Sri Krishna Sahasra Nama Stotram

śrī kṛṣṇa sahasra nāma stotram

Śloka 1

oṃ asya śrīkṛṣṇasahasranāmastotramantrasya parāśara ṛṣiḥ, anuṣṭup chandaḥ, śrīkṛṣṇaḥ paramātmā devatā, śrīkṛṣṇeti bījam, śrīvallabheti śaktiḥ, śārṅgīti kīlakaṃ, śrīkṛṣṇaprītyarthe jape viniyogaḥ ||

nyāsaḥ

parāśarāya ṛṣaye namaḥ iti śirasi,

anuṣṭup chandase namaḥ iti mukhe,

gopālakṛṣṇadevatāyai namaḥ iti hṛdaye,

śrīkṛṣṇāya bījāya namaḥ iti guhye,

śrīvallabhāya śaktyai namaḥ iti pādayoḥ,

śārṅgadharāya kīlakāya namaḥ iti sarvāṅge ||

karanyāsaḥ

śrīkṛṣṇa ityārabhya śūravaṃśaikadhīrityantāni aṅguṣṭhābhyāṃ namaḥ |

śaurirityārabhya svabhāsodbhāsitavraja ityantāni tarjanībhyāṃ namaḥ |

kṛtātmavidyāvinyāsa ityārabhya prasthānaśakaṭārūḍha iti madhyamābhyāṃ namaḥ,

bṛndāvanakṛtālaya ityārabhya madhurājanavīkṣita ityanāmikābhyāṃ namaḥ,

rajakapratighātaka ityārabhya dvārakāpurakalpana iti kaniṣṭhikābhyāṃ namaḥ

dvārakānilaya ityārabhya parāśara iti karatalakarapṛṣṭhābhyāṃ namaḥ,

evaṃ hṛdayādinyāsaḥ ||

dhyānam

keṣāñcitpremapuṃsāṃ vigalitamanasāṃ bālalīlāvilāsaṃ

keṣāṃ gopālalīlāṅkitarasikatanurveṇuvādyena devam |

keṣāṃ vāmāsamāje janitamanasijo daityadarpāpahaivaṃ

jñātvā bhinnābhilāṣaṃ sa jayati jagatāmīśvarastādṛśo'bhūt || 1 ||

kṣīrābdhau kṛtasaṃstavassuragaṇairbrahmādibhiḥ paṇḍitaiḥ

prodbhūto vasudevasadmani mudā cikrīḍa yo gokule |

kaṃsadhvaṃsakṛte jagāma madhurāṃ sārāmasadvārakāṃ

gopālo'khilagopikājanasakhaḥ pāyādapāyāt sa naḥ || 2 ||

phullendīvarakāntiminduvadanaṃ barhāvataṃsapriyaṃ

śrīvatsāṅkamudārakaustubhadharaṃ pītāmbaraṃ sundaram |

gopīnāṃ nayanotpalārcitatanuṃ gogopasaṅghāvṛtaṃ

govindaṃ kalaveṇuvādanarataṃ divyāṅgabhūṣaṃ bhaje || 3 ||

om |

kṛṣṇaḥ śrīvallabhaḥ śārṅgī viṣvaksenaḥ svasiddhidaḥ |

kṣīrodadhāmā vyūheśaḥ śeṣaśāyī jaganmayaḥ || 1 ||

bhaktigamyastrayīmūrtirbhārārtavasudhāstutaḥ |

devadevo dayāsindhurdevadevaśikhāmaṇiḥ || 2 ||

sukhabhāvassukhādhāro mukundo muditāśayaḥ |

avikriyaḥ kriyāmūrtiradhyātmasvasvarūpavān || 3 ||

śiṣṭābhilakṣyo bhūtātmā dharmatrāṇārthaceṣṭitaḥ |

antaryāmī kalārūpaḥ kālāvayavasākṣikaḥ || 4 ||

vasudhāyāsaharaṇo nāradapreraṇonmukhaḥ |

prabhūṣṇurnāradodgīto lokarakṣāparāyaṇaḥ || 5 ||

rauhiṇeyakṛtānando yogajñānaniyojakaḥ |

mahāguhāntarnikṣiptaḥ purāṇavapurātmavān || 6 ||

śūravaṃśaikadhīśśauriḥ kaṃsaśaṅkāviṣādakṛt |

vasudevollasacchaktirdevakyaṣṭamagarbhagaḥ || 7 ||

vasudevasutaḥ śrīmāndevakīnandano hariḥ |

āścaryabālaḥ śrīvatsalakṣmavakṣāścaturbhujaḥ || 8 ||

svabhāvotkṛṣṭasadbhāvaḥ kṛṣṇāṣṭamyantasambhavaḥ |

prājāpatyarkṣasambhūto niśīthasamayoditaḥ || 9 ||

śaṅkhacakragadāpadmapāṇiḥ padmanibhekṣaṇaḥ |

kirīṭī kaustubhoraskaḥ sphuranmakarakuṇḍalaḥ || 10 ||

pītavāsā ghanaśyāmaḥ kuñcitāñcitakuntalaḥ |

suvyaktavyaktābharaṇaḥ sūtikāgṛhabhūṣaṇaḥ || 11 ||

kārāgārāndhakāraghnaḥ pitṛprāgjanmasūcakaḥ |

