Shiva Sahasra Nama Stotram

shiva sahasra nAma stotram

pUrvapIThikA ||

vAsudeva uvAcha |

tataH sa prayato bhUtvA mama tAta yudhiShThira |

prAnjaliH prAha viprarShirnAmasaNgrahamAditaH || 1 ||

upamanyuruvAcha |

brahmaproktairRRiShiproktairvedavedA~NgasambhavaiH |

sarvalokeShu vikhyAtaM stutyaM stoShyAmi nAmabhiH || 2 ||

mahadbhirvihitaiH satyaiH siddhaiH sarvArthasAdhakaiH |

RRiShiNA taNDinA bhaktyA kRRitairvedakRRitAtmanA || 3 ||

yathoktaiH sAdhubhiH khyAtairmunibhistattvadarshibhiH |

pravaraM prathamaM svargyaM sarvabhUtahitaM shubham || 4 ||

shrutaiH sarvatra jagati brahmalokAvatAritaiH |

satyaistatparamaM brahma brahmaproktaM sanAtanam || 5 ||

vakShye yadukulashreShTha shRRiNuShvAvahito mama |

varayainaM bhavaM devaM bhaktastvaM parameshvaram || 6 ||

tena te shrAvayiShyAmi yattadbrahma sanAtanam |

na shakyaM vistarAtkRRitsnaM vaktuM sarvasya kenachit || 7 ||

yuktenApi vibhUtInAmapi varShashatairapi |

yasyAdirmadhyamantaM cha surairapi na gamyate || 8 ||

kastasya shaknuyAdvaktuM guNAn kArtsnyena mAdhava |

kiM tu devasya mahataH sa~NkShiptArthapadAkSharam || 9 ||

shaktitashcharitaM vakShye prasAdAttasya dhImataH |

aprApya tu tato.anuj~nAM na shakyaH stotumIshvaraH || 10 ||

yadA tenAbhyanuj~nAtaH stuto vai sa tadA mayA |

anAdinidhanasyAhaM jagadyonermahAtmanaH || 11 ||

nAmnAM ki~nchitsamuddeshaM vakShyAmyavyaktayoninaH |

varadasya vareNyasya vishvarUpasya dhImataH || 12 ||

shRRiNu nAmnAM cha yaM kRRiShNa yaduktaM padmayoninA |

dashanAmasahasrANi yAnyAha prapitAmahaH || 13 ||

tAni nirmathya manasA dadhno ghRRitamivoddhRRitam |

gireH sAraM yathA hema puShpasAraM yathA madhu || 14 ||

ghRRitAtsAraM yathA maNDastathaitatsAramuddhRRitam |

sarvapApApahamidaM chaturvedasamanvitam || 15 ||

prayatnenAdhigantavyaM dhAryaM cha prayatAtmanA |

mA~NgalyaM pauShTikaM chaiva rakShoghnaM pAvanaM mahat || 16 ||

idaM bhaktAya dAtavyaM shraddadhAnAstikAya cha |

nAshraddadhAnarUpAya nAstikAyAjitAtmane || 17 ||

yashchAbhyasUyate devaM kAraNAtmAnamIshvaram |

sa kRRiShNa narakaM yAti saha pUrvaiH sahAtmajaiH || 18 ||

idaM dhyAnamidaM yogamidaM dhyeyamanuttamam |

idaM japyamidaM j~nAnaM rahasyamidamuttamam || 19 ||

yaM j~nAtvA antakAlepi gachCheta paramAM gatim |

pavitraM ma~NgalaM medhyaM kalyANamidamuttamam || 20 ||

idaM brahmA purA kRRitvA sarvalokapitAmahaH |

sarva stavAnAM rAjatve divyAnAM samakalpayat || 21 ||

tadA prabhRRiti chaivAyamIshvarasya mahAtmanaH |

stavarAja iti khyAto jagatyamarapUjitaH || 22 ||

brahmalokAdayaM svarge stavarAjo.avatAritaH |

yatastaNDiH purA prApa tena taNDikRRito.abhavat || 23 ||

svargAchchaivAtra bhUrlokaM taNDinA hyavatAritaH |

sarvamaNgalamANgalyaM sarvapApapraNAshanam || 24 ||

nigadiShye mahAbAho stavAnAmuttamaM stavam |

brahmaNAmapi yadbrahma parANAmapi yatparam || 25 ||

tejasAmapi yattejastapasAmapi yattapaH |

shAntAnAmapi yaH shAnto dyutInAmapi yA dyutiH || 26 ||

dAntAnAmapi yo dAnto dhImatAmapi yA cha dhIH |

