KYTS 4.5 Namaste Rudra Manyava

4.5 - namaste rudra manyava - kṛṣṇa yajurveda taittirīya saṃhitā pāṭhaḥ

Śloka 1

kṛṣṇa yajurvedīya taittirīya saṃhitāyā-ñcaturthakāṇḍe pañcamaḥ praśnaḥ - homavidhinirūpaṇaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

nama̭ste rudra ma॒nyava̭ u॒tota॒ iṣa̭ve॒ namaḥ̭ | nama̭ste astu॒ dhanva̭ne bā॒hubhyā̭mu॒ta te॒ namaḥ̭ || yā ta॒ iṣuḥ̭ śi॒vata̭mā śi॒va-mba॒bhūva̭ te॒ dhanuḥ̭ | śi॒vā śa̭ra॒vyā̭ yā tava॒ tayā̭ no rudra mṛḍaya || yā tḙ rudra śi॒vā ta॒nūragho॒rā 'pā̭pakāśinī | tayā̭ nasta॒nuvā॒ śanta̭mayā॒ giri̭śantā॒bhi cā̭kaśīhi || yāmiṣṷ-ṅgiriśanta॒ haste॒ [haste᳚, bibha॒r​ṣyasta̭ve |] 1

bibha॒r​ṣyasta̭ve | śi॒vā-ṅgi̭ritra॒ tā-ṅkṷru॒ mā higṃ̭sīḥ॒ purṷṣa॒-ñjaga̭t || śi॒vena॒ vaca̭sā tvā॒ giri॒śācchā̭ vadāmasi | yathā̭ na॒-ssarva॒mi-jjaga̭daya॒kṣmagṃ su॒manā॒ asa̭t || addhya̭vocadadhiva॒ktā pra̭tha॒mo daivyo̭ bhi॒ṣak | ahīg̭śca॒ sarvā᳚n ja॒bhaṃ​ya~॒n-thsarvā᳚śca yātu dhā॒nyaḥ̭ || a॒sau yastā॒mro a̭ru॒ṇa u॒ta ba॒bhru-ssṷma॒ṅgalaḥ̭ | ye ce॒māgṃ ru॒drā a॒bhito̭ di॒kṣu [ ] 2

śri॒tā-ssa̭hasra॒śo 'vai̭ṣā॒gṃ॒ heḍa̭ īmahe || a॒sau yo̭ 'va॒sarpa̭ti॒ nīla̭grīvo॒ vilo̭hitaḥ | u॒taina̭-ṅgo॒pā a̭dṛśa॒-nnadṛ̭śa-nnudahā॒ryaḥ̭ | u॒tainaṃ॒-vi~śvā̭ bhū॒tāni॒ sa dṛ॒ṣṭo mṛ̭ḍayāti naḥ || namo̭ astu॒ nīla̭grīvāya sahasrā॒kṣāya̭ mī॒ḍhuṣe᳚ | atho॒ ye a̭sya॒ satvā̭no॒-'ha-ntebhyo̭ 'kara॒nnamaḥ̭ || pramṷñca॒ dhanva̭na॒stva mu॒bhayo॒-rārtni̭yo॒rjyām | yāśca̭ te॒ hasta॒ iṣa̭vaḥ॒ [iṣa̭vaḥ, parā॒ tā bha̭gavo vapa |] 3