vasudevastutaḥ stotraṃ tāpatrayanivāraṇaḥ || 12 ||

niravadyaḥ kriyāmūrtirnyāyavākyaniyojakaḥ |

adṛṣṭaceṣṭaḥ kūṭastho dhṛtalaukikavigrahaḥ || 13 ||

maharṣimānasollāso mahīmaṅgaladāyakaḥ |

santoṣitasuravrātaḥ sādhucittaprasādakaḥ || 14 ||

janakopāyanirdeṣṭā devakīnayanotsavaḥ |

pitṛpāṇipariṣkāro mohitāgārarakṣakaḥ || 15 ||

svaśaktyuddhāṭitāśeṣakapāṭaḥ pitṛvāhakaḥ |

śeṣoragaphaṇācchatraśśeṣoktākhyāsahasrakaḥ || 16 ||

yamunāpūravidhvaṃsī svabhāsodbhāsitavrajaḥ |

kṛtātmavidyāvinyāso yogamāyāgrasambhavaḥ || 17 ||

durgāniveditodbhāvo yaśodātalpaśāyakaḥ |

nandagopotsavasphūrtirvrajānandakarodayaḥ || 18 ||

sujātajātakarma śrīrgopībhadroktinirvṛtaḥ |

alīkanidropagamaḥ pūtanāstanapīḍanaḥ || 19 ||

stanyāttapūtanāprāṇaḥ pūtanākrośakārakaḥ |

vinyastarakṣāgodhūliryaśodākaralālitaḥ || 20 ||

nandāghrātaśiromadhyaḥ pūtanāsugatipradaḥ |

bālaḥ paryaṅkanidrālurmukhārpitapadāṅguliḥ || 21 ||

añjanasnigdhanayanaḥ paryāyāṅkuritasmitaḥ |

līlākṣastaralālokaśśakaṭāsurabhañjanaḥ || 22 ||

dvijoditasvastyayano mantrapūtajalāplutaḥ |

yaśodotsaṅgaparyaṅko yaśodāmukhavīkṣakaḥ || 23 ||

yaśodāstanyamuditastṛṇāvartādidussahaḥ |

tṛṇāvartāsuradhvaṃsī mātṛvismayakārakaḥ || 24 ||

praśastanāmakaraṇo jānucaṅkramaṇotsukaḥ |

vyālambicūlikāratno ghoṣagopapraharṣaṇaḥ || 25 ||

svamukhapratibimbārthī grīvāvyāghranakhojjvalaḥ |

paṅkānuleparuciro māṃsalorukaṭītaṭaḥ || 26 ||

ghṛṣṭajānukaradvandvaḥ pratibimbānukārakṛt |

avyaktavarṇavāgvṛttiḥ smitalakṣyaradodgamaḥ || 27 ||

dhātrīkarasamālambī praskhalaccitracaṅkramaḥ |

anurūpavayasyāḍhyaścārukaumāracāpalaḥ || 28 ||

vatsapucchasamākṛṣṭo vatsapucchavikarṣaṇaḥ |

vismāritānyavyāpāro gopagopīmudāvahaḥ || 29 ||

akālavatsanirmoktā vrajavyākrośasusmitaḥ |

navanītamahācoro dārakāhāradāyakaḥ || 30 ||

pīṭholūkhalasopānaḥ kṣīrabhāṇḍavibhedanaḥ |

śikyabhāṇḍasamākarṣī dhvāntāgārapraveśakṛt || 31 ||

bhūṣāratnaprakāśāḍhyo gopyupālambhabhartsitaḥ |

parāgadhūsarākāro mṛdbhakṣaṇakṛtekṣaṇaḥ || 32 ||

bāloktamṛtkathārambho mitrāntargūḍhavigrahaḥ |

kṛtasantrāsalolākṣo jananīpratyayāvahaḥ || 33||

mātṛdṛśyāttavadano vaktralakṣyacarācaraḥ |

yaśodālālitasvātmā svayaṃ svācchandyamohanaḥ || 34 ||

savitrīsnehasaṃśliṣṭaḥ savitrīstanalolupaḥ |

navanītārthanāprahvo navanītamahāśanaḥ || 35 ||

mṛṣākopaprakampoṣṭho goṣṭhāṅgaṇavilokanaḥ |

dadhimanthaghaṭībhettā kiṅkiṇīkvāṇasūcitaḥ || 36 ||

haiyaṅgavīnarasiko mṛṣāśruścauryaśaṅkitaḥ |

jananīśramavijñātā dāmabandhaniyantritaḥ || 37 ||

dāmākalpaścalāpāṅgo gāḍholūkhalabandhanaḥ |

ākṛṣṭolūkhalo'nantaḥ kuberasutaśāpavit || | 38 ||

nāradoktiparāmarśī yamalārjunabhañjanaḥ |

dhanadātmajasaṅghuṣṭo nandamocitabandhanaḥ || 39 ||

bālakodgītanirato bāhukṣepoditapriyaḥ |

ātmajño mitravaśago gopīgītaguṇodayaḥ || 40 ||

prasthānaśakaṭārūḍho bṛndāvanakṛtālayaḥ |