devAnAmapi yo deva RRiShINAmapi yastvRRiShiH || 27 ||

yajnAnAmapi yo yajnaH shivAnAmapi yaH shivaH |

rudrANAmapi yo rudraH prabhA prabhavatAmapi || 28 ||

yoginAmapi yo yogI kAraNAnAM cha kAraNam |

yato lokAH sambhavanti na bhavanti yataH punaH || 29 ||

sarvabhUtAtmabhUtasya harasyAmitatejasaH |

aShTottarasahasraM tu nAmnAM sharvasya me shRRiNu |

yachChrutvA manujavyAghra sarvAnkAmAnavApsyasi || 30 ||

dhyAnam |

shAntaM padmAsanasthaM shashidharamukuTaM pa~nchavaktraM trinetraM

shUlaM vajraM cha khaDgaM parashumabhayadaM dakShabhAge vahantam |

nAgaM pAshaM cha ghaNTAM pralayahutavahaM sA~NkushaM vAmabhAge

nAnAla~NkArayuktaM sphaTikamaNinibhaM pArvatIshaM namAmi ||

stotram |

OM sthiraH sthANuH prabhurbhImaH pravaro varado varaH |

sarvAtmA sarvavikhyAtaH sarvaH sarvakaro bhavaH || 1 ||

jaTI charmI shikhaNDI cha sarvA~NgaH sarvabhAvanaH |

harashcha hariNAkShashcha sarvabhUtaharaH prabhuH || 2 ||

pravRRittishcha nivRRittishcha niyataH shAshvato dhruvaH |

shmashAnavAsI bhagavAn khacharo gocharo.ardanaH || 3 ||

abhivAdyo mahAkarmA tapasvI bhUtabhAvanaH |

unmattaveShaprachChannaH sarvalokaprajApatiH || 4 ||

mahArUpo mahAkAyo vRRiSharUpo mahAyashAH |

mahAtmA sarvabhUtAtmA vishvarUpo mahAhanuH || 5 ||

lokapAlo.antarhitAtmA prasAdo hayagardabhiH |

pavitraM cha mahAMshchaiva niyamo niyamAshritaH || 6 ||

sarvakarmA svayambhUta AdirAdikaro nidhiH |

sahasrAkSho vishAlAkShaH somo nakShatrasAdhakaH || 7 ||

chandraH sUryaH shaniH keturgraho grahapatirvaraH |

atriratryA namaskartA mRRigabANArpaNo.anaghaH || 8 || [AdyantalayakartA cha]

mahAtapA ghoratapA adIno dInasAdhakaH |

saMvatsarakaro mantraH pramANaM paramaM tapaH || 9 ||

yogI yojyo mahAbIjo mahAretA mahAbalaH |

suvarNaretAH sarvaj~naH subIjo bIjavAhanaH || 10 ||

dashabAhustvanimiSho nIlakaNTha umApatiH |

vishvarUpaH svayaM shreShTho balavIro balo gaNaH || 11 ||

gaNakartA gaNapatirdigvAsAH kAma eva cha |

mantravitparamo mantraH sarvabhAvakaro haraH || 12 ||

kamaNDaludharo dhanvI bANahastaH kapAlavAn |

ashanI shataghnI khaDgI paTTishI chAyudhI mahAn || 13 ||

sruvahastaH surUpashcha tejastejaskaro nidhiH |

uShNIShI cha suvaktrashcha udagro vinatastathA || 14 ||

dIrghashcha harikeshashcha sutIrthaH kRRiShNa eva cha |

sRRigAlarUpaH siddhArtho muNDaH sarvashubha~NkaraH || 15 ||

ajashcha bahurUpashcha gandhadhArI kapardyapi |

UrdhvaretA Urdhvali~Nga UrdhvashAyI nabhaHsthalaH || 16 ||

trijaTI chIravAsAshcha rudraH senApatirvibhuH |

ahashcharo nakta~ncharastigmamanyuH suvarchasaH || 17 ||

gajahA daityahA kAlo lokadhAtA guNAkaraH |

siMhashArdUlarUpashcha ArdracharmAmbarAvRRitaH || 18 ||

kAlayogI mahAnAdaH sarvakAmashchatuShpathaH |

nishAcharaH pretachArI bhUtachArI maheshvaraH || 19 ||

bahubhUto bahudharaH svarbhAnuramito gatiH |

nRRityapriyo nityanarto nartakaH sarvalAlasaH || 20 ||

ghoro mahAtapAH pAsho nityo giriruho nabhaH |

sahasrahasto vijayo vyavasAyo hyatandritaH || 21 ||

adharShaNo dharShaNAtmA yaj~nahA kAmanAshakaH | [marSha]