parā॒ tā bha̭gavo vapa || a॒va॒tatya॒ dhanu॒stvagṃ saha̭srākṣa॒ śatḙṣudhe | ni॒śīrya̭ śa॒lyānā॒-mmukhā̭ śi॒vo naḥ̭ su॒manā̭ bhava || vijya॒-ndhanuḥ̭ kapa॒rdino॒ viśa̭lyo॒ bāṇa̭vāgṃ u॒ta | anḙśanna॒syeṣa̭va ā॒bhura̭sya niṣa॒ṅgathiḥ̭ || yā tḙ he॒ti-rmī̭ḍhuṣṭama॒ hastḙ ba॒bhūva̭ te॒ dhanuḥ̭ | tayā॒-'smān. vi॒śvata॒ stvama̭ya॒kṣmayā॒ pari̭bbhuja || nama̭ste a॒stvāyṷdhā॒yā-nā̭tatāya dhṛ॒ṣṇave᳚ | u॒bhābhyā̭ mu॒ta te॒ namo̭ bā॒hubhyā॒-ntava॒ dhanva̭ne || pari̭ te॒ dhanva̭no he॒tira॒smān-vṛ̭ṇaktu vi॒śvataḥ̭ | atho॒ ya i̭ṣu॒dhistavā॒re a॒sma-nnidhḙhi॒ tam || 4 ||

(hastḙ - di॒kṣvi - ṣa̭va - u॒bhābhyāṃ॒ - dvāvigṃ̭śatiśca) (a. 1)

namo॒ hira̭ṇya bāhave senā॒nyḙ di॒śāñca॒ pata̭ye॒ namo॒ namo̭ vṛ॒kṣebhyo॒ hari̭keśebhyaḥ paśū॒nā-mpata̭ye॒ namo॒ namaḥ̭ sa॒spiñja̭rāya॒ tviṣī̭mate pathī॒nā-mpata̭ye॒ namo॒ namo̭ babhlu॒śāya̭ vivyā॒dhine-'nnā̭nā॒-mpata̭ye॒ namo॒ namo॒ hari̭keśāyo-pavī॒tinḙ pu॒ṣṭānā॒-mpata̭ye॒ namo॒ namo̭ bha॒vasya̭ he॒tyai jaga̭tā॒-mpata̭ye॒ namo॒ namo̭ ru॒drāyā̭-tatā॒vine॒ kṣetrā̭ṇā॒-mpata̭ye॒ namo॒ namaḥ̭ sū॒tāyā-ha̭ntyāya॒ vanā̭nā॒-mpata̭ye॒ namo॒ namo॒ [namaḥ̭, rohi̭tāya] 5

rohi̭tāya stha॒pata̭ye vṛ॒kṣāṇā॒-mpata̭ye॒ namo॒ namo̭ ma॒ntriṇḙ vāṇi॒jāya॒ kakṣā̭ṇā॒-mpata̭ye॒ namo॒ namo̭ bhuva॒ntayḙ vārivaskṛ॒tā-yauṣa̭dhīnā॒-mpata̭ye॒ namo॒ nama̭ u॒ccai-rgho̭ṣāyā kra॒ndaya̭te pattī॒nā-mpata̭ye॒ namo॒ namaḥ̭ kṛthsnavī॒tāya॒ dhāva̭te॒ sattva̭nā॒-mpata̭ye॒ namaḥ̭ || 6 ||

(vanā̭nā॒-mpata̭ye॒ namo॒ nama॒ - ekā॒nnatri॒gṃ॒śacca̭ ) (a. 2)

nama॒-ssaha̭mānāya nivyā॒dhina̭ āvyā॒dhinī̭nā॒-mpata̭ye॒ namo॒ namaḥ̭ kaku॒bhāya̭ niṣa॒ṅgiṇe᳚ ste॒nānā॒-mpata̭ye॒ namo॒ namo̭ niṣa॒ṅgiṇa̭ iṣudhi॒mate॒ taska̭rāṇā॒-mpata̭ye॒ namo॒ namo॒ vañca̭te pari॒vañca̭te stāyū॒nā-mpata̭ye॒ namo॒ namo̭ nice॒ravḙ parica॒rāyāra̭ṇyānā॒-mpata̭ye॒ namo॒ namaḥ̭ sṛkā॒vibhyo॒ jighāgṃ̭sadbhyo muṣṇa॒tā-mpata̭ye॒ namo॒ namo̭ 'si॒madbhyo॒ nakta॒-ñcara̭dbhyaḥ prakṛ॒ntānā॒-mpata̭ye॒ namo॒ nama̭ uṣṇī॒ṣiṇḙ girica॒rāya̭ kulu॒ñcānā॒-mpata̭ye॒ namo॒ nama॒ [namaḥ̭, iṣṷmadbhyo] 7

