Shivananda Lahari

zivAnanda lahari

zloka 1

kalAbhyAM cUDAlaGkRta-zazikalAbhyAM nijatapaH-

-phalAbhyAM bhakteSu prakaTita-phalAbhyAM bhavatu me |

zivAbhyA-mastoka-tribhuvana-zivAbhyAM hRdi puna-

-rbhavAbhyA-mAnanda-sphuradanubhavAbhyAM natiriyam || 1 ||

galantI zambho tvaccarita-saritaH kilbiSarajo

dalantI dhIkulyA-saraNiSu patantI vijayatAm |

dizantI saMsAra-bhramaNa-paritApopazamanaM

vasantI maccetohradabhuvi zivAnandalaharI || 2 ||

trayIvedyaM hRdyaM tripura-haramAdyaM trinayanaM

jaTAbhArodAraM caladuragahAraM mRgadharam |

mahAdevaM devaM mayi sadayabhAvaM pazupatiM

cidAlambaM sAmbaM zivamati-viDambaM hRdi bhaje || 3 ||

sahasraM vartante jagati vibudhAH kSudraphaladA

na manye svapne vA tadanusaraNaM tatkRtaphalam |

hari-brahmAdInA-mapi nikaTa-bhAjAmasulabhaM

ciraM yAce zambho ziva tava padAmbhoja-bhajanam || 4 ||

smRtau zAstre vaidye zakuna-kavitA-gAnaphaNitau

purANe mantre vA stuti-naTana-hAsyeSvacaturaH |

kathaM rAjJAM prItirbhavati mayi ko'haM pazupate

pazuM mAM sarvajJa prathita kRpayA pAlaya vibho || 5 ||

ghaTo vA mRtpiNDo-'pyaNurapi ca dhUmo'gniracalaH

paTo vA tanturvA pariharati kiM ghorazamanam |

vRthA kaNThakSobhaM vahasi tarasA tarkavacasA

padAmbhojaM zambhorbhaja paramasaukhyaM vraja sudhIH || 6 ||

manaste pAdAbje nivasatu vacaH stotraphaNitau

karau cAbhyarcAyAM zrutirapi kathA karNanavidhau |

tava dhyAne buddhirnayanayugalaM mUrtivibhave [buddhiH nayanayugalaM]

para-granthAnkairvA paramaziva jAne paramataH || 7 ||

yathA buddhiH zuktau rajatamiti kAcAzmani maNi- [maNiH jale]

-rjale paiSTe kSIraM bhavati mRgatRSNA-su salilam |

tathA devabhrAntyA bhajati bhavadanyaM jaDajano

mahAdevezaM tvAM manasi ca na matvA pazupate || 8 ||

gabhIre kAsAre vizati vijane ghoravipine

vizAle zaile ca bhramati kusumArthaM jaDamatiH |

samarpyaikaM cetaH sarasijamu-mAnAtha bhavate

sukhe-nAvasthAtuM jana iha na jAnAti kimaho || 9 ||

naratvaM devatvaM nagavana-mRgatvaM mazakatA

pazutvaM kITatvaM bhavatu vihagatvAdi jananam |

sadA tvatpAdAbja-smaraNa-paramAnandalaharI-

-vihArAsaktaM ceddhRdayamiha kiM tena vapuSA || 10 ||

vaTurvA gehI vA yatirapi jaTI vA taditaro

naro vA yaH kazcidbhavatu bhava kiM tena bhavati |

yadIyaM hRtpadmaM yadi bhavadadhInaM pazupate

tadIyastvaM zambho bhavasi bhavabhAraM ca vahasi || 11 ||

guhAyAM gehe vA bahirapi vane vA'drizikhare

jale vA vahnau vA vasatu vasateH kiM vada phalam |

sadA yasyaivAntaH-karaNamapi zambho tava pade

sthitaM cedyogo'sau sa ca paramayogI sa ca sukhI || 12 ||

asAre saMsAre nija-bhajanadUre jaDadhiyA

bhramantaM mAmandhaM paramakRpayA pAtumucitam |

madanyaH ko dInastava kRpaNa-rakSAtinipuNa- [rakSAtinipuNaH tvadanyaH]

