Shiva Mahimna Stotram

ziva mahimnA stotram

zloka 1

atha zrI zivamahimnastotram ||

mahimnaH pAraM te paramaviduSo yadyasadRzI

stutirbrahmAdInAmapi tadavasannAstvayi giraH |

athA'vAcyaH sarvaH svamatipariNAmAvadhi gRNan

mamApyeSa stotre hara nirapavAdaH parikaraH || 1 ||

atItaH panthAnaM tava ca mahimA vAGmanasayoH

atadvyAvRttyA yaM cakitamabhidhatte zrutirapi |

sa kasya stotavyaH katividhaguNaH kasya viSayaH

pade tvarvAcIne patati na manaH kasya na vacaH || 2 ||

madhusphItA vAcaH paramamamRtaM nirmitavataH

tava brahman​ kiM vAgapi suragurorvismayapadam |

mama tvetAM vANIM guNakathanapuNyena bhavataH

punAmItyarthe'smin puramathana buddhirvyavasitA || 3 ||

tavaizvaryaM yattajjagadudayarakSApralayakRt

trayIvastu vyastaM tisruSu guNabhinnAsu tanuSu |

abhavyAnAmasmin varada ramaNIyAmaramaNIM

vihantuM vyAkrozIM vidadhata ihaike jaDadhiyaH || 4 ||

kimIhaH kiGkAyaH sa khalu kimupAyastribhuvanaM

kimAdhAro dhAtA sRjati kimupAdAna iti ca |

atarkyaizvarye tvayyanavasara duHstho hatadhiyaH

kutarko'yaM kAMzcit mukharayati mohAya jagataH || 5 ||

ajanmAno lokAH kimavayavavanto'pi jagatAM

adhiSThAtAraM kiM bhavavidhiranAdRtya bhavati |

anIzo vA kuryAd bhuvanajanane kaH parikaro

yato mandAstvAM pratyamaravara saMzerata ime || 6 ||

trayI sAGkhyaM yogaH pazupatimataM vaiSNavamiti

prabhinne prasthAne paramidamadaH pathyamiti ca |

rucInAM vaicitryAdRjukuTila nAnApathajuSAM

nRNAmeko gamyastvamasi payasAmarNava iva || 7 ||

mahokSaH khaTvAGgaM parazurajinaM bhasma phaNinaH

kapAlaM cetIyattava varada tantropakaraNam |

surAstAM tAmRddhiM dadhati tu bhavadbhUpraNihitAM

na hi svAtmArAmaM viSayamRgatRSNA bhramayati || 8 ||

dhruvaM kazcit sarvaM sakalamaparastvadhruvamidaM

paro dhrauvyA'dhrauvye jagati gadati vyastaviSaye |

samaste'pyetasmin puramathana tairvismita iva

stuvan​ jihremi tvAM na khalu nanu dhRSTA mukharatA || 9 ||

tavaizvaryaM yatnAd yadupari viriJcirhariradhaH

paricchetuM yAtAvanalamanalaskandhavapuSaH |

tato bhaktizraddhA-bharaguru-gRNadbhyAM giriza yat

svayaM tasthe tAbhyAM tava kimanuvRttirna phalati || 10 ||

ayatnAdAsAdya tribhuvanamavairavyatikaraM

dazAsyo yadbAhUnabhRta raNakaNDU-paravazAn |

ziraHpadmazreNI-racitacaraNAmbhoruha-baleH

sthirAyAstvadbhaktestripurahara visphUrjitamidam || 11 ||

amuSya tvatsevA-samadhigatasAraM bhujavanaM

balAt kailAse'pi tvadadhivasatau vikramayataH |

alabhyA pAtAle'pyalasacalitAGguSThazirasi

pratiSThA tvayyAsId dhruvamupacito muhyati khalaH || 12 ||

yadRddhiM sutrAmNo varada paramoccairapi satIM

adhazcakre bANaH parijanavidheyatribhuvanaH |

na taccitraM tasmin varivasitari tvaccaraNayoH

na kasyApyunnatyai bhavati zirasastvayyavanatiH || 13 ||