iṣṷmadbhyo dhanvā॒vibhya̭śca vo॒ namo॒ nama̭ ātanvā॒nebhyaḥ̭ prati॒dadhā̭nebhyaśca vo॒ namo॒ nama̭ ā॒yaccha̭dbhyo visṛ॒jadbhya̭śca vo॒ namo॒ namo-'sya̭dbhyo॒ viddhya̭dbhyaśca vo॒ namo॒ nama॒ āsī̭nebhya॒-śśayā̭nebhyaśca vo॒ namo॒ namaḥ̭ sva॒padbhyo॒ jāgra̭dbhyaśca vo॒ namo॒ nama॒stiṣṭha̭dbhyo॒ dhāva̭dbhyaśca vo॒ namo॒ namaḥ̭ sa॒bhābhyaḥ̭ sa॒bhāpa̭tibhyaśca vo॒ namo॒ namo॒ aśve॒bhyo 'śva̭patibhya śca vo॒ namaḥ̭ || 8 ||

(ku॒lu॒ñcānā॒-mpata̭ye॒ namo॒ namo - 'śva̭patibhya॒ - strīṇi̭ ca) (a. 3)

nama̭ āvyā॒dhinī᳚bhyo vi॒viddhya̭ntībhyaśca vo॒ namo॒ nama॒ uga̭ṇābhya-stṛgṃha॒tībhya̭śca vo॒ namo॒ namo̭ gṛ॒thsebhyo̭ gṛ॒thsapa̭tibhyaśca vo॒ namo॒ namo॒ vrāte᳚bhyo॒ vrāta̭patibhyaśca vo॒ namo॒ namo̭ ga॒ṇebhyo̭ ga॒ṇapa̭tibhyaśca vo॒ namo॒ namo॒ virṷ̄pebhyo vi॒śvarṷ̄pebhyaśca vo॒ namo॒ namo̭ ma॒hadbhyaḥ̭ kṣulla॒kebhya̭śca vo॒ namo॒ namo̭ ra॒thibhyo̭-'ra॒thebhya̭śca vo॒ namo॒ namo॒ rathe᳚bhyo॒ [namo॒ rathe᳚bhyaḥ, ratha̭patibhyaśca] 9

ratha̭patibhyaśca vo॒ namo॒ nama॒-ssenā᳚bhya-ssenā॒nibhya̭śca vo॒ namo॒ namaḥ̭ kṣa॒ttṛbhyaḥ̭ saṅgrahī॒tṛbhya̭śca vo॒ namo॒ nama॒stakṣa̭bhyo rathakā॒rebhya̭śca vo॒ namo॒ namaḥ॒ kulā̭lebhyaḥ ka॒rmāre᳚bhyaśca vo॒ namo॒ namaḥ̭ pu॒ñjiṣṭe᳚bhyo niṣā॒debhya̭śca vo॒ namo॒ nama̭ iṣu॒kṛdbhyo̭ dhanva॒kṛdbhya̭śca vo॒ namo॒ namo̭ mṛga॒yubhyaḥ̭ śva॒nibhya̭śca vo॒ namo॒ nama॒-śśvabhya॒-śśvapa̭tibhyaśca vo॒ namaḥ̭ || 10 ||