-stvadanyaH ko vA me trijagati zaraNyaH pazupate || 13 ||

prabhustvaM dInAnAM khalu paramabandhuH pazupate

pramukhyo'haM teSAmapi kimuta bandhutvamanayoH |

tvayaiva kSantavyAH ziva madaparAdhAzca sakalAH

prayatnA-tkartavyaM madavanamiyaM bandhusaraNiH || 14 ||

upekSA no cetkiM na harasi bhavaddhyAna-vimukhAM

durAzA-bhUyiSThAM vidhilipi-mazakto yadi bhavAn |

zirastadvaidhAtraM nanakhalu suvRttaM pazupate

kathaM vA niryatnaM karanakha-mukhenaiva lulitam || 15 ||

viriJci-rdIrghAyu-rbhavatu bhavatA tatparazira- [tatparaziraH catuSkaM]

-zcatuSkaM saMrakSyaM sa khalu bhuvi dainyaM likhitavAn |

vicAraH ko vA mAM vizada kRpayA pAti ziva te

kaTAkSavyApAraH svayamapi ca dInAvanaparaH || 16 ||

phalAdvA puNyAnAM mayi karuNayA vA tvayi vibho

prasanne'pi svAmin bhavadamala-pAdAbja-yugalam |

kathaM pazyeyaM mAM sthagayati namaH sambhramajuSAM

nilimpAnAM zreNi-rnija-kanaka-mANikya-makuTaiH || 17 ||

tvameko lokAnAM paramaphalado divyapadavIM

vahantastvanmUlAM punarapi bhajante harimukhAH |

kiyadvA dAkSiNyaM tava ziva madAzA ca kiyatI

kadA vA madrakSAM vahasi karuNA-pUritadRzA || 18 ||

durAzA-bhUyiSThe duradhipa-gRhadvAra-ghaTake

durante saMsAre duritanilaye duHkhajanake |

madAyAsaM kiM na vyapanayasi kasyopa-kRtaye

vadeyaM prItizcettava ziva kRtArthAH khalu vayam || 19 ||

sadA mohATavyAM carati yuvatInAM kucagirau

naTatyAzA-zAkhA-svaTati jhaTiti svairamabhitaH |

kapAlin bhikSo me hRdaya-kapimatyanta-capalaM

dRDhaM bhaktyA baddhvA ziva bhavadadhInaM kuru vibho || 20 ||

dhRti-stambhAdhArAM dRDha-guNa-nibaddhAM sagamanAM

vicitrAM padmADhyAM pratidivasa-sanmArga-ghaTitAm |

smarAre maccetaH-sphuTa-paTakuTIM prApya vizadAM

jaya svAmin zaktyA saha ziva gaNaiH sevita vibho || 21 ||

pralobhAdyairarthAharaNa-paratantro dhanigRhe [pralobhAdyaiH arthAharaNa-paratantro]

pravezodyuktaH san bhramati bahudhA taskarapate |

imaM cetazcoraM kathamiha sahe zaGkara vibho

tavAdhInaM kRtvA mayi niraparAdhe kuru kRpAm || 22 ||

karomi tvatpUjAM sapadi sukhado me bhava vibho

vidhitvaM viSNutvaM dizasi khalu tasyAH phalamiti |

punazca tvAM draSTuM divi bhuvi vahanpakSi-mRgatA-

-madRSTvA tatkhedaM kathamiha sahe zaGkara vibho || 23 ||

kadA vA kailAse kanakamaNisaudhe saha gaNai- [saha gaNaiH vasan]

