Daridrya Dahana Shiva Stotram

dAridrya dahana ziva stotram

zloka 1

vizvezvarAya narakArNava tAraNAya

karNAmRtAya zazizekhara dhAraNAya |

karpUrakAnti dhavalAya jaTAdharAya

dAridryaduHkha dahanAya namazzivAya || 1 ||

gaurIpriyAya rajanIza kalAdharAya

kAlAntakAya bhujagAdhipa kaGkaNAya |

gaGgAdharAya gajarAja vimardhanAya

dAridryaduHkha dahanAya namazzivAya || 2 ||

bhaktapriyAya [bhaktipriyAya] bhavaroga bhayApahAya

ugrAya duHkha [durga] bhavasAgara tAraNAya |

jyotirmayAya guNanAma sunRtyakAya

dAridryaduHkha dahanAya namazzivAya || 3 ||

carmAmbarAya zavabhasma vilepanAya

phAlekSaNAya maNikuNDala maNDitAya |

maJjIrapAdayugalAya jaTAdharAya

dAridryaduHkha dahanAya namazzivAya || 4 ||

paJcAnanAya phaNirAja vibhUSaNAya

hemAGkuzAya bhuvanatraya maNDitAya

Ananda bhUmi varadAya tamopayAya [tamomayAya] |

dAridryaduHkha dahanAya namazzivAya || 5 ||

bhAnupriyAya bhavasAgara tAraNAya

kAlAntakAya kamalAsana pUjitAya |

netratrayAya zubhalakSaNa lakSitAya

dAridryaduHkha dahanAya namazzivAya || 6 ||

rAmapriyAya raghunAtha varapradAya

nAgapriyAya narakArNava tAraNAya |

puNyAya [puNyeSu] puNyabharitAya surArcitAya

dAridryaduHkha dahanAya namazzivAya || 7 ||

muktezvarAya phaladAya gaNezvarAya

gItApriyAya vRSabhezvara vAhanAya |

mAtaGgacarma vasanAya mahezvarAya

dAridryaduHkha dahanAya namazzivAya || 8 ||

vasiSThena kRtaM stotraM sarvaroga nivAraNam |

sarvasampatkaraM zIghraM putrapautrAdi vardhanam |

trisandhyaM yaH paThennityaM sa hi svarga mavApnuyAt || 9 ||

|| iti zrI vasiSTha viracitaM dAridryadahana zivastotraM sampUrNam ||

alternate first verse

gaurIvilAsa bhuvanAya mahezvarAya

paJcAnanAya zaraNAgata kalpadAya |

zarvAya sarvajagatAmadhipAya

tasmai dAridrya duHkhadahanAya namaH zivAya ||