Shivananda Lahari

shivAnanda lahari

shloka 1

kalAbhyAM chUDAla~NkRRita-shashikalAbhyAM nijatapaH-

-phalAbhyAM bhakteShu prakaTita-phalAbhyAM bhavatu me |

shivAbhyA-mastoka-tribhuvana-shivAbhyAM hRRidi puna-

-rbhavAbhyA-mAnanda-sphuradanubhavAbhyAM natiriyam || 1 ||

galantI shambho tvachcharita-saritaH kilbiSharajo

dalantI dhIkulyA-saraNiShu patantI vijayatAm |

dishantI saMsAra-bhramaNa-paritApopashamanaM

vasantI machchetohradabhuvi shivAnandalaharI || 2 ||

trayIvedyaM hRRidyaM tripura-haramAdyaM trinayanaM

jaTAbhArodAraM chaladuragahAraM mRRigadharam |

mahAdevaM devaM mayi sadayabhAvaM pashupatiM

chidAlambaM sAmbaM shivamati-viDambaM hRRidi bhaje || 3 ||

sahasraM vartante jagati vibudhAH kShudraphaladA

na manye svapne vA tadanusaraNaM tatkRRitaphalam |

hari-brahmAdInA-mapi nikaTa-bhAjAmasulabhaM

chiraM yAche shambho shiva tava padAmbhoja-bhajanam || 4 ||

smRRitau shAstre vaidye shakuna-kavitA-gAnaphaNitau

purANe mantre vA stuti-naTana-hAsyeShvachaturaH |

kathaM rAj~nAM prItirbhavati mayi ko.ahaM pashupate

pashuM mAM sarvaj~na prathita kRRipayA pAlaya vibho || 5 ||

ghaTo vA mRRitpiNDo-.apyaNurapi cha dhUmo.agnirachalaH

paTo vA tanturvA pariharati kiM ghorashamanam |

vRRithA kaNThakShobhaM vahasi tarasA tarkavachasA

padAmbhojaM shambhorbhaja paramasaukhyaM vraja sudhIH || 6 ||

manaste pAdAbje nivasatu vachaH stotraphaNitau

karau chAbhyarchAyAM shrutirapi kathA karNanavidhau |

tava dhyAne buddhirnayanayugalaM mUrtivibhave [buddhiH nayanayugalaM]

para-granthAnkairvA paramashiva jAne paramataH || 7 ||

yathA buddhiH shuktau rajatamiti kAchAshmani maNi- [maNiH jale]

-rjale paiShTe kShIraM bhavati mRRigatRRiShNA-su salilam |

tathA devabhrAntyA bhajati bhavadanyaM jaDajano

mahAdeveshaM tvAM manasi cha na matvA pashupate || 8 ||

gabhIre kAsAre vishati vijane ghoravipine

vishAle shaile cha bhramati kusumArthaM jaDamatiH |

samarpyaikaM chetaH sarasijamu-mAnAtha bhavate

sukhe-nAvasthAtuM jana iha na jAnAti kimaho || 9 ||

naratvaM devatvaM nagavana-mRRigatvaM mashakatA

pashutvaM kITatvaM bhavatu vihagatvAdi jananam |

sadA tvatpAdAbja-smaraNa-paramAnandalaharI-

-vihArAsaktaM cheddhRRidayamiha kiM tena vapuShA || 10 ||

vaTurvA gehI vA yatirapi jaTI vA taditaro

naro vA yaH kashchidbhavatu bhava kiM tena bhavati |

yadIyaM hRRitpadmaM yadi bhavadadhInaM pashupate

tadIyastvaM shambho bhavasi bhavabhAraM cha vahasi || 11 ||

guhAyAM gehe vA bahirapi vane vA.adrishikhare

jale vA vahnau vA vasatu vasateH kiM vada phalam |

sadA yasyaivAntaH-karaNamapi shambho tava pade

sthitaM chedyogo.asau sa cha paramayogI sa cha sukhI || 12 ||

asAre saMsAre nija-bhajanadUre jaDadhiyA

bhramantaM mAmandhaM paramakRRipayA pAtumuchitam |

madanyaH ko dInastava kRRipaNa-rakShAtinipuNa- [rakShAtinipuNaH tvadanyaH]