-rvasan zambhoragre sphuTa-ghaTita-mUrdhAJjalipuTaH |

vibho sAmba svAmi-nparamaziva pAhIti nigada-

-nvidhAtRRNAM kalpAn kSaNamiva vineSyAmi sukhataH || 24 ||

stavai-rbrahmAdInAM jayajaya-vacobhirniyaminAM

gaNAnAM kelIbhirmadakalamahokSasya kakudi | [kelIbhiH madakala-mahokSasya]

sthitaM nIlagrIvaM trinayana-mumAzliSTa-vapuSaM

kadA tvAM pazyeyaM karadhRta-mRgaM khaNDa-parazum || 25 ||

kadA vA tvAM dRSTvA giriza tava bhavyAGghri yugalaM

gRhItvA hastAbhyAM zirasi nayane vakSasi vahan |

samA zliSyA ghrAya sphuTa jalaja gandhAn parimalA-

-nalAbhyAM brahmAdyairmudamanubhaviSyAmi hRdaye || 26 || [brahmAdyaiH muda-manubhaviSyAmi]

karasthe hemAdrau giriza nikaTasthe dhanapatau

gRhasthe svarbhUjA mara surabhi cintAmaNigaNe |

ziraHsthe zItAMzau caraNayugalasthe'khilazubhe

kamarthaM dAsye'haM bhavatu bhavadarthaM mama manaH || 27 ||

sArUpyaM tava pUjane ziva mahAdeveti saGkIrtane

sAmIpyaM zivabhakti-dhuryajanatA-sAGgatya-sambhASaNe ||

sAlokyaM ca carAcarAtmakatanudhyAne bhavAnIpate

sAyujyaM mama siddhamatra bhavati svAmin kRtArtho'smyaham || 28 ||

tvatpAdAmbujamarcayAmi paramaM tvAM cintayAmyanvahaM

tvAmIzaM zaraNaM vrajAmi vacasA tvAmeva yAce vibho |

vIkSAM me diza cAkSuSIM sakaruNAM divyaizciraM prArthitAM

zambho lokaguro madIyamanasaH saukhyopadezaM kuru || 29 ||

vastroddhUtavidhau sahasrakaratA puSpArcane viSNutA

gandhe gandhavahAtmatA'nnapacane barhirmukhAdhyakSatA |

pAtre kAJcanagarbhatAsti mayi cedbAlenducUDAmaNe

zuzrUSAM karavANi te pazupate svAmiMstrilokIguro || 30 ||

nAlaM vA paramopakArakamidaM tvekaM pazUnAM pate

pazyan kukSigatAMzcarAcaragaNAn bAhyasthitAn rakSitum |

sarvAmartyapalAyanauSadhamatijvAlAkaraM bhIkaraM

nikSiptaM garalaM gale na gilitaM nodgIrNameva tvayA || 31 ||

jvAlograH sakalAmarAtibhayadaH kSvelaH kathaM vA tvayA

dRSTaH kiM ca kare dhRtaH karatale kiM pakvajambUphalam |

jihvAyAM nihitazca siddhaghuTikA vA kaNThadeze bhRtaH

kiM te nIlamaNirvibhUSaNamayaM zambho mahAtman vada || 32 ||

nAlaM vA sakRdeva deva bhavataH sevA natirvA nutiH

pUjA vA smaraNaM kathAzravaNamapyAlokanaM mAdRzAm |

svAminnasthiradevatAnusaraNAyAsena kiM labhyate

kA vA muktiritaH kuto bhavati cetkiM prArthanIyaM tadA || 33 ||

kiM brUmastava sAhasaM pazupate kasyAsti zambho bhava-

-ddhairyaM cedRzamAtmanaH sthitiriyaM cAnyaiH kathaM labhyate |

bhrazyaddevagaNaM trasanmunigaNaM nazyatprapaJcaM layaM

pazyannirbhaya eka eva viharatyAnandasAndro bhavAn || 34 ||

yogakSemadhurandharasya sakalazreyaHpradodyogino

dRSTAdRSTamatopadezakRtino bAhyAntaravyApinaH |

sarvajJasya dayAkarasya bhavataH kiM veditavyaM mayA

zambho tvaM paramAntaraGga iti me citte smarAmyanvaham || 35 ||

bhakto bhaktiguNAvRte mudamRtApUrNe prasanne manaH

kumbhe sAmba tavAGghripallavayugaM saMsthApya saMvitphalam |

satvaM mantramudIrayannijazarIrAgArazuddhiM vahan

puNyAhaM prakaTIkaromi ruciraM kalyANamApAdayan || 36 ||

AmnAyAmbudhimAdareNa sumanaHsaGghAH samudyanmano [samudyanmanaH]

