Shiva Sahasra Nama Stotram

ziva sahasra nAma stotram

zloka 1

pUrvapIThikA ||

vAsudeva uvAca |

tataH sa prayato bhUtvA mama tAta yudhiSThira |

prAJjaliH prAha viprarSirnAmasaGgrahamAditaH || 1 ||

upamanyuruvAca |

brahmaproktairRSiproktairvedavedAGgasambhavaiH |

sarvalokeSu vikhyAtaM stutyaM stoSyAmi nAmabhiH || 2 ||

mahadbhirvihitaiH satyaiH siddhaiH sarvArthasAdhakaiH |

RSiNA taNDinA bhaktyA kRtairvedakRtAtmanA || 3 ||

yathoktaiH sAdhubhiH khyAtairmunibhistattvadarzibhiH |

pravaraM prathamaM svargyaM sarvabhUtahitaM zubham || 4 ||

zrutaiH sarvatra jagati brahmalokAvatAritaiH |

satyaistatparamaM brahma brahmaproktaM sanAtanam || 5 ||

vakSye yadukulazreSTha zRNuSvAvahito mama |

varayainaM bhavaM devaM bhaktastvaM paramezvaram || 6 ||

tena te zrAvayiSyAmi yattadbrahma sanAtanam |

na zakyaM vistarAtkRtsnaM vaktuM sarvasya kenacit || 7 ||

yuktenApi vibhUtInAmapi varSazatairapi |

yasyAdirmadhyamantaM ca surairapi na gamyate || 8 ||

kastasya zaknuyAdvaktuM guNAn kArtsnyena mAdhava |

kiM tu devasya mahataH saGkSiptArthapadAkSaram || 9 ||

zaktitazcaritaM vakSye prasAdAttasya dhImataH |

aprApya tu tato'nujJAM na zakyaH stotumIzvaraH || 10 ||

yadA tenAbhyanujJAtaH stuto vai sa tadA mayA |

anAdinidhanasyAhaM jagadyonermahAtmanaH || 11 ||

nAmnAM kiJcitsamuddezaM vakSyAmyavyaktayoninaH |

varadasya vareNyasya vizvarUpasya dhImataH || 12 ||

zRNu nAmnAM ca yaM kRSNa yaduktaM padmayoninA |

dazanAmasahasrANi yAnyAha prapitAmahaH || 13 ||

tAni nirmathya manasA dadhno ghRtamivoddhRtam |

gireH sAraM yathA hema puSpasAraM yathA madhu || 14 ||

ghRtAtsAraM yathA maNDastathaitatsAramuddhRtam |

sarvapApApahamidaM caturvedasamanvitam || 15 ||

prayatnenAdhigantavyaM dhAryaM ca prayatAtmanA |

mAGgalyaM pauSTikaM caiva rakSoghnaM pAvanaM mahat || 16 ||

idaM bhaktAya dAtavyaM zraddadhAnAstikAya ca |

nAzraddadhAnarUpAya nAstikAyAjitAtmane || 17 ||

yazcAbhyasUyate devaM kAraNAtmAnamIzvaram |

sa kRSNa narakaM yAti saha pUrvaiH sahAtmajaiH || 18 ||

idaM dhyAnamidaM yogamidaM dhyeyamanuttamam |

idaM japyamidaM jJAnaM rahasyamidamuttamam || 19 ||

yaM jJAtvA antakAlepi gaccheta paramAM gatim |

pavitraM maGgalaM medhyaM kalyANamidamuttamam || 20 ||

idaM brahmA purA kRtvA sarvalokapitAmahaH |

sarva stavAnAM rAjatve divyAnAM samakalpayat || 21 ||

tadA prabhRti caivAyamIzvarasya mahAtmanaH |

stavarAja iti khyAto jagatyamarapUjitaH || 22 ||

brahmalokAdayaM svarge stavarAjo'vatAritaH |

yatastaNDiH purA prApa tena taNDikRto'bhavat || 23 ||

svargAccaivAtra bhUrlokaM taNDinA hyavatAritaH |

sarvamaGgalamAGgalyaM sarvapApapraNAzanam || 24 ||

nigadiSye mahAbAho stavAnAmuttamaM stavam |

brahmaNAmapi yadbrahma parANAmapi yatparam || 25 ||

tejasAmapi yattejastapasAmapi yattapaH |

zAntAnAmapi yaH zAnto dyutInAmapi yA dyutiH || 26 ||

dAntAnAmapi yo dAnto dhImatAmapi yA ca dhIH |