(rathe᳚bhyaḥ॒ - śvapa̭tibhyaśca॒ - dve ca̭ ) (a. 4)

namo̭ bha॒vāya̭ ca ru॒drāya̭ ca॒ namaḥ̭ śa॒rvāya̭ ca paśu॒pata̭ye ca॒ namo॒ nīla̭grīvāya ca śiti॒kaṇṭhā̭ya ca॒ namaḥ̭ kapa॒rdinḙ ca॒ vyṷptakeśāya ca॒ namaḥ̭ sahasrā॒kṣāya̭ ca śa॒tadha̭nvane ca॒ namo̭ giri॒śāya̭ ca śipivi॒ṣṭāya̭ ca॒ namo̭ mī॒ḍhuṣṭa̭māya॒ ceṣṷmate ca॒ namo᳚ hra॒svāya̭ ca vāma॒nāya̭ ca॒ namo̭ bṛha॒te ca॒ var​ṣī̭yase ca॒ namo̭ vṛ॒ddhāya̭ ca saṃ॒​vṛddhva̭ne ca॒ [saṃ॒​vṛddhva̭ne ca, namo॒ agri̭yāya ca] 11

namo॒ agri̭yāya ca pratha॒māya̭ ca॒ nama̭ ā॒śavḙ cāji॒rāya̭ ca॒ namaQsśīghri̭yāya ca॒ śībhyā̭ya ca॒ nama̭ ū॒rmyā̭ya cāvasva॒nyā̭ya ca॒ namaḥ̭ srota॒syā̭ya ca॒ dvīpyā̭ya ca || 12 ||

(saṃ॒​vṛ~ddhva̭ne ca॒ - pañca̭vigṃśatiśca) (a. 5)

namo᳚ jye॒ṣṭhāya̭ ca kani॒ṣṭhāya̭ ca॒ namaḥ̭ pūrva॒jāya̭ cāpara॒jāya̭ ca॒ namo̭ maddhya॒māya̭ cāpaga॒lbhāya̭ ca॒ namo̭ jagha॒nyā̭ya ca॒ buddhni̭yāya ca॒ namaḥ̭ so॒bhyā̭ya ca pratisa॒ryā̭ya ca॒ namo॒ yāmyā̭ya ca॒ kṣemyā̭ya ca॒ nama̭ urva॒ryā̭ya ca॒ khalyā̭ya ca॒ nama॒-śślokyā̭ya cāvasā॒nyā̭ya ca॒ namo॒ vanyā̭ya ca॒ kakṣyā̭ya ca॒ namaḥ̭ śra॒vāya̭ ca pratiśra॒vāya̭ ca॒ [pratiśra॒vāya̭ ca, nama̭ ā॒śuṣḙṇāya] 13

nama̭ ā॒śuṣḙṇāya cā॒śura̭thāya ca॒ nama॒-śśūrā̭ya cāvabhinda॒te ca॒ namo̭ va॒rmiṇḙ ca varū॒thinḙ ca॒ namo̭ bi॒lminḙ ca kava॒cinḙ ca॒ namaḥ̭ śru॒tāya̭ ca śrutase॒nāya̭ ca || 14 ||

(pra॒ti॒śra॒vāya̭ ca॒ - pañca̭vigṃśatiśca) (a. 6)

namo̭ dundu॒bhyā̭ya cāhana॒nyā̭ya ca॒ namo̭ dhṛ॒ṣṇavḙ ca pramṛ॒śāya̭ ca॒ namo̭ dū॒tāya̭ ca॒ prahi̭tāya ca॒ namo̭ niṣa॒ṅgiṇḙ ceṣudhi॒matḙ ca॒ nama̭ stī॒kṣṇeṣa̭ve cāyu॒dhinḙ ca॒ namaḥ̭ svāyu॒dhāya̭ ca su॒dhanva̭ne ca॒ nama॒-ssrutyā̭ya ca॒ pathyā̭ya ca॒ namaḥ̭ kā॒ṭyā̭ya ca nī॒pyā̭ya ca॒ nama॒-ssūdyā̭ya ca sara॒syā̭ya ca॒ namo̭ nā॒dyāya̭ ca vaiśa॒ntāya̭ ca॒ [vaiśa॒ntāya̭ ca, namaḥ॒ kūpyā̭ya] 15

namaḥ॒ kūpyā̭ya cāva॒ṭyā̭ya ca॒ namo॒ var​ṣyā̭ya cāva॒r​ṣyāya̭ ca॒ namo̭ me॒ghyā̭ya ca vidyu॒tyā̭ya ca॒ nama̭ ī॒ddhriyā̭ya cāta॒pyā̭ya ca॒ namo॒ vātyā̭ya ca॒ reṣmi̭yāya ca॒ namo̭ vāsta॒vyā̭ya ca vāstu॒pāya̭ ca || 16 ||

