Sri Krishna Krupa Kataksha Stotram

śrī kṛṣṇa kṛpā kaṭākṣa stotraṃ

Śloka 1

śrīkṛṣṇa prārthanā

mūkaṃ karoti vācālaṃ paṅgu laṅghayate girim|

yatkṛpā tamahaṃ vande paramānanda mādhavam||

nāhaṃ vasāmi vaikuṇṭhe yogināṃ hṛdaye na ca|

madbhaktā yatra gāyanti tatra tiṣṭhāmi nārada||

atha śrī kṛṣṇa kṛpā kaṭākṣa stotra ||

bhaje vrajaikamaṇḍanaṃ samastapāpakhaṇḍanaṃ

svabhaktacittarañjanaṃ sadaiva nandanandanam |

supicchagucchamastakaṃ sunādaveṇuhastakaṃ

anaṅgaraṅgasāgaraṃ namāmi kṛṣṇanāgaram ||

manojagarvamocanaṃ viśālalolalocanaṃ

vidhūtagopaśocanaṃ namāmi padmalocanam |

karāravindabhūdharaṃ smitāvalokasundaraṃ

mahendramānadāraṇaṃ namāmi kṛṣṇa vāraṇam ||

kadambasūnakuṇḍalaṃ sucārugaṇḍamaṇḍalaṃ

vrajāṅganaikavallabhaṃ namāmi kṛṣṇadurlabham |

yaśodayā samodayā sagopayā sanandayā

yutaṃ sukhaikadāyakaṃ namāmi gopanāyakam ||

sadaiva pādapaṅkajaṃ madīya mānase nijaṃ

dadhānamuktamālakaṃ namāmi nandabālakam |

samastadoṣaśoṣaṇaṃ samastalokapoṣaṇaṃ

samastagopamānasaṃ namāmi nandalālasam ||

bhuvo bharāvatārakaṃ bhavābdhikarṇadhārakaṃ

yaśomatīkiśorakaṃ namāmi cittacorakam |

dṛgantakāntabhaṅginaṃ sadā sadālisaṅginaṃ

dine-dine navaṃ-navaṃ namāmi nandasambhavam ||

guṇākaraṃ sukhākaraṃ kṛpākaraṃ kṛpāparaṃ

suradviṣannikandanaṃ namāmi gopanandanam |

navīna gopanāgaraṃ navīnakeli-lampaṭaṃ

namāmi meghasundaraṃ taḍitprabhālasatpaṭam ||

samasta gopa mohanaṃ, hṛdambujaika modanaṃ

namāmikuñjamadhyagaṃ prasanna bhānuśobhanam |

nikāmakāmadāyakaṃ dṛgantacārusāyakaṃ

rasālaveṇugāyakaṃ namāmikuñjanāyakam ||

vidagdha gopikāmano manojñatalpaśāyinaṃ

namāmi kuñjakānane pravṛddhavahnipāyinam |

kiśorakānti rañjitaṃ dṛgañjanaṃ suśobhitaṃ

gajendramokṣakāriṇaṃ namāmi śrīvihāriṇam ||

phalaśṛti

yadā tadā yathā tathā tathaiva kṛṣṇasatkathā

mayā sadaiva gīyatāṃ tathā kṛpā vidhīyatām |

pramāṇikāṣṭakadvayaṃ japatyadhītya yaḥ pumān

bhavetsa nandanandane bhave bhave subhaktimāna ||