devAnAmapi yo deva RSINAmapi yastvRSiH || 27 ||

yajJAnAmapi yo yajJaH zivAnAmapi yaH zivaH |

rudrANAmapi yo rudraH prabhA prabhavatAmapi || 28 ||

yoginAmapi yo yogI kAraNAnAM ca kAraNam |

yato lokAH sambhavanti na bhavanti yataH punaH || 29 ||

sarvabhUtAtmabhUtasya harasyAmitatejasaH |

aSTottarasahasraM tu nAmnAM zarvasya me zRNu |

yacchrutvA manujavyAghra sarvAnkAmAnavApsyasi || 30 ||

dhyAnam |

zAntaM padmAsanasthaM zazidharamukuTaM paJcavaktraM trinetraM

zUlaM vajraM ca khaDgaM parazumabhayadaM dakSabhAge vahantam |

nAgaM pAzaM ca ghaNTAM pralayahutavahaM sAGkuzaM vAmabhAge

nAnAlaGkArayuktaM sphaTikamaNinibhaM pArvatIzaM namAmi ||

stotram |

OM sthiraH sthANuH prabhurbhImaH pravaro varado varaH |

sarvAtmA sarvavikhyAtaH sarvaH sarvakaro bhavaH || 1 ||

jaTI carmI zikhaNDI ca sarvAGgaH sarvabhAvanaH |

harazca hariNAkSazca sarvabhUtaharaH prabhuH || 2 ||

pravRttizca nivRttizca niyataH zAzvato dhruvaH |

zmazAnavAsI bhagavAn khacaro gocaro'rdanaH || 3 ||

abhivAdyo mahAkarmA tapasvI bhUtabhAvanaH |

unmattaveSapracchannaH sarvalokaprajApatiH || 4 ||

mahArUpo mahAkAyo vRSarUpo mahAyazAH |

mahAtmA sarvabhUtAtmA vizvarUpo mahAhanuH || 5 ||

lokapAlo'ntarhitAtmA prasAdo hayagardabhiH |

pavitraM ca mahAMzcaiva niyamo niyamAzritaH || 6 ||

sarvakarmA svayambhUta AdirAdikaro nidhiH |

sahasrAkSo vizAlAkSaH somo nakSatrasAdhakaH || 7 ||

candraH sUryaH zaniH keturgraho grahapatirvaraH |

atriratryA namaskartA mRgabANArpaNo'naghaH || 8 || [AdyantalayakartA ca]

mahAtapA ghoratapA adIno dInasAdhakaH |

saMvatsarakaro mantraH pramANaM paramaM tapaH || 9 ||

yogI yojyo mahAbIjo mahAretA mahAbalaH |

suvarNaretAH sarvajJaH subIjo bIjavAhanaH || 10 ||

dazabAhustvanimiSo nIlakaNTha umApatiH |

vizvarUpaH svayaM zreSTho balavIro balo gaNaH || 11 ||

gaNakartA gaNapatirdigvAsAH kAma eva ca |

mantravitparamo mantraH sarvabhAvakaro haraH || 12 ||

kamaNDaludharo dhanvI bANahastaH kapAlavAn |

azanI zataghnI khaDgI paTTizI cAyudhI mahAn || 13 ||

sruvahastaH surUpazca tejastejaskaro nidhiH |

uSNISI ca suvaktrazca udagro vinatastathA || 14 ||

dIrghazca harikezazca sutIrthaH kRSNa eva ca |

sRgAlarUpaH siddhArtho muNDaH sarvazubhaGkaraH || 15 ||

ajazca bahurUpazca gandhadhArI kapardyapi |

UrdhvaretA UrdhvaliGga UrdhvazAyI nabhaHsthalaH || 16 ||

trijaTI cIravAsAzca rudraH senApatirvibhuH |

ahazcaro naktaJcarastigmamanyuH suvarcasaH || 17 ||

gajahA daityahA kAlo lokadhAtA guNAkaraH |

siMhazArdUlarUpazca ArdracarmAmbarAvRtaH || 18 ||

kAlayogI mahAnAdaH sarvakAmazcatuSpathaH |

nizAcaraH pretacArI bhUtacArI mahezvaraH || 19 ||

bahubhUto bahudharaH svarbhAnuramito gatiH |

nRtyapriyo nityanarto nartakaH sarvalAlasaH || 20 ||

ghoro mahAtapAH pAzo nityo giriruho nabhaH |

sahasrahasto vijayo vyavasAyo hyatandritaH || 21 ||

adharSaNo dharSaNAtmA yajJahA kAmanAzakaH | [marSa]