(vai॒śa॒ntāya̭ ca - tri॒gṃ॒śacca̭) (a. 7)

nama॒-ssomā̭ya ca ru॒drāya̭ ca॒ nama̭stā॒mrāya̭ cāru॒ṇāya̭ ca॒ namaḥ̭ śa॒ṅgāya̭ ca paśu॒pata̭ye ca॒ nama̭ u॒grāya̭ ca bhī॒māya̭ ca॒ namo̭ agreva॒dhāya̭ ca dūreva॒dhāya̭ ca॒ namo̭ ha॒ntre ca॒ hanī̭yase ca॒ namo̭ vṛ॒kṣebhyo॒ hari̭keśebhyo॒ nama̭stā॒rāya॒ namaḥ̭ śa॒mbhavḙ ca mayo॒bhavḙ ca॒ namaḥ̭ śaṅka॒rāya̭ ca mayaska॒rāya̭ ca॒ namaḥ̭ śi॒vāya̭ ca śi॒vata̭rāya ca॒ [śi॒vata̭rāya ca, nama॒stīrthyā̭ya ca॒] 17

nama॒stīrthyā̭ya ca॒ kūlyā̭ya ca॒ namaḥ̭ pā॒ryā̭ya cāvā॒ryā̭ya ca॒ namaḥ̭ pra॒tara̭ṇāya co॒ttara̭ṇāya ca॒ nama̭ ātā॒ryā̭ya cālā॒dyā̭ya ca॒ nama॒-śśaṣpyā̭ya ca॒ phenyā̭ya ca॒ namaḥ̭ sika॒tyā̭ya ca pravā॒hyā̭ya ca || 18 ||

(śi॒vata̭rāya ca - tri॒gṃ॒śacca̭) (a. 8)

nama̭ iri॒ṇyā̭ya ca prapa॒thyā̭ya ca॒ namaḥ̭ kigṃśi॒lāya̭ ca॒ kṣaya̭ṇāya ca॒ namaḥ̭ kapa॒rdinḙ ca pula॒stayḙ ca॒ namo॒ goṣṭhyā̭ya ca॒ gṛhyā̭ya ca॒ nama॒stalpyā̭ya ca॒ gehyā̭ya ca॒ namaḥ̭ kā॒ṭyā̭ya ca gahvare॒ṣṭhāya̭ ca॒ namo᳚ hrada॒yyā̭ya ca nive॒ṣpyā̭ya ca॒ namaḥ̭ pāgṃsa॒vyā̭ya ca raja॒syā̭ya ca॒ nama॒-śśuṣkyā̭ya ca hari॒tyā̭ya ca॒ namo॒ lopyā̭ya cola॒pyā̭ya ca॒ [cola॒pyā̭ya ca, nama̭ ū॒rvyā̭ya ca] 19

nama̭ ū॒rvyā̭ya ca sū॒rmyā̭ya ca॒ namaḥ̭ pa॒rṇyā̭ya ca parṇaśa॒dyā̭ya ca॒ namo̭-'pagu॒ramā̭ṇāya cābhighna॒te ca॒ nama̭ ākkhida॒te ca̭ prakkhida॒te ca॒ namo̭ vaḥ kiri॒kebhyo̭ de॒vānā॒gṃ॒ hṛda̭yebhyo॒ namo̭ vikṣīṇa॒kebhyo॒ namo̭ vicinva॒tkebhyo॒ nama̭ ānir-ha॒tebhyo॒ nama̭ āmīva॒tkebhyaḥ̭ || 20 ||