manthAnaM dRDhabhaktirajjusahitaM kRtvA mathitvA tataH |

somaM kalpataruM suparvasurabhiM cintAmaNiM dhImatAM

nityAnandasudhAM nirantararamAsaubhAgyamAtanvate || 37 ||

prAkpuNyAcalamArgadarzitasudhAmUrtiH prasannaH zivaH

somaH sadgaNasevito mRgadharaH pUrNastamomocakaH |

cetaH puSkaralakSito bhavati cedAnandapAthonidhiH

prAgalbhyena vijRmbhate sumanasAM vRttistadA jAyate || 38 ||

dharmo me caturaGghrikaH sucaritaH pApaM vinAzaM gataM

kAmakrodhamadAdayo vigalitAH kAlAH sukhAviSkRtAH |

jJAnAnandamahauSadhiH suphalitA kaivalyanAthe sadA

mAnye mAnasapuNDarIkanagare rAjAvataMse sthite || 39 ||

dhIyantreNa vacoghaTena kavitAkulyopakulyAkramai- [kavitAkulyopakulyAkramaiH]

-rAnItaizca sadAzivasya caritAmbhorAzidivyAmRtaiH |

hRtkedArayutAzca bhaktikalamAH sAphalyamAtanvate

durbhikSAnmama sevakasya bhagavanvizveza bhItiH kutaH || 40 ||

pApotpAtavimocanAya ruciraizvaryAya mRtyuJjaya

stotradhyAnanatipradakSiNasaparyAlokanAkarNane |

jihvAcittaziroGghrihastanayanazrotrairahaM prArthito

mAmAjJApaya tannirUpaya muhurmAmeva mA me'vacaH || 41 ||

gAmbhIryaM parikhApadaM ghanadhRtiH prAkAra udyadguNa- [udyadguNastòmaH]

-stomazcAptabalaM ghanendriyacayo dvArANi dehe sthitaH |

vidyA vastusamRddhirityakhilasAmagrIsamete sadA

durgAtipriyadeva mAmakamanodurge nivAsaM kuru || 42 ||

mA gaccha tvamitastato giriza bho mayyeva vAsaM kuru

svAminnAdikirAta mAmakamanaHkAntArasImAntare |

vartante bahuzo mRgA madajuSo mAtsaryamohAdaya- [ mAtsaryamohAdayaH]

-stAnhatvA mRgayAvinodarucitA lAbhaM ca samprApsyasi || 43 ||

karalagnamRgaH karIndrabhaGgo

ghanazArdUlavikhaNDano'stajantuH |

girizo vizadAkRtizca cetaH-

-kuhare paJcamukho'sti me kuto bhIH || 44 ||

chandaH zAkhizikhAnvitair [zAkhizikhAnvitairaH] dvijavaraiH saMsevite zAzvate

saukhyApAdini khedabhedini sudhAsAraiH phalairdIpite |

cetaHpakSizikhAmaNe tyaja vRthA aJcAramanyairalaM

nityaM zaGkara pAdapadmayugalInIDe vihAraM kuru || 45 ||

AkIrNe nakharAjikAntivibhavai [nakharAjikAntivibhavaiH] rudyatsudhAvaibhavai-[rudyatsudhAvaibhavaiH]