dakSayAgApahArI ca susaho madhyamastathA || 22 ||

tejopahArI balahA mudito'rtho'jito'varaH |

gambhIraghoSo gambhIro gambhIrabalavAhanaH || 23 ||

nyagrodharUpo nyagrodho vRkSakarNasthitirvibhuH |

sutIkSNadazanazcaiva mahAkAyo mahAnanaH || 24 ||

viSvakseno hariryajJaH saMyugApIDavAhanaH |

tIkSNatApazca haryazvaH sahAyaH karmakAlavit || 25 ||

viSNuprasAdito yajJaH samudro baDabAmukhaH |

hutAzanasahAyazca prazAntAtmA hutAzanaH || 26 ||

ugratejA mahAtejA janyo vijayakAlavit |

jyotiSAmayanaM siddhiH sarvavigraha eva ca || 27 ||

zikhI muNDI jaTI jvAlI mUrtijo mUrdhago balI |

veNavI paNavI tAlI khalI kAlakaTaGkaTaH || 28 ||

nakSatravigrahamatirguNabuddhirlayo'gamaH |

prajApatirvizvabAhurvibhAgaH sarvago'mukhaH || 29 ||

vimocanaH susaraNo hiraNyakavacodbhavaH |

meDhrajo balacArI ca mahIcArI srutastathA || 30 || [meghajo]

sarvatUryaninAdI ca sarvAtodyaparigrahaH |

vyAlarUpo guhAvAsI guho mAlI taraGgavit || 31 ||

tridazastrikAladhRkkarmasarvabandhavimocanaH |

bandhanastvasurendrANAM yudhizatruvinAzanaH || 32 ||

sAGkhyaprasAdo durvAsAH sarvasAdhuniSevitaH |

praskandano vibhAgajJo atulyo yajJabhAgavit || 33 ||

sarvavAsaH sarvacArI durvAsA vAsavo'maraH |

haimo hemakaro'yajJaH sarvadhArI dharottamaH || 34 || [yajJaH]

lohitAkSo mahAkSazca vijayAkSo vizAradaH |

saGgraho nigrahaH kartA sarpacIranivAsanaH || 35 ||

mukhyo'mukhyazca dehazca kAhaliH sarvakAmadaH |

sarvakAlaprasAdazca subalo balarUpadhRt || 36 ||

sarvakAmavarazcaiva sarvadaH sarvatomukhaH |

AkAzanirvirUpazca nipAtI hyavazaH khagaH || 37 ||

raudrarUpo'MzurAdityo bahurazmiH suvarcasI |

vasuvego mahAvego manovego nizAcaraH || 38 ||

sarvavAsI zriyAvAsI upadezakaro'karaH |

munirAtmanirAlokaH sambhagnazca sahasradaH || 39 ||

pakSI ca pakSarUpazca atidIpto vizAM patiH |

unmAdo madanaH kAmo hyazvattho'rthakaro yazaH || 40 ||

vAmadevazca vAmazca prAgdakSiNazca vAmanaH |

siddhayogI maharSizca siddhArthaH siddhasAdhakaH || 41 ||

bhikSuzca bhikSurUpazca vipaNo mRduravyayaH |

mahAseno vizAkhazca SaSTibhAgo gavAM patiH || 42 ||

vajrahastazca viSkambhI camUstambhana eva ca |

vRttAvRttakarastAlo madhurmadhukalocanaH || 43 ||

vAcaspatyo vAjasano nityamAzramapUjitaH | [nityamAzritapUjitaH]