dakShayAgApahArI cha susaho madhyamastathA || 22 ||

tejopahArI balahA mudito.artho.ajito.avaraH |

gambhIraghoSho gambhIro gambhIrabalavAhanaH || 23 ||

nyagrodharUpo nyagrodho vRRikShakarNasthitirvibhuH |

sutIkShNadashanashchaiva mahAkAyo mahAnanaH || 24 ||

viShvakseno hariryaj~naH saMyugApIDavAhanaH |

tIkShNatApashcha haryashvaH sahAyaH karmakAlavit || 25 ||

viShNuprasAdito yaj~naH samudro baDabAmukhaH |

hutAshanasahAyashcha prashAntAtmA hutAshanaH || 26 ||

ugratejA mahAtejA janyo vijayakAlavit |

jyotiShAmayanaM siddhiH sarvavigraha eva cha || 27 ||

shikhI muNDI jaTI jvAlI mUrtijo mUrdhago balI |

veNavI paNavI tAlI khalI kAlakaTa~NkaTaH || 28 ||

nakShatravigrahamatirguNabuddhirlayo.agamaH |

prajApatirvishvabAhurvibhAgaH sarvago.amukhaH || 29 ||

vimochanaH susaraNo hiraNyakavachodbhavaH |

meDhrajo balachArI cha mahIchArI srutastathA || 30 || [meghajo]

sarvatUryaninAdI cha sarvAtodyaparigrahaH |

vyAlarUpo guhAvAsI guho mAlI tara~Ngavit || 31 ||

tridashastrikAladhRRikkarmasarvabandhavimochanaH |

bandhanastvasurendrANAM yudhishatruvinAshanaH || 32 ||

sA~NkhyaprasAdo durvAsAH sarvasAdhuniShevitaH |

praskandano vibhAgajno atulyo yajnabhAgavit || 33 ||

sarvavAsaH sarvachArI durvAsA vAsavo.amaraH |

haimo hemakaro.ayajnaH sarvadhArI dharottamaH || 34 || [yajnaH]

lohitAkSho mahAkShashcha vijayAkSho vishAradaH |

sa~Ngraho nigrahaH kartA sarpachIranivAsanaH || 35 ||

mukhyo.amukhyashcha dehashcha kAhaliH sarvakAmadaH |

sarvakAlaprasAdashcha subalo balarUpadhRRit || 36 ||

sarvakAmavarashchaiva sarvadaH sarvatomukhaH |

AkAshanirvirUpashcha nipAtI hyavashaH khagaH || 37 ||

raudrarUpo.aMshurAdityo bahurashmiH suvarchasI |

vasuvego mahAvego manovego nishAcharaH || 38 ||

sarvavAsI shriyAvAsI upadeshakaro.akaraH |

munirAtmanirAlokaH sambhagnashcha sahasradaH || 39 ||

pakShI cha pakSharUpashcha atidIpto vishAM patiH |

unmAdo madanaH kAmo hyashvattho.arthakaro yashaH || 40 ||

vAmadevashcha vAmashcha prAgdakShiNashcha vAmanaH |

siddhayogI maharShishcha siddhArthaH siddhasAdhakaH || 41 ||

bhikShushcha bhikShurUpashcha vipaNo mRRiduravyayaH |

mahAseno vishAkhashcha ShaShTibhAgo gavAM patiH || 42 ||

vajrahastashcha viShkambhI chamUstambhana eva cha |

vRRittAvRRittakarastAlo madhurmadhukalochanaH || 43 ||

vAchaspatyo vAjasano nityamAshramapUjitaH | [nityamAshritapUjitaH]