-rAdhaute'pi ca padmarAgalalite haMsavrajairAzrite |

nityaM bhaktivadhUgaNaizca rahasi svecchAvihAraM kuru

sthitvA mAnasarAjahaMsa girijAnAthAGghrisaudhAntare || 46 ||

zambhudhyAna vasantasaGgini hRdArAme'ghajIrNacchadAH

srastA bhaktilatAcchaTA vilasitAH puNyapravAlazritAH |

dIpyante guNakorakA japavacaHpuSpANi sadvAsanA

jJAnAnanda sudhAmarandalaharI saMvitphalAbhyunnatiH || 47 ||

nityAnandarasAlayaM suramunisvAntAmbujAtAzrayaM

svacchaM saddvijasevitaM kaluSahRtsadvAsanA viSkRtam |

zambhudhyAna sarovaraM vraja manohaM sAvataMsa sthiraM

kiM kSudrA zrayapalvala bhramaNa saJjAtazramaM prApsyasi || 48 ||

AnandAmRta pUritA harapadAM bhojA lavAlodyatA

sthairyopaghnamupetya bhaktilatikA zAkhopa zAkhAnvitA |

ucchair mAnasa kAyamAna paTalImAkramya niSkalmaSA

nityAbhISTa phalapradA bhavatu me satkarma saMvardhitA || 49 ||

sandhyA rambha vijRmbhitaM zrutiziraH sthAnAntarAdhi SThitaM

saprema bhramarAbhirAmaM asakRt sadvAsanA zobhitam |

bhogIndrA bharaNaM samastasumanaH pUjyaM guNAviSkRtaM

seve zrIgiri mallikArjuna mahAliGgaM zivAliGgitam || 50 ||

bhRGgIcchA naTanotkaTaH karamadagrAhI sphuran mAdhavA- [sphuran mAdhavAvhlAdo]

-hlAdo nAdayuto mahAsitavapuH paJceSuNA cAdRtaH |

satpakSaH sumano vaneSu sa punaH sAkSAnmadIye mano-

-rAjIve bhramarAdhipo viharatAM zrIzailavAsI vibhuH || 51 ||

kAruNyAmRta varSiNaM ghanavipadgrISmac chidAkarmaThaM

vidyAsasya phalodayAya sumanaH saMsevya micchAkRtim |

nRtyad bhakta mayUramadri nilayaM caJcajjaTAmaNDalaM

zambho vAJchati nIlakandhara sadA tvAM me manazcAtakaH || 52 ||

AkAzena zikhI samastaphaNinAM netrA kalApI natA-[natAnugrAhi]

-nugrAhi praNavopade zaninadaiH kekIti yo gIyate |

zyAmAM zailasamudbhavAM ghanaruciM dRSTvA naTantaM mudA

vedAntopavane vihArarasikaM taM nIlakaNThaM bhaje || 53 ||

sandhyA gharmadinAtyayo harikarAghAta prabhUtAnaka- [prabhUtAnakadhvAno ]

-dhvAno vAridagarjitaM diviSadAM dRSTicchaTA caJcalA |

bhaktAnAM paritoSabASpa vitatir vRSTir mayUrI zivA

yasminnujjvala tANDavaM vijayate taM nIlakaNThaM bhaje || 54 ||

AdyAyAmita tejase zrutipadairvedyAya sAdhyAya te

vidyAnandamayAtmane trijagataH saMrakSaNodyogine |

dhyeyAyAkhilayogibhiH suragaNairgeyAya mAyAvine

samyaktANDava sambhramAya jaTine seyaM natiH zambhave || 55 ||

nityAya triguNAtmane purajite kAtyAyanI zreyase

satyAyAdi kuTumbine munimanaH pratyakSa cinmUrtaye |

mAyAsRSTa jagattrayAya sakalAmnAyAntasaJcAriNe

sAyaM tANDava sambhramAya jaTine seyaM natiH zambhave || 56 ||

nityaM svodarapoSaNAya sakalAnuddizya vittAzayA

vyarthaM paryaTanaM karomi bhavataH sevAM na jAne vibho |

majjanmAntara puNya pAka balatastvaM zarva sarvAntara- [sarvAntaraH]

-stiSThasyeva hi tena vA pazupate te rakSaNIyo'smyaham || 57 ||

eko vArija bAndhavaH kSitinabho vyAptaM tamo maNDalaM

bhittvA locana gocaro'pi bhavati tvaM koTi sUryaprabhaH |

vedyaH kiM na bhavasyaho ghanataraM kIdRgbhavenmattama- [kIdRgbhavenmattamaH]