govatsapālanaikāgro nānākrīḍāparicchadaḥ || 41 ||

kṣepaṇīkṣepaṇaprīto veṇuvādyaviśāradaḥ |

vṛṣavatsānukaraṇo vṛṣadhvānaviḍambanaḥ || 42 ||

niyuddhalīlāsaṃhṛṣṭaḥ kūjānukṛtakokilaḥ |

upāttahaṃsagamanassarvajanturutānukṛt || 43 ||

bhṛṅgānukārī dadhyannacoro vatsapurassaraḥ |

balī bakāsuragrāhī bakatālupradāhakaḥ || 44 ||

bhītagopārbhakāhūto bakacañcuvidāraṇaḥ |

bakāsurārirgopālo bālo bālādbhutāvahaḥ || 45 ||

balabhadrasamāśliṣṭaḥ kṛtakrīḍānilāyanaḥ |

krīḍāsetunidhānajñaḥ plavaṅgotplavano'dbhutaḥ || 46 ||

kandukakrīḍano luptanandādibhavavedanaḥ |

sumano'laṅkṛtaśirāḥ svādusnigdhānnaśikyabhṛt || 47 ||

guñjāprālambanacchannaḥ piñchairalakaveṣakṛt |

vanyāśanapriyaḥ śṛṅgaravākāritavatsakaḥ || 48 ||

manojñapallavottaṃsapuṣpasvecchāttaṣaṭpadaḥ |

mañjuśiñjitamañjīracaraṇaḥ karakaṅkaṇaḥ || 49 ||

anyonyaśāsanaḥ krīḍāpaṭuḥ paramakaitavaḥ |

pratidhvānapramuditaḥ śākhācaturacaṅkramaḥ || 50 ||

aghadānavasaṃhartā vrajavighnavināśanaḥ |

vrajasañjīvanaḥ śreyonidhirdānavamuktidaḥ || 51 ||

kālindīpulināsīnassahabhuktavrajārbhakaḥ |

kakṣājaṭharavinyastaveṇurvallavaceṣṭitaḥ || 52 ||

bhujasandhyantaranyastaśṛṅgavetraḥ śucismitaḥ |

vāmapāṇisthadadhyannakabalaḥ kalabhāṣaṇaḥ || 53 ||

aṅgulyantaravinyastaphalaḥ paramapāvanaḥ |

adṛśyatarṇakānveṣī vallavārbhakabhītihā || 54 ||

adṛṣṭavatsapavrāto brahmavijñātavaibhavaḥ |

govatsavatsapānveṣī virāṭ-puruṣavigrahaḥ || 55 ||

svasaṅkalpānurūpārtho vatsavatsaparūpadhṛk |

yathāvatsakriyārūpo yathāsthānaniveśanaḥ || 56 ||

yathāvrajārbhakākāro gogopīstanyapassukhī |

cirādvalohito dānto brahmavijñātavaibhavaḥ || 57 ||

vicitraśaktirvyālīnasṛṣṭagovatsavatsapaḥ |

brahmatrapākaro dhātṛstutassarvārthasādhakaḥ || 58 ||

brahma brahmamayo'vyaktastejorūpassukhātmakaḥ |

niruktaṃ vyākṛtirvyakto nirālambanabhāvanaḥ || 59 ||

prabhaviṣṇuratantrīko devapakṣārtharūpadhṛk |

akāmassarvavedādiraṇīyasthūlarūpavān || 60 ||

vyāpī vyāpyaḥ kṛpākartā vicitrācārasammataḥ |

chandomayaḥ pradhānātmā mūrtāmūrtidvayākṛtiḥ || 61 ||

anekamūrtirakrodhaḥ paraḥ prakṛtirakramaḥ |

sakalāvaraṇopetassarvadevo maheśvaraḥ || 62 ||

mahāprabhāvanaḥ pūrvavatsavatsapadarśakaḥ |

kṛṣṇayādavagopālo gopālokanaharṣitaḥ || 63 ||

smitekṣāharṣitabrahmā bhaktavatsalavākpriyaḥ |

brahmānandāśrudhautāṅghrirlīlāvaicitryakovidaḥ || 64 ||

balabhadraikahṛdayo nāmākāritagokulaḥ |

gopālabālako bhavyo rajjuyajñopavītavān || 65 ||

vṛkṣacchāyāhatāśāntirgopotsaṅgopabarhaṇaḥ |

gopasaṃvāhitapado gopavyajanavījitaḥ || 66|

gopagānasukhonnidraḥ śrīdāmārjitasauhṛdaḥ |

sunandasuhṛdekātmā subalaprāṇarañjanaḥ || 67 ||

tālīvanakṛtakrīḍo balapātitadhenukaḥ |

gopīsaubhāgyasambhāvyo godhūlicchuritālakaḥ || 68 ||

gopīvirahasantapto gopikākṛtamajjanaḥ |

pralambabāhurutphullapuṇḍarīkāvataṃsakaḥ || 69 ||

vilāsalalitasmeragarbhalīlāvalokanaḥ |