brahmachArI lokachArI sarvachArI vichAravit || 44 ||

IshAna IshvaraH kAlo nishAchArI pinAkabhRRit |

nimittastho nimittaM cha nandirnandikaro hariH || 45 ||

nandIshvarashcha nandI cha nandano nandivardhanaH |

bhagahArI nihantA cha kAlo brahmA pitAmahaH || 46 ||

chaturmukho mahAliNgashchAruliNgastathaiva cha |

li~NgAdhyakShaH surAdhyakSho yogAdhyakSho yugAvahaH || 47 ||

bIjAdhyakSho bIjakartA adhyAtmAnugato balaH |

itihAsaH sakalpashcha gautamo.atha nishAkaraH || 48 ||

dambho hyadambho vaidambho vashyo vashakaraH kaliH |

lokakartA pashupatirmahAkartA hyanauShadhaH || 49 ||

akSharaM paramaM brahma balavachChakra eva cha |

nItirhyanItiH shuddhAtmA shuddho mAnyo gatAgataH || 50 ||

bahuprasAdaH susvapno darpaNo.atha tvamitrajit |

vedakAro mantrakAro vidvAn samaramardanaH || 51 ||

mahAmeghanivAsI cha mahAghoro vashIkaraH |

agnijvAlo mahAjvAlo atidhUmro huto haviH || 52 ||

vRRiShaNaH sha~Nkaro nityavarchasvI dhUmaketanaH |

nIlastathA~Ngalubdhashcha shobhano niravagrahaH || 53 ||

svastidaH svastibhAvashcha bhAgI bhAgakaro laghuH |

utsaNgashcha mahANgashcha mahAgarbhaparAyaNaH || 54 ||

kRRiShNavarNaH suvarNashcha indriyaM sarvadehinAm |

mahApAdo mahAhasto mahAkAyo mahAyashAH || 55 ||

mahAmUrdhA mahAmAtro mahAnetro nishAlayaH |

mahAntako mahAkarNo mahoShThashcha mahAhanuH || 56 ||

mahAnAso mahAkamburmahAgrIvaH shmashAnabhAk |

mahAvakShA mahorasko hyantarAtmA mRRigAlayaH || 57 ||

lambano lambitoShThashcha mahAmAyaH payonidhiH |

mahAdanto mahAdaMShTro mahAjihvo mahAmukhaH || 58 ||

mahAnakho mahAromA mahAkesho mahAjaTaH |

prasannashcha prasAdashcha pratyayo girisAdhanaH || 59 ||

snehano.asnehanashchaiva ajitashcha mahAmuniH |

vRRikShAkAro vRRikShaketuranalo vAyuvAhanaH || 60 ||

gaNDalI merudhAmA cha devAdhipatireva cha |

atharvashIrShaH sAmAsya RRiksahasrAmitekShaNaH || 61 ||

yajuH pAdabhujo guhyaH prakAsho ja~NgamastathA |

amoghArthaH prasAdashcha abhigamyaH sudarshanaH || 62 ||

upakAraH priyaH sarvaH kanakaH kA~nchanachChaviH |

nAbhirnandikaro bhAvaH puShkarasthapatiH sthiraH || 63 ||

dvAdashastrAsanashchAdyo yajno yajnasamAhitaH |

naktaM kalishcha kAlashcha makaraH kAlapUjitaH || 64 ||

sagaNo gaNakArashcha bhUtavAhanasArathiH |

bhasmashayo bhasmagoptA bhasmabhUtastarurgaNaH || 65 ||

lokapAlastathA.aloko mahAtmA sarvapUjitaH |

shuklastrishuklaH sampannaH shuchirbhUtaniShevitaH || 66 ||

AshramasthaH kriyAvastho vishvakarmamatirvaraH |

vishAlashAkhastAmroShTho hyambujAlaH sunishchalaH || 67 ||

kapilaH kapishaH shukla Ayushchaiva paro.aparaH |

gandharvo hyaditistArkShyaH suvij~neyaH sushAradaH || 68 ||

parashvadhAyudho devo hyanukArI subAndhavaH |

tumbavINo mahAkrodha UrdhvaretA jaleshayaH || 69 ||

ugro vaMshakaro vaMsho vaMshanAdo hyaninditaH |

sarvA~NgarUpo mAyAvI suhRRido hyanilo.analaH || 70 ||

bandhano bandhakartA cha subandhanavimochanaH |

sa yaj~nAriH sa kAmArirmahAdaMShTro mahAyudhaH || 71 ||

bahudhA ninditaH sharvaH shaNkaraH shaNkaro.adhanaH |

amaresho mahAdevo vishvadevaH surArihA || 72 ||

ahirbudhnyo.anilAbhashcha chekitAno havistathA | [hari]