(u॒la॒pyā̭ya ca॒ - traya̭strigṃśacca̭) (a. 9)

drāpe॒ andha̭saspate॒ dari̭dra॒nnīla̭lohita | e॒ṣā-mpurṷṣāṇāme॒ṣā-mpa̭śū॒nā-mmā bhe rmā-'ro॒ mo ḙṣā॒-ṅkiñca॒nāma̭mat || yā tḙ rudra śi॒vā ta॒nū-śśi॒vā vi॒śvāha̭bheṣajī | śi॒vā ru॒drasya̭ bheṣa॒jī tayā̭ no mṛḍa jī॒vase᳚ || i॒māgṃ ru॒drāya̭ ta॒vasḙ kapa॒rdine᳚ kṣa॒yadvī̭rāya॒ prabha̭rāmahe ma॒tim | yathā̭ na॒-śśamasa̭-ddvi॒pade॒ catṷṣpade॒ viśva̭-mpu॒ṣṭa-ṅgrāmḙ a॒smi- [a॒sminn, anā̭turam |] 21

-nnanā̭turam || mṛ॒ḍā no̭ rudro॒ tano॒ maya̭skṛdhi kṣa॒yadvī̭rāya॒ nama̭sā vidhema te | yaccha-ñca॒ yośca॒ manṷrāya॒je pi॒tā tada̭śyāma॒ tava̭ rudra॒ praṇī̭tau || mā no̭ ma॒hānta̭mu॒ta mā no̭ arbha॒ka-mmā na॒ ukṣa̭ntamu॒ta mā na̭ ukṣi॒tam | mā no̭ vadhīḥ pi॒tara॒-mmota mā॒tara̭-mpri॒yā mā na̭sta॒nuvo̭ [mā na̭sta॒nuvaḥ̭, ru॒dra॒ rī॒ri॒ṣaḥ॒ |] 22

rudra rīriṣaḥ || mā na̭sto॒ke tana̭ye॒ mā na॒ āyṷṣi॒ mā no॒ goṣu॒ mā no॒ aśvḙṣu rīriṣaḥ | vī॒rā-nmāno̭ rudra bhāmi॒to va̭dhīr-ha॒viṣma̭nto॒ nama̭sā vidhema te || ā॒rāttḙ go॒ghna u॒ta pṷ̄ruṣa॒ghne kṣa॒yadvī̭rāya su॒mnama॒sme tḙ astu | rakṣā̭ ca no॒ adhi̭ ca deva brū॒hyadhā̭ ca na॒-śśarma̭ yaccha dvi॒bar​hāḥ᳚ || stu॒hi [ ] 23

śru॒ta-ṅga̭rta॒sadaṃ॒-yuvā̭na-mmṛ॒ga-nna bhī॒ma-mṷpaha॒tnu-mu॒gram | mṛ॒ḍā ja̭ri॒tre rṷdra॒ stavā̭no a॒nyantḙ a॒smanniva̭pantu॒ senāḥ᳚ || pari̭ṇo ru॒drasya̭ he॒ti rvṛ̭ṇaktu॒ pari̭tve॒ṣasya̭ durma॒tira̭ghā॒yoḥ | ava̭ sthi॒rā ma॒ghava̭dbhya-stanuṣva॒ mīḍhva̭sto॒kāya॒ tana̭yāya mṛḍaya || mīḍhṷṣṭama॒ śiva̭tama śi॒vo naḥ̭ su॒manā̭ bhava | pa॒ra॒me vṛ॒kṣa āyṷdha-nni॒dhāya॒ kṛttiṃ॒-vasā̭na॒ āca̭ra॒ pinā̭ka॒- [āca̭ra॒ pinā̭kam, bibhra॒dāga̭hi |] 24