sragbhūṣaṇānulepāḍhyo jananyupahṛtānnabhuk || 70 ||

varaśayyāśayo rādhāpremasallāpanirvṛtaḥ |

yamunātaṭasañcārī viṣārtavrajaharṣadaḥ || 71 ||

kāliyakrodhajanakaḥ vṛddhāhikulaveṣṭitaḥ |

kāliyāhiphaṇāraṅganaṭaḥ kāliyamardanaḥ || 72 ||

nāgapatnīstutiprīto nānāveṣasamṛddhikṛt |

aviṣvaktadṛgātmeśaḥ svadṛgātmastutipriyaḥ || 73 ||

sarveśvarassarvaguṇaḥ prasiddhassarvasātvataḥ |

akuṇṭhadhāmā candrārkadṛṣṭirākāśanirmalaḥ || 74 ||

anirdeśyagatirnāgavanitāpatibhaikṣadaḥ |

svāṅghrimudrāṅkanāgendramūrdhā kāliyasaṃstutaḥ || 75 ||

abhayo viśvataścakṣuḥ stutottamaguṇaḥ prabhuḥ |

ahamātmā marutprāṇaḥ paramātmā dyuśīrṣavān || 76 ||

nāgopāyanahṛṣṭātmā hradotsāritakāliyaḥ |

balabhadrasukhālāpo gopāliṅgananirvṛtaḥ || 77 ||

dāvāgnibhītagopālagoptā dāvāgnināśanaḥ |

nayanācchādanakrīḍālampaṭo nṛpaceṣṭitaḥ || 78 ||

kākapakṣadharassaumyo balavāhakakelimān |

balaghātitadurdharṣapralambo balavatsalaḥ || 79 ||

muñjāṭavyagniśamanaḥ prāvṛṭkālavinodavān |

śilānyastānnabhṛddaityasaṃhartā śādvalāsanaḥ || 80 ||

sadāptagopikodgītaḥ karṇikārāvataṃsakaḥ |

naṭaveṣadharaḥ padmamālāṅko gopikāvṛtaḥ || 81 ||

gopīmanoharāpāṅgo veṇuvādanatatparaḥ |

vinyastavadanāmbhojaścāruśabdakṛtānanaḥ || 82 ||

bimbādharārpitodāraveṇurviśvavimohanaḥ |

vrajasaṃvarṇitaśrāvyaveṇunādaḥ śrutipriyaḥ || 83 ||

gogopagopījanmepsurbrahmendrādyabhivanditaḥ |

gītasnutisaritpūro nādanartitabarhiṇaḥ || 84 ||

rāgapallavitasthāṇurgītānamitapādapaḥ |

vismāritatṛṇagrāsamṛgo mṛgavilobhitaḥ || 85 ||

vyāghrādihiṃsrasahajavairahartā sugāyanaḥ |

gāḍhodīritagobṛndapremotkarṇitatarṇakaḥ || 86 ||

niṣpandayānabrahmādivīkṣito viśvavanditaḥ |

śākhotkarṇaśakuntaughaśchatrāyitabalāhakaḥ || 87 ||

prasannaḥ paramānandaścitrāyitacarācaraḥ |

gopikāmadano gopīkucakuṅkumamudritaḥ || 88 ||

gopikanyājalakrīḍāhṛṣṭo gopyaṃśukāpahṛt |

skandhāropitagopastrīvāsāḥ kundanibhasmitaḥ || 89 ||

gopīnetrotpalaśaśī gopikāyācitāṃśukaḥ |

gopīnamaskriyādeṣṭā gopyekakaravanditaḥ || 90 ||

gopyañjaliviśeṣārthī gopakrīḍāvilobhitaḥ |

śāntavāsasphuradgopīkṛtāñjaliraghāpahaḥ || 91 ||

gopīkelivilāsārthī gopīsampūrṇakāmadaḥ |

gopastrīvastrado gopīcittacoraḥ kutūhalī || 92 ||

bṛndāvanapriyo gopabandhuryajvānnayācitā |

yajñeśo yajñabhāvajño yajñapatnyabhivāñchitaḥ || 93 ||

munipatnīvitīrṇānnatṛpto munivadhūpriyaḥ |

dvijapatnyabhibhāvajño dvijapatnīvarapradaḥ || 94 ||

pratiruddhasatīmokṣaprado dvijavimohitā |

munijñānaprado yajvastuto vāsavayāgavit || 95 ||

pitṛproktakriyārūpaśakrayāganivāraṇaḥ |

śakrā'marṣakaraśśakravṛṣṭipraśamanonmukhaḥ || 96 ||

govardhanadharo gopagobṛndatrāṇatatparaḥ |

govardhanagiricchatracaṇḍadaṇḍabhujārgalaḥ || 97 ||

saptāhavidhṛtādrīndro meghavāhanagarvahā |

bhujāgroparivinyastakṣmādharakṣmābhṛdacyutaḥ || 98 ||

svasthānasthāpitagirirgopīdadhyakṣatārcitaḥ |