ajaikapAchcha kApAlI trisha~NkurajitaH shivaH || 73 ||

dhanvantarirdhUmaketuH skando vaishravaNastathA |

dhAtA shakrashcha viShNushcha mitrastvaShTA dhruvo dharaH || 74 ||

prabhAvaH sarvago vAyuraryamA savitA raviH |

uSha~Ngushcha vidhAtA cha mAndhAtA bhUtabhAvanaH || 75 ||

vibhurvarNavibhAvI cha sarvakAmaguNAvahaH |

padmanAbho mahAgarbhashchandravaktro.anilo.analaH || 76 ||

balavAMshchopashAntashcha purANaH puNyacha~nchurI |

kurukartA kuruvAsI kurubhUto guNauShadhaH || 77 ||

sarvAshayo darbhachArI sarveShAM prANinAM patiH |

devadevaH sukhAsaktaH sadasatsarvaratnavit || 78 ||

kailAsagirivAsI cha himavadgirisaMshrayaH |

kUlahArI kUlakartA bahuvidyo bahupradaH || 79 ||

vaNijo vardhakI vRRikSho vakulashchandanashChadaH |

sAragrIvo mahAjatruralolashcha mahauShadhaH || 80 ||

siddhArthakArI siddhArthashChandovyAkaraNottaraH |

siMhanAdaH siMhadaMShTraH siMhagaH siMhavAhanaH || 81 ||

prabhAvAtmA jagatkAlasthAlo lokahitastaruH |

sAraNgo navachakrANgaH ketumAlI sabhAvanaH || 82 ||

bhUtAlayo bhUtapatirahorAtramaninditaH || 83 ||

vAhitA sarvabhUtAnAM nilayashcha vibhurbhavaH |

amoghaH saMyato hyashvo bhojanaH prANadhAraNaH || 84 ||

dhRRitimAn matimAn dakShaH satkRRitashcha yugAdhipaH |

gopAlirgopatirgrAmo gocharmavasano hariH || 85 ||

hiraNyabAhushcha tathA guhApAlaH praveshinAm |

prakRRiShTArirmahAharSho jitakAmo jitendriyaH || 86 ||

gAndhArashcha suvAsashcha tapaHsakto ratirnaraH |

mahAgIto mahAnRRityo hyapsarogaNasevitaH || 87 ||

mahAketurmahAdhAturnaikasAnucharashchalaH |

AvedanIya AdeshaH sarvagandhasukhAvahaH || 88 ||

toraNastAraNo vAtaH paridhI patikhecharaH |

saMyogo vardhano vRRiddho ativRRiddho guNAdhikaH || 89 ||

nitya AtmasahAyashcha devAsurapatiH patiH |

yuktashcha yuktabAhushcha devo divisuparvaNaH || 90 ||

AShADhashcha suShADhashcha dhruvo.atha hariNo haraH |

vapurAvartamAnebhyo vasushreShTho mahApathaH || 91 ||

shirohArI vimarshashcha sarvalakShaNalakShitaH |

akShashcha rathayogI cha sarvayogI mahAbalaH || 92 ||

samAmnAyo.asamAmnAyastIrthadevo mahArathaH |

nirjIvo jIvano mantraH shubhAkSho bahukarkashaH || 93 ||

ratnaprabhUto raktANgo mahArNavanipAnavit | [ratnANgo]

mUlaM vishAlo hyamRRito vyaktAvyaktastaponidhiH || 94 ||

ArohaNo.adhirohashcha shIladhArI mahAyashAH |

senAkalpo mahAkalpo yogo yugakaro hariH || 95 || [yogakaro]

