Sri Krishna Krupa Kataksha Stotram

zrI kRSNa kRpA kaTAkSa stotraM

zloka 1

zrIkRSNa prArthanA

mUkaM karoti vAcAlaM paGgu laGghayate girim|

yatkRpA tamahaM vande paramAnanda mAdhavam||

nAhaM vasAmi vaikuNThe yoginAM hRdaye na ca|

madbhaktA yatra gAyanti tatra tiSThAmi nArada||

atha zrI kRSNa kRpA kaTAkSa stotra ||

bhaje vrajaikamaNDanaM samastapApakhaNDanaM

svabhaktacittaraJjanaM sadaiva nandanandanam |

supicchagucchamastakaM sunAdaveNuhastakaM

anaGgaraGgasAgaraM namAmi kRSNanAgaram ||

manojagarvamocanaM vizAlalolalocanaM

vidhUtagopazocanaM namAmi padmalocanam |

karAravindabhUdharaM smitAvalokasundaraM

mahendramAnadAraNaM namAmi kRSNa vAraNam ||

kadambasUnakuNDalaM sucArugaNDamaNDalaM

vrajAGganaikavallabhaM namAmi kRSNadurlabham |

yazodayA samodayA sagopayA sanandayA

yutaM sukhaikadAyakaM namAmi gopanAyakam ||

sadaiva pAdapaGkajaM madIya mAnase nijaM

dadhAnamuktamAlakaM namAmi nandabAlakam |

samastadoSazoSaNaM samastalokapoSaNaM

samastagopamAnasaM namAmi nandalAlasam ||

bhuvo bharAvatArakaM bhavAbdhikarNadhArakaM

yazomatIkizorakaM namAmi cittacorakam |

dRgantakAntabhaGginaM sadA sadAlisaGginaM

dine-dine navaM-navaM namAmi nandasambhavam ||

guNAkaraM sukhAkaraM kRpAkaraM kRpAparaM

suradviSannikandanaM namAmi gopanandanam |

navIna gopanAgaraM navInakeli-lampaTaM

namAmi meghasundaraM taDitprabhAlasatpaTam ||

samasta gopa mohanaM, hRdambujaika modanaM

namAmikuJjamadhyagaM prasanna bhAnuzobhanam |

nikAmakAmadAyakaM dRgantacArusAyakaM

rasAlaveNugAyakaM namAmikuJjanAyakam ||

vidagdha gopikAmano manojJatalpazAyinaM

namAmi kuJjakAnane pravRddhavahnipAyinam |

kizorakAnti raJjitaM dRgaJjanaM suzobhitaM

gajendramokSakAriNaM namAmi zrIvihAriNam ||

phalazRti

yadA tadA yathA tathA tathaiva kRSNasatkathA

mayA sadaiva gIyatAM tathA kRpA vidhIyatAm |

pramANikASTakadvayaM japatyadhItya yaH pumAn

bhavetsa nandanandane bhave bhave subhaktimAna ||