sumanassumanovṛṣṭihṛṣṭo vāsavavanditaḥ || 99 ||

kāmadhenupayaḥpūrābhiṣiktassurabhistutaḥ |

dharāṅghriroṣadhīromā dharmagoptā manomayaḥ || 100 ||

jñānayajñapriyaśśāstranetrassarvārthasārathiḥ |

airāvatakarānītaviyadgaṅgāpluto vibhuḥ || 101 ||

brahmābhiṣikto gogoptā sarvalokaśubhaṅkaraḥ |

sarvavedamayo magnanandānveṣipitṛpriyaḥ || 102 ||

varuṇodīritātmekṣākautuko varuṇārcitaḥ |

varuṇānītajanako gopajñātātmavaibhavaḥ || 103 ||

svarlokālokasaṃhṛṣṭagopavargatrivargadaḥ |

brahmahṛdgopito gopadraṣṭā brahmapadapradaḥ || 104 ||

śaraccandravihārotkaḥ śrīpatirvaśako kṣamaḥ |

bhayāpaho bhartṛruddhagopikādhyānagocaraḥ || 105 ||

gopikānayanāsvādyo gopīnarmoktinirvṛtaḥ |

gopikāmānaharaṇo gopikāśatayūthapaḥ || 106 ||

vaijayantīsragākalpo gopikāmānavardhanaḥ |

gopakāntāsunirdeṣṭā kānto manmathamanmathaḥ || 107 ||

svātmāsyadattatāmbūlaḥ phalitotkṛṣṭayauvanaḥ |

vallavīstanasaktākṣo vallavīpremacālitaḥ || 108 ||

gopīcelāñcalāsīno gopīnetrābjaṣaṭpadaḥ |

rāsakrīḍāsamāsakto gopīmaṇḍalamaṇḍanaḥ || 109 ||

gopīhemamaṇiśreṇimadhyendramaṇirujjvalaḥ |

vidyādharenduśāpaghnaśśaṅkhacūḍaśiroharaḥ || 110 ||

śaṅkhacūḍaśiroratnasamprīṇitabalo'naghaḥ |

ariṣṭāriṣṭakṛdduṣṭakeśidaityaniṣūdanaḥ || 111 ||

sarasassasmitamukhassusthiro virahākulaḥ |

saṅkarṣaṇārpitaprītirakrūradhyānagocaraḥ || 112 ||

akrūrasaṃstuto gūḍho guṇavṛtyupalakṣitaḥ |

pramāṇagamyastanmātrā'vayavī buddhitatparaḥ || 113 ||

sarvapramāṇapramadhīssarvapratyayasādhakaḥ |

puruṣaśca pradhānātmā viparyāsavilocanaḥ || 114 ||

madhurājanasaṃvīkṣyo rajakapratighātakaḥ |

vicitrāmbarasaṃvīto mālākāravarapradaḥ || 115 ||

kubjāvakratvanirmoktā kubjāyauvanadāyakaḥ |

kubjāṅgarāgasurabhiḥ kaṃsakodaṇḍakhaṇḍanaḥ || 116 ||

dhīraḥ kuvalayāpīḍamardanaḥ kaṃsabhītikṛt |

dantidantāyudho raṅgatrāsako mallayuddhavit || 117 ||

cāṇūrahantā kaṃsārirdevakīharṣadāyakaḥ |

vasudevapadānamraḥ pitṛbandhavimocanaḥ || 118 ||

urvībhayāpaho bhūpa ugrasenādhipatyadaḥ |

ājñāsthitaśacīnāthassudharmānayanakṣamaḥ || 119 ||

ādyo dvijātisatkartā śiṣṭācārapradarśakaḥ |

sāndīpanikṛtābhyastavidyābhyāsaikadhīssudhīḥ || 120 ||

gurvabhīṣṭakriyādakṣaḥ paścimodadhipūjitaḥ |

hatapañcajanaprāptapāñcajanyo yamārcitaḥ || 121 ||

dharmarājajayānītaguruputra urukramaḥ |

guruputrapradaśśāstā madhurājasabhāsadaḥ || 122 ||

jāmadagnyasamabhyarcyo gomantagirisañcaraḥ |

gomantadāvaśamano garuḍānītabhūṣaṇaḥ || 123 ||

cakrādyāyudhasaṃśobhī jarāsandhamadāpahaḥ |

sṛgālāvanipālaghnassṛgālātmajarājyadaḥ || 124 ||

vidhvastakālayavano mucukundavarapradaḥ |

ājñāpitamahāmbhodhirdvārakāpurakalpanaḥ || 125 ||

dvārakānilayo rukmimānahantā yadūdvahaḥ |

ruciro rukmiṇījāniḥ pradyumnajanakaḥ prabhuḥ || 126 ||

apākṛtatrilokārtiraniruddhapitāmahaḥ |

aniruddhapadānveṣī cakrī garuḍavāhanaḥ || 127 ||

bāṇāsurapurīroddhā rakṣājvalanayantrajit |