brahmacArI lokacArI sarvacArI vicAravit || 44 ||

IzAna IzvaraH kAlo nizAcArI pinAkabhRt |

nimittastho nimittaM ca nandirnandikaro hariH || 45 ||

nandIzvarazca nandI ca nandano nandivardhanaH |

bhagahArI nihantA ca kAlo brahmA pitAmahaH || 46 ||

caturmukho mahAliGgazcAruliGgastathaiva ca |

liGgAdhyakSaH surAdhyakSo yogAdhyakSo yugAvahaH || 47 ||

bIjAdhyakSo bIjakartA adhyAtmAnugato balaH |

itihAsaH sakalpazca gautamo'tha nizAkaraH || 48 ||

dambho hyadambho vaidambho vazyo vazakaraH kaliH |

lokakartA pazupatirmahAkartA hyanauSadhaH || 49 ||

akSaraM paramaM brahma balavacchakra eva ca |

nItirhyanItiH zuddhAtmA zuddho mAnyo gatAgataH || 50 ||

bahuprasAdaH susvapno darpaNo'tha tvamitrajit |

vedakAro mantrakAro vidvAn samaramardanaH || 51 ||

mahAmeghanivAsI ca mahAghoro vazIkaraH |

agnijvAlo mahAjvAlo atidhUmro huto haviH || 52 ||

vRSaNaH zaGkaro nityavarcasvI dhUmaketanaH |

nIlastathAGgalubdhazca zobhano niravagrahaH || 53 ||

svastidaH svastibhAvazca bhAgI bhAgakaro laghuH |

utsaGgazca mahAGgazca mahAgarbhaparAyaNaH || 54 ||

kRSNavarNaH suvarNazca indriyaM sarvadehinAm |

mahApAdo mahAhasto mahAkAyo mahAyazAH || 55 ||

mahAmUrdhA mahAmAtro mahAnetro nizAlayaH |

mahAntako mahAkarNo mahoSThazca mahAhanuH || 56 ||

mahAnAso mahAkamburmahAgrIvaH zmazAnabhAk |

mahAvakSA mahorasko hyantarAtmA mRgAlayaH || 57 ||

lambano lambitoSThazca mahAmAyaH payonidhiH |

mahAdanto mahAdaMSTro mahAjihvo mahAmukhaH || 58 ||

mahAnakho mahAromA mahAkezo mahAjaTaH |

prasannazca prasAdazca pratyayo girisAdhanaH || 59 ||

snehano'snehanazcaiva ajitazca mahAmuniH |

vRkSAkAro vRkSaketuranalo vAyuvAhanaH || 60 ||

gaNDalI merudhAmA ca devAdhipatireva ca |

atharvazIrSaH sAmAsya RksahasrAmitekSaNaH || 61 ||

yajuH pAdabhujo guhyaH prakAzo jaGgamastathA |

amoghArthaH prasAdazca abhigamyaH sudarzanaH || 62 ||

upakAraH priyaH sarvaH kanakaH kAJcanacchaviH |

nAbhirnandikaro bhAvaH puSkarasthapatiH sthiraH || 63 ||

dvAdazastrAsanazcAdyo yajJo yajJasamAhitaH |

naktaM kalizca kAlazca makaraH kAlapUjitaH || 64 ||

sagaNo gaNakArazca bhUtavAhanasArathiH |

bhasmazayo bhasmagoptA bhasmabhUtastarurgaNaH || 65 ||

lokapAlastathA'loko mahAtmA sarvapUjitaH |

zuklastrizuklaH sampannaH zucirbhUtaniSevitaH || 66 ||

AzramasthaH kriyAvastho vizvakarmamatirvaraH |

vizAlazAkhastAmroSTho hyambujAlaH sunizcalaH || 67 ||

kapilaH kapizaH zukla Ayuzcaiva paro'paraH |

gandharvo hyaditistArkSyaH suvijJeyaH suzAradaH || 68 ||

parazvadhAyudho devo hyanukArI subAndhavaH |

tumbavINo mahAkrodha UrdhvaretA jalezayaH || 69 ||

ugro vaMzakaro vaMzo vaMzanAdo hyaninditaH |

sarvAGgarUpo mAyAvI suhRdo hyanilo'nalaH || 70 ||

bandhano bandhakartA ca subandhanavimocanaH |

sa yajJAriH sa kAmArirmahAdaMSTro mahAyudhaH || 71 ||

bahudhA ninditaH zarvaH zaGkaraH zaGkaro'dhanaH |

amarezo mahAdevo vizvadevaH surArihA || 72 ||

ahirbudhnyo'nilAbhazca cekitAno havistathA | [hari]