-stvadanyaH ko vA me trijagati sharaNyaH pashupate || 13 ||

prabhustvaM dInAnAM khalu paramabandhuH pashupate

pramukhyo.ahaM teShAmapi kimuta bandhutvamanayoH |

tvayaiva kShantavyAH shiva madaparAdhAshcha sakalAH

prayatnA-tkartavyaM madavanamiyaM bandhusaraNiH || 14 ||

upekShA no chetkiM na harasi bhavaddhyAna-vimukhAM

durAshA-bhUyiShThAM vidhilipi-mashakto yadi bhavAn |

shirastadvaidhAtraM nanakhalu suvRRittaM pashupate

kathaM vA niryatnaM karanakha-mukhenaiva lulitam || 15 ||

viri~nchi-rdIrghAyu-rbhavatu bhavatA tatparashira- [tatparashiraH chatuShkaM]

-shchatuShkaM saMrakShyaM sa khalu bhuvi dainyaM likhitavAn |

vichAraH ko vA mAM vishada kRRipayA pAti shiva te

kaTAkShavyApAraH svayamapi cha dInAvanaparaH || 16 ||

phalAdvA puNyAnAM mayi karuNayA vA tvayi vibho

prasanne.api svAmin bhavadamala-pAdAbja-yugalam |

kathaM pashyeyaM mAM sthagayati namaH sambhramajuShAM

nilimpAnAM shreNi-rnija-kanaka-mANikya-makuTaiH || 17 ||

tvameko lokAnAM paramaphalado divyapadavIM

vahantastvanmUlAM punarapi bhajante harimukhAH |

kiyadvA dAkShiNyaM tava shiva madAshA cha kiyatI

kadA vA madrakShAM vahasi karuNA-pUritadRRishA || 18 ||

durAshA-bhUyiShThe duradhipa-gRRihadvAra-ghaTake

durante saMsAre duritanilaye duHkhajanake |

madAyAsaM kiM na vyapanayasi kasyopa-kRRitaye

vadeyaM prItishchettava shiva kRRitArthAH khalu vayam || 19 ||

sadA mohATavyAM charati yuvatInAM kuchagirau

naTatyAshA-shAkhA-svaTati jhaTiti svairamabhitaH |

kapAlin bhikSho me hRRidaya-kapimatyanta-chapalaM

dRRiDhaM bhaktyA baddhvA shiva bhavadadhInaM kuru vibho || 20 ||

dhRRiti-stambhAdhArAM dRRiDha-guNa-nibaddhAM sagamanAM

vichitrAM padmADhyAM pratidivasa-sanmArga-ghaTitAm |

smarAre machchetaH-sphuTa-paTakuTIM prApya vishadAM

jaya svAmin shaktyA saha shiva gaNaiH sevita vibho || 21 ||

pralobhAdyairarthAharaNa-paratantro dhanigRRihe [pralobhAdyaiH arthAharaNa-paratantro]

praveshodyuktaH san bhramati bahudhA taskarapate |

imaM chetashchoraM kathamiha sahe sha~Nkara vibho

tavAdhInaM kRRitvA mayi niraparAdhe kuru kRRipAm || 22 ||

karomi tvatpUjAM sapadi sukhado me bhava vibho

vidhitvaM viShNutvaM dishasi khalu tasyAH phalamiti |

punashcha tvAM draShTuM divi bhuvi vahanpakShi-mRRigatA-

-madRRiShTvA tatkhedaM kathamiha sahe sha~Nkara vibho || 23 ||

kadA vA kailAse kanakamaNisaudhe saha gaNai- [saha gaNaiH vasan]