dhūtapramathasaṃrambho jitamāheśvarajvaraḥ || 128 ||

ṣaṭcakraśaktinirjetā bhūtavetālamohakṛt |

śambhutriśūlajicchambhujṛmbhaṇaśśambhusaṃstutaḥ || 129 ||

indriyātmenduhṛdayassarvayogeśvareśvaraḥ |

hiraṇyagarbhahṛdayo mohāvartanivartanaḥ || 130 ||

ātmajñānanidhirmedhā kośastanmātrarūpavān |

indro'gnivadanaḥ kālanābhassarvāgamādhvagaḥ || 131 ||

turīyasarvadhīsākṣī dvandvārāmātmadūragaḥ |

ajñātapāro vaśyaśrīravyākṛtavihāravān || 132 ||

ātmapradīpo vijñānamātrātmā śrīniketanaḥ |

bāṇabāhuvanacchettā mahendraprītivardhanaḥ || 133 ||

aniruddhanirodhajño jaleśāhṛtagokulaḥ |

jaleśavijayī vīrassatrājidratnayācakaḥ || 134 ||

prasenānveṣaṇodyukto jāmbavaddhṛtaratnadaḥ |

jitarkṣarājatanayāhartā jāmbavatīpriyaḥ || 135 ||

satyabhāmāpriyaḥ kāmaśśatadhanvaśiroharaḥ |

kālindīpatirakrūrabandhurakrūraratnadaḥ || 136 ||

kaikeyīramaṇo bhadrābhartā nāgnajitīdhavaḥ |

mādrīmanoharaśśaibyāprāṇabandhururukramaḥ || 137 ||

suśīlādayito mitravindānetramahotsavaḥ |

lakṣmaṇāvallabho ruddhaprāgjyotiṣamahāpuraḥ || 138 ||

surapāśāvṛticchedī murāriḥ krūrayuddhavit |

hayagrīvaśirohartā sarvātmā sarvadarśanaḥ || 139 ||

narakāsuravicchettā narakātmajarājyadaḥ|

pṛthvīstutaḥ prakāśātmā hṛdyo yajñaphalapradaḥ || 140 ||

guṇagrāhī guṇadraṣṭā gūḍhasvātmā vibhūtimān |

kavirjagadupadraṣṭā paramākṣaravigrahaḥ || 141 ||

prapannapālano mālī mahadbrahmavivardhanaḥ |

vācyavācakaśaktyarthassarvavyākṛtasiddhidaḥ || 142 ||

svayamprabhuranirvedyassvaprakāśaścirantanaḥ |

nādātmā mantrakoṭīśo nānāvādanirodhakaḥ || 143 ||

kandarpakoṭilāvaṇyaḥ parārthaikaprayojakaḥ |

amarīkṛtadevaughaḥ kanyakābandhamocanaḥ || 144 ||

ṣoḍaśastrīsahasreśaḥ kāntaḥ kāntāmanobhavaḥ |

krīḍāratnācalāhartā varuṇacchatraśobhitaḥ || 145 ||

śakrābhivanditaśśakrajananīkuṇḍalapradaḥ |

aditiprastutastotro brāhmaṇodghuṣṭaceṣṭanaḥ || 146 ||

purāṇassaṃyamī janmāliptaḥ ṣaḍviṃśako'rthadaḥ |

yaśasyanītirādyantarahitassatkathāpriyaḥ || 147 ||

brahmabodhaḥ parānandaḥ pārijātāpahārakaḥ |

pauṇḍrakaprāṇaharaṇaḥ kāśirājaniṣūdanaḥ || 148 ||

kṛtyāgarvapraśamano vicakravadhadīkṣitaḥ |

kaṃsavidhvaṃsanassāmbajanako ḍimbhakārdanaḥ || 149 ||

munirgoptā pitṛvarapradassavanadīkṣitaḥ |

rathī sārathyanirdeṣṭā phālgunaḥ phālgunipriyaḥ || 150 ||

saptābdhistambhanodbhāto harissaptābdhibhedanaḥ |

ātmaprakāśaḥ pūrṇaśrīrādinārāyaṇekṣitaḥ || 151 ||

vipraputrapradaścaiva sarvamātṛsutapradaḥ |

pārthavismayakṛtpārthapraṇavārthaprabodhanaḥ || 152 ||

kailāsayātrāsumukho badaryāśramabhūṣaṇaḥ |

ghaṇṭākarṇakriyāmauḍhyāttoṣito bhaktavatsalaḥ || 153 ||

munibṛndādibhirdhyeyo ghaṇṭākarṇavarapradaḥ |

tapaścaryāparaścīravāsāḥ piṅgajaṭādharaḥ || 154 ||

pratyakṣīkṛtabhūteśaśśivastotā śivastutaḥ |

kṛṣṇāsvayaṃvarālokakautukī sarvasammataḥ || 155 ||

balasaṃrambhaśamano baladarśitapāṇḍavaḥ |