ajaikapAcca kApAlI trizaGkurajitaH zivaH || 73 ||

dhanvantarirdhUmaketuH skando vaizravaNastathA |

dhAtA zakrazca viSNuzca mitrastvaSTA dhruvo dharaH || 74 ||

prabhAvaH sarvago vAyuraryamA savitA raviH |

uSaGguzca vidhAtA ca mAndhAtA bhUtabhAvanaH || 75 ||

vibhurvarNavibhAvI ca sarvakAmaguNAvahaH |

padmanAbho mahAgarbhazcandravaktro'nilo'nalaH || 76 ||

balavAMzcopazAntazca purANaH puNyacaJcurI |

kurukartA kuruvAsI kurubhUto guNauSadhaH || 77 ||

sarvAzayo darbhacArI sarveSAM prANinAM patiH |

devadevaH sukhAsaktaH sadasatsarvaratnavit || 78 ||

kailAsagirivAsI ca himavadgirisaMzrayaH |

kUlahArI kUlakartA bahuvidyo bahupradaH || 79 ||

vaNijo vardhakI vRkSo vakulazcandanazchadaH |

sAragrIvo mahAjatruralolazca mahauSadhaH || 80 ||

siddhArthakArI siddhArthazchandovyAkaraNottaraH |

siMhanAdaH siMhadaMSTraH siMhagaH siMhavAhanaH || 81 ||

prabhAvAtmA jagatkAlasthAlo lokahitastaruH |

sAraGgo navacakrAGgaH ketumAlI sabhAvanaH || 82 ||

bhUtAlayo bhUtapatirahorAtramaninditaH || 83 ||

vAhitA sarvabhUtAnAM nilayazca vibhurbhavaH |

amoghaH saMyato hyazvo bhojanaH prANadhAraNaH || 84 ||

dhRtimAn matimAn dakSaH satkRtazca yugAdhipaH |

gopAlirgopatirgrAmo gocarmavasano hariH || 85 ||

hiraNyabAhuzca tathA guhApAlaH pravezinAm |

prakRSTArirmahAharSo jitakAmo jitendriyaH || 86 ||

gAndhArazca suvAsazca tapaHsakto ratirnaraH |

mahAgIto mahAnRtyo hyapsarogaNasevitaH || 87 ||

mahAketurmahAdhAturnaikasAnucarazcalaH |

AvedanIya AdezaH sarvagandhasukhAvahaH || 88 ||

toraNastAraNo vAtaH paridhI patikhecaraH |

saMyogo vardhano vRddho ativRddho guNAdhikaH || 89 ||

nitya AtmasahAyazca devAsurapatiH patiH |

yuktazca yuktabAhuzca devo divisuparvaNaH || 90 ||

ASADhazca suSADhazca dhruvo'tha hariNo haraH |

vapurAvartamAnebhyo vasuzreSTho mahApathaH || 91 ||

zirohArI vimarzazca sarvalakSaNalakSitaH |

akSazca rathayogI ca sarvayogI mahAbalaH || 92 ||

samAmnAyo'samAmnAyastIrthadevo mahArathaH |

nirjIvo jIvano mantraH zubhAkSo bahukarkazaH || 93 ||

ratnaprabhUto raktAGgo mahArNavanipAnavit | [ratnAGgo]

mUlaM vizAlo hyamRto vyaktAvyaktastaponidhiH || 94 ||

ArohaNo'dhirohazca zIladhArI mahAyazAH |

senAkalpo mahAkalpo yogo yugakaro hariH || 95 || [yogakaro]