yugarUpo mahArUpo mahAnAgahano vadhaH |

nyAyanirvapaNaH pAdaH paNDito hyachalopamaH || 96 ||

bahumAlo mahAmAlaH shashI harasulochanaH |

vistAro lavaNaH kUpastriyugaH saphalodayaH || 97 ||

trilochano viShaNNA~Ngo maNividdho jaTAdharaH |

bindurvisargaH sumukhaH sharaH sarvAyudhaH sahaH || 98 ||

nivedanaH sukhAjAtaH sugandhAro mahAdhanuH |

gandhapAlI cha bhagavAnutthAnaH sarvakarmaNAm || 99 ||

manthAno bahulo vAyuH sakalaH sarvalochanaH |

talastAlaH karasthAlI UrdhvasaMhanano mahAn || 100 ||

ChatraM suchChatro vikhyAto lokaH sarvAshrayaH kramaH |

muNDo virUpo vikRRito daNDI kuNDI vikurvaNaH || 101 ||

haryakShaH kakubho vajrI shatajihvaH sahasrapAt |

sahasramUrdhA devendraH sarvadevamayo guruH || 102 ||

sahasrabAhuH sarvA~NgaH sharaNyaH sarvalokakRRit |

pavitraM trikakunmantraH kaniShThaH kRRiShNapi~NgalaH || 103 ||

brahmadaNDavinirmAtA shataghnIpAshashaktimAn |

padmagarbho mahAgarbho brahmagarbho jalodbhavaH || 104 ||

gabhastirbrahmakRRidbrahmI brahmavidbrAhmaNo gatiH |

anantarUpo naikAtmA tigmatejAH svayambhuvaH || 105 ||

UrdhvagAtmA pashupatirvAtaraMhA manojavaH |

chandanI padmanAlAgraH surabhyuttaraNo naraH || 106 ||

karNikAramahAsragvI nIlamauliH pinAkadhRRit |

umApatirumAkAnto jAhnavIdhRRidumAdhavaH || 107 ||

varo varAho varado vareNyaH sumahAsvanaH |

mahAprasAdo damanaH shatruhA shvetapi~NgalaH || 108 ||

pItAtmA paramAtmA cha prayatAtmA pradhAnadhRRit | [prItAtmA]

sarvapArshvamukhastryakSho dharmasAdhAraNo varaH || 109 ||

charAcharAtmA sUkShmAtmA amRRito govRRiSheshvaraH |

sAdhyarShirvasurAdityo vivasvAnsavitAmRRitaH || 110 ||

vyAsaH sargaH susa~NkShepo vistaraH paryayo naraH |

RRituH saMvatsaro mAsaH pakShaH sa~NkhyAsamApanaH || 111 ||

kalA kAShThA lavA mAtrA muhUrtAhaH kShapAH kShaNAH |

vishvakShetraM prajAbIjaM li~NgamAdyastu nirgamaH || 112 ||

sadasadvyaktamavyaktaM pitA mAtA pitAmahaH |

svargadvAraM prajAdvAraM mokShadvAraM triviShTapam || 113 ||

nirvANaM hlAdanashchaiva brahmalokaH parA gatiH |

devAsuravinirmAtA devAsuraparAyaNaH || 114 ||

devAsuragururdevo devAsuranamaskRRitaH |

devAsuramahAmAtro devAsuragaNAshrayaH || 115 ||

devAsuragaNAdhyakSho devAsuragaNAgraNIH |

devAtidevo devarShirdevAsuravarapradaH || 116 || [devAdi]

devAsureshvaro vishvo devAsuramaheshvaraH |

sarvadevamayo.achintyo devatAtmA.a.atmasambhavaH || 117 ||

udbhittrivikramo vaidyo virajo nIrajo.amaraH |

IDyo hastIshvaro vyAghro devasiMho nararShabhaH || 118 ||

vibudho.agravaraH sUkShmaH sarvadevastapomayaH |

suyuktaH shobhano vajrI prAsAnAM prabhavo.avyayaH || 119 ||

guhaH kAnto nijaH sargaH pavitraM sarvapAvanaH |

shRRiNgI shRRiNgapriyo babhrU rAjarAjo nirAmayaH || 120 ||

abhirAmaH suragaNo virAmaH sarvasAdhanaH |

lalATAkSho vishvadevo hariNo brahmavarchasaH || 121 ||

sthAvarANAM patishchaiva niyamendriyavardhanaH |

siddhArthaH siddhabhUtArtho.achintyaH satyavrataH shuchiH || 122 ||

vratAdhipaH paraM brahma bhaktAnAM paramA gatiH | [bhaktAnugrahakArakaH]

vimukto muktatejAshcha shrImAn shrIvardhano jagat || 123 ||

uttarapIThikA (phalashRRiti)