yativeṣārjunābhīṣṭadāyī sarvātmagocaraḥ || 156 ||

subhadrāphālgunodvāhakartā prīṇitaphālgunaḥ |

khāṇḍavaprīṇitārciṣmānmayadānavamocanaḥ || 157 ||

sulabho rājasūyārhayudhiṣṭhiraniyojakaḥ |

bhīmārditajarāsandho māgadhātmajarājyadaḥ || 158 ||

rājabandhananirmoktā rājasūyāgrapūjanaḥ |

caidyādyasahano bhīṣmastutassātvatapūrvajaḥ || 159 ||

sarvātmārthasamāhartā mandarācaladhārakaḥ |

yajñāvatāraḥ prahlādapratijñāpratipālakaḥ || 160 ||

baliyajñasabhādhvaṃsī dṛptakṣatrakulāntakaḥ |

daśagrīvāntako jetā revatīpremavallabhaḥ || 161 ||

sarvāvatārādhiṣṭhātā vedabāhyavimohanaḥ |

kalidoṣanirākartā daśanāmā dṛḍhavrataḥ || 162 ||

ameyātmā jagatsvāmī vāgmī caidyaśiroharaḥ |

draupadīracitastotraḥ keśavaḥ puruṣottamaḥ || 163 ||

nārāyaṇo madhupatirmādhavo doṣavarjitaḥ |

govindaḥ puṇḍarīkākṣo viṣṇuśca madhusūdanaḥ || 164 ||

trivikramastrilokeśo vāmanaḥ śrīdharaḥ pumān |

hṛṣīkeśo vāsudevaḥ padmanābho mahāhradaḥ || 165 ||

dāmodaraścaturvyūhaḥ pāñcālīmānarakṣaṇaḥ |

sālvaghnassamaraślāghī dantavaktranibarhaṇaḥ || 166 ||

dāmodarapriyasakhā pṛthukāsvādanapriyaḥ ||

ghṛṇī dāmodaraḥ śrīdo gopīpunaravekṣakaḥ || 167 ||

gopikāmuktido yogī durvāsastṛptikārakaḥ |

avijñātavrajākīrṇapāṇḍavālokano jayī || 168 ||

pārthasārathyanirataḥ prājñaḥ pāṇḍavadūtyakṛt |

vidurātithyasantuṣṭaḥ kuntīsantoṣadāyakaḥ || 169 ||

suyodhanatiraskartā duryodhanavikāravit |

vidurābhiṣṭhuto nityo vārṣṇeyo maṅgalātmakaḥ || 170 ||

pañcaviṃśatitattveśaścaturviṃśatidehabhāk |

sarvānugrāhakassarvadāśārhasatatārcitaḥ || 171 ||

acintyo madhurālāpassādhudarśī durāsadaḥ |

manuṣyadharmānugataḥ kauravendrakṣayekṣitā || 172 ||

upendro dānavārātirurugīto mahādyutiḥ |

brahmaṇyadevaḥ śrutimān gobrāhmaṇahitāśayaḥ || 173 ||

varaśīlaśśivārambhassuvijñānavimūrtimān |

svabhāvaśuddhassanmitrassuśaraṇyassulakṣaṇaḥ || 174 ||

dhṛtarāṣṭragataudṛṣṭipradaḥ karṇavibhedanaḥ |

pratodadhṛgviśvarūpavismāritadhanañjayaḥ || 175 ||

sāmagānapriyo dharmadhenurvarṇottamo'vyayaḥ |

caturyugakriyākartā viśvarūpapradarśakaḥ || 176 ||

brahmabodhaparitrātapārtho bhīṣmārthacakrabhṛt |

arjunāyāsavidhvaṃsī kāladaṃṣṭrāvibhūṣaṇaḥ || 177 ||

sujātānantamahimā svapnavyāpāritārjunaḥ |

akālasandhyāghaṭanaścakrāntaritabhāskaraḥ || 178 ||

duṣṭapramathanaḥ pārthapratijñāparipālakaḥ |

sindhurājaśiraḥpātasthānavaktā vivekadṛk || 179 ||

subhadrāśokaharaṇo droṇotsekādivismitaḥ |

pārthamanyunirākartā pāṇḍavotsavadāyakaḥ || 180 ||

aṅguṣṭhākrāntakaunteyarathaśśakto'hiśīrṣajit |

kālakopapraśamano bhīmasenajayapradaḥ || 181 ||

aśvatthāmavadhāyāsatrātapāṇḍusutaḥ kṛtī |

iṣīkāstrapraśamano drauṇirakṣāvicakṣaṇaḥ || 182 ||

pārthāpahāritadrauṇicūḍāmaṇirabhaṅguraḥ |

dhṛtarāṣṭraparāmṛṣṭabhīmapratikṛtismayaḥ || 183 ||

bhīṣmabuddhipradaśśāntaśśaraccandranibhānanaḥ |

gadāgrajanmā pāñcālīpratijñāparipālakaḥ || 184 ||