yugarUpo mahArUpo mahAnAgahano vadhaH |

nyAyanirvapaNaH pAdaH paNDito hyacalopamaH || 96 ||

bahumAlo mahAmAlaH zazI harasulocanaH |

vistAro lavaNaH kUpastriyugaH saphalodayaH || 97 ||

trilocano viSaNNAGgo maNividdho jaTAdharaH |

bindurvisargaH sumukhaH zaraH sarvAyudhaH sahaH || 98 ||

nivedanaH sukhAjAtaH sugandhAro mahAdhanuH |

gandhapAlI ca bhagavAnutthAnaH sarvakarmaNAm || 99 ||

manthAno bahulo vAyuH sakalaH sarvalocanaH |

talastAlaH karasthAlI UrdhvasaMhanano mahAn || 100 ||

chatraM succhatro vikhyAto lokaH sarvAzrayaH kramaH |

muNDo virUpo vikRto daNDI kuNDI vikurvaNaH || 101 ||

haryakSaH kakubho vajrI zatajihvaH sahasrapAt |

sahasramUrdhA devendraH sarvadevamayo guruH || 102 ||

sahasrabAhuH sarvAGgaH zaraNyaH sarvalokakRt |

pavitraM trikakunmantraH kaniSThaH kRSNapiGgalaH || 103 ||

brahmadaNDavinirmAtA zataghnIpAzazaktimAn |

padmagarbho mahAgarbho brahmagarbho jalodbhavaH || 104 ||

gabhastirbrahmakRdbrahmI brahmavidbrAhmaNo gatiH |

anantarUpo naikAtmA tigmatejAH svayambhuvaH || 105 ||

UrdhvagAtmA pazupatirvAtaraMhA manojavaH |

candanI padmanAlAgraH surabhyuttaraNo naraH || 106 ||

karNikAramahAsragvI nIlamauliH pinAkadhRt |

umApatirumAkAnto jAhnavIdhRdumAdhavaH || 107 ||

varo varAho varado vareNyaH sumahAsvanaH |

mahAprasAdo damanaH zatruhA zvetapiGgalaH || 108 ||

pItAtmA paramAtmA ca prayatAtmA pradhAnadhRt | [prItAtmA]

sarvapArzvamukhastryakSo dharmasAdhAraNo varaH || 109 ||

carAcarAtmA sUkSmAtmA amRto govRSezvaraH |

sAdhyarSirvasurAdityo vivasvAnsavitAmRtaH || 110 ||

vyAsaH sargaH susaGkSepo vistaraH paryayo naraH |

RtuH saMvatsaro mAsaH pakSaH saGkhyAsamApanaH || 111 ||

kalA kASThA lavA mAtrA muhUrtAhaH kSapAH kSaNAH |

vizvakSetraM prajAbIjaM liGgamAdyastu nirgamaH || 112 ||

sadasadvyaktamavyaktaM pitA mAtA pitAmahaH |

svargadvAraM prajAdvAraM mokSadvAraM triviSTapam || 113 ||

nirvANaM hlAdanazcaiva brahmalokaH parA gatiH |

devAsuravinirmAtA devAsuraparAyaNaH || 114 ||

devAsuragururdevo devAsuranamaskRtaH |

devAsuramahAmAtro devAsuragaNAzrayaH || 115 ||

devAsuragaNAdhyakSo devAsuragaNAgraNIH |

devAtidevo devarSirdevAsuravarapradaH || 116 || [devAdi]

devAsurezvaro vizvo devAsuramahezvaraH |

sarvadevamayo'cintyo devatAtmA''tmasambhavaH || 117 ||

udbhittrivikramo vaidyo virajo nIrajo'maraH |

IDyo hastIzvaro vyAghro devasiMho nararSabhaH || 118 ||

vibudho'gravaraH sUkSmaH sarvadevastapomayaH |

suyuktaH zobhano vajrI prAsAnAM prabhavo'vyayaH || 119 ||

guhaH kAnto nijaH sargaH pavitraM sarvapAvanaH |

zRGgI zRGgapriyo babhrU rAjarAjo nirAmayaH || 120 ||

abhirAmaH suragaNo virAmaH sarvasAdhanaH |

lalATAkSo vizvadevo hariNo brahmavarcasaH || 121 ||

sthAvarANAM patizcaiva niyamendriyavardhanaH |

siddhArthaH siddhabhUtArtho'cintyaH satyavrataH zuciH || 122 ||

vratAdhipaH paraM brahma bhaktAnAM paramA gatiH | [bhaktAnugrahakArakaH]

vimukto muktatejAzca zrImAn zrIvardhano jagat || 123 ||

uttarapIThikA (phalazRti)