-mbibhra॒dāga̭hi || viki̭rida॒ vilo̭hita॒ nama̭ste astu bhagavaḥ | yāstḙ sa॒hasragṃ̭ he॒tayo॒-'nya-ma॒smanni va̭pantu॒ tāḥ || sa॒hasrā̭ṇi sahasra॒dhā bā̭hu॒vostava̭ he॒tayaḥ̭ | tāsā॒mīśā̭no bhagavaḥ parā॒cīnā॒ mukhā̭ kṛdhi || 25 ||

(a॒smigg​-sta॒nuvaḥ̭-stu॒hi-pinā̭ka॒-mekā॒nnatri॒gṃ॒śacca̭) (a. 10)

sa॒hasrā̭ṇi sahasra॒śo ye ru॒drā adhi॒ bhūmyā᳚m | teṣāgṃ̭ sahasrayoja॒ne 'va॒dhanvā̭ni tanmasi || a॒smi-nma̭ha॒tya̭rṇa॒ve᳚-'ntari̭kṣe bha॒vā adhi̭ || nīla̭grīvā-śśiti॒kaṇṭhā᳚-śśa॒rvā a॒dhaḥ, kṣa̭māca॒rāḥ || nīla̭grīvā-śśiti॒kaṇṭhā॒ divagṃ̭ ru॒drā upa̭śritāḥ || ye vṛ॒kṣeṣṷ sa॒spiñja̭rā॒ nīla̭grīvā॒ vilo̭hitāḥ || ye bhū॒tānā॒-madhi̭patayo viśi॒khāsaḥ̭ kapa॒rdi̭naḥ || ye annḙṣu vi॒viddhya̭nti॒ pātrḙṣu॒ piba̭to॒ janāṋ || ye pa॒thā-mpa̭thi॒rakṣa̭ya ailabṛ॒dā ya॒vyudhaḥ̭ || ye tī॒rthāni̭ - [ ] 26

pra॒cara̭nti sṛ॒kāva̭nto niṣa॒ṅgiṇaḥ̭ || ya e॒tāva̭ntaśca॒ bhūyāgṃ̭saśca॒ diśo̭ ru॒drā vi̭tasthi॒re || teṣāgṃ̭ sahasrayoja॒ne 'va॒dhanvā̭ni tanmasi || namo̭ ru॒drebhyo॒ ye pṛ̭thi॒vyāṃ-ye᳚-'ntari̭kṣe॒ ye di॒vi yeṣā॒mannaṃ॒ ~vāto̭ va॒r॒ṣamiṣa̭va॒stebhyo॒ daśa॒ prācī॒ rdaśa̭dakṣi॒ṇā daśa̭pra॒tīcī॒ rdaśodī̭cī॒ rdaśo॒rdhvā-stebhyo॒ nama॒ste no̭ mṛḍayantu॒ te ya-ndvi॒ṣmo yaśca̭ no॒ dveṣṭi॒ taṃ-vo॒ jambhḙ dadhāmi || 27 ||

(tī॒rthāni॒ - yaśca॒ - ṣaṭ ca̭ ) (a. 11)

(nama̭ste rudra॒ - namo॒ hira̭ṇyabāhave॒ - nama॒-ssaha̭mānāya॒ - nama̭ āvyā॒dhinī᳚bhyo॒ - namo̭ bha॒vāya॒ - namo᳚ jye॒ṣṭhāya॒ - namo̭ dundu॒bhyā̭ya॒ - nama॒-ssomā̭ya॒ - nama̭ iri॒ṇyā̭ya॒ - drāpa̭ - sa॒hasrā॒ - ṇyekā̭daśa)

(nama̭ste rudra॒ - namo̭ bha॒vāya॒ - drāpḙ - sa॒ptavigṃ̭śatiḥ)

(nama̭ste rudra॒, taṃ-vo~॒ jambhḙ dadhāmi)

|| hariḥ̭ om ||

|| kṛṣṇa yajurvedīya taittirīya saṃhitāyā-ñcaturtha kāṇḍe pañcamaḥ praśna-ssamāptaḥ ||