gāndhārīkopadṛgguptadharmasūnuranāmayaḥ |

prapannārtibhayacchettā bhīṣmaśalyavyadhāvahaḥ || 185 ||

śāntaśśāntanavodīrṇasarvadharmasamāhitaḥ |

smāritabrahmavidyārthaprītapārtho mahāstravit || 186 ||

prasādaparamodāro gāṅgeyasugatipradaḥ |

vipakṣapakṣakṣayakṛtparīkṣitprāṇarakṣaṇaḥ || 187 ||

jagadgururdharmasūnorvājimedhapravartakaḥ |

vihitārthāptasatkāro māsakātparivartadaḥ || 188 ||

uttaṅkaharṣadātmīyadivyarūpapradarśakaḥ |

janakāvagatasvoktabhāratassarvabhāvanaḥ || 189 ||

asoḍhayādavodreko vihitāptādipūjanaḥ ||

samudrasthāpitāścaryamusalo vṛṣṇivāhakaḥ || 190 ||

muniśāpāyudhaḥ padmāsanāditridaśārthitaḥ |

vṛṣṭipratyavahārotkassvadhāmagamanotsukaḥ || 191 ||

prabhāsālokanodyukto nānāvidhanimittakṛt |

sarvayādavasaṃsevyassarvotkṛṣṭaparicchadaḥ || 192 ||

velākānanasañcārī velānilahṛtaśramaḥ |

kālātmā yādavo'nantasstutisantuṣṭamānasaḥ || 193 ||

dvijālokanasantuṣṭaḥ puṇyatīrthamahotsavaḥ |

satkārāhlāditāśeṣabhūsurassuravallabhaḥ || 194 ||

puṇyatīrthāplutaḥ puṇyaḥ puṇyadastīrthapāvanaḥ |

viprasātkṛtagokoṭiśśatakoṭisuvarṇadaḥ || 195 ||

svamāyāmohitā'śeṣavṛṣṇivīro viśeṣavit |

jalajāyudhanirdeṣṭā svātmāveśitayādavaḥ || 196 ||

devatābhīṣṭavaradaḥ kṛtakṛtyaḥ prasannadhīḥ |

sthiraśeṣāyutabalassahasraphaṇivīkṣaṇaḥ || 197 ||

brahmavṛkṣavaracchāyāsīnaḥ padmāsanasthitaḥ |

pratyagātmā svabhāvārthaḥ praṇidhānaparāyaṇaḥ || 198 ||

vyādheṣuviddhapūjyāṅghrirniṣādabhayamocanaḥ |

pulindastutisantuṣṭaḥ pulindasugatipradaḥ || 199 ||

dārukārpitapārthādikaraṇīyoktirīśitā |

divyadundubhisaṃyuktaḥ puṣpavṛṣṭiprapūjitaḥ || 200 ||

purāṇaḥ parameśānaḥ pūrṇabhūmā pariṣṭutaḥ |

patirādyaḥ paraṃ brahma paramātmā parātparaḥ || 201 ||

śrīparamātmā parātparaḥ oṃ namaḥ iti |

phalaśrutiḥ –

idaṃ sahasraṃ kṛṣṇasya nāmnāṃ sarvārthadāyakam |

anantarūpī bhagavān vyākhyātādau svayambhuve || 202 ||

tena proktaṃ vasiṣṭhāya tato labdhvā parāśaraḥ |

vyāsāya tena samproktaṃ śuko vyāsādavāptavān || 203 ||

tacchiṣyairbahubhirbhūmau khyāpitaṃ dvāpare yuge |

kṛṣṇājñayā hariharaḥ kalau prakhyāpayadvibhuḥ || 204 ||

idaṃ paṭhati bhaktyā yaḥ śṛṇoti ca samāhitaḥ |

svasiddhyai prārthayantyenaṃ tīrthakṣetrādidevatāḥ || 205 ||

prāyaścittānyaśeṣāṇi nālaṃ yāni vyapohitum |

tāni pāpāni naśyanti sakṛdasya praśaṃsanāt || 206 ||

ṛṇatrayavimuktasya śrautasmārtānuvartinaḥ |

ṛṣestrimūrtirūpasya phalaṃ vindedidaṃ paṭhan || 207 ||

idaṃ nāmasahasraṃ yaḥ paṭhatyetacchṛṇoti ca |

śivaliṅgasahasrasya sa pratiṣṭhāphalaṃ labhet || 208 ||

idaṃ kirīṭī sañjapya jayī pāśupatāstrabhāk |

kṛṣṇasya prāṇabhūtassan kṛṣṇaṃ sārathimāptavān || 209 ||

draupadyā damayantyā ca sāvitryā ca suśīlayā |

duritāni jitānyetajjapādāptaṃ ca vāñchitam || 210 ||

kimidaṃ bahunā śaṃsanmānavo modanirbharaḥ |

brahmānandamavāpyānte kṛṣṇasāyūjyamāpnuyāt || 211 ||