akANDa-brahmANDa-kSayacakita-devAsurakRpA

vidheyasyA''sId​ yastrinayana viSaM saMhRtavataH |

sa kalmASaH kaNThe tava na kurute na zriyamaho

vikAro'pi zlAghyo bhuvana-bhaya- bhaGga- vyasaninaH || 14 ||

asiddhArthA naiva kvacidapi sadevAsuranare

nivartante nityaM jagati jayino yasya vizikhAH |

sa pazyannIza tvAmitarasurasAdhAraNamabhUt

smaraH smartavyAtmA na hi vaziSu pathyaH paribhavaH || 15 ||

mahI pAdAghAtAd vrajati sahasA saMzayapadaM

padaM viSNorbhrAmyad bhuja-parigha-rugNa-graha- gaNam |

muhurdyaurdausthyaM yAtyanibhRta-jaTA-tADita-taTA

jagadrakSAyai tvaM naTasi nanu vAmaiva vibhutA || 16 ||

viyadvyApI tArA-gaNa-guNita-phenodgama-ruciH

pravAho vArAM yaH pRSatalaghudRSTaH zirasi te |

jagaddvIpAkAraM jaladhivalayaM tena kRtamiti

anenaivonneyaM dhRtamahima divyaM tava vapuH || 17 ||

rathaH kSoNI yantA zatadhRtiragendro dhanuratho

rathAGge candrArkau ratha-caraNa-pANiH zara iti |

didhakSoste ko'yaM tripuratRNamADambara-vidhiH

vidheyaiH krIDantyo na khalu paratantrAH prabhudhiyaH || 18 ||

hariste sAhasraM kamala balimAdhAya padayoH

yadekone tasmin​ nijamudaharannetrakamalam |

gato bhaktyudrekaH pariNatimasau cakravapuSaH

trayANAM rakSAyai tripurahara jAgarti jagatAm || 19 ||

kratau supte jAgrat​ tvamasi phalayoge kratumatAM

kva karma pradhvastaM phalati puruSArAdhanamRte |

atastvAM samprekSya kratuSu phaladAna-pratibhuvaM

zrutau zraddhAM badhvA dRDhaparikaraH karmasu janaH || 20 ||

kriyAdakSo dakSaH kratupatiradhIzastanubhRtAM

RSINAmArtvijyaM zaraNada sadasyAH sura-gaNAH |

kratubhraMzastvattaH kratuphala-vidhAna-vyasaninaH

dhruvaM kartuH zraddhA-vidhuramabhicArAya hi makhAH || 21 ||

prajAnAthaM nAtha prasabhamabhikaM svAM duhitaraM

gataM rohid​ bhUtAM riramayiSumRSyasya vapuSA |

dhanuSpANeryAtaM divamapi sapatrAkRtamamuM

trasantaM te'dyApi tyajati na mRgavyAdharabhasaH || 22 ||

svalAvaNyAzaMsA dhRtadhanuSamahnAya tRNavat

puraH pluSTaM dRSTvA puramathana puSpAyudhamapi |

yadi straiNaM devI yamanirata-dehArdha-ghaTanAt

avaiti tvAmaddhA bata varada mugdhA yuvatayaH || 23 ||

zmazAneSvAkrIDA smarahara pizAcAH sahacarAH

citA-bhasmAlepaH sragapi nRkaroTI-parikaraH |

amaGgalyaM zIlaM tava bhavatu nAmaivamakhilaM

tathApi smartRRNAM varada paramaM maGgalamasi || 24 ||

manaH pratyakcitte savidhamavidhAyAtta-marutaH

prahRSyadromANaH pramada-salilotsaGgati-dRzaH |

yadAlokyAhlAdaM hrada iva nimajyAmRtamaye

dadhatyantastattvaM kimapi yaminastat kila bhavAn || 25 ||

tvamarkastvaM somastvamasi pavanastvaM hutavahaH

tvamApastvaM vyoma tvamu dharaNirAtmA tvamiti ca |

paricchinnAmevaM tvayi pariNatA bibhrati giraM

na vidmastattattvaM vayamiha tu yat tvaM na bhavasi || 26 ||

trayIM tisro vRttIstribhuvanamatho trInapi surAn

