhartA nAgnajitIdhavaH |

mAdrImanoharazzaibyAprANabandhururukramaH || 137 ||

suzIlAdayito mitravindAnetramahotsavaH |

lakSmaNAvallabho ruddhaprAgjyotiSamahApuraH || 138 ||

surapAzAvRticchedI murAriH krUrayuddhavit |

hayagrIvazirohartA sarvAtmA sarvadarzanaH || 139 ||

narakAsuravicchettA narakAtmajarAjyadaH|

pRthvIstutaH prakAzAtmA hRdyo yajJaphalapradaH || 140 ||

guNagrAhI guNadraSTA gUDhasvAtmA vibhUtimAn |

kavirjagadupadraSTA paramAkSaravigrahaH || 141 ||

prapannapAlano mAlI mahadbrahmavivardhanaH |

vAcyavAcakazaktyarthassarvavyAkRtasiddhidaH || 142 ||

svayamprabhuranirvedyassvaprakAzazcirantanaH |

nAdAtmA mantrakoTIzo nAnAvAdanirodhakaH || 143 ||

kandarpakoTilAvaNyaH parArthaikaprayojakaH |

amarIkRtadevaughaH kanyakAbandhamocanaH || 144 ||

SoDazastrIsahasrezaH kAntaH kAntAmanobhavaH |

krIDAratnAcalAhartA varuNacchatrazobhitaH || 145 ||

zakrAbhivanditazzakrajananIkuNDalapradaH |

aditiprastutastotro brAhmaNodghuSTaceSTanaH || 146 ||

purANassaMyamI janmAliptaH SaDviMzako'rthadaH |

yazasyanItirAdyantarahitassatkathApriyaH || 147 ||

brahmabodhaH parAnandaH pArijAtApahArakaH |

pauNDrakaprANaharaNaH kAzirAjaniSUdanaH || 148 ||

kRtyAgarvaprazamano vicakravadhadIkSitaH |

kaMsavidhvaMsanassAmbajanako DimbhakArdanaH || 149 ||

munirgoptA pitRvarapradassavanadIkSitaH |

rathI sArathyanirdeSTA phAlgunaH phAlgunipriyaH || 150 ||

saptAbdhistambhanodbhAto harissaptAbdhibhedanaH |

AtmaprakAzaH pUrNazrIrAdinArAyaNekSitaH || 151 ||

vipraputrapradazcaiva sarvamAtRsutapradaH |

pArthavismayakRtpArthapraNavArthaprabodhanaH || 152 ||

kailAsayAtrAsumukho badaryAzramabhUSaNaH |

ghaNTAkarNakriyAmauDhyAttoSito bhaktavatsalaH || 153 ||

munibRndAdibhirdhyeyo ghaNTAkarNavarapradaH |

tapazcaryAparazcIravAsAH piGgajaTAdharaH || 154 ||

pratyakSIkRtabhUtezazzivastotA zivastutaH |

kRSNAsvayaMvarAlokakautukI sarvasammataH || 155 ||

balasaMrambhazamano baladarzitapANDavaH |

yativeSArjunAbhISTadAyI sarvAtmagocaraH || 156 ||

subhadrAphAlgunodvAhakartA prINitaphAlgunaH |

khANDavaprINitArciSmAnmayadAnavamocanaH || 157 ||

sulabho rAjasUyArhayudhiSThiraniyojakaH |

bhImArditajarAsandho mAgadhAtmajarAjyadaH || 158 ||

rAjabandhananirmoktA rAjasUyAgrapUjanaH |

caidyAdyasahano bhISmastutassAtvatapUrvajaH || 159 ||

sarvAtmArthasamAhartA mandarAcaladhArakaH |

yajJAvatAraH prahlAdapratijJApratipAlakaH || 160 ||

baliyajJasabhAdhvaMsI dRptakSatrakulAntakaH |

dazagrIvAntako jetA revatIpremavallabhaH || 161 ||

sarvAvatArAdhiSThAtA vedabAhyavimohanaH |