-rvasan shambhoragre sphuTa-ghaTita-mUrdhA~njalipuTaH |

vibho sAmba svAmi-nparamashiva pAhIti nigada-

-nvidhAtRRINAM kalpAn kShaNamiva vineShyAmi sukhataH || 24 ||

stavai-rbrahmAdInAM jayajaya-vachobhirniyaminAM

gaNAnAM kelIbhirmadakalamahokShasya kakudi | [kelIbhiH madakala-mahokShasya]

sthitaM nIlagrIvaM trinayana-mumAshliShTa-vapuShaM

kadA tvAM pashyeyaM karadhRRita-mRRigaM khaNDa-parashum || 25 ||

kadA vA tvAM dRRiShTvA girisha tava bhavyA~Nghri yugalaM

gRRihItvA hastAbhyAM shirasi nayane vakShasi vahan |

samA shliShyA ghrAya sphuTa jalaja gandhAn parimalA-

-nalAbhyAM brahmAdyairmudamanubhaviShyAmi hRRidaye || 26 || [brahmAdyaiH muda-manubhaviShyAmi]

karasthe hemAdrau girisha nikaTasthe dhanapatau

gRRihasthe svarbhUjA mara surabhi chintAmaNigaNe |

shiraHsthe shItAMshau charaNayugalasthe.akhilashubhe

kamarthaM dAsye.ahaM bhavatu bhavadarthaM mama manaH || 27 ||

sArUpyaM tava pUjane shiva mahAdeveti sa~NkIrtane

sAmIpyaM shivabhakti-dhuryajanatA-sA~Ngatya-sambhAShaNe ||

sAlokyaM cha charAcharAtmakatanudhyAne bhavAnIpate

sAyujyaM mama siddhamatra bhavati svAmin kRRitArtho.asmyaham || 28 ||

tvatpAdAmbujamarchayAmi paramaM tvAM chintayAmyanvahaM

tvAmIshaM sharaNaM vrajAmi vachasA tvAmeva yAche vibho |

vIkShAM me disha chAkShuShIM sakaruNAM divyaishchiraM prArthitAM

shambho lokaguro madIyamanasaH saukhyopadeshaM kuru || 29 ||

vastroddhUtavidhau sahasrakaratA puShpArchane viShNutA

gandhe gandhavahAtmatA.annapachane barhirmukhAdhyakShatA |

pAtre kA~nchanagarbhatAsti mayi chedbAlenduchUDAmaNe

shushrUShAM karavANi te pashupate svAmiMstrilokIguro || 30 ||

nAlaM vA paramopakArakamidaM tvekaM pashUnAM pate

pashyan kukShigatAMshcharAcharagaNAn bAhyasthitAn rakShitum |

sarvAmartyapalAyanauShadhamatijvAlAkaraM bhIkaraM

nikShiptaM garalaM gale na gilitaM nodgIrNameva tvayA || 31 ||

jvAlograH sakalAmarAtibhayadaH kShvelaH kathaM vA tvayA

dRRiShTaH kiM cha kare dhRRitaH karatale kiM pakvajambUphalam |

jihvAyAM nihitashcha siddhaghuTikA vA kaNThadeshe bhRRitaH

kiM te nIlamaNirvibhUShaNamayaM shambho mahAtman vada || 32 ||

nAlaM vA sakRRideva deva bhavataH sevA natirvA nutiH

pUjA vA smaraNaM kathAshravaNamapyAlokanaM mAdRRishAm |

svAminnasthiradevatAnusaraNAyAsena kiM labhyate

kA vA muktiritaH kuto bhavati chetkiM prArthanIyaM tadA || 33 ||

kiM brUmastava sAhasaM pashupate kasyAsti shambho bhava-

-ddhairyaM chedRRishamAtmanaH sthitiriyaM chAnyaiH kathaM labhyate |

bhrashyaddevagaNaM trasanmunigaNaM nashyatprapa~nchaM layaM

pashyannirbhaya eka eva viharatyAnandasAndro bhavAn || 34 ||

yogakShemadhurandharasya sakalashreyaHpradodyogino

dRRiShTAdRRiShTamatopadeshakRRitino bAhyAntaravyApinaH |

sarvaj~nasya dayAkarasya bhavataH kiM veditavyaM mayA

shambho tvaM paramAntara~Nga iti me chitte smarAmyanvaham || 35 ||

bhakto bhaktiguNAvRRite mudamRRitApUrNe prasanne manaH

kumbhe sAmba tavA~NghripallavayugaM saMsthApya saMvitphalam |

satvaM mantramudIrayannijasharIrAgArashuddhiM vahan

puNyAhaM prakaTIkaromi ruchiraM kalyANamApAdayan || 36 ||

AmnAyAmbudhimAdareNa sumanaHsa~NghAH samudyanmano [samudyanmanaH]