akArAdyairvarNaistribhirabhidadhat tIrNavikRti |

turIyaM te dhAma dhvanibhiravarundhAnamaNubhiH

samastaM vyastaM tvAM zaraNada gRNAtyomiti padam || 27 ||

bhavaH zarvo rudraH pazupatirathograH sahamahAn

tathA bhImezAnAviti yadabhidhAnASTakamidam |

amuSmin pratyekaM pravicarati deva zrutirapi

priyAyAsmaidhAmne praNihita-namasyo'smi bhavate || 28 ||

namo nediSThAya priyadava daviSThAya ca namaH

namaH kSodiSThAya smarahara mahiSThAya ca namaH |

namo varSiSThAya trinayana yaviSThAya ca namaH

namaH sarvasmai te tadidamatisarvAya ca namaH || 29 ||

bahula-rajase vizvotpattau bhavAya namo namaH

prabala-tamase tat saMhAre harAya namo namaH |

jana-sukhakRte sattvodriktau mRDAya namo namaH

pramahasi pade nistraiguNye zivAya namo namaH || 30 ||

kRza-pariNati-cetaH klezavazyaM kva cedaM

kva ca tava guNa-sImollaGghinI zazvadRddhiH |

iti cakitamamandIkRtya mAM bhaktirAdhAd

varada caraNayoste vAkya-puSpopahAram || 31 ||

asita-giri-samaM syAt kajjalaM sindhu-pAtre

sura-taruvara-zAkhA lekhanI patramurvI |

likhati yadi gRhItvA zAradA sarvakAlaM

tadapi tava guNAnAmIza pAraM na yAti || 32 ||

asura-sura-munIndrairarcitasyendu-mauleH

grathita-guNamahimno nirguNasyezvarasya |

sakala-gaNa-variSThaH puSpadantAbhidhAnaH

ruciramalaghuvRttaiH stotrametaccakAra || 33 ||

aharaharanavadyaM dhUrjaTeH stotrametat

paThati paramabhaktyA zuddha-cittaH pumAn yaH |

sa bhavati zivaloke rudratulyastathA'tra

pracuratara-dhanAyuH putravAn kIrtimAMzca || 34 ||

mahezAnnAparo devo mahimno nAparA stutiH |

aghorAnnAparo mantro nAsti tattvaM guroH param || 35 ||

dIkSA dAnaM tapastIrthaM jJAnaM yAgAdikAH kriyAH |

mahimnastava pAThasya kalAM nArhanti SoDazIm || 36 ||

kusumadazana-nAmA sarva-gandharva-rAjaH

zazidharavara-maulerdevadevasya dAsaH |

sa khalu nija-mahimno bhraSTa evAsya roSAt

stavanamidamakArSId divya-divyaM mahimnaH || 37 ||

suragurumabhipUjya svarga-mokSaika-hetuM [suravaramunipUjyaM]

paThati yadi manuSyaH prAJjalirnAnya-cetAH |

vrajati ziva-samIpaM kinnaraiH stUyamAnaH

stavanamidamamoghaM puSpadantapraNItam || 38 ||

zrI puSpadanta-mukha-paGkaja-nirgatena

stotreNa kilbiSa-hareNa hara-priyeNa |

kaNThasthitena paThitena samAhitena

suprINito bhavati bhUtapatirmahezaH || 43 ||

AsamAptamidaM stotraM puNyaM gandharva-bhASitam |

anaupamyaM manohAri sarvamIzvaravarNanam || 39 ||

tava tattvaM na jAnAmi kIdRzo'si mahezvara |

yAdRzo'si mahAdeva tAdRzAya namo namaH || 41 ||

ekakAlaM dvikAlaM vA trikAlaM yaH paThennaraH |

sarvapApa-vinirmuktaH ziva loke mahIyate || 42 ||

ityeSA vAGmayI pUjA zrImacchaGkara-pAdayoH |

arpitA tena devezaH prIyatAM me sadAzivaH || 40 ||

|| iti zrI puSpadanta viracitaM zivamahimna-stotraM samAptam ||