kalidoSanirAkartA dazanAmA dRDhavrataH || 162 ||

ameyAtmA jagatsvAmI vAgmI caidyaziroharaH |

draupadIracitastotraH kezavaH puruSottamaH || 163 ||

nArAyaNo madhupatirmAdhavo doSavarjitaH |

govindaH puNDarIkAkSo viSNuzca madhusUdanaH || 164 ||

trivikramastrilokezo vAmanaH zrIdharaH pumAn |

hRSIkezo vAsudevaH padmanAbho mahAhradaH || 165 ||

dAmodarazcaturvyUhaH pAJcAlImAnarakSaNaH |

sAlvaghnassamarazlAghI dantavaktranibarhaNaH || 166 ||

dAmodarapriyasakhA pRthukAsvAdanapriyaH ||

ghRNI dAmodaraH zrIdo gopIpunaravekSakaH || 167 ||

gopikAmuktido yogI durvAsastRptikArakaH |

avijJAtavrajAkIrNapANDavAlokano jayI || 168 ||

pArthasArathyanirataH prAjJaH pANDavadUtyakRt |

vidurAtithyasantuSTaH kuntIsantoSadAyakaH || 169 ||

suyodhanatiraskartA duryodhanavikAravit |

vidurAbhiSThuto nityo vArSNeyo maGgalAtmakaH || 170 ||

paJcaviMzatitattvezazcaturviMzatidehabhAk |

sarvAnugrAhakassarvadAzArhasatatArcitaH || 171 ||

acintyo madhurAlApassAdhudarzI durAsadaH |

manuSyadharmAnugataH kauravendrakSayekSitA || 172 ||

upendro dAnavArAtirurugIto mahAdyutiH |

brahmaNyadevaH zrutimAn gobrAhmaNahitAzayaH || 173 ||

varazIlazzivArambhassuvijJAnavimUrtimAn |

svabhAvazuddhassanmitrassuzaraNyassulakSaNaH || 174 ||

dhRtarASTragataudRSTipradaH karNavibhedanaH |

pratodadhRgvizvarUpavismAritadhanaJjayaH || 175 ||

sAmagAnapriyo dharmadhenurvarNottamo'vyayaH |

caturyugakriyAkartA vizvarUpapradarzakaH || 176 ||

brahmabodhaparitrAtapArtho bhISmArthacakrabhRt |

arjunAyAsavidhvaMsI kAladaMSTrAvibhUSaNaH || 177 ||

sujAtAnantamahimA svapnavyApAritArjunaH |

akAlasandhyAghaTanazcakrAntaritabhAskaraH || 178 ||

duSTapramathanaH pArthapratijJAparipAlakaH |

sindhurAjaziraHpAtasthAnavaktA vivekadRk || 179 ||

subhadrAzokaharaNo droNotsekAdivismitaH |

pArthamanyunirAkartA pANDavotsavadAyakaH || 180 ||

aGguSThAkrAntakaunteyarathazzakto'hizIrSajit |

kAlakopaprazamano bhImasenajayapradaH || 181 ||

azvatthAmavadhAyAsatrAtapANDusutaH kRtI |

iSIkAstraprazamano drauNirakSAvicakSaNaH || 182 ||

pArthApahAritadrauNicUDAmaNirabhaGguraH |

dhRtarASTraparAmRSTabhImapratikRtismayaH || 183 ||

bhISmabuddhipradazzAntazzaraccandranibhAnanaH |

gadAgrajanmA pAJcAlIpratijJAparipAlakaH || 184 ||

gAndhArIkopadRgguptadharmasUnuranAmayaH |

prapannArtibhayacchettA bhISmazalyavyadhAvahaH || 185 ||

zAntazzAntanavodIrNasarvadharmasamAhitaH |

smAritabrahmavidyArthaprItapArtho mahAstravit || 186 ||

prasAdaparamodAro gAGgeyasugatipradaH |