manthAnaM dRRiDhabhaktirajjusahitaM kRRitvA mathitvA tataH |

somaM kalpataruM suparvasurabhiM chintAmaNiM dhImatAM

nityAnandasudhAM nirantararamAsaubhAgyamAtanvate || 37 ||

prAkpuNyAchalamArgadarshitasudhAmUrtiH prasannaH shivaH

somaH sadgaNasevito mRRigadharaH pUrNastamomochakaH |

chetaH puShkaralakShito bhavati chedAnandapAthonidhiH

prAgalbhyena vijRRimbhate sumanasAM vRRittistadA jAyate || 38 ||

dharmo me chatura~NghrikaH sucharitaH pApaM vinAshaM gataM

kAmakrodhamadAdayo vigalitAH kAlAH sukhAviShkRRitAH |

j~nAnAnandamahauShadhiH suphalitA kaivalyanAthe sadA

mAnye mAnasapuNDarIkanagare rAjAvataMse sthite || 39 ||

dhIyantreNa vachoghaTena kavitAkulyopakulyAkramai- [kavitAkulyopakulyAkramaiH]

-rAnItaishcha sadAshivasya charitAmbhorAshidivyAmRRitaiH |

hRRitkedArayutAshcha bhaktikalamAH sAphalyamAtanvate

durbhikShAnmama sevakasya bhagavanvishvesha bhItiH kutaH || 40 ||

pApotpAtavimochanAya ruchiraishvaryAya mRRityu~njaya

stotradhyAnanatipradakShiNasaparyAlokanAkarNane |

jihvAchittashiro~NghrihastanayanashrotrairahaM prArthito

mAmAj~nApaya tannirUpaya muhurmAmeva mA me.avachaH || 41 ||

gAmbhIryaM parikhApadaM ghanadhRRitiH prAkAra udyadguNa- [udyadguNastòmaH]

-stomashchAptabalaM ghanendriyachayo dvArANi dehe sthitaH |

vidyA vastusamRRiddhirityakhilasAmagrIsamete sadA

durgAtipriyadeva mAmakamanodurge nivAsaM kuru || 42 ||

mA gachCha tvamitastato girisha bho mayyeva vAsaM kuru

svAminnAdikirAta mAmakamanaHkAntArasImAntare |

vartante bahusho mRRigA madajuSho mAtsaryamohAdaya- [ mAtsaryamohAdayaH]

-stAnhatvA mRRigayAvinodaruchitA lAbhaM cha samprApsyasi || 43 ||

karalagnamRRigaH karIndrabha~Ngo

ghanashArdUlavikhaNDano.astajantuH |

girisho vishadAkRRitishcha chetaH-

-kuhare pa~nchamukho.asti me kuto bhIH || 44 ||

ChandaH shAkhishikhAnvitair [shAkhishikhAnvitairaH] dvijavaraiH saMsevite shAshvate

saukhyApAdini khedabhedini sudhAsAraiH phalairdIpite |

chetaHpakShishikhAmaNe tyaja vRRithA a~nchAramanyairalaM

nityaM sha~Nkara pAdapadmayugalInIDe vihAraM kuru || 45 ||

AkIrNe nakharAjikAntivibhavai [nakharAjikAntivibhavaiH] rudyatsudhAvaibhavai-[rudyatsudhAvaibhavaiH]