-statsarvaM [tatsarvaM] vyapanIya me pazupate sAkSAtprasanno bhava || 58 ||

haMsaH padmavanaM samicchati yathA nIlAmbudaM cAtakaH

kokaH kokanadapriyaM pratidinaM candraM cakorastathA |

ceto vAJchati mAmakaM pazupate cinmArgamRgyaM vibho

gaurInAtha bhavatpadAbja yugalaM kaivalya saukhyapradam || 59 ||

rodhastoyahRtaH zrameNa pathikazchAyAM tarorvRSTito [tarorvRSTitaH]

bhItaH svasthagRhaM gRhasthamatithir dInaH prabhuM dhArmikam |

dIpaM santamasAkulazca zikhinaM zItA vRtastvaM tathA

cetaH sarvabhayApahaM vraja sukhaM zambhoH padAmbhoruham || 60 ||

aGkolaM nija-bIja-santatirayaskAntopalaM [santatiH ayaskAntopalaM] sUcikA

sAdhvI naijavibhuM latA kSitiruhaM sindhuH sarid vallabham |

prApnotIha yathA tathA pazupateH pAdAravinda dvayaM

cetovRtti rupetya tiSThati sadA sA bhakti rityucyate || 61 ||

AnandAzrubhirAtanoti pulakaM nairmalyatazchAdanaM

vAcA-zaGkhamukhe sthitaizca jaTharApUrtiM caritrAmRtaiH |

rudrAkSair hasitena deva vapuSo rakSAM bhavadbhAvanA-

-paryaGke vinivezya bhaktijananI bhaktArbhakaM rakSati || 62 ||

mArgAvartitapAdukA pazupateraGgasya kUrcAyate

gaNDUSAmbuniSecanaM puraripordivyAbhiSekAyate |

kiJci-dbhakSita-mAMsa-zeSakabalaM navyopahArAyate

bhaktiH kiM na karotyaho vanacaro bhaktAvataMsAyate || 63 ||

vakSastADanamantakasya kaThinApasmArasammardanaM

bhUbhRtparyaTanaM namatsuraziraHkoTIrasaGgharSaNam |

karmedaM mRdulasya tAvakapadadvandvasya kiM vocitaM

maccetomaNipAdukAviharaNaM zambho sadAGgIkuru || 64 ||

vakSastADanazaGkayA vicalito vaivasvato nirjarAH

koTIrojjvalaratnadIpakalikAnIrAjanaM kurvate |

dRSTvA muktivadhUstanoti nibhRtAzleSaM bhavAnIpate

yaccetastava pAdapadmabhajanaM tasyeha kiM durlabham || 65 ||

krIDArthaM sRjasi prapaJcamakhilaM krIDAmRgAste janAH

yatkarmAcaritaM mayA ca bhavataH prItyai bhavatyeva tat |

zambho svasya kutUhalasya karaNaM macceSTitaM nizcitaM

tasmAnmAmakarakSaNaM pazupate kartavyameva tvayA || 66 ||

bahuvidhaparitoSabASpapUra-

-sphuTapulakAGkitacArubhogabhUmim |

cirapadaphalakAGkSisevyamAnAM

paramasadAzivabhAvanAM prapadye || 67 ||

amitamudamRtaM muhurduhantIM

vimalabhavatpadagoSThamAvasantIm |

sadaya pazupate supuNyapAkAM

mama paripAlaya bhaktidhenumekAm || 68 ||

jaDatA pazutA kalaGkitA

kuTilacaratvaM ca nAsti mayi deva |

asti yadi rAjamaule

bhavadAbharaNasya nAsmi kiM pAtram || 69 ||

arahasi rahasi svatantrabuddhyA

varivasituM sulabhaH prasannamUrtiH |

agaNitaphaladAyakaH prabhurme

jagadadhiko hRdi rAjazekharo'sti || 70 ||

ArUDhabhaktiguNakuJcitabhAvacApa-

-yuktaiH zivasmaraNabANagaNairamoghaiH |