vipakSapakSakSayakRtparIkSitprANarakSaNaH || 187 ||

jagadgururdharmasUnorvAjimedhapravartakaH |

vihitArthAptasatkAro mAsakAtparivartadaH || 188 ||

uttaGkaharSadAtmIyadivyarUpapradarzakaH |

janakAvagatasvoktabhAratassarvabhAvanaH || 189 ||

asoDhayAdavodreko vihitAptAdipUjanaH ||

samudrasthApitAzcaryamusalo vRSNivAhakaH || 190 ||

munizApAyudhaH padmAsanAditridazArthitaH |

vRSTipratyavahArotkassvadhAmagamanotsukaH || 191 ||

prabhAsAlokanodyukto nAnAvidhanimittakRt |

sarvayAdavasaMsevyassarvotkRSTaparicchadaH || 192 ||

velAkAnanasaJcArI velAnilahRtazramaH |

kAlAtmA yAdavo'nantasstutisantuSTamAnasaH || 193 ||

dvijAlokanasantuSTaH puNyatIrthamahotsavaH |

satkArAhlAditAzeSabhUsurassuravallabhaH || 194 ||

puNyatIrthAplutaH puNyaH puNyadastIrthapAvanaH |

viprasAtkRtagokoTizzatakoTisuvarNadaH || 195 ||

svamAyAmohitA'zeSavRSNivIro vizeSavit |

jalajAyudhanirdeSTA svAtmAvezitayAdavaH || 196 ||

devatAbhISTavaradaH kRtakRtyaH prasannadhIH |

sthirazeSAyutabalassahasraphaNivIkSaNaH || 197 ||

brahmavRkSavaracchAyAsInaH padmAsanasthitaH |

pratyagAtmA svabhAvArthaH praNidhAnaparAyaNaH || 198 ||

vyAdheSuviddhapUjyAGghrirniSAdabhayamocanaH |

pulindastutisantuSTaH pulindasugatipradaH || 199 ||

dArukArpitapArthAdikaraNIyoktirIzitA |

divyadundubhisaMyuktaH puSpavRSTiprapUjitaH || 200 ||

purANaH paramezAnaH pUrNabhUmA pariSTutaH |

patirAdyaH paraM brahma paramAtmA parAtparaH || 201 ||

zrIparamAtmA parAtparaH OM namaH iti |

phalazrutiH –

idaM sahasraM kRSNasya nAmnAM sarvArthadAyakam |

anantarUpI bhagavAn vyAkhyAtAdau svayambhuve || 202 ||

tena proktaM vasiSThAya tato labdhvA parAzaraH |

vyAsAya tena samproktaM zuko vyAsAdavAptavAn || 203 ||

tacchiSyairbahubhirbhUmau khyApitaM dvApare yuge |

kRSNAjJayA hariharaH kalau prakhyApayadvibhuH || 204 ||

idaM paThati bhaktyA yaH zRNoti ca samAhitaH |

svasiddhyai prArthayantyenaM tIrthakSetrAdidevatAH || 205 ||

prAyazcittAnyazeSANi nAlaM yAni vyapohitum |

tAni pApAni nazyanti sakRdasya prazaMsanAt || 206 ||

RNatrayavimuktasya zrautasmArtAnuvartinaH |

RSestrimUrtirUpasya phalaM vindedidaM paThan || 207 ||

idaM nAmasahasraM yaH paThatyetacchRNoti ca |

zivaliGgasahasrasya sa pratiSThAphalaM labhet || 208 ||

idaM kirITI saJjapya jayI pAzupatAstrabhAk |

kRSNasya prANabhUtassan kRSNaM sArathimAptavAn || 209 ||

draupadyA damayantyA ca sAvitryA ca suzIlayA |

duritAni jitAnyetajjapAdAptaM ca vAJchitam || 210 ||

kimidaM bahunA zaMsanmAnavo modanirbharaH |

brahmAnandamavApyAnte kRSNasAyUjyamApnuyAt || 211 ||