-rAdhaute.api cha padmarAgalalite haMsavrajairAshrite |

nityaM bhaktivadhUgaNaishcha rahasi svechChAvihAraM kuru

sthitvA mAnasarAjahaMsa girijAnAthA~NghrisaudhAntare || 46 ||

shambhudhyAna vasantasa~Ngini hRRidArAme.aghajIrNachChadAH

srastA bhaktilatAchChaTA vilasitAH puNyapravAlashritAH |

dIpyante guNakorakA japavachaHpuShpANi sadvAsanA

j~nAnAnanda sudhAmarandalaharI saMvitphalAbhyunnatiH || 47 ||

nityAnandarasAlayaM suramunisvAntAmbujAtAshrayaM

svachChaM saddvijasevitaM kaluShahRRitsadvAsanA viShkRRitam |

shambhudhyAna sarovaraM vraja manohaM sAvataMsa sthiraM

kiM kShudrA shrayapalvala bhramaNa sa~njAtashramaM prApsyasi || 48 ||

AnandAmRRita pUritA harapadAM bhojA lavAlodyatA

sthairyopaghnamupetya bhaktilatikA shAkhopa shAkhAnvitA |

uchChair mAnasa kAyamAna paTalImAkramya niShkalmaShA

nityAbhIShTa phalapradA bhavatu me satkarma saMvardhitA || 49 ||

sandhyA rambha vijRRimbhitaM shrutishiraH sthAnAntarAdhi ShThitaM

saprema bhramarAbhirAmaM asakRRit sadvAsanA shobhitam |

bhogIndrA bharaNaM samastasumanaH pUjyaM guNAviShkRRitaM

seve shrIgiri mallikArjuna mahAliNgaM shivAliNgitam || 50 ||

bhRRi~NgIchChA naTanotkaTaH karamadagrAhI sphuran mAdhavA- [sphuran mAdhavAvhlAdo]

-hlAdo nAdayuto mahAsitavapuH pa~ncheShuNA chAdRRitaH |

satpakShaH sumano vaneShu sa punaH sAkShAnmadIye mano-

-rAjIve bhramarAdhipo viharatAM shrIshailavAsI vibhuH || 51 ||

kAruNyAmRRita varShiNaM ghanavipadgrIShmach ChidAkarmaThaM

vidyAsasya phalodayAya sumanaH saMsevya michChAkRRitim |

nRRityad bhakta mayUramadri nilayaM cha~nchajjaTAmaNDalaM

shambho vA~nChati nIlakandhara sadA tvAM me manashchAtakaH || 52 ||

AkAshena shikhI samastaphaNinAM netrA kalApI natA-[natAnugrAhi]

-nugrAhi praNavopade shaninadaiH kekIti yo gIyate |

shyAmAM shailasamudbhavAM ghanaruchiM dRRiShTvA naTantaM mudA

vedAntopavane vihArarasikaM taM nIlakaNThaM bhaje || 53 ||

sandhyA gharmadinAtyayo harikarAghAta prabhUtAnaka- [prabhUtAnakadhvAno ]

-dhvAno vAridagarjitaM diviShadAM dRRiShTichChaTA cha~nchalA |

bhaktAnAM paritoShabAShpa vitatir vRRiShTir mayUrI shivA

yasminnujjvala tANDavaM vijayate taM nIlakaNThaM bhaje || 54 ||

AdyAyAmita tejase shrutipadairvedyAya sAdhyAya te

vidyAnandamayAtmane trijagataH saMrakShaNodyogine |

dhyeyAyAkhilayogibhiH suragaNairgeyAya mAyAvine

samyaktANDava sambhramAya jaTine seyaM natiH shambhave || 55 ||

nityAya triguNAtmane purajite kAtyAyanI shreyase

satyAyAdi kuTumbine munimanaH pratyakSha chinmUrtaye |

mAyAsRRiShTa jagattrayAya sakalAmnAyAntasa~nchAriNe

sAyaM tANDava sambhramAya jaTine seyaM natiH shambhave || 56 ||

nityaM svodarapoShaNAya sakalAnuddishya vittAshayA

vyarthaM paryaTanaM karomi bhavataH sevAM na jAne vibho |

majjanmAntara puNya pAka balatastvaM sharva sarvAntara- [sarvAntaraH]

-stiShThasyeva hi tena vA pashupate te rakShaNIyo.asmyaham || 57 ||

eko vArija bAndhavaH kShitinabho vyAptaM tamo maNDalaM

bhittvA lochana gocharo.api bhavati tvaM koTi sUryaprabhaH |

vedyaH kiM na bhavasyaho ghanataraM kIdRRigbhavenmattama- [kIdRRigbhavenmattamaH]