yathA pradhAnaM bhagavAniti bhaktyA stuto mayA |

yaM na brahmAdayo devA vidustattvena narSayaH || 1 ||

stotavyamarcyaM vandyaM ca kaH stoSyati jagatpatim |

bhaktyA tvevaM puraskRtya mayA yajJapatirvibhuH || 2 ||

tato'bhyanujJAM samprApya stuto matimatAM varaH |

zivamebhiH stuvan devaM nAmabhiH puSTivardhanaiH || 3 ||

nityayuktaH zucirbhaktaH prApnotyAtmAnamAtmanA |

etaddhi paramaM brahma paraM brahmAdhigacchati || 4 ||

RSayazcaiva devAzca stuvantyetena tatparam |

stUyamAno mahAdevastuSyate niyatAtmabhiH || 5 ||

bhaktAnukampI bhagavAnAtmasaMsthAkaro vibhuH |

tathaiva ca manuSyeSu ye manuSyAH pradhAnataH || 6 ||

AstikAH zraddadhAnAzca bahubhirjanmabhiH stavaiH |

bhaktyA hyananyamIzAnaM paraM devaM sanAtanam || 7 ||

karmaNA manasA vAcA bhAvenAmitatejasaH |

zayAnA jAgramANAzca vrajannupavizaMstathA || 8 ||

unmiSannimiSaMzcaiva cintayantaH punaH punaH |

zRNvantaH zrAvayantazca kathayantazca te bhavam || 9 ||

stuvantaH stUyamAnAzca tuSyanti ca ramanti ca |

janmakoTisahasreSu nAnAsaMsArayoniSu || 10 ||

jantorvigatapApasya bhave bhaktiH prajAyate |

utpannA ca bhave bhaktirananyA sarvabhAvataH || 11 ||

bhAvinaH kAraNe cAsya sarvayuktasya sarvathA |

etaddeveSu duSprApaM manuSyeSu na labhyate || 12 ||

nirvighnA nizcalA rudre bhaktiravyabhicAriNI |

tasyaiva ca prasAdena bhaktirutpadyate nRNAm || 13 ||

yena yAnti parAM siddhiM tadbhAvagatacetasaH |

ye sarvabhAvAnugatAH prapadyante mahezvaram || 14 ||

prapannavatsalo devaH saMsArAttAnsamuddharet |

evamanye vikurvanti devAH saMsAramocanam || 15 ||

manuSyANAmRte devaM nAnyA zaktistapobalam |

iti tenendrakalpena bhagavAn sadasatpatiH || 16 ||

kRttivAsAH stutaH kRSNa taNDinA zubhabuddhinA |

stavametaM bhagavato brahmA svayamadhArayat || 17 ||

gIyate ca sa buddhyeta brahmA zaGkarasannidhau |

idaM puNyaM pavitraM ca sarvadA pApanAzanam || 18 ||

yogadaM mokSadaM caiva svargadaM toSadaM tathA |

evametatpaThante ya ekabhaktyA tu zaGkaram || 19 ||

yA gatiH sAGkhyayogAnAM vrajantyetAM gatiM tadA |

stavametaM prayatnena sadA rudrasya sannidhau || 20 ||

abdamekaM caredbhaktaH prApnuyAdIpsitaM phalam |

etadrahasyaM paramaM brahmaNo hRdi saMsthitam || 21 ||

brahmA provAca zakrAya zakraH provAca mRtyave |

mRtyuH provAca rudrebhyo rudrebhyastaNDimAgamat || 22 ||

mahatA tapasA prAptastaNDinA brahmasadmani |

taNDiH provAca zukrAya gautamAya ca bhArgavaH || 23 ||

vaivasvatAya manave gautamaH prAha mAdhava |

nArAyaNAya sAdhyAya samAdhiSThAya dhImate || 24 ||

yamAya prAha bhagavAn sAdhyo nArAyaNo'cyutaH |

nAciketAya bhagavAnAha vaivasvato yamaH || 25 ||

mArkaNDeyAya vArSNeya nAciketo'bhyabhASata |

mArkaNDeyAnmayA prApto niyamena janArdana || 26 ||

tavApyahamamitraghna stavaM dadyAM hyavizrutam |

svargyamArogyamAyuSyaM dhanyaM vedena sammitam || 27 ||

nAsya vighnaM vikurvanti dAnavA yakSarAkSasAH |

pizAcA yAtudhAnA vA guhyakA bhujagA api || 28 ||

yaH paTheta zuciH pArtha brahmacArI jitendriyaH | [bhUtvA]

abhagnayogo varSaM tu so'zvamedhaphalaM labhet || 29 ||

iti zrImahAbhArate anuzAsanaparvaNi mahAdevasahasranAma stotraM nAma saptadazo'dhyAyaH ||