yathA pradhAnaM bhagavAniti bhaktyA stuto mayA |

yaM na brahmAdayo devA vidustattvena narShayaH || 1 ||

stotavyamarchyaM vandyaM cha kaH stoShyati jagatpatim |

bhaktyA tvevaM puraskRRitya mayA yaj~napatirvibhuH || 2 ||

tato.abhyanuj~nAM samprApya stuto matimatAM varaH |

shivamebhiH stuvan devaM nAmabhiH puShTivardhanaiH || 3 ||

nityayuktaH shuchirbhaktaH prApnotyAtmAnamAtmanA |

etaddhi paramaM brahma paraM brahmAdhigachChati || 4 ||

RRiShayashchaiva devAshcha stuvantyetena tatparam |

stUyamAno mahAdevastuShyate niyatAtmabhiH || 5 ||

bhaktAnukampI bhagavAnAtmasaMsthAkaro vibhuH |

tathaiva cha manuShyeShu ye manuShyAH pradhAnataH || 6 ||

AstikAH shraddadhAnAshcha bahubhirjanmabhiH stavaiH |

bhaktyA hyananyamIshAnaM paraM devaM sanAtanam || 7 ||

karmaNA manasA vAchA bhAvenAmitatejasaH |

shayAnA jAgramANAshcha vrajannupavishaMstathA || 8 ||

unmiShannimiShaMshchaiva chintayantaH punaH punaH |

shRRiNvantaH shrAvayantashcha kathayantashcha te bhavam || 9 ||

stuvantaH stUyamAnAshcha tuShyanti cha ramanti cha |

janmakoTisahasreShu nAnAsaMsArayoniShu || 10 ||

jantorvigatapApasya bhave bhaktiH prajAyate |

utpannA cha bhave bhaktirananyA sarvabhAvataH || 11 ||

bhAvinaH kAraNe chAsya sarvayuktasya sarvathA |

etaddeveShu duShprApaM manuShyeShu na labhyate || 12 ||

nirvighnA nishchalA rudre bhaktiravyabhichAriNI |

tasyaiva cha prasAdena bhaktirutpadyate nRRiNAm || 13 ||

yena yAnti parAM siddhiM tadbhAvagatachetasaH |

ye sarvabhAvAnugatAH prapadyante maheshvaram || 14 ||

prapannavatsalo devaH saMsArAttAnsamuddharet |

evamanye vikurvanti devAH saMsAramochanam || 15 ||

manuShyANAmRRite devaM nAnyA shaktistapobalam |

iti tenendrakalpena bhagavAn sadasatpatiH || 16 ||

kRRittivAsAH stutaH kRRiShNa taNDinA shubhabuddhinA |

stavametaM bhagavato brahmA svayamadhArayat || 17 ||

gIyate cha sa buddhyeta brahmA sha~Nkarasannidhau |

idaM puNyaM pavitraM cha sarvadA pApanAshanam || 18 ||

yogadaM mokShadaM chaiva svargadaM toShadaM tathA |

evametatpaThante ya ekabhaktyA tu sha~Nkaram || 19 ||

yA gatiH sA~NkhyayogAnAM vrajantyetAM gatiM tadA |

stavametaM prayatnena sadA rudrasya sannidhau || 20 ||

abdamekaM charedbhaktaH prApnuyAdIpsitaM phalam |

etadrahasyaM paramaM brahmaNo hRRidi saMsthitam || 21 ||

brahmA provAcha shakrAya shakraH provAcha mRRityave |

mRRityuH provAcha rudrebhyo rudrebhyastaNDimAgamat || 22 ||

mahatA tapasA prAptastaNDinA brahmasadmani |

taNDiH provAcha shukrAya gautamAya cha bhArgavaH || 23 ||

vaivasvatAya manave gautamaH prAha mAdhava |

nArAyaNAya sAdhyAya samAdhiShThAya dhImate || 24 ||

yamAya prAha bhagavAn sAdhyo nArAyaNo.achyutaH |

nAchiketAya bhagavAnAha vaivasvato yamaH || 25 ||

mArkaNDeyAya vArShNeya nAchiketo.abhyabhAShata |

mArkaNDeyAnmayA prApto niyamena janArdana || 26 ||

tavApyahamamitraghna stavaM dadyAM hyavishrutam |

svargyamArogyamAyuShyaM dhanyaM vedena sammitam || 27 ||

nAsya vighnaM vikurvanti dAnavA yakSharAkShasAH |

pishAchA yAtudhAnA vA guhyakA bhujagA api || 28 ||

yaH paTheta shuchiH pArtha brahmachArI jitendriyaH | [bhUtvA]

abhagnayogo varShaM tu so.ashvamedhaphalaM labhet || 29 ||

iti shrImahAbhArate anushAsanaparvaNi mahAdevasahasranAma stotraM nAma saptadasho.adhyAyaH ||