-statsarvaM [tatsarvaM] vyapanIya me pashupate sAkShAtprasanno bhava || 58 ||

haMsaH padmavanaM samichChati yathA nIlAmbudaM chAtakaH

kokaH kokanadapriyaM pratidinaM chandraM chakorastathA |

cheto vA~nChati mAmakaM pashupate chinmArgamRRigyaM vibho

gaurInAtha bhavatpadAbja yugalaM kaivalya saukhyapradam || 59 ||

rodhastoyahRRitaH shrameNa pathikashChAyAM tarorvRRiShTito [tarorvRRiShTitaH]

bhItaH svasthagRRihaM gRRihasthamatithir dInaH prabhuM dhArmikam |

dIpaM santamasAkulashcha shikhinaM shItA vRRitastvaM tathA

chetaH sarvabhayApahaM vraja sukhaM shambhoH padAmbhoruham || 60 ||

a~NkolaM nija-bIja-santatirayaskAntopalaM [santatiH ayaskAntopalaM] sUchikA

sAdhvI naijavibhuM latA kShitiruhaM sindhuH sarid vallabham |

prApnotIha yathA tathA pashupateH pAdAravinda dvayaM

chetovRRitti rupetya tiShThati sadA sA bhakti rityuchyate || 61 ||

AnandAshrubhirAtanoti pulakaM nairmalyatashChAdanaM

vAchA-sha~Nkhamukhe sthitaishcha jaTharApUrtiM charitrAmRRitaiH |

rudrAkShair hasitena deva vapuSho rakShAM bhavadbhAvanA-

-parya~Nke viniveshya bhaktijananI bhaktArbhakaM rakShati || 62 ||

mArgAvartitapAdukA pashupatera~Ngasya kUrchAyate

gaNDUShAmbuniShechanaM puraripordivyAbhiShekAyate |

ki~nchi-dbhakShita-mAMsa-sheShakabalaM navyopahArAyate

bhaktiH kiM na karotyaho vanacharo bhaktAvataMsAyate || 63 ||

vakShastADanamantakasya kaThinApasmArasammardanaM

bhUbhRRitparyaTanaM namatsurashiraHkoTIrasa~NgharShaNam |

karmedaM mRRidulasya tAvakapadadvandvasya kiM vochitaM

machchetomaNipAdukAviharaNaM shambho sadA~NgIkuru || 64 ||

vakShastADanasha~NkayA vichalito vaivasvato nirjarAH

koTIrojjvalaratnadIpakalikAnIrAjanaM kurvate |

dRRiShTvA muktivadhUstanoti nibhRRitAshleShaM bhavAnIpate

yachchetastava pAdapadmabhajanaM tasyeha kiM durlabham || 65 ||

krIDArthaM sRRijasi prapa~nchamakhilaM krIDAmRRigAste janAH

yatkarmAcharitaM mayA cha bhavataH prItyai bhavatyeva tat |

shambho svasya kutUhalasya karaNaM machcheShTitaM nishchitaM

tasmAnmAmakarakShaNaM pashupate kartavyameva tvayA || 66 ||

bahuvidhaparitoShabAShpapUra-

-sphuTapulakA~NkitachArubhogabhUmim |

chirapadaphalakA~NkShisevyamAnAM

paramasadAshivabhAvanAM prapadye || 67 ||

amitamudamRRitaM muhurduhantIM

vimalabhavatpadagoShThamAvasantIm |

sadaya pashupate supuNyapAkAM

mama paripAlaya bhaktidhenumekAm || 68 ||

jaDatA pashutA kala~NkitA

kuTilacharatvaM cha nAsti mayi deva |

asti yadi rAjamaule

bhavadAbharaNasya nAsmi kiM pAtram || 69 ||

arahasi rahasi svatantrabuddhyA

varivasituM sulabhaH prasannamUrtiH |

agaNitaphaladAyakaH prabhurme

jagadadhiko hRRidi rAjashekharo.asti || 70 ||

ArUDhabhaktiguNaku~nchitabhAvachApa-

-yuktaiH shivasmaraNabANagaNairamoghaiH |