nirjitya kilbiSaripUnvijayI sudhIndraH

sAnandamAvahati susthirarAjalakSmIm || 71 ||

dhyAnAJjanena samavekSya tamaHpradezaM

bhittvA mahAbalibhirIzvaranAmamantraiH |

divyAzritaM bhujagabhUSaNamudvahanti

ye pAdapadmamiha te ziva te kRtArthAH || 72 ||

bhUdAratAmudavahadyadapekSayA zrI-

-bhUdAra eva kimataH sumate labhasva |

kedAramAkalitamuktimahauSadhInAM

pAdAravindabhajanaM paramezvarasya || 73 ||

AzApAzaklezadurvAsanAdi-

-bhedodyuktairdivyagandhairamandaiH |

AzAzATIkasya pAdAravindaM

cetaHpeTIM vAsitAM me tanotu || 74 ||

kalyANinaM sarasacitragatiM savegaM

sarveGgitajJamanaghaM dhruvalakSaNADhyam |

cetasturaGgamadhiruhya cara smarAre

netaH samastajagatAM vRSabhAdhirUDha || 75 ||

bhaktirmahezapadapuSkaramAvasantI

kAdambinIva kurute paritoSavarSam |

sampUrito bhavati yasya manastaTAka-

-stajjanmasasyamakhilaM saphalaM ca nAnyat || 76 ||

buddhiH sthirA bhavitumIzvarapAdapadma-

-saktA vadhUrvirahiNIva sadA smarantI |

sadbhAvanAsmaraNadarzanakIrtanAdi

sammohiteva zivamantrajapena vinte || 77 ||

sadupacAravidhiSvanubodhitAM

savinayAM suhRdaM samupAzritAm |

mama samuddhara buddhimimAM prabho

varaguNena navoDhavadhUmiva || 78 ||

nityaM yogimanaH sarojadalasaJcArakSamastvatkramaH

zambho tena kathaM kaThorayamarADvakSaHkavATakSatiH |

atyantaM mRdulaM tvadaGghriyugalaM hA me manazcintaya-

-tyetallocanagocaraM kuru vibho hastena saMvAhaye || 79 ||

eSyatyeSa janiM mano'sya kaThinaM tasminnaTAnIti ma-

-drakSAyai girisImni komalapadanyAsaH purAbhyAsitaH |

no ceddivyagRhAntareSu sumanastalpeSu vedyAdiSu

prAyaH satsu zilAtaleSu naTanaM zambho kimarthaM tava || 80 ||

kaJcitkAlamumAmaheza bhavataH pAdAravindArcanaiH

kaJciddhyAnasamAdhibhizca natibhiH kaJcitkathAkarNanaiH |

kaJcitkaJcidavekSaNaizca nutibhiH kaJciddazAmIdRzIM

yaH prApnoti mudA tvadarpitamanA jIvan sa muktaH khalu || 81 ||

bANatvaM vRSabhatvamardhavapuSA bhAryAtvamAryApate

ghoNitvaM sakhitA mRdaGgavahatA cetyAdi rUpaM dadhau |

tvatpAde nayanArpaNaM ca kRtavAMstvaddehabhAgo hariH

pUjyAtpUjyataraH sa eva hi na cetko vA tadanyo'dhikaH || 82 ||

jananamRtiyutAnAM sevayA devatAnAM

na bhavati sukhalezaH saMzayo nAsti tatra |

ajanimamRtarUpaM sAmbamIzaM bhajante

ya iha paramasaukhyaM te hi dhanyA labhante || 83 ||

ziva tava paricaryAsannidhAnAya gauryA

bhava mama guNadhuryAM buddhikanyAM pradAsye |

sakalabhuvanabandho saccidAnandasindho

sadaya hRdayagehe sarvadA saMvasa tvam || 84 ||

jaladhimathanadakSo naiva pAtAlabhedI

na ca vanamRgayAyAM naiva lubdhaH pravINaH |

azanakusumabhUSAvastramukhyAM saparyAM