nirjitya kilbiSharipUnvijayI sudhIndraH

sAnandamAvahati susthirarAjalakShmIm || 71 ||

dhyAnA~njanena samavekShya tamaHpradeshaM

bhittvA mahAbalibhirIshvaranAmamantraiH |

divyAshritaM bhujagabhUShaNamudvahanti

ye pAdapadmamiha te shiva te kRRitArthAH || 72 ||

bhUdAratAmudavahadyadapekShayA shrI-

-bhUdAra eva kimataH sumate labhasva |

kedAramAkalitamuktimahauShadhInAM

pAdAravindabhajanaM parameshvarasya || 73 ||

AshApAshakleshadurvAsanAdi-

-bhedodyuktairdivyagandhairamandaiH |

AshAshATIkasya pAdAravindaM

chetaHpeTIM vAsitAM me tanotu || 74 ||

kalyANinaM sarasachitragatiM savegaM

sarveNgitajnamanaghaM dhruvalakShaNADhyam |

chetastura~Ngamadhiruhya chara smarAre

netaH samastajagatAM vRRiShabhAdhirUDha || 75 ||

bhaktirmaheshapadapuShkaramAvasantI

kAdambinIva kurute paritoShavarSham |

sampUrito bhavati yasya manastaTAka-

-stajjanmasasyamakhilaM saphalaM cha nAnyat || 76 ||

buddhiH sthirA bhavitumIshvarapAdapadma-

-saktA vadhUrvirahiNIva sadA smarantI |

sadbhAvanAsmaraNadarshanakIrtanAdi

sammohiteva shivamantrajapena vinte || 77 ||

sadupachAravidhiShvanubodhitAM

savinayAM suhRRidaM samupAshritAm |

mama samuddhara buddhimimAM prabho

varaguNena navoDhavadhUmiva || 78 ||

nityaM yogimanaH sarojadalasa~nchArakShamastvatkramaH

shambho tena kathaM kaThorayamarADvakShaHkavATakShatiH |

atyantaM mRRidulaM tvada~NghriyugalaM hA me manashchintaya-

-tyetallochanagocharaM kuru vibho hastena saMvAhaye || 79 ||

eShyatyeSha janiM mano.asya kaThinaM tasminnaTAnIti ma-

-drakShAyai girisImni komalapadanyAsaH purAbhyAsitaH |

no cheddivyagRRihAntareShu sumanastalpeShu vedyAdiShu

prAyaH satsu shilAtaleShu naTanaM shambho kimarthaM tava || 80 ||

ka~nchitkAlamumAmahesha bhavataH pAdAravindArchanaiH

kanchiddhyAnasamAdhibhishcha natibhiH kanchitkathAkarNanaiH |

kanchitkanchidavekShaNaishcha nutibhiH ka~nchiddashAmIdRRishIM

yaH prApnoti mudA tvadarpitamanA jIvan sa muktaH khalu || 81 ||

bANatvaM vRRiShabhatvamardhavapuShA bhAryAtvamAryApate

ghoNitvaM sakhitA mRRida~NgavahatA chetyAdi rUpaM dadhau |

tvatpAde nayanArpaNaM cha kRRitavAMstvaddehabhAgo hariH

pUjyAtpUjyataraH sa eva hi na chetko vA tadanyo.adhikaH || 82 ||

jananamRRitiyutAnAM sevayA devatAnAM

na bhavati sukhaleshaH saMshayo nAsti tatra |

ajanimamRRitarUpaM sAmbamIshaM bhajante

ya iha paramasaukhyaM te hi dhanyA labhante || 83 ||

shiva tava paricharyAsannidhAnAya gauryA

bhava mama guNadhuryAM buddhikanyAM pradAsye |

sakalabhuvanabandho sachchidAnandasindho

sadaya hRRidayagehe sarvadA saMvasa tvam || 84 ||

jaladhimathanadakSho naiva pAtAlabhedI

na cha vanamRRigayAyAM naiva lubdhaH pravINaH |

ashanakusumabhUShAvastramukhyAM saparyAM

kathaya kathamahaM te kalpayAnIndumaule || 85 ||

pUjAdravyasamRRiddhayo virachitAH pUjAM kathaM kurmahe

pakShitvaM na cha vA kiTitvamapi na prAptaM mayA durlabham |

jAne mastakama~NghripallavamumAjAne na te.ahaM vibho

na j~nAtaM hi pitAmahena hariNA tattvena tadrUpiNA || 86 ||

ashanaM garalaM phaNI kalApo

vasanaM charma cha vAhanaM mahokShaH |

mama dAsyasi kiM kimasti shambho

tava pAdAmbujabhaktimeva dehi || 87 ||

yadA kRRitAmbhonidhisetubandhanaH

karasthalAdhaHkRRitaparvatAdhipaH |

bhavAni te la~Nghitapadmasambhava-

-stadA shivArchAstavabhAvanakShamaH || 88 ||

natibhirnutibhistvamIsha pUjA-

-vidhibhirdhyAnasamAdhibhirna tuShTaH |

dhanuShA musalena chAshmabhirvA

vada te prItikaraM tathA karomi || 89 ||

vachasA charitaM vadAmi shambho-

-rahamudyogavidhAsu te.aprasaktaH |

manasAkRRitimIshvarasya seve

shirasA chaiva sadAshivaM namAmi || 90 ||

AdyAvidyA hRRidgatA nirgatAsI-

-dvidyA hRRidyA hRRidgatA tvatprasAdAt |

seve nityaM shrIkaraM tvatpadAbjaM

bhAve mukterbhAjanaM rAjamaule || 91 ||

dUrIkRRitAni duritAni durakSharANi

daurbhAgyaduHkhaduraha~NkRRitidurvachAMsi |

sAraM tvadIyacharitaM nitarAM pibantaM

gaurIsha mAmiha samuddhara satkaTAkShaiH || 92 ||

somakalAdharamaulau

komalaghanakandhare mahAmahasi |

svAmini girijAnAthe

mAmakahRRidayaM nirantaraM ramatAm || 93 ||

sA rasanA te nayane

tAveva karau sa eva kRRitakRRityaH |

yA ye yau yo bhargaM

vadatIkShete sadArchataH smarati || 94 ||

atimRRidulau mama charaNA-

-vatikaThinaM te mano bhavAnIsha |

iti vichikitsAM santyaja

shiva kathamAsIdgirau tathA veshaH || 95 ||

dhairyA~Nkushena nibhRRitaM

rabhasAdAkRRiShya bhaktishRRi~NkhalayA |

purahara charaNAlAne

hRRidayamadebhaM badhAna chidyantraiH || 96 ||

pracharatyabhitaH pragalbhavRRittyA

madavAneSha manaH karI garIyAn |

rigRRihya nayena bhaktirajvA

parama sthANu padaM dRRiDhaM nayAmum || 97 ||

sarvAla~NkArayuktAM saralapadayutAM sAdhuvRRittAM suvarNAM

sadbhiH saMstUyamAnAM sarasaguNayutAM lakShitAM lakShaNADhyAm |

udyadbhUShAvisheShAmupagatavinayAM dyotamAnArtharekhAM

kalyANIM deva gaurIpriya mama kavitAkanyakAM tvaM gRRihANa || 98 ||

idaM te yuktaM vA paramashiva kAruNyajaladhe

gatau tiryagrUpaM tava padashirodarshanadhiyA |

haribrahmANau tau divi bhuvi charantau shramayutau

kathaM shambho svAminkathaya mama vedyo.asi purataH || 99 ||

stotreNAlamahaM pravachmi na mRRiShA devA viri~nchAdayaH

stutyAnAM gaNanAprasa~Ngasamaye tvAmagragaNyaM viduH |

mAhAtmyAgravichAraNaprakaraNe dhAnAtuShastomava-

-ddhUtAstvAM viduruttamottamaphalaM shambho bhavatsevakAH || 100 ||

iti shrImatparamahaMsaparivrAjakAchAryasya shrIgovindabhagavatpUjyapAdashiShyasya shrImachCha~NkarabhagavataH kRRitau shivAnandalaharI ||