kathaya kathamahaM te kalpayAnIndumaule || 85 ||

pUjAdravyasamRddhayo viracitAH pUjAM kathaM kurmahe

pakSitvaM na ca vA kiTitvamapi na prAptaM mayA durlabham |

jAne mastakamaGghripallavamumAjAne na te'haM vibho

na jJAtaM hi pitAmahena hariNA tattvena tadrUpiNA || 86 ||

azanaM garalaM phaNI kalApo

vasanaM carma ca vAhanaM mahokSaH |

mama dAsyasi kiM kimasti zambho

tava pAdAmbujabhaktimeva dehi || 87 ||

yadA kRtAmbhonidhisetubandhanaH

karasthalAdhaHkRtaparvatAdhipaH |

bhavAni te laGghitapadmasambhava-

-stadA zivArcAstavabhAvanakSamaH || 88 ||

natibhirnutibhistvamIza pUjA-

-vidhibhirdhyAnasamAdhibhirna tuSTaH |

dhanuSA musalena cAzmabhirvA

vada te prItikaraM tathA karomi || 89 ||

vacasA caritaM vadAmi zambho-

-rahamudyogavidhAsu te'prasaktaH |

manasAkRtimIzvarasya seve

zirasA caiva sadAzivaM namAmi || 90 ||

AdyAvidyA hRdgatA nirgatAsI-

-dvidyA hRdyA hRdgatA tvatprasAdAt |

seve nityaM zrIkaraM tvatpadAbjaM

bhAve mukterbhAjanaM rAjamaule || 91 ||

dUrIkRtAni duritAni durakSarANi

daurbhAgyaduHkhadurahaGkRtidurvacAMsi |

sAraM tvadIyacaritaM nitarAM pibantaM

gaurIza mAmiha samuddhara satkaTAkSaiH || 92 ||

somakalAdharamaulau

komalaghanakandhare mahAmahasi |

svAmini girijAnAthe

mAmakahRdayaM nirantaraM ramatAm || 93 ||

sA rasanA te nayane

tAveva karau sa eva kRtakRtyaH |

yA ye yau yo bhargaM

vadatIkSete sadArcataH smarati || 94 ||

atimRdulau mama caraNA-

-vatikaThinaM te mano bhavAnIza |

iti vicikitsAM santyaja

ziva kathamAsIdgirau tathA vezaH || 95 ||

dhairyAGkuzena nibhRtaM

rabhasAdAkRSya bhaktizRGkhalayA |

purahara caraNAlAne

hRdayamadebhaM badhAna cidyantraiH || 96 ||

pracaratyabhitaH pragalbhavRttyA

madavAneSa manaH karI garIyAn |

rigRhya nayena bhaktirajvA

parama sthANu padaM dRDhaM nayAmum || 97 ||

sarvAlaGkArayuktAM saralapadayutAM sAdhuvRttAM suvarNAM

sadbhiH saMstUyamAnAM sarasaguNayutAM lakSitAM lakSaNADhyAm |

udyadbhUSAvizeSAmupagatavinayAM dyotamAnArtharekhAM

kalyANIM deva gaurIpriya mama kavitAkanyakAM tvaM gRhANa || 98 ||

idaM te yuktaM vA paramaziva kAruNyajaladhe

gatau tiryagrUpaM tava padazirodarzanadhiyA |

haribrahmANau tau divi bhuvi carantau zramayutau

kathaM zambho svAminkathaya mama vedyo'si purataH || 99 ||

stotreNAlamahaM pravacmi na mRSA devA viriJcAdayaH

stutyAnAM gaNanAprasaGgasamaye tvAmagragaNyaM viduH |

mAhAtmyAgravicAraNaprakaraNe dhAnAtuSastomava-

-ddhUtAstvAM viduruttamottamaphalaM zambho bhavatsevakAH || 100 ||

iti zrImatparamahaMsaparivrAjakAcAryasya zrIgovindabhagavatpUjyapAdaziSyasya zrImacchaGkarabhagavataH kRtau zivAnandalaharI ||